Nkonko ya babadi

Yakoba uvua muenze bibi pavuaye mudingidije muvuaye Esau bu mudibi bileja mu Genese 27:18, 19 anyi?

Udi mua kuikala mumanye muyuki eu bimpe. Pakavua Isaka mukulakaje, wakatuma Esau bua kumukuatshila nyama wamba ne: ‘Ndie, bua mutshima wanyi ukuvudijile disanka diambedi tshiyi muanji kufua.’ Bu muvua Lebeka mumvue tshivua bayende muambe, wakalamba munyinyi wa dipembu dimpe ne kuambila Yakoba ne: ‘Wewe neulue ne [munyinyi] kudi tatuebe, yeye audie, akuvudijila disanka diambedi kayi muanji kufua.’ Pashishe Yakoba wakavuala bilamba bia Esau ne kumuvuadikabu biseba bia mbuji pa bianza ne pa dikoshi ne kulua ne biakudia kudi tatuende. Pakamukonka Isaka ne: ‘Wewe udi nganyi muananyi?’ Yakoba wakandamuna ne: ‘Ndi bianyi Esau, muanebe muan’a bute.’ Isaka wakitaba ne kumubenesha.​—Genese 27:1-29.

Bible kena utuleja malu onso bua tshivua tshifikishe Lebeka ne Yakoba ku dienza bualu ebu to, kadi udi uleja anu tshivua tshienzeke. Tumanye kabidi ne: kena ubingisha anyi upisha tshivua Lebeka ne Yakoba benze to, ne bua nanku, kena uleja tshintu nansha tshimue tshidi mua kutushindikila muvuaku dishima to. Tshidibi, Mukanda wa Nzambi udi utupesha butoke pa bualu ebu.

Tshia kumpala, malu adibu balonda mu Bible adi aleja patoke ne: Yakoba ke uvua Isaka ne bua kubenesha, ki Esau to. Kumpala kua bualu ebu kuenzeka, Esau ukavua musumbishe Yakoba buana bute buende buvuaye ulengulula anu bua kupeta biakudia. Esau ‘wakapetula bintu bia buana bute.’ (Genese 25:29-34) Nunku, pavua Yakoba muye kudi tatuende, uvua ne bukenji bua kukeba dibenesha kudiye.

Tshibidi, pakalua Isaka kumanya ne: Uvua mubeneshe Yakoba, kakakeba bua kushintulula dibenesha adi to. Pamuapa uvua muvuluke mêyi avua Yehowa muambile Lebeka kumpala kua kulelayi bana babidi aba a ne: ‘Mukulu neakuatshile muakunyende mudimu.’ (Genese 25:23) Bualu bukuabu bua kubenga kupua muoyo mbua ne: Isaka wakabenesha kabidi Yakoba pakavuaye musue kuya ku Halana.​—Genese 28:1-4.

Bualu bua ndekelu, tuvuluke ne: Yehowa uvua mumanye ne mumone bionso bivua bienzeke. Dibenesha divua Yakoba mupete divua diumvuangana ne tshivua Yehowa mulaye Abalahama. (Genese 12:2, 3) Bu Nzambi kayi musue bua dibenesha edi diya kudi Yakoba, uvua mua kupangisha bualu ebu mu mushindu kampanda anyi kansanga. Kadi Yehowa wakajadika muvua Yakoba mukumbanyine dibenesha edi wamba ne: ‘Bisamba bionso bia pa buloba nebisanke bua bualu buebe ne bua tunkanunuina tuebe.’​—Genese 28:10-15.