Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Muana udi mufuile munda mua mamuende udi mua kubishibua ku lufu anyi?

Muoyo wa muana udi utuadija anu padi mamuende umuimita. Yehowa Nzambi udi mua kubisha bantu bonso too ne batshivua munda mua bamamuabu bualu “Nzambi udi mumanye mua kuenza malu onso.” (Mâko 10:27) Kadi Bible kena uleja patoke bikalaye mua kubisha bana badi bafuila munda mua bamamuabu to.​—15/4, dibeji 12, 13.

• Ntshinyi tshitudi mua kulongela kudi tunkenene, nsenji, mpasu ya mikumbi ne misodi?

Malu adi bintu binayi ebi bienza adi aleja mudibi ne meji. Nunku bidi bitumbisha meji a Nzambi. (Nsu. 30:24-28)​—15/4, dibeji 16-19.

• Bua tshinyi Bible udi utubela bua kuikala kupuwa imue misangu?

Bible udi uleja ne: kupuwa kudi mua kuleja mutudi tunemeka bantu bakuabu, kudi kuambuluisha bua kuela meji ne kuleja mutudi ne budimu ne busunguluji. (Mus. 37:7; 63:6; Nsu. 11:12)​—15/5, dibeji 3-5.

• Mbakalenge bena Yuda banga bavua ne tshisumi tshikole bua nzubu wa Nzambi?

Kuvua bakalenge 19 bavua bakokeshe mu bukalenge bua ku Sud bua Yuda, kadi anu bakalenge banayi ke bavua ne tshisumi tshikole. Bakalenge abu ke: Asa, Yehoshafata, Hezikiya ne Yoshiya.​—15/6, dibeji 7-11.

• Mbena Kristo bela manyi bonso badi pa buloba badi ne mudimu wa kulongolola malongesha a mu Bible anyi?

Tòo. Bena Kristo bela manyi bonso badi benza kasumbu ka mupika wa lulamatu ne wa budimu, kadi anu bena mu Kasumbu Kaludiki ke badi batangila mudimu wa kufila malongesha a mu Dîyi dia Nzambi.​—15/6, dibeji 22-24.

• Bua tshinyi tudi mua kuamba ne: mushindu uvua Yezu wenzela bantu malu uvua mushilangane ne uvua bamfumu ba bitendelelu babenzela?

Bamfumu ba bitendelelu bavua bapepeja bantu pamutu pa kubananga. Pashishe, kabavua banange Nzambi to. Kadi Yezu yeye uvua munange Tatuende ne uvua umvuila bantu luse. (Mat. 9:36) Uvua wakidila bantu bimpe, uditeka pa muaba wabu ne ubenzela malu mimpe.​—15/7, dibeji 15.

• Bua tshinyi dilama ne ditula dia makuta didi mua kujula bilumbu mu dîku? Ntshinyi tshidi mua kuambuluisha mulume ne mukajende bua kuepuka bilumbu ebi?

Bilumbu bia makuta bitu bijuka misangu ya bungi bualu mulume ne mukajende kabena beyemenangana ne badi mua kuikala bapete nkoleshilu mushilangane. Malu anayi adi mua kubambuluisha ngowu aa: kumanya mua kuyukidilangana mu lutulu bua makuta, kumvuangana bua mudibu ne bua kumona makuta adibu bapeta, kufunda bungi bua makuta adibu ne bua kutula ne kusungula tshidi muntu yonso ne bua kuenza.​—1/10, dibeji 10-12.