‘Udimuke bua mudimu uwakangata mu Mukalenge’

‘Udimuke bua mudimu uwakangata mu Mukalenge, bua wewe uujikije.’​—KOLOS. 4:17.

1, 2. Bena Kristo badi ne dibanza kayi kudi bantu?

TUDI ne dibanza dinene kudi bantu badi batunyunguluke. Malu adibu basungula bua kuenza lelu neabafikishe ku dipanduka anyi ku difua palua “dikenga dinene.” (Buak. 7:14) Muntu uvua mufunde mukanda wa Nsumuinu ku bukole bua nyuma wa Nzambi wakamba ne: ‘Pandisha badibu baya nabu ku lufu; usungile badi bamba kushipibua.’ Mêyi aa adi ne bujitu bua bungi. Tuetu katuyi badimuije bantu bua malu adibu benza, tudi mua kupeta dibanza dia mashi. Ke bualu kayi mvese eu udi utungunuka wamba ne: ‘Biwamba ne: Katuakadi bamanye muanda eu, yeye udi uteta mitshima kêna uumona anyi? Udi ulama muoyo webe kêna muumanye anyi? Kêna ufuta muntu bu mudi mudimu wende anyi?’ Bidi bimueneka ne: Bantemu ba Yehowa kabena mua kuamba ne: ‘kabavua bamanye’ njiwu ivua mindile bantu to.​—Nsu. 24:11, 12.

² Yehowa udi wangata muoyo wa bantu ne mushinga wa bungi. Udi ulomba basadidi bende bua benze muabu muonso bua kuambuluisha bantu ba bungi bua bapanduke. Musadidi yonso wa Nzambi udi ne bua kumanyisha bakuabu mukenji udi upandisha bantu udi mu Dîyi dia Nzambi. Mudimu wetu mmufuanangane ne wa mutentekedi udi wela lubila bua kudimuija badi mu musoko bua njiwu kampanda. Katuena basue bua mashi a bantu babutuka ikale pambidi petu. (Yeh. 33:1-7) Ke bualu kayi, mbimpe tutungunuke ne ‘kuambila bantu dîyi dia Nzambi.’​—Bala 2 Timote 4:1, 2, 5.

3. Mmalu kayi atualonga mu tshiena-bualu etshi ne mu bibidi bidi bilonda?

³ Mu tshiena-bualu etshi netulonge mushindu wa kutantamena malu adi atupangisha mua kuenza mudimu wetu udi upandisha bantu ne mushindu utudi mua kuambuluisha bantu ba bungi menemene. Mu tshidi tshilonda, netulonge mua kulua balongeshi bimpe ba bulelela. Tshisatu netshileje amue malu mimpe adi bamanyishi ba Bukalenge ba buloba bujima bapeta mu mudimu wabu. Kadi kumpala kua tuetu kulonga biena-bualu ebi, mbimpe tuanji kutangila kabidi bua tshinyi matuku etu aa mmabi.

Bua tshinyi bantu ba bungi kabena ne ditekemena?

4, 5. Mmalu kayi adi enzekela bantu ne ntshinyi tshidi ba bungi benza?

⁴ Malu adi enzeka pa buloba adi aleja ne: tudi ‘ku nshikidilu kua tshikondo etshi’ ne nshikidilu eu ukadi pabuipi. Bantu badi bamona malu ne nsombelu ivua Yezu ne bayidi bende bambe ne: neyikale tshimanyinu tshia ‘matuku a ku nshikidilu.’ “Kanyinganyinga,” mvita, nzala, bikumina ne makenga makuabu bidi bitatshisha bantu. Bantu badi badisua, kabena banemeka mikenji yonso ne kabena banemeka Nzambi to. Nansha bua bantu badi batumikila mikenji ya mu Bible, matuku aa mmatuku a “malu makole.”​—Mat. 24:3, 6-8, 12; 2 Tim. 3:1-5.

⁵ Kadi bantu ba bungi ki mbamanye tshidi malu aa enzekela to. Ke bualu kayi ba bungi badi badiabakena bua njiwu idi mua kubafikila  bobu ne bena mu mêku abu. Padibu bafuisha anyi bapeta lutatu lukuabu badi bakenga bikole. Bu mudibu kabayi bamanye tshidi malu aa enzekela ne kudibu mua kupeta diambuluisha, kabena ne ditekemena nansha dimue.​—Ef. 2:12.

6. Bua tshinyi “Babulona Munene” kêna mua kuambuluisha bantu bende?

⁶ “Babulona Munene” anyi nsangilu wa bitendelelu bionso bia dishima ki mmuambuluishe bantu nansha kakese to. Kadi ku diambuluisha dia ‘mvinyo wa masandi ende’ mmupangishe bantu ba bungi bua kumanya Nzambi bimpe. Bu mudi tshitendelelu tshia dishima tshienza malu bu mukaji wa ndumba, tshidi tshishima ‘bakalenge ba pa buloba’ ne tshibakokesha. Tshidi kabidi tshilongesha malongesha a dishima ne tshienza mudimu ne majimbu bua bantu ba bungi bikale batumikila bamfumu babu ba tshididi kabayi batontolola. Nunku tshitendelelu tshia dishima ntshipete bukole bua bungi ne ntshibenge kabidi malongesha a bulelela.​—Buak. 17:1, 2, 5; 18:23.

7. Ntshinyi tshidi tshindile bantu ba bungi? Kadi mmunyi mutudi mua kuambuluisha bakuabu?

⁷ Yezu wakalongesha ne: bantu ba bungi badi mu njila munene udi ufikisha ku kabutu. (Mat. 7:13, 14) Bamue bantu badi mu njila munene eu bualu mbabenge ku bukole bua kulonda malu adi Bible ulongesha. Kadi bakuabu ba bungi badimu bualu bamfumu babu ba bitendelelu ki mbabalongeshe tshidi Yehowa ubalomba menemene. Pamuapa bakuabu badi mua kushintulula nsombelu wabu bobu babaleje ku diambuluisha dia Bible tshidibu ne bua kushintulukila. Kadi bantu bonso badi bashala mu Babulona Munene ne badi batungunuka ne kubenga mikenji ya mu Bible kabakupanduka ku “dikenga dinene” to.​—Buak. 7:14.

‘Katulekedi’ kuyisha

8, 9. Bena Kristo ba kumpala bakenza tshinyi pakatuadijabu kubakengesha, ne mbua tshinyi?

⁸ Yezu wakamba ne: bayidi bende bavua ne bua kuyisha lumu luimpe lua Bukalenge ne kuvuija bantu bayidi. (Mat. 28:19, 20) Nunku bena Kristo balelela batu bamona dienza mudimu wa kuyisha bu tshilumbu tshia lulamatu kudi Nzambi wabu ne mushindu wa kuleja ditabuja diabu. Ke bualu kayi bayidi ba kumpala ba Yezu bakatungunuka ne kuyisha nansha pavuabu babakengesha. Bavua beyemena Yehowa bua abapeshe bukole, basambila bua abambuluishe bua batungunuke ne ‘kuamba dîyi diende ne dikima dikole.’ Nunku Yehowa wakabapesha nyuma muimpe ne bakatungunuka ne kuamba dîyi dia Nzambi ne dikima dionso.​—Bien. 4:18, 29, 31.

⁹ Pakabangishabu kuluisha bayidi ba Yezu ne tshikisu tshikole, bavuaku balekele kuyisha anyi? Tòo. Mudimu wa kuyisha wa bapostolo uvua utonda bamfumu ba tshitendelelu tshia bena Yuda, ke bobu kubakanyina ne kubelabu  mfimbu. Kadi bapostolo ‘kabakalekela kuyisha bantu ne kubambila lumu luimpe ne: Yezu udi Kristo.’ Bakajingulula ne: bavua ne bua ‘kutumikila mêyi a Nzambi kumpala kua mêyi a bantu.’​—Bien. 5:28, 29, 40-42.

10. Mmateta kayi atu bena Kristo bapeta lelu? Kadi bikadilu biabu bilenga bidi mua kufikisha ku tshinyi?

¹⁰ Lelu kabatu bela Bantemu ba Yehowa ba bungi mu maloko anyi babatuta bualu badi bayisha to. Kadi bonso batu bapeta mateta mashilangane. Tshilejilu, kondo kebe ka muoyo kalongesha kudi Bible kadi mua kukusaka bua kuikala ne bikadilu bishilangane ne bia bantu bakuabu. Bena mudimu nebe, balongi nebe anyi bena mutumba nebe badi mua kukumona bu muntu wa mushindu mukuabu bualu udi ulonda mikenji ya mu Bible. Kadi abi kabiena ne bua kukutekesha mu maboko to. Bena pa buloba apa badi mu mîdima mu malu a Nzambi, kadi bena Kristo bobu badi ne bua ‘kumueneka bu miendu.’ (Filip. 2:15) Pamuapa bantu bakuabu nebamone bikadilu biebe bimpe, nebabianyishe ne nebatumbishe Yehowa.​—Bala Matayo 5:16.

11. (a) Ntshinyi tshitu bamue bantu benza padibu babayisha? (b) Mmakenga kayi avua mupostolo Paulo mupete ne ntshinyi tshiakenzaye?

¹¹ Bidi bikengela tuikale ne dikima bua kutungunuka ne kuyisha lumu luimpe lua Bukalenge. Bamue bantu, nansha balela bebe badi mua kukuseka anyi kuteta mua kukutekesha mu maboko. (Mat. 10:36) Bakatuta mupostolo Paulo misangu ya bungi bualu uvua uyisha. Mona tshivuaye wenza pavuabu bamukengesha. Wakafunda ne: ‘Patuakadianjila kukenga, ne pakatuenzelabu bibi, tuakakolesha mitshima mu Nzambi wetu bua kunuambila lumu luimpe lua Nzambi mu kuluangana kua bungi.’ (1 Tes. 2:2) Kakuyi mpata, Paulo uvua ne bua kuikala ne dikima bua kutungunuka ne kuyisha lumu luimpe panyima pa bamane kumukuata, kumuvula bilamba bia pa mutu, kumututa mfimbu ne kumuela mu buloko. (Bien. 16:19-24) Ntshinyi tshivua tshimupesha dikima dia kutungunuka? Ndijinga dikole divuaye nadi dia kukumbaja mudimu uvua Nzambi mumupeshe.​—1 Kol. 9:16.

12, 13. Ntatu kayi itu bamue bantu bapeta? Ntshinyi tshidibu benza bua kuyitantamena?

¹² Bidi kabidi mua kuikala bikole bua kutungunuka ne kuyisha ne tshisumi muaba udi bantu kabayi kumbelu anyi udibu kabayi bitaba mukenji wa Bukalenge to. Ntshinyi tshitudi mua kuenza dîba adi? Mbimpe tuikale ne dikima dia bungi bua kuakula ne bantu padi mpunga imueneka. Tudi kabidi mua kushintulula mêba atudi tuyisha anyi kutamba kuyisha miaba itudi mua kupeta bantu.​—Tangila Yone 4:7-15; Bienzedi 16:13; 17:17.

¹³ Bantu ba bungi batu bapeta kabidi ntatu ya bukulakaje ne ya masama, idi mua kubapangisha mua kuenza mudimu wa kuyisha bu mudibu basue. Biobi nanku buebe wewe, kuteketshi mu maboko to. Yehowa mmumone muudi ukenga ne udi usanka bua biudi wenza. (Bala 2 Kolinto 8:12.) Nansha wewe muikale ne lutatu lua mushindu kayi (bakukengesha, kabayi bakuteleja mu buambi anyi usama), enza bionso biudi mua kuenza mu mudimu wa kuyisha lumu luimpe.​—Nsu. 3:27; tangila Mâko 12:41-44.

‘Udimuke bua mudimu webe’

14. Ntshilejilu kayi tshivua mupostolo Paulo mushile bena Kristo nende? Wakafila kabidi mubelu kayi?

¹⁴ Mupostolo Paulo uvua wangata mudimu wa kuyisha ne mushinga wa bungi ne wakakankamija bena Kristo nende bua kuenza bia muomumue. (Bien. 20:20, 21; 1 Kol. 11:1) Muntu mukuabu uvua Paulo mukankamije uvua Âkipo muena Kristo wa mu bidimu lukama bia kumpala. Mu mukanda uvua Paulo mufundile bena Kolosai, wakafunda ne: ‘Nuambile Âkipo kabidi ne: Udimuke bua mudimu uwakangata mu Mukalenge, bua wewe uujikije.’ (Kolos. 4:17) Katuena bamanye Âkipo eu ne nsombelu uvuaye nende to, kadi bidi bimueneka ne: wakitaba mudimu wa kuyisha. Biwikala muena Kristo udi mudilambule kudi Nzambi, udi pebe muitabe mudimu eu. Udiku utungunuka ne kudimuka bua mudimu webe wa kuyisha bua wewe kuukumbaja anyi?

15. Kudilambula kua muena Kristo kudi kumvuija tshinyi? Kudi kutusaka bua kudiela nkonko kayi?

 ¹⁵ Kumpala kua tuetu kutambula, tuvua balambule mioyo yetu kudi Yehowa mu disambila dituvua benze ne muoyo umue. Bivua bileja ne: tuvua badisuike bua kuenza disua diende. Mpindieu mbimpe tudiebeje ne: ‘Kuenza disua dia Nzambi ke kudi ne mushinga munene mu nsombelu wanyi anyi?’ Tudi mua kuikala ne majitu a bungi adi Yehowa utulomba bua kukumbaja bu mudi, kukumbaja majinga a bena mu dîku dietu. (1 Tim. 5:8) Kadi ntshinyi tshitudi tuenza ne dîba dietu ne bukole buetu bidi bishala? Ntshinyi tshidi ne mushinga mu nsombelu wetu?​—Bala 2 Kolinto 5:14, 15.

16, 17. Bansonga ne bantu badi kabayi ne majitu a bungi badi mua kuenza tshinyi?

¹⁶ Udi nsonga ukadi mudilambule anyi? Ukadi mujikije tulasa tuebe peshi ukadi pa kutujikija anyi? Pamuapa, kuena muanji kuikala ne majitu a bungi a mu dîku to. Ntshinyi tshiudi musue kuenza? Mmapangadika kayi audi mua kuangata bua kukumbaja dilaya diebe dia kuenza disua dia Yehowa? Bansonga ba bungi mbakaje malu abu bua kulua bampanda-njila ne mbapete masanka a bungi.​—Mus. 110:3; Muam. 12:1.

¹⁷ Pamuapa ukadi mujikije tulasa tuebe ne mutuadije kuenza mudimu. Kadi kuena ne majitu a bungi pa kumbusha anu ebe nkayebe. Kakuyi mpata utu musue kuenza midimu ya mu tshisumbu paudi ne dîba. Udiku musue kupeta masanka a bungi anyi? Ukadiku muele meji bua kuvudija mudimu webe wa kuyisha anyi? (Mus. 34:8; Nsu. 10:22) Kutshidi miaba mikuabu idibu dijinga ne bamanyishi bua kufikisha lumu luimpe kudi bantu bonso. Udiku mua kuakaja amue malu mu nsombelu webe bua kuya miaba ya buena eyi anyi?—Bala 1 Timote 6:6-8.

18. Ntshinyi tshivua muanetu mukuabu ne mukajende benze? Bakapeta tshinyi?

¹⁸ Tuangate tshilejilu tshia Kevin ne Elena ba mu États-Unis. * Bu muvuabu bafuma ku diselangana ne bilondeshile tshilele tshia muaba uvuabu basombele, bakamona ne: bavua ne bua kusumba nzubu. Bonso babidi bavua benza mudimu wa mêba a bungi bua kupeta nsombelu mulenga. Midimu yabu ya bianza ne ya ku nzubu kayivua ibashila dîba dia bungi dia kuyisha to. Bakamona ne: bavua bapitshisha dîba diabu pabuipi ne dionso ne bukole buabu anu bua kukeba biuma. Kadi pakamonabu muvua mulume mukuabu ne mukajende bavua bampanda-njila bikale bimpe ne disanka,  Kevin ne Elena bakangata dipangadika dia kushintulula nsombelu wabu. Bamane kulomba Yehowa bua abambuluishe, bakapanyisha nzubu wabu ne kuyabu kusombela mu nzubu mukese. Elena wakakepesha mêba avuaye uya ku mudimu ne kuluaye mpanda-njila. Bua malu mimpe a mu buambi avua mukajende umulondela, Kevin pende wakalekela mudimu uvua umuangata mêba a bungi, kuluaye mpanda-njila. Pashishe bakaya mu ditunga dikuabu dia mu Amerike wa ku Sud muvuabu dijinga dikole ne bamanyishi ba Bukalenge. Kevin udi wamba ne: “Tuvua ne disanka mu dibaka dietu, kadi patuakavudija mudimu wetu wa kuyisha, disanka dietu diakavula kabidi bikole.”​—Bala Matayo 6:19-22.

19, 20. Bua tshinyi kuyisha lumu luimpe ke mudimu mutambe bunene udi wenzeka lelu?

¹⁹ Kuyisha lumu luimpe ke mudimu mutambe bunene udi wenzeka lelu eu pa buloba. (Buak. 14:6, 7) Udi wambuluisha bua kutumbisha dîna dia Yehowa. (Mat. 6:9) Mukenji udi mu Bible udi ulengeja nsombelu wa bantu ba bungi badi bawitaba tshidimu tshionso etshi, ne bualu ebu budi mua kupandisha mioyo yabu. Kadi mupostolo Paulo wakebeja ne: ‘Mmunyi mumvuabu lumu luende kabayi ne mubambidi?’ (Lomo 10:14, 15) Kabiena mua kuenzeka padiku kakuyi muntu udi uyisha. Kuenaku mua kudisuika bua kuenza muebe muonso bua kuyisha anyi?

²⁰ Mushindu mukuabu uudi mua kuambuluisha bantu bua kumonabu mudi matuku atudi aa makole ne tshikala mapangadika adibu bangata mua kubakebela nkulengeja diyisha diebe. Tshiena-bualu tshidi tshilonda netshileje tshiudi mua kuenza bua kulua mulongeshi muimpe.

[Mêyi adi kuinshi]

Mmunyi muwandamuna?

• Bena Kristo badi ne dibanza kayi kudi bantu bakuabu?

• Ntshinyi tshitudi mua kuenza bua kutantamena malu adi atupangisha bua kuyisha?

• Mmunyi mutudi mua kukumbaja mudimu wa kuyisha utudi bitabe?

[Nkonko ya dilonga]

[Tshimfuanyi mu dibeji 5]

Tudi ne bua kuikala ne dikima bua kuyisha padibu batukengesha

[Tshimfuanyi mu dibeji 7]

Udi mua kuenza tshinyi wewe uyisha muaba udi bantu kabayi kumbelu?