Mmunyi muudi mua kunanukila mu diyisha?

UKATUKU mudiumvue mutshioke anyi mutekete ku muoyo ne ujinga kulekela kuyisha anyi? Kudi malu adi mua kutupangisha bua kutantamana, tutele bu mudi: buluishi bukole, kanyinganyinga, masama, tuseku tua bena mulongo netu anyi bantu batudi tuyisha babenga kuitaba. Kadi tuangate tshilejilu tshia Yezu. Wakatantamena mateta makole ‘bua disanka diakatekibua kumpala kuende.’ (Eb. 12:2) Uvua mumanye ne: bu yeye mua kuleja muvua malu avuabu babande nawu Nzambi a dishima, uvua mua kusankisha Yehowa.​—Nsu. 27:11.

Paudi pebe unanukila mu mudimu wa diyisha, udi mua kusankisha Yehowa. Kadi ntshinyi tshituenza bikala imue ntatu yenda ikepesha bukole buetu bua kuyisha? Muanetu Krystyna (mmukulakaje ne udi ne tusamasama) udi wamba ne: “Ntu ntshioka bikole ne disanka dianyi dikepela. Ntatu idi milue ne bukulakaja buanyi, bu mudi tusamasama ne tunyinganyinga bua nsombelu mukole, itu ikepesha tshisumi tshianyi mu buambi.” Kadi mmunyi muudi mua kunanukila ne kuyisha nansha koku bipumbishi?

Widikije baprofete

Bua kunanukila mu mudimu wa kuyisha, bambi ba lumu luimpe ba lulamatu badi ne bua kudienzeja bua kuikala ne mmuenenu wa malu wa buena wa baprofete ba kale. Tuangate tshilejilu tshia muprofete Yelemiya. Pavuabu bamuambile bua kuikala muprofete, wakanji kubenga. Kadi wakalua kuenza mudimu wa buprofete mu ntatu ya bungi, kuyitantamena mu bidimu 40 anu bualu wakalonga bua kueyemena Nzambi ne muoyo mujima.​—Yel. 1:6; 20:7-11.

Tshilejilu tshia Yelemiya tshiakakolesha muanetu Henryk ku muoyo. Udi wamba ne: “Mu bidimu bipite pa 70 bindi anu nyisha ebi, mvua nteketa ku muoyo imue misangu bua mushindu uvua bantu bangata bulelela, tshilejilu, bua lukinu luabu ne bua dibenga kunteleja diabu. Pavua malu aa enzeka, mvua mvuluka tshilejilu tshia Yelemiya. Bua muvuaye munange Yehowa ne malanda makole avuaye mudie nende, wakatungunuka ne mudimu wa buprofete.” (Yel. 1:17) Muanetu Rafał pende utu widikija tshilejilu tshia Yelemiya. Udi wamba ne: “Yelemiya uvua mueyemene Nzambi pamutu pa kudieyemena anyi kulonda meji ende. Wakatungunuka ne kuyisha ne dikima nansha muvuaye ne buluishi. Mvua ndienzeja bua kuidikija tshilejilu tshiende.”

Tshilejilu tshia muprofete Yeshaya tshidi tshiambuluisha kabidi bantu ba bungi bua kunanukila. Nzambi wakamuambila ne: bantu ba mu ditunga diabu kabakumuteleja to. Yehowa wakamba ne: ‘Vuija mitshima ya bantu aba mitshima idi ne manyi, vuija matshi abu mpudi matshi.’ Yeshaya kavua mua kuenza bimpe mudimu wende anyi? Bua diambuluisha dia Nzambi kavua mua kupangila to! Pavua Yehowa muambile Yeshaya bua kuikalaye muprofete, wakamba ne: ‘Ke meme eu, untume meme!’ (Yesh. 6:8-10) Yeshaya uvua mushale anu mu mudimu wende. Ke tshiutu pebe wenza bua mudimu wa kuyisha anyi?

Bua kunanukila mu mudimu wa buambi padi bantu kabayi batuteleja anu bu muvua Yeshaya munanukile pende, katutambi kuimanyina amu pa dibenga kuteleja dia bantu to. Tangila muvua muanetu Rafał mutantamena ntatu; udi wamba ne: “Ntu ndienzeja bua kubenga kuela meji ku mêyi mabi atu bantu bamba. Bantu ba mu teritware wanyi badi ne budikadidi bua kuenza malu mudibu basue.” Muanetu Anna udi wamba pende ne: “Ntu ndienzeja bua kubenga kuela meji ku malu mabi adi mua kuntekesha ku muoyo. Disambila ne dikonkonona dia mvese wa ku dituku kumpala kua kuya mu buambi ke bitu bingambuluisha bua kuenza nanku. Dîba adi meji mabi onso adi mua kunduila adi umbuka.”

Muprofete Yehezekele uvua uyisha bena Yuda bavuabu baye nabu ku bupika ku Babulona, kadi bena Yuda aba bavua ne mutu mukole. (Yeh. 2:6) Bu Yehezekele mubenge kuambila bantu Dîyi  dia Nzambi ne bu muntu mubi mua kufua bualu kabavua bamudimuije, mashi a muntu au avua pambidi pa Yehezekele. Yehowa wakambila Yehezekele ne: ‘Nendombe mashi ende ku tshianza tshiebe.’​—Yeh. 3:17, 18.

Muanetu Henryk udi udienzeja bua kuikala ne lungenyi lua buena lua Yehezekele. Udi wamba ne: “Tshiena musue kuambula mashi a muntu nansha. Mioyo ya bantu idi mu njiwu.” (Bien. 20:26, 27) Muanetu Zbigniew wakamba pende ne: “Yehezekele wakatungunuka nansha muvua bantu ne meji mabi. Bualu ebu budi bungambuluisha bua kumona mudimu wa kuyisha bu mudi Mufuki uumona.”

Kuena nkayebe to

Kuena nkayebe paudi uyisha to. Anu bu mupostolo Paulo, tudi mua kuamba ne: ‘Tudi benzejanganyi ba mudimu ne Nzambi.’ (1 Kol. 3:9) Muanetu Krystyna utu misangu mikuabu uteketa ku muoyo, kadi udi wamba ne: “Ke bualu kayi ntu ndomba Yehowa bukole misangu yonso. Utu ubumpesha.” Kakuyi mpata, tudi dijinga ne diambuluisha dia nyuma wa Nzambi patudi tuyisha.​—Zek. 4:6.

Patudi mu mudimu wa buambi, nyuma muimpe utu utuambuluisha bua kuikala ne ngikadilu mimpe idi Bible ubikila ne: “mamuma a nyuma.” (Gal. 5:22, 23) Ngikadilu eyi idi ituambuluisha bua kutungunuka mu mudimu wa kuyisha nansha bualu kayi mua kuenzeka. Muanetu Henryk udi wamba ne: “Mudimu wa kuyisha mmungambuluishe bua kushintulula bumuntu buanyi. Ndi mulonge mua kuikala ne lutulu, kuangata bakuabu ne mushinga ne kubenga kuteketa mu mikolo lukasa.” Kunanukila mu diyisha nansha kuikale lutatu lua mushindu kayi kudi mua kukuambuluisha bua kuikala ne mamuma a nyuma a bungi.

Yehowa udi ulombola mudimu wa mushinga mukole eu ku diambuluisha dia banjelu. (Buak. 14:6) Bible udi uleja ne: kudi banjelu ‘mbombo misangu mbombo, ne binunu bia binunu.’ (Buak. 5:11) Ku bulombodi bua Yezu, banjelu aba badi bambuluisha batendeledi ba Nzambi badi pa buloba. Bualu ebu butuku mu mutu muebe pautu uyisha anyi?

Muanetu Anna udi wamba ne: “Kuela meji bua mutudi ne banjelu mu mudimu wa buambi kutu kunkolesha mu maboko. Ntu nganyisha diambuluisha didibu batupesha ku bulombodi bua Yehowa ne Yezu.” Tudi ne diakalenga dinene dia kuenza mudimu pamue ne banjelu ba Nzambi, ki muomu anyi?

Kadi mmunyi mudi kuyisha pamue ne bena Kristo netu kutuambuluisha bua kunanukila? Tudi ne disanka dia kumanyangana ne bena Kristo balelela netu ba bungi. Kakuyi mpata, udi mumone mudi mêyi a mu Bible aa malelela: ‘Bu mudi tshiamu tshisakisha tshinga tshiamu, mbu mudi muntu ulengeja tshikadilu tshia mulunda wende.’​—Nsu. 27:17.

Kuyisha pamue ne bena Kristo netu kudi kutuambuluisha bua kuidikija imue mishindu mipiamipia ya kuyisha idibu bakuata nayi mudimu. Muanetu Elżbieta udi wamba ne: “Kuyisha ne bena Kristo bashilangane nkungambuluishe bua kubananga ne kunanga kabidi bantu batudi tuyisha.” Udienzeje bua kuyisha ne bamanyishi bashilashilangane, mudimu webe neulengele.

Udilame bimpe

Bua kushala ne disanka mu mudimu wa buambi, tudi ne bua kuikala ne programe muimpe, tudilongela Bible ne tulala tulu anyi tuikisha mêba makumbane. Mbuena kuamba ne: tudi ne bua kudilama bimpe mu malu a ntendelelu ne a ku mubidi.

Bible udi wamba ne: “Malu adi muntu wa tshisumi ujinga kuenza adi akumbana.” (Nsu. 21:5, MMM) Muanetu Zygmunt (udi ne bidimu 88) udi wamba ne: “Kuikala ne programe muimpe wa mudimu wa buambi nkungambuluishe bua kupatula bipeta bimpe. Ndi mulongolole malu anyi bua mpete dîba dia bungi dia kuyisha.”

Dimanya dia bungi dia Bible didi dituambuluisha bua kuyisha bimpe. Anu bu mutu kudia biakudia kuambuluisha mubidi bua kuikala ne makanda, kulonga dîyi dia Nzambi kudi kutuambuluisha bua kuyisha bimpe. Kubala Dîyi dia Nzambi dituku dionso ne kudia ‘biakudia bifila pa dituku diabi’ kudi kutupesha bukole bua kuenza mudimu wa buambi.​—Mat. 24:45-47.

Muanetu Elżbieta wakashintulula malu a bungi mu nsombelu wende bua kulengeja mudimu wende wa buambi. Udi wamba ne: “Ndi mukepesha  dîba dimvua mpitshisha ku ditangila televizion bua meme kupeta dîba dia bungi dia kudilongolola bua mudimu wa buambi. Pandi mbala Bible dilolo dionso, ndi ngela meji bua bantu bamvua mupetangane nabu mu teritware. Ndi nkeba mvese ne biena-bualu bidi mua kubambuluisha.”

Wewe ulala tulu mêba makumbane, nebikuambuluishe bua kuikala ne makanda audi mua kuyisha nawu bikole. Kadi padi muntu ujimija dîba diende dia bungi ku dijikija lutetuku, kakuikala ne dîba dia bungi dia kuyisha to. Muanetu Andrzej (muambi wa lumu luimpe wa tshisumi) udi wamba ne: “Kubenga kuikisha bimpe kudi kutshiokesha muntu bikole; ebu ke bumue bua ku malu atu afikisha muntu ku diteketa ku muoyo. Ntu ndienzeja muanyi muonso bua kuikisha bimpe.”​—Muam. 4:6.

Nansha mutudi tudifila ne muoyo mujima, bantu anu bakese ke batu bitaba lumu luimpe. Kadi Yehowa kakupua mudimu wetu muoyo nansha. (Eb. 6:10) Nansha mudi bantu ba bungi babenga kuyikila netu, batu bashala bakula bua dilua dietu patudi tumuka. Bidi mua kuenzeka anu mutudi tubala bua Yehezekele ne: Bantu ‘nebamanye ne: Muprofete uvua munkatshi muetu.’ (Yeh. 2:5) Eyowa, mudimu wetu ki mmupepele to, kadi udi ututuadila tuetu ne bantu badi batuteleja masanka a bungi.

Muanetu Zygmunt udi wamba ne: “Kuyisha kudi kutuambuluisha bua kuvuala bumuntu bupiabupia ne kuleja mutudi banange Nzambi ne bantu netu.” Muanetu Andrzej udi wamba ne: “Ndiakalenga dinene dia kuenza petu mudimu eu udi usungila mioyo ya bantu. Katuakuwenza kabidi wa bungi bu lelu ne mu nsombelu ya buena idiku lelu to.” Wewe pebe neupete masanka a bungi bua muudi unanukila mu mudimu wa diyisha lelu.​—2 Kol. 4:1, 2.

[Bimfuanyi mu dibeji 31]

Kudilama bimpe mu malu a Nzambi ne a ku mubidi kudi kutuambuluisha bua kunanukila mu diyisha lumu luimpe