Nkonko ya babadi

Bu muvuabu bakandike bena Yuda bua kuenza Pasaka ne ‘tshintu nansha tshikese tshia luevene,’ bua tshinyi Yezu wakabanjija Tshivulukilu tshia lufu luende ne mvinyo mupatula ku mâyi a tumuma tua mvinyo akavua malue makole?​—Ekesode 12:20; Luka 22:7, 8, 14-20.

Bena Isalele bakatuadija kuenza Pasaka bua kuvuluka tshimuangi tshiabu mu Ejipitu mu 1513 kumpala kua Yezu. Pavua Yehowa mubaleje mua kumuenza wakabambila ne: ‘Kanudi nansha tshintu tshikese tshia luevene; mu nzubu yenu yonso nenudie anu bintu bidi kabiyi ne luevene.’ (Ekesode 12:11, 20) Nzambi uvua mubelele mukenji eu anu bua mampa avuabu ne bua kudia mu Pasaka. Kabavua batelamu bualu bua mvinyo to.

Bualu bunene buvuaye mukandikile luevene anyi buanga bua mampa mbua kuleja muakapatuka bena Isalele mu Ejipitu lubilu lubilu. Ekesode 12:34 udi wamba ne: ‘Bantu bakangata mampa diambedi luevene kaluyi luanji kubuelamu, ne binu bivuabu benza nabi mampa bakabikuta mu bilulu biabu, bakabiteka pa mapa abu.’ Dipangika dia luevene mu mampa avuabu benza nawu Pasaka panyima pa dipatuka diabu mu Ejipitu divua mua kuvuluija bana bakaluabu kulela kudi bena Isalele bualu bua mushinga mukole ebu.

Kabidi, kunyima kua matuku a bungi, bakabanga kuangata luevene misangu mivule bu tshimfuanyi tshia bubi. Tshilejilu, bua kuakula bua muena tshiendenda uvua mu tshisumbu tshia bena Kristo, mupostolo Paulo wakebeja ne: ‘Kanuena bamanye ne: luevene lukese ludi lumuangalaka mu mutanda mujima anyi?’ Pashishe kuluaye kuamba ne: ‘Umushayi luevene lukulukulu bua nuenu nuikale bu mutanda mupiamupia, bu munudi kanuyi ne luevene. Bualu bua mulambu wetu wa kupita kua Yehowa [anyi pasaka] wakashipibua, n’Kristo mene. Nunku tuikale tudia bidia bia disanka edi; katubidi ne luevene lukulukulu, anyi luevene lua meji mabi ne lua malu mabi, kadi tudie disanka ne bidia bidi kabiyi ne luevene, bia malu a patoke ne a bushuwa.’ (1 Kolinto 5:6-8) Anu diampa divua kadiyi ne luevene ke divuabu mua kuangata bu tshimfuanyi tshia mubidi wa Yezu uvua kauyi ne bubi.​—Ebelu 7:26.

Bena Yuda nkayabu ke bakalua kusakidila dinua dia mvinyo mu tshibilu tshia Pasaka. Bidi bimueneka ne: bakenza nanku pakafumabu mu bupika ku Babulona. Bible ki mmuleje ne: Nzambi wakabenga disakidila diabu dia mvinyo edi to; nunku Yezu kavua muenze tshilema pavuaye muenze Pasaka ne mvinyo nansha. Bushuwa, mushindu uvua mvinyo ya kale idiandamukila nkayayi ilua mikole uvua mushilangane ne tshivua tshienzeka bua mampa. Pavuabu basopa bukula bua mampa, bavua belamu buanga bua mampa anyi luevene bua pata kushishaye kubanda. Kadi mvinyo ivuabu benza ne tumuma tua mvinyo kayivua yoyi bualu ne buanga bua nunku to. Bintu bivua biyikudimuna bua kuyikolesha bikavua bimane kuikala mu tumuma tuayi anu ku tshifukilu. Kabavua mua kupeta mâyi a tumuma tua mvinyo atshivua katakata dîba dia Pasaka to, bualu kabavua mua kualama anu nanku kaayi mashintuluke makole kubangila ku dîba divuabu bapola tumuma mu ngondo wa 8 ne wa 9 too ne ku Pasaka mu ngondo muisatu anyi muinayi nansha.

Nunku, pavua Yezu muenze Tshivulukilu ne mvinyo kavua mushipe mikenji ivua Nzambi muele bua luevene mu Pasaka nansha. Mvinyo yonso mukunze udibu kabayi bashemeje anyi bakoleshe anyi bele bintu bia dipembu ke mvinyo mukumbane utudi mua kuangata bu tshimfuanyi tshia “mashi a mushinga mukole” a Kristo.​—1 Petelo 1:19.