Disanka dia “kutshimuna ne muana wa mukoko”

CAREY BARBER wakafunda mukanda mukuabu mu 1971 uleja malu avua mamufikile mu bidimu 50 bia kumpala bivuaye muenze mu mudimu wa Nzambi. Wakafundamu ne: “Munkatshi mua bidimu bindi muenze mu mudimu wa Yehowa ndi mupete malu a bungi malenga. Malu aa mmampeteshe ditalala ne disanka bidi bilama muoyo wanyi ne mbijadikila ne: nentshimune ku ndekelu. Ndi mua kutela bu mudi: didisangisha ne bantu bende; dibenga kubuelakana ne bantu babi ba mu bulongolodi bua Satana; ditekemena dia kutshimuna ne Muana wa mukoko Yezu Kristo, ne malu adi andeja mudi Yehowa mmunange.”

Bidimu bisambombo pashishe, muanetu Barber (uvua muena Kristo muela manyi) wakatuadija kuenza mudimu mu Kasumbu Kaludiki ka Bantemu ba Yehowa. Wakatungunuka ne kuindila bua “kutshimuna ne Muana wa mukoko” munkatshi mua bidimu 30 bivuaye mu kasumbu aka. Mmufue ne lulamatu mu Dia lumingu dia 8 ngondo muinayi 2007, ne bidimu 101.​—1 Kolinto 15:57.

Carey Barber uvua muledibue mu 1905 mu Angleterre ne wakatambula mu 1921 mu tshimenga tshia Winnipeg mu Canada. Uvua muana wa dipasa; yeye uvua nkanku, Mbuyi diende uvua Norman. Mu 1923 yeye ne muanabu Norman bakalua ku Brooklyn, mu New York bua kuambuluishabu bua mudimu mupiamupia. Mu tshikondo atshi, Bantemu ba Yehowa bakavua pa kubangisha kudipatuila mikanda yabu bua kumanyisha ‘bantu bonso ba pa buloba’ lumu luimpe lua Bukalenge bua Nzambi. (Matayo 24:14) Mu midimu ya kumpala ivua muanetu Barber muenze muvua wa kupatula mikanda ku biamu. Bavua bapatula kabidi mabeji avua ne mibelu bua bilumbu bivuabu baya nabi ku Kabadi kanene ka mu États-Unis. Pashishe, Muanetu Barber wakenza mudimu mu tshibambalu tshia mudimu tshitu tshitangila malu a bisumbu ne mudimu wa buambi mu ditunga dijima.

Bu muvua muanetu Barber mumanye midimu yonso eyi uvua mukumbane bua kuenza mudimu wa mutangidi muena ngendu, mudimu wakatuadijaye mu 1948. Uvua utangila bisumbu ne malu a mpuilu mu tshitupa tshionso tshia ku Ouest tshia États-Unis. Wakamba ne: uvua munange kuikala pambelu bikole, wenda uyisha bantu bonso lumu luimpe. Pavuaye mu mudimu eu, wakamanyangana ne bana betu ba bungi. Lungenyi luende ne tshisumi mu buambi biakamuambuluisha pakabuelaye mu kalasa ka 26 ka Gilada. Pavuaye mu kalasa, wakibidilangana bikole ne mulongi wabu mukuabu wa mu Canada, diende Sydney Lee Brewer. Bakaselangana pakajika kalasa, kuyabu musangu umue bua kutangila bisumbu bia ku Chicago, ku Illinois. Mukaji wa muanetu Barber uvua wambuluisha bayende bikole ne umukolesha munkatshi mua bidimu bipite pa 20 bivuabu benda batangila bisumbu.

Bantu bavua bamanye muanetu Barber mu bidimu bia bungi bivuaye mutangidi wa tshijengu anyi wa distrike, peshi mu bidimu 30 bivuaye mu Kasumbu Kaludiki ne wenza ngendu nebamuvuluke bua miyuki yende ne malu a mushinga avuaye wamba. Tudi ne disanka dia bungi dia mudiye ‘mutshimune ne Muana wa mukoko.’