Kudiunda kuebe kumueneke kudi bonso

‘Unanukile kuikala mu malu aa, udifile ne mutshima webe wonso kudiwu, bua kudiunda kuebe kumueneke kudi bonso.’​—1 TIM. 4:15.

1, 2. (a) Mmalu kayi atudi bamanye bua Timote patshivuaye muana? (b) Mmunyi muakashintuluka nsombelu wende pavuaye ne bidimu bitue ku 20?

TIMOTE uvua mukolele mu provense wa Galatia mu Lomo, muaba eu ke udi ditunga dia Turquie lelu. Bidimu bipite pa dikumi panyima pa lufu lua Yezu, bakenza bisumbu bia bena Kristo bia bungi mu tshitupa etshi. Dimue dituku Timote ne mamuende ne kakuende bakalua bena Kristo ne bavua benza mudimu ne tshisumi mu tshimue tshia ku bisumbu bia mu Galatia. (2 Tim. 1:5; 3:14, 15) Nansha muvua Timote nsonga, uvua musue kuikala muena Kristo mu miaba ivuaye mumanye bimpe. Kadi malu akatuadija kushintuluka diakamue.

² Malu akatuadija kushintuluka pavua Paulo ukumbula bisumbu bia muaba eu bua musangu muibidi. Tshikondo atshi Timote uvua mua kuikala ne bidimu 19 anyi 20. Paulo uvua pamuapa ukumbula bena Kristo ba mu Luseta pakumvuaye bena mu tshisumbu atshi bendeshila Timote “lumu luimpe.” (Bien. 16:2) Nansha muvua Timote nsonga, uvua muena Kristo mushindame. Pashishe nyuma muimpe wakasaka Paulo ne bakulu ba mu tshisumbu bua kutentekela Timote bianza bua atuadije kuenza mudimu wa pa buawu mu tshisumbu.​—1 Tim. 4:14; 2 Tim. 1:6.

3. Mmudimu kayi wa pa buawu uvua Timote mupete?

³ Timote wakapeta dibikila dia pa buadi dia kuenza ngendu ne Paulo. (Bien. 16:3) Timote uvua mua kuikala musanke bikole be! Bidimu bivua bilonda, Timote uvua mua kutuadija ngendu ne Paulo ne imue misangu ne bantu bakuabu wenda wenza midimu ivua bapostolo ne bakulu bamupesha. Paulo ne Timote bakatuadija kuenza ngendu benda bakolesha ditabuja dia bena Kristo. (Bala Bienzedi 16:4, 5.) Nunku bena Kristo ba bungi bakadimuena muvua Timote mulubuluke mu malu a Nzambi. Mupostolo Paulo mumane kuenza mudimu pamue ne Timote bidimu bitue ku 10, wakafundila bena Filipoi ne: ‘Tshiena ne mukuabu udi ne mutshima bu wa [Timote] wadielesha meji bulelela bua malu enu. Nudi bamanye bujalame buende ne: bu mudi muana ne tatu wende, nunku yeye wakakuata nanyi mudimu wa mu lumu luimpe.’​—Filip. 2:20-22.

4. (a) Mmudimu kayi munene uvuabu bapeshe Timote? (b) Mêyi a Paulo adi mu 1 Timote 4:15 adi mua kujudija nkonko kayi?

⁴ Mu tshikondo tshivua Paulo mufundile bena Kristo ba mu Filipoi mukanda atshi, uvua mua kuikala mupeshe Timote mudimu munene wa kuteka bakulu ne basadidi ba mudimu mu tshisumbu. (1 Tim. 3:1; 5:22) Bidi bimueneka ne: Timote ukavua mukulu muena Kristo wa kueyemena. Paulo wakambila kabidi Timote mu mukanda umue umue au ne: ‘kudiunda kuebe kumueneka kudi bonso.’ (1 Tim. 4:15) Timote kavuaku muanji kuleja didiunda diende mu mushindu kampanda wa dikema anyi? Kadi, ntshinyi tshivua Paulo  musue kuamba mu mêyi aa? Mmunyi mudi mubelu wende eu mua kutuambuluisha?

Mua kuleja didiunda ku ngikadilu ya buena Kristo

5, 6. (a) Mmushindu kayi uvuabu bakeba kunyanga bukezuke bua tshisumbu tshia mu Efeso? (b) Mmunyi muvua Timote ne bua kulama tshisumbu?

⁵ Tukonkononayi tshivuabu bafundile mêyi adi mu 1 Timote 4:15. (Bala 1 Timote 4:11-16.) Kumpala kua Paulo kufunda mêyi aa, uvua muye ku Makedonia ne kulombaye Timote bua ashale mu Efeso. Bua tshinyi? Bualu bamue bantu ba mu tshimenga etshi bakavua batapulula bena mu tshisumbu ne malongesha a dishima. Timote uvua ne bua kulama tshisumbu bua tshikale tshikezuke. Mushindu kayi? Umue mushindu, nkuikala tshilejilu tshimpe kudi bantu bakuabu.

⁶ Paulo wakafundila Timote ne: ‘Wikale tshilejilu kudi bena kuitabuja mu mêyi ne mu tshikadilu tshiebe ne mu dinanga ne mu ditabuja ne mu butoke bua mutshima.’ Paulo wakamba kabidi ne: ‘Unanukile kuikala mu malu aa, udifile ne mutshima webe wonso kudiwu, bua kudiunda kuebe kumueneke kudi bantu bonso.’ (1 Tim. 4:12, 15) Timote uvua ne bua kudiunda mu ngikadilu ya buena Kristo, kadi ki mbua kuipatshilaye majitu makuabu a pa buawu to. Muena Kristo yonso udi ne bua kuenza bua kuleja kudiunda kua mushindu eu.

7. Ntshinyi tshidi bena Kristo bonso mu tshisumbu ne bua kuenza?

⁷ Anu muvuabi bienzeka mu tshikondo tshia Timote, lelu bantu batu bapeta majitu a mishindu mishilangane mu tshisumbu. Bamue badi bakulu anyi basadidi ba mudimu. Bakuabu mbampanda-njila ba pa tshibidilu. Banga pabu mbatangidi ba bijengu anyi ba distrike ne bakuabu badi benza mudimu ku Betele anyi bamisionere. Bakulu batu balongesha miaba mishilangane bu mudi: mu mpuilu ne mu mpungilu. Kadi bena Kristo bonso mbuena kuamba ne: balume, bakaji ne bana badi ne mushindu wa kuleja kudiunda kuabu mu malu a Nzambi kudi bonso. (Mat. 5:16) Tshilejilu tshia Timote tshidi tshileja ne: nansha bena Kristo badi ne majitu a pa buawu badi pabu ne bua kuleja kudi bantu bonso didiunda diabu mu ngikadilu ya buena Kristo.

Wikale tshilejilu mu mêyi

8. Mêyi etu adi ne mushinga kayi mu ntendelelu wetu?

⁸ Umue mushindu uvua Timote mua kuikala tshilejilu tshimpe nku mêyi ende. Mmunyi mutudi mua kuleja didiunda dietu mu bualu ebu? Mêyi etu atu aleja tshitudi. Yezu wakamba ne: ‘Mukana mudi muamba anu malu adi matambe kuvulangana mu mutshima.’ (Mat. 12:34) Yakobo muanabu ne Yezu uvua mujingulule pende mudi mêyi etu ne mushinga mu ntendelelu wetu. Wakafunda ne: ‘Biela muntu meji ne: ndi ndonda malu a Nzambi, padiye kayi ukanda ludimi luende, kadi udi udinga mutshima wende, bualu bua Nzambi bua muntu eu budi tshianana.’​—Yak. 1:26.

9. Mmu mushindu kayi utudi ne bua kuikala tshilejilu mu ngakuilu wetu?

⁹ Malu atudi tuakula adi aleja bena mu tshisumbu bakuabu mutudi badiunde mu malu a Nzambi anyi katuyi tudiunda. Nanku, pamutu pa kupatula mêyi mabi, adi apuekeshangana milongo anyi kujanangana peshi kutapangana ku muoyo, muena Kristo mushindame udi udienzeja bua kudiundisha bakuabu, kubakolesha, kubasamba ne kubakankamika. (Nsu. 12:18; Ef. 4:29; 1 Tim. 6:3-5, 20) Kuikala badilongolole bua kuyukila ne bantu bakuabu malu a bikadilu bimpe ne kuyisha mêyi a Nzambi kudi kuleja mutudi balamate Nzambi. (Lomo 1:15, 16) Bantu bena muoyo mutoke nebamone mutudi tuenza mudimu bimpe ne tshipedi tshia kuakula ne badi mua kutuidikija.​—Filip. 4:8, 9.

Tuikale tshilejilu mu bikadilu ne mu butoke bua mutshima

10. Bua tshinyi bidi bikengela kuikala ne ditabuja didi kadiye ne lubombo bua kudiunda mu nyuma?

¹⁰ Muena Kristo udi ne bua kuikala ne mêyi adi adiundisha bakuabu ne kuenza malu makuabu bua kuikala tshilejilu tshimpe. Muntu yeye wakula malu mimpe, kadi wenza malu mabi mmuena lubombo. Paulo uvua mumanye  bimpe lubombo lua Bafalese ne muvua njila uvuabu balonda muikale mubi. Wakadimuija Timote misangu ne misangu bua epuke lubombo ne mashimi bia mushindu eu. (1 Tim. 1:5; 4:1, 2) Kadi Timote kavua muena lubombo to. Mu mukanda muibidi uvua Paulo mufundile Timote, wakamba ne: ‘Ndi mvuluka ditabuja didi munda muebe didi kadiyi ne lubombo.’ (2 Tim. 1:5) Timote uvua ne bua kuleja bantu ne: mmuena Kristo wa bushuwa. Uvua ne bua kuikala ne bikadilu bimpe bia kutemba ku bantu.

11. Ntshinyi tshivua Paulo mufundile Timote bua biuma?

¹¹ Mu mikanda ibidi ivua Paulo mufundile Timote, wakamubela bua ikale ne bikadilu bimpe mu malu a bungi. Tshilejilu, Timote uvua ne bua kuepuka dikeba dia biuma. Paulo wakafunda ne: ‘Lukuka lua biuma ludi muji wa malu mabi a mishindu yonso; bidi bantu bakuabu badikebela ne bakasesuishibua mu njila wa ditabuja, bakadisunsula mubidi wonso ne tunyinganyinga tua bungi.’ (1 Tim. 6:10) Lukuka lua biuma ntshimanyinu tshia diteketa mu ditabuja. Kadi muena Kristo yeye ne disanka dia kuikala ne nsombelu kayi mukutakaja ne bintu, ‘muikale ne biakudia ne bia kuluata,’ udi uleja mudiye mudiunde mu ditabuja.​—1 Tim. 6:6-8; Filip. 4:11-13.

12. Mmunyi mudi muena Kristo yonso mua kuleja didiunda diende kudi bakuabu?

¹² Paulo wakambila Timote mudibi ne mushinga bua bakaji bena Kristo ‘badilengeje ne bilamba bidi bibakanyine; bikale ne kalolo ne bupuekele.’ (1 Tim. 2:9) Bana betu ba bakaji badi basungula bua kuvuala bilamba ne badilengeja ne kanemu ne budipuekeshi bu mudibu benza mu malu makuabu a mu nsombelu wabu, badi tshilejilu tshimpe. (1 Tim. 3:11) Nansha bana betu ba balume badi pabu ne kutumikila mubelu eu. Paulo wakabela bakulu bua bikale ‘bena meji mapole ne bupuekele; bamanye mua kulongolola malu abu bimpe.’ (1 Tim. 3:2) Patudi tuleja ngikadilu eyi mu nsombelu wetu wa dituku dionso, kudiunda kuetu nekumueneke kudi bantu bonso.

13. Anu bu Timote, mmunyi mutudi petu mua kuikala tshilejilu tshia butoke bua mutshima?

 ¹³ Timote uvua kabidi tshilejilu tshimpe mu butoke bua mutshima. Pavua Paulo muakule bua butoke bua mutshima, uvua wela meji ku nsombelu kampanda musunguluke wa malu a bikadilu bia bulume ne bukaji. Timote uvua ne bua kuikala muntu udi kayi mua kubandibua nangananga mu malanda ende ne bantu bakaji. Uvua ne bua kunemeka ‘bakaji banunu bu bamamu bamuledi; bansongakaji bu bana babu ba tatu umue mu butoke buonso bua mutshima.’ (1 Tim. 4:12; 5:2) Nansha muntu yeye muende masandi mu musokoko, Nzambi udi anu mumumone ne nebilue anu kumanyika kudi bantu bakuabu. Bia muomumue, muena Kristo yeye wenza malu mimpe bantu bakuabu nebaamone. (1 Tim. 5:24, 25) Tuetu bonso mu tshisumbu tudi ne mushindu wa kuleja didiunda dietu mu bikadilu ne mu butoke bua mutshima.

Dinanga ne ditabuja bidi ne mushinga

14. Mmushindu kayi udi Bible uleja mushinga wa tuetu kunangangana?

¹⁴ Tshimanyinu tshinene tshia bena Kristo balelela ndinanga. Yezu wakambila bayidi bende ne: ‘Bua bualu ebu bantu bonso nebamanye ne: nudi bayidi banyi, binuasuangana nunku.’ (Yone 13:35) Mmunyi mutudi mua kuleja dinanga dia nunku? Dîyi dia Nzambi didi ditusengelela bua “tunangangane” ne “tulejangane muoyo muimpe ne luse; tulengululangane bilema,” ne tuikale bakididianganyi. (Ef. 4:2, 32, MMM; Eb. 13:1, 2) Mupostolo Paulo wakafunda ne: ‘Mu dinanga dia bana benu ba mu Kristo nunangangane, muntu ne muntu.’​—Lomo 12:10.

15. Bua tshinyi bena Kristo bonso ne nangananga bakulu badi ne bua kuikala ne dinanga?

¹⁵ Bu Timote muikale wenzela bena Kristo nende malu makole, kabavua mua kumona malu mimpe avuaye wenza bu mulongeshi ne mukulu to. (Bala 1 Kolinto 13:1-3.) Bualu bukuabu, mushindu uvua Timote munange bikole bana babu bena Kristo, ubakidila ne ubenzela malu mimpe, bivua bileja muvuaye mudiunde mu ditabuja. Ke bualu kayi mu mukanda uvua mupostolo Paulo mufundile Timote uvua muakule bua dinanga, uleja ne: ngikadilu uvua Timote ne bua kuikala nende.

16. Bua tshinyi Timote uvua ne bua kuleja ditabuja dikole?

¹⁶ Ditabuja dia Timote diakatetshibua pavuaye ku Efeso. Bantu bakuabu bavua ne malongesha avua kaayi apetangana ne bulelela bua bena Kristo to. Banga bavua batangalaja “nsumuinu ya tshianana” anyi bakeba malu avua kaayi mua kuambuluisha tshisumbu mu nyuma nansha. (Bala 1 Timote 1:3, 4.) Paulo wakamba bua bantu aba ne: ‘mbuujibue ne diambu, kabayi bamanye muanda, kadi badi basama muoyo bua kukokangana ne bua kuelangana mpata.’ (1 Tim. 6:3, 4) Timote uvuaku mua kuteta bua kuanyisha ngenyi mibi ivua yenda ibuela mu tshisumbu anyi? Tòo, bualu Paulo uvua mumubele bua ‘aluangane mvita mimpe ya ditabuja,’ ne epuke ‘biakulakula bia patupu ne mpata ya bantu badi ne lungenyi ludibu batupakana ne: ndulelela.’ (1 Tim. 6:12, 20, 21) Bushuwa, Timote wakatumikila mubelu wa Paulo eu.​—1 Kol. 10:12.

17. Mmunyi mudi ditabuja dietu mua kutetshibua lelu?

¹⁷ Bualu bukuabu bua mushinga buvuabu bambile Timote budi ne: ‘Palua bikondo bia ku nshikidilu pabuipi, bantu bakuabu nebalekele ditabuja diabu, balamata ku nyuma idi ipambuisha ne ku mayisha a bademon.’ (1 Tim. 4:1) Nunku bena Kristo bonso mu tshisumbu ne aba badi ne majitu badi ne bua kuleja ditabuja dikole anu bu dia Timote. Tuetu badimukile  batontolodi ne bangate dipangadika dia kubepuka, kudiunda kuetu nekumueneke ne netuikale tshilejilu tshimpe tshia ditabuja.

Dienzeja bua kudiunda kuebe kumueneke

18, 19. (a) Mmunyi muudi mua kuleja kudiunda kuebe kudi bantu bonso? (b) Netulonge tshinyi mu tshiena-bualu tshidi tshilonda?

¹⁸ Bushuwa, ki ntshimuenekelu tshia mpala, mamanya anyi lumu ludi nalu muntu bidi mua kuleja ne: mmuena Kristo mushindame mu ditabuja to. Kushindama kakuena kumuenekela ku bungi bua bidimu bikadi muntu nabi mu tshisumbu to. Kadi, kudiunda kulelela mu ditabuja kudi kumueneka patudi tutumikila Yehowa mu lungenyi, mu mêyi ne mu bikadilu bietu. (Lomo 16:19) Tudi ne bua kutumikila mubelu wa kunangangana ne wa kukolesha ditabuja dietu. Nanku, tuelanganayi meji bua mêyi avua Paulo mufundile Timote ne tudifilayi ne muoyo mujima kudiwu bua kudiunda kuetu kumueneke kudi bonso.

¹⁹ Ngikadilu mukuabu udi uleja ne: tudi badiunde mu nyuma ne balue bena Kristo bashindame ndisanka, didi dikale tshitupa tshia dimuma dia nyuma muimpe wa Nzambi. (Gal. 5:22, 23) Mu tshiena-bualu tshidi tshilonda, netulonge mua kuikala ne disanka ne mua kudilama mu bikondo bia ntatu.

Newandamune munyi?

• Mmunyi mudi bakuabu mua kutumona bua mêyi atudi tuakula?

• Mmunyi mutudi mua kuleja kudiunda kuetu mu bikadilu ne mu butoke bua mutshima?

• Bua tshinyi bena Kristo badi ne bua kuikala bilejilu bimpe bia dinanga ne bia ditabuja?

[Nkonko ya dilonga]

[Tshimfuanyi mu dibeji 11]

Nansha muvua Timote nsonga uvua muena Kristo mushindame

[Bimfuanyi mu dibeji 13]

Kudiunda kuebe nkumueneke kudi bakuabu anyi?