Longesha bana bebe bua kuikala bena ditalala

Nicole (muana wa bidimu 8) uvua ne disanka muvua dîku diabu diye kusombela mutantshi mule. Nunku, uvua pa tshibidilu uyukila kalu kuonso ne mulunda wende wa pa muoyo Gabrielle. Dimue dituku, Gabrielle wakamba Nicole mêyi mashile ne: kavua ne bua kukonka kabidi bualu bua Nicole to. Nicole wakabungama ne kufikaye munda bikole, kuambilaye mamuende ne: “Tshiena musue kumona kabidi Gabrielle nansha kakese to.”

BILUMBU bia bana bu mudi tshia Nicole ne Gabrielle bitu misangu mivule bilomba bua baledi babikose, ki nganu bua kutuyisha tshiji, kadi bua kuleja kabidi mushindu wa kujikija tshilumbu. Pa tshibidilu bana batu ne “malu a buana,” ne misangu mivule kabatu bamanye mudi mêyi ne bienzedi biabu mua kubungamija bakuabu to. (1 Kolinto 13:11) Bidi bikengela kubalongesha bua kupetabu ngikadilu idi mua kubambuluisha bua kusomba mu ditalala ne bena mu dîku ne bantu ba miaba mikuabu.

Baledi bena Kristo mbadifile bikole mu dilongesha bana babu bua ‘kukeba ditalala ne kudilonda.’ (1 Petelo 3:11) Disanka ditudi tupeta patudi tukeba ditalala ndipite bionso bitudi mua kuenza bua kutantamena dielelangana meji mabi, dibungama ne dilaminangana munda. Biwikala muledi, mmunyi muudi mua kulongesha bana bebe bua kuikala bena ditalala?

Ubambuluishe bua bikale ne dijinga dia kusankisha “Nzambi wa ditalala”

Bible udi ubikila Yehowa ne: “Nzambi wa ditalala” ne “mufidi wa ditalala.” (Filipoi 4:9; Lomo 15:33, MMM) Nenku, baledi ba meji badi balongesha ne Bible bua kuambuluisha bana babu bua bikale ne dijinga dia kusankisha Nzambi ne kuidikija ngikadilu yende. Tshilejilu, ambuluisha bana bebe bua kumona mu lungenyi tshivua mupostolo Yone mumone mu tshikena-kumona tshia dikema: muanzankongolo mulengele wa dikala dia émeraude munyunguluke nkuasa wa bumfumu wa Yehowa. * (Buakabuluibua 4:2, 3) Ubumvuije ne: muanzankongolo eu udi uleja ditalala ne bupole bidi binyunguluke Yehowa, kabidi ne:  bantu bonso badi bamutumikila nebapete mabenesha aa.

Yehowa udi ufila kabidi mibelu ku butuangaji bua Muanende Yezu udi Bible ubikila ne: ‘Mukalenge wa Ditalala.’ (Yeshaya 9:6, 7) Nanku, ubale ne ukonkonone ne bana bebe miyuki ya mu Bible idi ne malongesha a Yezu a mua kuepuka mvita ne dikokangana. (Matayo 26:51-56; Mâko 9:33-35) Ubumvuije bua tshinyi Paulo, muntu uvua “muena luonji” kumpala, wakashintulula bikadilu biende ne kufundaye ne: ‘mupika wa Mukalenge kena ne bua kutandangana, kadi ikale biende ne kalolo kudi bantu bonso, ikale [udikanda ku bubi].’ (1 Timote 1:13; 2 Timote 2:24) Pamuapa neukeme bua kumona mushindu watumikila bana bebe malu aa.

Evan udi uvuluka muvuabu bamuyobole kudi muana mukuabu mu kalasa pavuaye ne bidimu 7. Udi wamba ne: “Bua tshiji tshimvua mukuatshile muana au, ngakajinga bua kumupingajila tshivuaye mungenzele! Pashishe meme kuvuluka dilongesha dituvua balonge kumbelu bua bantu badi bakebangana bilumbu. Mvua mumanye ne: Yehowa mmusue bua ‘tshialukijidi muntu bubi ku bubi buende’ ne bua ‘ngikale ne bantu bonso ditalala.’” (Lomo 12:17, 18) Pashishe Evan wakapeta bukole ne dikima dia kutuyisha tshilunji pa kuandamuna muana au ne lutulu lua bungi. Uvua musue kusankisha Nzambi wa ditalala.

Ikala muledi udi ukeba ditalala

Ku nzubu kuebe kudi nsombelu wa ditalala anyi? Bikalayiku, bana bebe badi mua kulonga malu a bungi adi atangila ditalala nansha paudi kuyi mupatule dîyi nansha dimue. Neufike ku dilongesha bana bebe bua kuikala bena ditalala biwikala widikija njila ya ditalala ya Nzambi ne Kristo.​—Lomo 2:21.

Russ ne Cindy badi benza mudimu wa bungi wa kulongesha bana babu babidi ba balume, bababela bua kuenza malu ne dinanga padibu babafikisha munda kudi bakuabu. Cindy udi wamba ne: “Ngikadilu ututu meme ne Russ tuleja bana betu ne bantu bakuabu padi bilumbu bijuka udi wambuluisha bikole mu mushindu udi bana betu bajikija bilumbu bia muomumue.”

Nansha paudi wenza tshilema, bu mudiku kakuyi muledi utu kayi wenza bilema, udi anu mua kulongesha bana malu a mushinga mu dîba adi. Stephen udi wamba ne: “Kuvua bikondo bimvua meme ne mukajanyi Terry tujukila kulu ne lukasa ne tupesha bana betu basatu dinyoka katuyi nansha banji kumvua malu onso to. Pavuabi bituenzekela nanku, tuvua tubalomba luse.” Terry udi wamba pende ne: “Tuvua tuenza bua bana betu bamanye ne: tuetu petu katuena bapuangane to, tutu tuenza bilema. Tudi bamone ne: bualu ebu mbubueje ditalala mu dîku dietu ne mbuambuluishe kabidi bana bua kumanya mushindu wa kukeba ditalala.”

Bana bebe badiku balonga mua kuikala bena ditalala padibu bamona mushindu uudi ubenzela malu anyi? Yezu wakafila mubelu eu ne: “Nuenzele bantu malu onso anudi basue banuenzele.” (Matayo 7:12) Nansha muutu ne biebe bilema, ikala mujadike ne: dinanga diudi uleja bana bebe nedipatule bipeta bimpe. Bana bebe nebatumikile bipepele dîba diudi ubapesha mibelu ne dinanga.

 Kuikadi ukuata tshiji lukasa

Nsumuinu 19:11 udi wamba ne: ‘Lungenyi luimpe lua muntu ludi lukanda tshiji.’ Mmunyi muudi mua kuambuluisha bana bebe bua kupeta lungenyi luimpe elu? David udi umvuija mushindu udiye yeye ne mukajende Mariann bamone muimpe bua muanabu wa balume ne wa bakaji. Udi wamba ne: “Padibu bakuatshila muntu udi mubambe anyi mubenzele bualu bubi tshiji, tudi tubambuluisha bua kuikala ne luse. Tutu tubela nkonko mipepele bu mudi eyi: ‘Muntu au uvuaku mua kuikala mupete lutatu dituku adi anyi? Udiku mua kuikala ne mukawu anyi? Mbamubungamije kudi munga muntu anyi?’” Mariann udi wamba pende ne: “Ebi bitu bituyisha tshilunji tshia bana pamutu pa kubalekela bashala ne tshiji anyi bakokangana bua kumanya udi mubinge ne udi mupile.”

Dilongesha dia nunku didi mua kupatula bipeta bilenga. Tangila mpindieu muvuabu bambuluishe Nicole utudi batele ku ntuadijilu kua tshiena-bualu etshi kudi mamuende Michelle bua kupingaja bulunda buende ne Gabrielle. Michelle udi wamba ne: “Meme ne Nicole tuakabala nshapita wa 14 wa mukanda wa Longa malu kudi Mulongeshi Munene. * Pashishe ngakumvuija tshivua Yezu musue kuamba pakalejaye ne: tudi ne bua kubuikidila muntu ‘too ne ku misangu makumi muanda mutekete ne muanda mutekete.’ Meme mumane kuteleja bimpe Nicole pavuaye umvuija ende malu avuaye nawu munda, ngakamuambuluisha bua kumvua dibungama ne kanyinganyinga ka Gabrielle bua muvua mulunda wende wa pa muoyo uya kusombela mutantshi mule.”​—Matayo 18:21, 22.

Pakafika Nicole ku dijingulula tshivua mua kuikala tshifikishe Gabrielle ku ditayika ne tshiji, biakamuambuluisha bua kuditeka pa muaba wende ne biakamusaka bua kubikila Gabrielle ku nshinga bua kumulomba luse. Michelle udi wamba ne: “Kubangila anu dîba adi, Nicole udi ne disanka dia kuditeka pa muaba wa bakuabu ne dia kubenzela malu adi abasankisha.”​—Filipoi 2:3, 4.

Ambuluisha bana bebe bua kabalubakanyi bua bilema bia bakuabu ne bua dipangakana ku mêyi. Pamuapa neusanke bua kumona bana bebe baleja bakuabu muoyo mulenga ne dinanga.​—Lomo 12:10; 1 Kolinto 12:25.

Ubaleje bulenga bua dibuikidilangana

Nsumuinu 19:11 udi wamba ne: ‘Butumbi buende nkulekelela muntu bubi.’ Pavua Yezu upunga ne lufu, wakidikija Tatuende ne kulejaye ngikadilu wa dibuikidilangana. (Luka 23:34) Bana bebe badi mua kulonga butumbi anyi bulenga bua dibuikidilangana padibu bakumona wewe ubabuikidila.

Angata tshilejilu tshia Willy (udi ne bidimu bitanu), utu musue kuzola bimfuanyi ne mekala pamue ne kakuende mukaji. Kadi dimue edi, kakuende wakalekela kuzola, kubangishaye kutandisha Willy bikole ne pashishe kuyaye. Willy wakashala mubungame be. Tatuende Sam wakamba ne: “Kakuende wa Willy udi ne disama dia Alzheimer. Tuakumvuija Willy bualu ebu mu mêyi avuaye mua kumvua.” Tuetu bamane kuvuluija Willy ne: tuvua bamufuile luse misangu ya bungi ne yeye pende udi ne bua kuenzela bantu bakuabu bualu bua muomumue, Sam wakakema bua tshiakenza Willy. Sam udi wamba ne: “Udiku mua kuela meji bua tshituvua bumvue meme ne mukajanyi, patuakamona muana eu mutekete uya kudi kakuende wa bidimu 80, wakula nende ne dîyi dia luse ne pashishe ukuata kakuende ku tshianza bapingana nende ku mesa anyi?”

Mbutumbi tshia bushuwa padi bana balonga mua ‘kuleja bakuabu lutulu ne kubalekelela’  mapanga ne bilema biabu. (Kolosai 3:13) Nansha padi bantu bakeba matandu ku bukole, uleje bana bebe ne: kuenza bualu budi bukeba ditalala kudi ne bukole bua bungi, bualu ‘bikala bienzedi bia muntu bisankishe Yehowa, yeye udi umulengejija ne bena lukuna bende.’​—Nsumuinu 16:7.

Utungunuke ne kuambuluisha bana bebe bua bikale bena ditalala

Padi baledi balongesha bana babu “mu ditalala” ne Dîyi dia Nzambi ne bikale ‘bantu badi benzeja ditalala,’ badi babapetesha masanka a bushuwa. (Yakobo 3:18) Baledi ba nunku badi bapayisha bana babu ne bintu bidibu nabi dijinga bua kujikija bilumbu ne kuikala bena ditalala. Bualu ebu budi bubapetesha diakalenga ne disanka dia bungi mu nsombelu wabu mujima.

Dan ne Kathy badi ne bana ba bitende basatu badi basadila Yehowa bimpe. Dan udi wamba ne: “Nansha mutuvua ne ntatu bua kubalongesha patshivuabu bapuekele, tudi ne disanka bua mudibu benzela Yehowa mudimu bimpe. Badi mpindieu bumvuangana bimpe ne bakuabu ne badi babuikidilangana bipepele padiku bualu budi busua kunyanga ditalala.” Kathy udi wamba ne: “Ebi bidi bitukankamija bikole bualu ditalala ndimue dia ku mamuma a nyuma wa Nzambi.”​—Galatia 5:22, 23.

Nenku nuenu baledi bena Kristo, ‘kanupungidi’ anyi ‘kanuteketshi’ bua kulongesha bana benu bua kusomba mu ditalala, nansha padibi bimueneka bienda majetete ku ntuadijilu. Nuenu nuenza nunku, numanye ne: ‘Nzambi wa dinanga ne ditalala neikale nenu.’​—Galatia 6:9, MMM; 2 Kolinto 13:11.

[Mêyi adi kuinshi]

[Kazubu/​Tshimfuanyi mu dibeji 20]

MMALU ADI AMBULUISHA ANYI?

Mukanda uvuabu bapatule uvua ne mandamuna a nkonko ivuabu bele bantu kudi bena tshisumbu tshikuabu (Réseau éducation-médias) uvua ne tshiena-bualu tshia se: “Tshikisu mu manaya a ku bisanji” udi wamba ne: “Lungenyi lua kuenza malu a tshikisu bu mushindu wa kujikija bilumbu ndukankamija kudi manaya a filme idibu baleja bantu ba patupu baluishangana ne bilobo dîba dionso.” Anu filme 10 pa lukama idibu baleja ku TV ke ivuabu basangane ileja bipeta bibi bidi tshikisu tshikebesha. Mukanda au udi wamba ne: kadi “bavua baleja patupu tshikisu bu bualu buakanyine, bua tshibidilu ne budi kabuyi kuepuka, mushindu mutambe kupepela wa kujikija bilumbu.”

Udiku umona mushinga wa kushintulula malu pa bidi bitangila dimona dia TV ku nzubu kuebe anyi? Kulekedi bisanji binyanga mudimu uudi wenza bua kulongesha bana bebe bua kuikala bena ditalala.

[Tshimfuanyi mu dibeji 17]

Wambuluishe bana bebe bua bikale ne dijinga dia kusankisha “Nzambi wa ditalala”

[Tshimfuanyi mu dibeji 18]

Wambuluisha bana bua kabikadi ne ngakuilu ne bienzedi bidi bibungamija bakuabu

[Tshimfuanyi mu dibeji 19]

Bana bebe badi ne bua kulonga mua kulomba luse ne kulufuila bakuabu