Kuikala bantu ba Yehowa mbualu bua luse ludi kaluyi lutuakanyine

‘Tudi ba Mukalenge.’​—LOMO 14:8.

1, 2. (a) Ndiakalenga kayi ditudi nadi? (b) Netukebe mandamuna a nkonko kayi?

PAKAMBILA Yehowa bena Isalele ne: “Nuenu nenuikale bantu banyi ba munkatshi mua bantu bonso,” tshivua ndumu lunene kudibu. (Ekes. 19:5) Lelu eu kabidi badi mu tshisumbu tshia bena Kristo badi pabu ne lumu lua kuikala bantu ba Yehowa. (1 Pet. 2:9; Buak. 7:9, 14, 15) Adi ndiakalenga didi mua kutuambuluisha tshiendelele.

² Nansha mudi kuikala bantu ba Yehowa bualu bua diakalenga, kudi kabidi bu dibanza. Bamue badi mua kudikonka ne: ‘Meme eu nenkokeshe bua kuenza bidi Yehowa ujinga kundi? Kadi meme mulue kuenza bualu bubi, kakundekela anyi? Meme mulue muntu wa Yehowa, tshiakupangila budikadidi buanyi anyi?’ Mbiakane bua kukeba mandamuna a nkonko ya nunku. Kadi bangabanga kudi lukonko lukuabu ludi lukengela kuluelela meji bikole: Kuikala bantu ba Yehowa kudi ne masanka kayi?

Kuikala bantu ba Yehowa kudi kutufikisha ku disanka

3. Pavua Lahaba musungule bua kutendelela Yehowa biakamuambuluisha ku tshinyi?

³ Bantu badi ba Yehowa badiku ne masanka adibu bapeta bua tshidibu atshi anyi? Mona tshiakenzekela Lahaba, mukaji wa ndumba uvua mu tshimenga tshia kale tshia Yeleko.  Lahaba uvua ne bua kuikala mukolele mu ntendelelu ya bukoya ya nzambi ya bena Kanâna. Kadi pakumvuaye bua muvua Yehowa mutshimune baluishi ba bena Isalele, wakajingulula ne: Yehowa ke Nzambi mulelela. Ke pakaditekaye mu njiwu bua kusokoka bantu basungula ba Nzambi, e kubalombaye pabu bua kumulamabu ne muoyo matuku kumpala. Mukanda wa Nzambi udi wamba ne: ‘Lahaba, mukaji wa masandi, kakabingishibua ku kuenza kuende, bualu bua yeye wakangata bamisheshe, wakabatuma mu njila mukuabu anyi?’ (Yak. 2:25) Kadi elabi meji a malu mimpe avuaye mupete pakabuelaye mu ntendelelu mukezuke wa bantu ba Nzambi, bantu badi mikenji ya Nzambi milongeshe bua kuendela mu njila ya dinanga ne buakane. Si uvua ne bua kuikala ne disanka dia dikema bua muvuaye mulekele nsombelu wende mubi au wa kale’s! Bakamusela kudi muena Isalele mukuabu e kulelabu muana wa balume, diende Boaza, wakalua muntu wa mushinga mukole wa mu bantu ba Nzambi.​—Yosh. 6:25; Luta 2:4-12; Mat. 1:5, 6.

4. Mmushindu kayi uvua disungula dia Luta dia kutendelela Yehowa dimuambuluishe?

⁴ Luta muena Moaba pende wakasungula bua kutendelela Yehowa. Patshivuaye muana, uvua pamuapa utendelela nzambi Kemoshe ne nzambi mikuabu ya bena Moaba. Kadi wakalua kumanya Yehowa Nzambi mulelela, e kumuselabu kudi muena Isalele mukuabu uvua mulue kusombela mu ditunga diabu. (Bala Luta 1:1-6.) Pashishe, pakalua Luta ne mukenende Ôpa ne Naomi mamuenabu kuasa luendu bua kuya ku Beteleheme, Naomi wakasengelela Luta ne Ôpa bua kupinganabu ku mabu. Nsombelu kavua anu mua kubapepelela mu Isalele muvuabu baya to. Ke bualu kayi Ôpa ‘wakapingana kudi bana babu ne kudi nzambi wende,’ kadi Luta yeye kakapingana to. Wakalonda ditabuja diende, bualu uvua mujingulule uvuaye musue bua alue Mfumuende. Wakambila Naomi ne: ‘Kunsengeledi bua meme kukushiya ne bua kupingana tshikulondi; nenye kuwaya, nendale kuwalala, bantu bebe nebikale bantu banyi ne Nzambi webe neikale Nzambi wanyi.’ (Luta 1:15, 16) Bu muvua Luta musungule bua kutendelela Yehowa, mikenji ya Nzambi ivua ilombela bakaji ba mu lufuila ne bapele ne bavua kabayi ne maloba dikuatshisha dia pa buadi yakamuambuluisha bikole. Yehowa wakamukuba e kumulama, kumupeteshaye disanka divule.

5. Ntshinyi tshiudi mumonaku kudi bantu badi benzela Yehowa mudimu ne lulamatu?

⁵ Udi pamuapa mumanye bantu kampanda badi batungunuke anu ne kulamata Yehowa bidimu ne bidimu, bamuenzela mudimu katshia badilambula kudiye. Tetabi kubebeja malu mimpe adi kuenzela Nzambi mudimu au kubapetesha, kadi umvue. Nansha mudiku kakuyi muntu utu kayi ne ntatu, malu adi kaayi kuela mpata adi ajadika mêyi a mufundi wa Misambu aa ne: “Disanka didi kudi bantu badi ne Yehowa, Nzambi wabo!”​—Mus. 144:15.

Bidi Yehowa utulomba mbikumbanyine

6. Bua tshinyi ki mbimpe kutshina ne: katuena mua kukokesha bidi Yehowa utulomba?

⁶ Ukadi pamuapa mudiebeje ni wakokesha mua kuenza bidi Yehowa utekemena kuudi. Mbipepele bua muntu kupampakana padiye wela meji a kubanga kuenzela Nzambi mudimu,  kuenda mu mikenji yende, ne kuakula mu dîna diende. Tshilejilu, Mose wakadiumvua kayi mukumbane pavua Nzambi mumutume bua kuyikila ne bena Isalele ne kuyikila ne mukalenge wa Ejipitu. Kadi Yehowa Nzambi kavua mulombe Mose malu mapitshidile to, ‘wakamuyisha malu avuaye mua kuenza.’ (Bala Ekesode 3:11; 4:1, 10, 13-15.) Bu muvua Mose muitabe diambuluisha divuabu bamupe, wakapeta disanka pakabangaye kukumbaja disua dia Nzambi. Nansha tuetu kabidi, Yehowa kena utulomba malu adi matupite bukole to. Udi utumvuila mutudi bena mapanga, ne mmusue kutuambuluisha. (Mus. 103:14) Kuenzela Nzambi mudimu bu muyidi wa Yezu kudi kutukolesha pamutu pa kututondesha, bualu kuenza nanku kudi kuambuluisha bakuabu, kusankisha ne mutshima wa Yehowa. Yezu wakamba ne: ‘Luayi kundi, meme nennupe dikisha. Angatayi mutshi wanyi wa tshikokedi pa nshingu yenu, nuyile malu kundi; bualu bua meme ndi ne kalolo ne kanemu mu mutshima wanyi.’​—Mat. 11:28, 29.

7. Bua tshinyi udi mua kuikala mujadike ne: Yehowa neakuambuluishe bua kuenza tshidiye ukulomba?

⁷ Patudi tueyemena Yehowa bua kutupaye bukole, neikale anu utukankamija mudibi bikengela. Tshilejilu, mbimueneke ne: Yelemiya uvua muntu wa lumamamama. Ke bualu kayi pavua Yehowa mumupe mudimu wa buprofete wakamba ne: ‘Aka, Mukalenge Yehowa! Mona, tshiena mua kuakula bimpe, bualu bua ntshidi anu muana.’ Kuluaye kuamba kabidi ne: ‘Tshiena ngambila bantu dîyi diende kabidi.’ (Yel. 1:6; 20:9) Kadi Yehowa wakamukolesha, ne kupetaye bukole bua kuyisha mukenji uvua ba bungi kabayi basue kumvua munda mua bidimu 40. Yehowa wakamujadikila misangu ne misangu umuambila ne: ‘Ndi nebe bua kukupandisha.’​—Yel. 1:8, 19; 15:20.

8. Tudi tuleja ne: tudi beyemene Yehowa mushindu kayi?

⁸ Anu muvua Yehowa mukoleshe Mose ne Yelemiya, ke mudiye mua kutuambuluisha petu bua kuenza tshidiye ulomba bena Kristo lelu. Kadi tudi ne bua kueyemena Nzambi. Mukanda wa Nzambi udi wamba: ‘Eyemena Yehowa ne mutshima webe wonso, kueyemenyi dijingulula diebe dia mianda. Umumanye yeye bimpe mu bienzedi biebe bionso, yeye neakululamijile njila yebe.’ (Nsu. 3:5, 6) Tudi tuleja mutudi tueyemena Yehowa patudi tuanyisha diambuluisha didiye utupeshila mu Dîyi diende ne mu tshisumbu tshiende. Tuetu bitabe bua Yehowa kutulombola mu njila wa muoyo, kakuakuikala tshiatupangisha bua kushala bamulamate nansha.

Yehowa udi ulama yonso wa kutudi

9, 10. Ndikubibua dia mushindu kayi didi Musambu wa 91 utulaya?

⁹ Patu bantu belangana meji bua kudilambula kudi Yehowa, bamue batu pamuapa batshina ne: badi mua kuenza bubi ne kudimona kabayi ne mushinga ku mêsu kuende. Pende Yehowa yeye udi utukuba ne bitudi nabi dijinga bua kulama malanda etu nende a mushinga mukole. Tumonayibi mushindu udibu baleje bualu ebu mu Musambu wa 91.

¹⁰ Musambu eu udi utuadija ne: ‘Udi mushikame mu tshisokomenu tshia Nzambi Mutambe Bunene wa mulu neikale mu mundidimbi wa Nzambi wa Bukole Buonso. Nengambe bua Yehowa ne: Yeye udi tshinyemenu tshianyi ne musoko wanyi munnyunguluke ne Nzambi wanyi undi ngeyemena. Bualu bua neakupandishe ku buteyi bua tshilembi tshia nyunyi.’ (Mus. 91:1-3) Muaba eu Nzambi udi ulaya bua kulama bonso badi bamunange ne bamueyemena. (Bala Musambu wa 91:9, 14.) Nkubalama kua mushindu kayi kuvuaye wamba? Bushuwa, Yehowa wakalama mioyo ya bamue ba ku bantu bende ba kale. Uvua muenze nanku imue misangu bua ndelanganyi yabu kutungunukayi too ne ku Masiya uvuaye mubalaye. Kadi bakuabu ba bungi bavua ne ditabuja bakedibua mu maloko, kukengeshibua, kushipibua ne tshikisu tshibi menemene anu bua ne: balekele kulamata Nzambi. (Eb. 11:34-39) Bakapeta dikima divua dibakengela bua kunanukila, bualu Yehowa uvua ubalama mu ditabuja bua kabajimiji muoyo wabu mutoke. Nunku, tudi tumvua ne: kukubibua kudi Musambu wa 91 utulaya nkua ditabuja dietu.

11. (a) “Tshisokomenu tshia Nzambi Mutambe Bunene wa mulu” ntshinyi? (b) Nnganyi udi Nzambi ulamamu?

¹¹ Nanku “tshisokomenu tshia Nzambi Mutambe Bunene wa mulu” tshidi mufundi wa  Misambu mutele etshi mmuaba wa tshifuanyikijilu udibu bakuba ditabuja dietu. Badi basombe mu tshisokomenu etshi ne Nzambi bu benyi bende mbepula ku tshintu tshionso anyi muntu yonso udi ujinga kunyanga ditabuja diabu ne dinanga diabu dia Nzambi. (Mus. 15:1, 2; 121:5) Muaba eu mmusokome bualu bena panu kabena mua kuwujingulula to. Ke muaba udi Yehowa ulamina bantu badi bamuambila ne: ‘Udi Nzambi wanyi undi ngeyemena.’ Tuetu bashale anu mu muaba wa tshinyemenu eu, katuena ne bualu bua kutshina ne: netukuatshike mu buteyi bua Satana udi ‘tshilembi tshia nyunyi’ ne kubipila Nzambi to.

12. Nnjiwu kayi idi iluisha malanda etu ne Nzambi?

¹² Nnjiwu kayi idi iluisha malanda mimpe atudi badie ne Nzambi? Mufundi wa Musambu wa 91 mmuyileje ya bungi, bu mudi ‘tshipupu tshidi tshiendakana mu mîdima, ne dibutuka didi dibutula bantu munda munya.’ (Mus. 91:5, 6) ‘Tshilembi tshia nyunyi’ ntshiteye ba bungi ne dijinga dibi dia lungenyi lua budikadidi. (2 Kol. 11:3) Udi ukuata bakuabu padiye ubasaka ku muoyo wa zukuzuku, ku didisua, ne ku lukuka lua bintu. Kadi banga udi ubapambuisha ne ngenyi ya nkindi, bu mudi ya dinanga dinekesha dia buena muabu, ya mudi bia panu bidienze nkayabi, ne ya ntendelelu wa dishima. (Kolos. 2:8) Bavule pabu mmubalobeshe ne buteyi bua tshiendenda tshia masandi. Bipupu bidi binyangakaja ditabuja bia nunku mbifikishe bantu bapite bungi bua kujimija dinanga diabu kudi Nzambi.​—Bala Musambu wa 91:7-10; Mat. 24:12.

Lama dinanga diebe dia Nzambi

13. Mmalu kayi adi Yehowa mutulongoluele bua tuetu kulama ditabuja dietu?

¹³ Mushindu kayi udi Yehowa ulama bantu bende bua kabajimiji ditabuja diabu? Musambu udi wamba ne: ‘Yeye neakufile mu bianza bia banjelu bende bua kukulamabu mu njila yebe yonso.’ (Mus. 91:11) Banjelu batu batulama ne batuludika patudi tuyisha lumu luimpe. (Buak. 14:6) Pa kumusha banjelu, tudi kabidi ne bakulu mu bisumbu badi batulama ku meji mabi padibu balamata bikole ku Dîyi dia Nzambi padibu balongesha. Badi bambuluisha muntu yonso udi uditatshisha bua kutantamena lungenyi lua bena panu. (Tito 1:9; 1 Pet. 5:2) Kudi kabidi ‘mupika wa lulamatu ne wa budimu’ udi utupesha biakudia bia mu nyuma bua kutulama ku malongesha a mudi bintu bionso bidienze, ngenyi mibi ya tshiendenda, dikeba bubanji ne lumu, kabidi ne ku nkunka ne ngenyi yonso mibi idi mua kutuenzela bibi. (Mat. 24:45, NW) Ntshinyi tshidi tshikuambuluisha bua kutantamena njiwu eyi?

14. Tudi ne bua kuenza tshinyi bua Yehowa kutulamaye?

¹⁴ Ntshinyi tshitudi mua kuenza bua tuetu kushala mu bukubi mu “tshisokomenu” tshia Nzambi? Anu mututu tuenza bua kudilama ku njiwu idi mua kutukuata bu mudi ya mashinyi, ya bena tshinyangu, ya tuishi tudi mua kutukebela masama, ke mutudi kabidi mua kudilama ku njiwu ya mu nyuma. Nunku, tudi ne bua kuikala tubala mikanda yetu, tubuela mu bisangilu bionso ne mu mpuilu bua kupeta buludiki bua kudi Yehowa. Tudi kabidi ne bua kulomba mibelu kudi bakulu. Ngikadilu mimpe  idi nayi bana betu bena Kristo idi ituambuluisha payi. Bushuwa, kudisangisha ne bana betu mu tshisumbu kudi kutuambuluisha bua kulua bantu ba meji.​—Nsu. 13:20; bala 1 Petelo 4:10.

15. Bua tshinyi udi ne bua kuikala mujadike ne: Yehowa neakukube ku tshintu tshionso tshidi mua kutunyangila malanda etu nende?

¹⁵ Tuikala bashindike ne: Yehowa kakuitaba bua tshintu kampanda tshijimija dianyishibua dietu kudiye. (Lomo 8:38, 39) Udi ulama tshisumbu bua kabatshinyangi kudi bena mu bitendelelu bia dishima, bena malu a tshididi badi batukine, bualu kabatu bakeba nangananga kutushipa to, kadi batu bakeba bua tulekele Nzambi wetu wa tshijila. Dilaya dia Yehowa edi ditu anu diakumbana: ‘kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele.’​—Yesh. 54:17.

Udi utupesha budikadidi nnganyi?

16. Bua tshinyi bena panu kabena mua kutupesha budikadidi?

¹⁶ Kuikala bantu ba Yehowa kudiku kutupangisha budikadidi anyi? Tòo, pabi patudi tulamata bulongolodi ebu tudi mua kujimija budikadidi buetu. Bena panu badi kule ne Yehowa ne badi babakokesha kudi nzambi wa tshikisu utu ukuata bantu ku bupika. (Yone 14:30) Tshilejilu, ndongoluelu wa malu wa Satana udi wenza mudimu ne malu a makuta bua kunyenga bantu budikadidi buabu. (Tangila Buakabuluibua 13:16, 17.) Bubi budi kabidi ne bukole bua kupambula bantu ne kubakuata ku bupika. (Yone 8:34; Eb. 3:13) Nansha mudi bantu badi kabayi bena Kristo mua kutulaya budikadidi padibu batumbisha bualu kampanda budi Yehowa mutukandike, tuetu bitabe ngenyi yabu netulue bapika ba bubi ne ba malu mabi.​—Lomo 1:24-32.

17. Yehowa udi utupikula ku malu kayi?

¹⁷ Kadi tuetu beyemene Yehowa udi mua kutupikula ku tshintu tshionso tshidi mua kutuenzela bibi. Mu mushindu mukuabu, tudi anu bu muntu udi ufila mubidi wende kudi munganga wa dimanya dia bungi bua kumupanda bua kumumusha disama didi dimukengesha. Tuetu bonso tudi ne disama didi ditukengesha, disama adi ke mpekatu utudi bapiana. Nunku tuetu beyemene Yehowa, neatumbushe ku ntatu ya mpekatu ne kutupesha muoyo wa kashidi ku diambuluisha dia mulambu wa Yezu Kristo. (Yone 3:36) Anu mutudi mua kueyemena munganga utu upandangana patudi tumvua bakula bua dimanya diende, ke mutudi kabidi tueyemena Yehowa bikole patudi tutungunuka ne kulonga malu adi amutangila. Nunku, tudi tutungunuka ne kulonga Dîyi dia Nzambi ne muoyo mujima bualu nekutuambuluishe bua kumunanga ne kubenga kutshina bua kuikala bantu bende.​—1 Yone 4:18.

18. Bantu ba Yehowa nebapete masanka kayi?

¹⁸ Yehowa mmupeshe bantu bonso budikadidi bua kudisunguila malu. Dîyi diende didi diamba ne: “Nudisunguile muoyo, nenuikale ne muoyo ne nuenu ne bana benu; bua kunanga Yehowa Nzambi wenu.” (Dut. 30:19, 20) Mmusue bua tuleje mutudi bamunange patudi tusungula bua kumuenzela mudimu. Kuikala bantu ba Nzambi utudi banange kudi kutuambuluisha bua kuikala ne disanka, kakuena kutupangisha bua kuikala ne budikadidi to.

19. Bua tshinyi kuikala bantu ba Yehowa nduse ludi kaluyi lutuakanyine?

¹⁹ Mutudi bena mapanga, katuena bakumbane bua kuikala bantu ba Nzambi mupuangane. Kadi tudi tulua bantu bende anu bua luse luende ludi kaluyi lutuakanyine. (2 Tim. 1:9) Ke bualu kayi Paulo wakafunda ne: ‘Bituikala ne muoyo, tudi ne muoyo bua Mukalenge; bituafua, tufuafua bua Mukalenge; nunku, bituikala ne muoyo, anyi bituafua, tudi ba Mukalenge.’ (Lomo 14:8) Katuakunyingalala dituku nansha dimue bua mutudi basungule bua kuikala bantu ba Yehowa to.

Newandamune munyi?

• Kuikala bantu ba Yehowa kudi kutupetesha masanka kayi?

• Bua tshinyi tudi mua kukokesha bua kuenza tshidi Nzambi utulomba?

• Mmushindu kayi udi Yehowa ulama bantu bende?

[Nkonko ya dilonga]

[Tshimfuanyi mu dibeji 8]

Konka bantu malu mimpe adibu bapete padibu balue bantu ba Yehowa

[Tshimfuanyi mu dibeji 10]

Ngimue mishindu kayi idi Yehowa utulama?