Bantu bakane nebatumbishe Nzambi tshiendelele

‘Nebavuluke muntu muakane. Buakane buende budiku too ne tshiendelele.’​—MUS. 112:6, 9.

1. (a) Bantu badi bakane ku mêsu kua Nzambi mbatekemene tshinyi mu matuku atshilualua? (b) Ndukonko kayi ludi mua kujuka?

BANTU bonso badi bakane ku mêsu kua Nzambi nebapete malu mimpe a dikema mu matuku adi kumpala eku! Nebikale ne disanka dia kulonga ngikadilu milenga ya Yehowa bidimu ne bidimu. Nebatumbishe Nzambi ne muoyo mujima padibu benda bamanya bimpe midimu ya Nzambi. Bua kupeta masanka atshilualua aa, bidi bikengela kuikala ne “buakane,” anu bu mudibi bileja mu Musambu wa 112. Kadi mmunyi mudi Yehowa, Nzambi munsantu ne muakane mua kuangata bantu babi bu bakane? Nansha mutudi tudienzeja bikole bua kuenza malu mimpe, tutu anu tuenza bilema, pamuapa bilema binene.​—Lomo 3:23; Yak. 3:2.

2. Mbishima kayi bididi bivua Yehowa mmuenze bua dinanga?

² Yehowa mmulongolole ne dinanga dionso mushindu udiye mua kuangatshila bantu babi bu bakane ku mêsu kuende. Mmushindu kayi au? Tshia kumpala, mpavuaye mushintulule muoyo wa Muanende munanga uvuaye nende mu diulu mu tshishima, kuwelaye mu difu dia nsongakaji utshivua kamama bua aledibue bu muntu mupuangane. (Luka 1:30-35) Pashishe bakashipa Yezu kudi baluishi bende. Ke Yehowa kuenza tshikuabu tshishima pavuaye mumubishe ku lufu bu tshifukibua tshia mu nyuma tshia butumbi bua bungi.​—1 Pet. 3:18.

3. Bua tshinyi Yehowa uvua ne disanka bua kufuta Muanende muoyo mu diulu?

³ Yehowa wakafuta Muanende Yezu tshintu tshivuaye kayi muanji kupeta kumpala kua  kuluaye pa buloba, kumupeshaye mu diulu muoyo udi kauyi mua kubutuka. (Eb. 7:15-17, 28) Yehowa uvua ne disanka dia kuenza nunku bualu Yezu wakashala ne lulamatu too ne pavuaye mu mateta makole. Nunku Yezu wakasankisha Yehowa mu mushindu muimpe mutambe pavuaye muleje ne: Satana mmuena mafi padiye wamba mudi bantu benzela Nzambi mudimu anu bua kupeta bintu, kadi kabiyi bua dinanga to.​—Nsu. 27:11.

4. (a) Pakapingana Yezu mu diulu, ntshinyi tshiakenzaye diakamue? Ntshinyi tshiakenza Yehowa? (b) Udi umvua bishi bua malu onso adi Yehowa ne Yezu bakuenzele?

⁴ Yezu wakenza malu a bungi pavuaye mupingane mu diulu. ‘Wakamueneka kumpala kua Nzambi bua bualu buetu’ ne mushinga wa ‘mashi ende mene.’ Tatu wetu wa mu diulu wakitaba ne disanka dionso mashi a Yezu bu ‘mulambu wa kubuikila nawu mibi yetu.’ Nanku, bua kondo ka muoyo kimpe anyi ‘muoyo-mukese mulengeja’ utudi nawu mpindieu, tudi mua “kukuatshila Nzambi udi ne muoyo mudimu.” Bualu ebu budi butufikisha ku diambulula mêyi a mbangilu a Musambu wa 112 a ne: ‘Tumbishayi Yehowa!’​—Eb. 9:12-14, 24; 1 Yone 2:2.

5. (a) Tshitudi ne bua kuenza ntshinyi bua Nzambi kutuangataye bu bantu bakane? (b) Nku malu kayi kudi Musambu wa 111 ne wa 112 ipetangana?

⁵ Bua tuetu kuikala bantu bakane ku mêsu kua Nzambi, tudi ne bua kutungunuka ne kuikala ne ditabuja mu mashi a Yezu. Tudi ne bua kuikala tuela Yehowa tuasakidila dituku dionso edi bua mudiye mutunange bikole. (Yone 3:16) Tudi kabidi ne bua kutungunuka ne kulonga Dîyi dia Nzambi ne kuditumikila mu nsombelu wetu. Musambu wa 112 udi ne mibelu mimpe bua bantu bonso badi basue kuikala ne kondo ka muoyo katoke ku mêsu kua Nzambi. Musambu eu udi ne ngenyi idi ipetangana ne Musambu wa 111. Misambu yonso ibidi eyi idi ituadija ne mêyi a ne: ‘Tumbishayi Yehowa!’ anyi “Aleluya!” Mu tshiena Ebelu, Misambu eyi idi ne biambilu 22, tshiambilu tshionso tshituadija ne dimue dia ku maleta 22 a tshiena Ebelu malondangane, kubanga ku dia kumpala too ne ku dia ndekelu. *

Malu adi afikisha ku disanka

6. Mmunyi mudi “muntu” udi utshina Nzambi udibu batele mu Musambu wa 112 mupete disanka?

⁶ ‘Disanka didi kudi muntu udi unemeka Yehowa, udi usanka bikole bua mikenji yende! Tunkanunuina tuende netuikale ne bukitu bua bungi pa buloba; mulongo [wa ndelanganyi] wa bantu bakane newikale ne disanka.’ (Mus. 112:1, 2) Mufundi wa Musambu eu udi wakula bua “muntu” umue mu mvese wa kumpala, kadi mu mvese muibidi udi ushintulula, wakula bua “bantu bakane.” Bualu ebu budi buleja ne: Musambu wa 112 eu udi wakula bua tshisumbu tshimue tshienza ne bantu ba bungi. Bua kushindika bualu ebu, nyuma muimpe wakasaka mupostolo Paulo bua kuleja mudi Musambu wa 112:9 utangila bena Kristo ba kumpala. (Bala 2 Kolinto 9:8, 9.) Musambu eu udi umvuija bimpe mushindu udi bena Kristo badi pa buloba mua kuikala ne disanka lelu.

7. Ditshina dia Nzambi didi ne mushinga kayi kudi bantu bende? Kadi wewe udi ne bua kumvua munyi bua mikenji yende?

 ⁷ Anu mudibi bileja mu Musambu wa 112:1, bena Kristo aba badi bapeta disanka divule padibu benda mu ‘ditshina dia Yehowa.’ Ditshina edi didi dibambuluisha bua kukandamena lungenyi lua mu bulongolodi bua Satana. Badi ‘basanka bikole’ bua kulonga Dîyi dia Nzambi ne kutumikila mikenji yende. Mu mikenji ayi mudi wa kuyisha lumu luimpe lua Bukalenge pa buloba bujima. Badi badienzeja bua kuvuija bantu ba mu bisamba bionso bayidi eku benda badimuija bantu babi bua dituku dia dilumbuluisha dia Yehowa.​—Yeh. 3:17, 18; Mat. 28:19, 20.

8. (a) Mmunyi mudi bantu ba Nzambi lelu bapeta difutu bua bidibu benza? (b) Mmasanka kayi apeta bantu badi ne ditekemena dia kupiana buloba?

⁸ Lelu bantu ba Nzambi bakadi miliyo mitue ku muanda mutekete bualu badi batumikila mikenji yende. Nnganyi udi mua kuela mpata mudi tshisamba etshi tshilue ne “bukole pa buloba”? [MMM] (Yone 10:16; Buak. 7:9, 14) Nebikale kabidi ne “disanka” dia bungi padi Nzambi wenda ukumbaja malu adiye mulongolole. Bua bantu badi ne ditekemena dia kuikala ne muoyo pa buloba, Yehowa neabapandishe ku “dikenga dinene” dikadi pa kulua bua kuenzabu ‘buloba bupiabupia mudi buakane buikalemu.’ Mu bule bua tshikondo, bantu bapanduka ku Armagedone ‘nebikale ne disanka’ dia bungi. Nebakidile miliyo ya bantu babika ku lufu. Ebu ki mbualu buimpe butambe anyi? Ndekelu wa bionso, bantu badi ‘basanka bikole bua mikenji ya Nzambi’ nebalue bapuangane ne nebikale ne “budishikaminyi bua butumbi bua bana ba Nzambi.”​—2 Pet. 3:13; Lomo 8:21.

Dienza mudimu bimpe ne bubanji

9, 10. Mmunyi mudi bena Kristo balelela benza mudimu ne meji ne dimanya dia Nzambi? Mmushindu kayi washala buakane buabu too ne tshiendelele?

⁹ ‘Lupetu ne bubanji bidi mu nzubu muende; buakane buende budiku too ne tshiendelele. Munya udi umueneka mu mîdima bua kutemena bantu bakane; Yehowa udi ne dinanga, udi ufuila bantu luse ne udi muakane.’ (Mus. 112:3, 4)  Mu tshikondo tshia kale, bamue basadidi ba Nzambi bavua bamanyike bua bubanji buabu. Mu ngumvuilu mukuabu, bantu batu Yehowa wanyisha batu balua babanji nansha bobu bikale bapele ku mubidi. Bidi bimueneka ne: bantu ba bungi badi banyishe bua kudipuekesha ku mêsu kua Nzambi badi mua kuikala balanda, babapepeja anu bu muvuabi mu matuku a Yezu. (Luka 4:18; 7:22; Yone 7:49) Kadi nansha muntu yeye muikale ne bubanji bua bungi anyi kayi nabu, udi mua kuikala nabu mu mukuabu mushindu, mbuena kuamba ne: kuikala ne meji ne dimanya dia Nzambi.​—Mat. 6:20; 1 Tim. 6:18, 19; bala Yakobo 2:5.

¹⁰ Bena Kristo bela manyi pamue ne mikoko mikuabu, kabena badilamina bubanji ebu to. Kadi badi ‘bamueneka’ mu bulongolodi bua mîdima bua Satana ebu ‘bu munya udi utemena bantu bakane.’ Badi benza nanku padibu bambuluisha bakuabu bua kupeta bubanji mu meji ne dimanya dia Nzambi. Baluishi mbenze ne muabu muonso bua kuimanyika mudimu wa kuyisha Bukalenge, kadi mbela bua tshiomba musabu. Bipeta bia mudimu eu muakane bidi ‘bishalaku too ne tshiendelele.’ Padi basadidi ba Nzambi bashala anu bakane mu mateta, badi mua kupeta dishindika dia kushala ne muoyo matuku a bungi, ‘too ne tshiendelele.’

11, 12. Ngimue mishindu kayi idi bantu ba Nzambi bakuata mudimu ne bintu bidibu nabi?

¹¹ Bela manyi ne bena ‘musumba munene’ mbaleje muoyo wabu mulenga bua dipeshangana bintu bia ku mubidi. Musambu wa 112:9 udi wamba ne: ‘Yeye wakabanya bintu, wakapesha bapele bintu.’ Bena Kristo balelela lelu batu bapesha bena Kristo nabu badi mu dikenga bintu, bapesha kabidi ne bena mutumba babu. Batu kabidi bafila bintu biabu bua kuambuluisha bantu badi bintu bu mudi bikumina anyi mpepele mikole mibueje mu dikenga. Anu muvua Yezu muleje, kupa kudi kuenza disanka.​—Bala Bienzedi 20:35; 2 Kolinto 9:7.

¹² Elabi kabidi meji bua bungi bua makuta adi atuka bua kupatula tshibejibeji etshi mu miakulu 172, ya bungi ya kudiyi idibu bakula kudi bantu bapele. Tshibejibeji etshi tshidi kabidi tshipatuka mu miakulu ya tumama ne ya bafofo kabidi.

Kuleja bakuabu bantu luse ne buakane

13. Mbanganyi badi bilejilu bilenga bia bena luse? Tudi mua kuidikija tshilejilu tshiabu mushindu kayi?

¹³ ‘Muntu udi uleja bantu luse ne udi ubasombesha bintu udi ne disanka.’ (Mus. 112:5) Ukadiku pamuapa mumone ne: bantu batu bambuluisha bakuabu kabatu anu bena luse to. Bamue batu bafila bintu bua kuleja mudibu ne bia bungi kupita bakuabu anyi bafila bashala banyingalala. Kabitu bienza disanka bua kuitaba diambuluisha dia muntu udi ukupuekesha milongo anyi kayi ukuangata ne mushinga peshi uleja ne: udi umutatshisha. Kadi padi muntu muena luse utupesha tshintu, tudi tutshiangata ne disanka dia bungi. Yehowa udi tshilejilu tshinene tshia muntu udi umvuila bantu luse ne udi ufila ne disanka. (1 Tim. 1:11; Yak. 1:5, 17) Yezu wakidikija tshilejilu tshilenga tshia Tatuende tshia kumvuilangana luse. (Mâko 1:40-42) Nunku, bua Nzambi kutumonaye bu bantu bakane, tupeshanganayi bintu ne disanka ne luse kabidi, nangananga patudi tuambuluisha bantu netu bua kumanya Yehowa mu mudimu wa buambi.

14. Mmu imue mishindu kayi itudi mua ‘kuenza malu etu ne buakane’?

¹⁴ ‘Udi wenza malu ende mu buakane.’ (Mus. 112:5, MMM) Anu bu mukavua Bible muambe, kasumbu ka mulami wa bintu wa lulamatu kadi kalombola bintu bionso bia Mfumu mu diumvuangana ne mikenji miakane ya Yehowa. (Bala Luka 12:42-44.) Ke mutubi bimuenekela ku malu a mu Bible adibu bambila bakulu a mua kulombola bisumbu, bualu batu imue misangu bajikija malu a mpekatu mu tshisumbu. Mushindu muakane wa kulombola malu mu bisumbu, mu nzubu ya bamisionere ne ya Betele udi kasumbu ka mupika kafila mmuimanyine pa tshidi Bible wamba. Badi balomba bakulu ne bena Kristo bonso bua kuikala ne buakane mu malu adibu benzelangana ne adibu benzela bantu badi kabayi Bantemu, too ne mu malu a mishinga.​—Bala Mika 6:8, 11.

Masanka a bantu bakane

15, 16. (a) Ntshinyi tshidi bantu bakane bumvua bua ngumu mibi ya pa buloba? (b) Bantu ba Nzambi mbadisuike bua kuenza tshinyi?

¹⁵ ‘Bualu bua kabena bamunyungisha  tshiendelele, nebavuluke muntu muakane kashidi. Kena utshina ngumu mibi; mutshima wende udi mushindame, udi weyemena Yehowa. Mutshima wende udi mukole, kena utshina, too ne pamonaye bualu budiye musue bukuate bena lukuna bende.’ (Mus. 112:6-8) Lelu, ngumu mibi mmivule kupita muvuayi kumpala, bu mudi ya mvita, tshinyangu, masama mapiamapia adi apatuka ne a kale adi kaayi ajika, dishipangana, bupele, ne dinyanga dia mâyi ne lupepele. Bantu badi Nzambi ubala bu bakane batu pabu bapeta ntatu bua malu aa, kadi kabena batshina matuku adi kumpala, bateketa mu mikolo nansha. Pamutu pa kutshina, mioyo yabu ‘mmishindame,’ ‘mmikole’ padibu eku bindile matuku adi kumpala ne dishindika, bamanye ne: bulongolodi buakane bua Nzambi bukadi pabuipi. Padi tshipupu kampanda tshienzeka, mbamanye mua kupita natshi bualu badi beyemena Yehowa. Yehowa kakuanyisha nansha kakese bua bantu bende bakane ‘banyungishibue,’ kadi udi ubambuluisha ne ubapesha bukole bua kutantamena nabu ntatu.​—Filip. 4:13.

¹⁶ Bantu bakane ba Nzambi badi kabidi ne bua kukola ku muoyo padibu babakina ne babashiminyina malu kudi bena lukuna babu. Nansha nanku, malu aa kaena abapangisha bua kuyisha to. Pamutu pa kuimanyika diyisha, mbatungunuke ne kuenza mudimu udi Yehowa mubapeshe wa kuyisha lumu luimpe lua Bukalenge buende ne kuvuija bantu bonso badi baluitaba bayidi ne bukole ne dishindama dionso. Tumanye ne: bantu bakane nebatungunuke ne kupeta buluishi bukole padi nshikidilu wenda usemena. Patubunda Satana Diabolo pa buloba bujima, bu Goga wa ku Magoga, ke pafika buluishi ebu mu katongobela. Dîba adi ‘netumone bena lukuna betu’ babatshimuna bonso. Ndisankapu kayi dituikala nadi dia kumona mushindu wikala dîna dia Yehowa mua kutumbishibua bua kashidi!​—Yeh. 38:18, 22, 23.

‘Nebabandishibue mu butumbi’

17. Mmunyi muikala bantu bakane mua ‘kubandishibua mu butumbi’?

¹⁷ Netuikale ne disanka dia bungi bua kutumbisha Yehowa tuetu bonso, Diabolo ne bulongolodi buende kabatshiyi batutatshisha. Bantu bonso badi batungunuka ne kuenda mu buakane kumpala kua Nzambi nebamutumbishe nunku tshiendelele. Bantu aba kabakufua bundu anyi kabakubatshimuna to, bualu Yehowa udi ulaya kabidi ne: muntu wende muakane ‘neabandishibue mu butumbi.’ (Mus. 112:9) Bantu bakane nebasanke pamonabu muatshimunabu baluishi bonso ba Yehowa.

18. Mêyi adi mu mvese wa ndekelu wa Musambu wa 112 neakumbane mushindu kayi?

¹⁸ ‘Muntu mubi neatangile muanda eu, neakuatshike kanyinganyinga; neasumakane menu, neajimine. Disua dia bantu babi nedijimine.’ (Mus. 112:10) Bantu bonso badi batungunuka ne kutatshisha bantu ba Nzambi ‘nebajimine’ ne lubabu luabu ne lukinu luabu. Dijinga diabu dia kumona mudi mudimu wetu wimana nedijimine nabu palua “dikenga dinene.”​—Mat. 24:21.

19. Mbualu kayi butudi mua kutekemena ne dishindika dionso?

¹⁹ Newikale pebe munkatshi mua bantu bapanduka tshikondo atshi tshia ditshimuna dinene anyi? Wewe mua kufua bua disama anyi bua bukulakaje kumpala kua nshikidilu wa bulongolodi bua Satana ebu, newikale pebe munkatshi mua bantu “bakane” babishibua anyi? (Bien. 24:15) Diandamuna didi mua kuikala ne: Eyowa, amu bituikala ne ditabuja mu mulambu wa Yezu ne tuidikija Yehowa, bu mudi “muntu” muakane udibu batela mu Musambu wa 112. (Bala Efeso 5:1, 2.) Yehowa neenze bua kabapu bantu ba mushindu eu muoyo musangu nansha umue, bua ‘bavuluke’ bienzedi biabu biakane. Yehowa neabavuluke ne neabanange bua kashidi ne tshiendelele.​—Mus. 112:3, 6, 9.

[Mêyi adi kuinshi]

Nkonko ya kuelela meji

• Ngamue malu kayi adi atusaka bua kuela mbila tuamba ne: ‘Tumbishayi Yehowa!’ anyi “Aleluya”?

• Mmalu kayi mimpe a matuku aa adi asankisha bena Kristo balelela?

• Mbantu batu bapeshangana bintu mushindu kayi badi Yehowa musue?

[Nkonko ya dilonga]

[Tshimfuanyi mu dibeji 25]

Bua kuikala bantu bakane ku mêsu kua Nzambi, tudi ne bua kuikala ne ditabuja mu mashi a Yezu

[Bimfuanyi mu dibeji 26]

Makuta etu atutu tufila ne disanka atu ambuluisha bua kupatula mikanda ya malu a Bible ne bua kuambuluisha bantu badi bipupu bikuate