Tshiudi ne bua kudilambuila kudi Yehowa

‘Muanjelu wa Nzambi wanyi undi nkuatshila mudimu, wakuimana pabuipi nanyi butuku ebu.’​—BIEN. 27:23.

1. Mmalu kayi adi bantu badi basue kutambula ne bua kuanji kuenza? Kadi nkonko kayi itu ijuka pa bualu ebu?

“KU DIAMBULUISHA dia mulambu wa Yezu Kristo, ukadi munyingalale bua mibi yebe, muyilekele ne mudilambule kudi Yehowa bua kuenza disua diende anyi?” Elu ndumue lua ku nkonko ibidi itu batu bajinga kutambula bandamuna ku ndekelu kua muyuki wa ntambu. Bua tshinyi bena Kristo badi ne bua kudilambula kudi Yehowa? Nku tshinyi kudi didilambula kudi Nzambi dituambuluisha? Bua tshinyi muntu udi kayi mudilambule kudi Nzambi kena mua kutendelela Nzambi bu mudiye musue? Bua kupeta mandamuna a nkonko eyi, mbimpe tuanji tumanye tshidi kudilambula kuine kumvuija.

2. Kudilambula kudi Yehowa kudi kumvuija tshinyi?

² Kudilambula kudi Nzambi kudi kumvuija tshinyi? Mona muvua mupostolo Paulo mumvuije malanda avuaye nawu ne Nzambi. Wakajuka kumpala kua bantu ba bungi bavuabu nabu mu buatu buvua buamba kudîna, ne kubikila Yehowa ne: Nzambi “undi meme muntu wende nsadila.” (Bien. 27:22-24, MMM) Bena Kristo balelela bonso mbantu ba Yehowa. Kadi bena panu bonso badi “mu bukokeshi bua mubi.” (1 Yone 5:19, Muanda Mulenga Lelu) Bena Kristo badi balua bantu ba Yehowa padibu badilambula kudiye mu disambila mu mushindu udiye musue. Didilambula dia mushindu eu mmutshipu udi muntu udienzela nkayende, pashishe balua kumutambuisha mu mâyi.

3. (a) Ditambula dia Yezu divua dileja tshinyi? (b) Mmunyi mudi bayidi bende mua kumuidikija?

³ Yezu mmutushile tshilejilu tshimpe pavuaye musungule bua kuenza disua dia Nzambi. Bu muvuaye muledibue mu tshisamba tshia Isalele tshikavua tshidilambule kudi Nzambi, mmumue ne: ukavua mudilambule kudi Nzambi. Kadi dituku diakatambulaye, kakenza anu tshivua Mikenji ya Mose ilomba to. Dîyi dia Nzambi didi dileja muvuaye muambe ne: ‘Mona, ngakulua bua kuenza disua diebe, Nzambi.’ (Eb. 10:7; Luka 3:21) Nunku ditambula dia Yezu divua dileja muvuaye mudifile kudi Nzambi bua kuenza disua dia Tatuende. Bayidi bende badi bamuidikija padibu pabu  batambula. Kadi buabu bobu, padibu batambula mu mâyi badi baleja patoke muvuabu badilambule kudi Nzambi mu disambila.

Mudi kudilambula kutuambuluisha

4. Ntshinyi tshidi bulunda bua Davidi ne Yonatana butulongesha bua dipunga tshipungidi?

⁴ Buetu tuetu bena Kristo, kudilambula kudi Nzambi ki mbualu bua bilele to. Kakuena kumvuija anu kuditshipa patupu to. Kadi nku tshinyi kudi didilambula dituambuluisha? Bua kumvua bimpe, tuakulabi bua diambuluisha ditu bantu bapeta padibu bapunga dîyi mu nsombelu yabu ne bantu nabu. Tshilejilu tshinene ntshia badiadia bulunda. Bua bulunda buenu ne muntu kukuambuluishabu, udi ne bua kuitaba malu adibu bukulomba. Mmumue ne: udi ne bua kudifila kudiye, tuambe ne: kudiumvua ne dibanza dia kuditatshisha bua bualu buende. Bumue bua ku malunda matambe buimpe adibu batele mu Bible mbua Davidi ne Yonatana. Bakapunga too ne tshipungidi tshia bulunda buabu. (Bala 1 Samuele 17:57; 18:1, 3.) Nansha mutu malunda a bungi kaayi pamuapa a badia tshipungidi nunku, mavule a kudiwu atu aya kumpala padi balunda badifila kudi yonso wa kudibu, anyi udiumvua ne dibanza dia muinende.​—Nsu. 17:17; 18:24.

5. Ntshinyi tshivua mupika uvua musue kushala kua mfumuende bua kashidi ne bua kuenza?

⁵ Mikenji ivua Nzambi mupeshe Nzambi bena Isalele idi ileja malanda a mushindu mukuabu avua ambuluisha bantu pavuabu bapunga tshipungidi. Tshilejilu, pavua mupika wanyisha bua kushala kashidi kudi mfumuende uvua umulama bimpe, mupika au uvua wenza nende tshipungidi tshia kashidi tshivua tshimushiya muena dibanza. Mikenji ya Mose idi yamba ne: ‘Biamba mupika ne: Ndi musue mukalenge wanyi ne mukajanyi ne bana banyi, tshiena musue kupeta budishikaminyi, nunku mukalenge wende nealue nende kudi balumbuluishi, nealue nende ku tshîbi anyi ku tshipanda tshia tshîbi ne mukalenge wende neatubuishe ditshi diende ne tshiamu ne yeye neamukuatshile mudimu tshiendelele.’​—Ekes. 21:5, 6.

6, 7. (a) Tshipungidi tshitu tshiambuluisha bantu ku tshinyi? (b) Bualu ebu budi buleja tshinyi bua malanda etu ne Yehowa?

⁶ Dibaka mbulunda budi bulomba bantu bua kuenza mitshipu ya mushinga mukole. Mulume anyi mukaji udi uditshipa kudi muntu nende, ki nkudi tshipungidi to. Padi mulume musombe ne mukaji patupu kabayi baselangane, bobu nansha bana badibu balele, ki mbajadike ni basomba pamue kashidi anyi nebalekelangane. Kadi mulume ne mukaji badi baditshipe ne baselangane bilondeshile mikenji ya mbulamatadi, badi badiumvua ne dibanza dikole kumpala kua Bible dia kudienzeja bua kujikija bilumbu biabu ne dinanga padibi bijuka.​—Mat. 19:5, 6; 1 Kol. 13:7, 8; Eb. 13:4.

⁷ Kale patshivuabu bafunda Bible, kuditshipa mu malu a mishinga kuvua kupetesha bantu malu mimpe a bungi. (Mat. 20:1, 2, 8) Ke mudibi kabidi lelu. Tshilejilu, bitu bituambuluisha patutu tuenza tshipungidi tshifunda pa dibeji kumpala kua tuetu kubanga malu a mishinga anyi kutuadija kuenza mudimu mu kumpanyi. Bikala tshipungidi tshilengeja malanda bu mudi a bulunda, a mu dibaka, ne a mu malu a midimu, kudilambula kuebe ne muoyo mujima kudi Yehowa kudi mua kukuambuluisha kabidi mu bulunda buenu nende bikole menemene. Mpindieu, tumonabi muvua kudilambula kudi Yehowa Nzambi kuambuluishe bantu pa kale ne muvua didilambula dipite kule ne kule didia dia tshipungidi patupu.

Muvua kudilambula kudi Nzambi kuambuluishe bena Isalele

8. Kudilambula kudi Nzambi kuvua kumvuija tshinyi bua bena Isalele?

⁸ Bena Isalele bakadilambula tshisamba tshijima kudi Yehowa Nzambi pavuabu baditshipe kudiye. Yehowa wakabasangisha pabuipi ne mukuna wa Sinai ne kubambila ne: ‘Binuatumikila dîyi dianyi, ne binuanemeka tshipungidi tshianyi, nuenu nenuikale bantu banyi ba munkatshi mua bantu bonso.’ Ke bantu bonso kuandamuna ne dîyi dimue ne: ‘Netuenze mêyi onso akutuambila Yehowa.’ (Ekes. 19:4-8) Kuikala badilambule kua bena Isalele kuvua kumvuija malu a bungi kupita kuikala badifile patupu ku bualu kampanda. Kuvua kumvuija ne: bavua balue  “bantu” ba Yehowa, ke Yehowa kutuadija kubangata bu tshintu tshiende tshia pa buatshi.

9. Nku tshinyi kuvua didilambula dia bena Isalele kudi Nzambi dibambuluishe?

⁹ Dikala bantu ba Yehowa divua diambuluishe bena Isalele. Yehowa uvua mubalamate ne kubatshiungaye anu mutu muledi udi munange muanende umutshiunga. Wakabambila ne: ‘Mukaji udi mua kupua muanende utshidi wamua mabele muoyo, bua yeye kafuidi muana wa balume wakulelaye luse anyi? Bulelela, bantu aba mene badi mua kupua muoyo, kadi meme tshiena nkupua wewe muoyo.’ (Yesh. 49:15) Yehowa wakabalombola ne mikenji yende, kubakolesha ne mêyi a baprofete, ne kubakubaye ne banjelu bende. Umue wa bafundi ba Misambu wakamba ne: ‘Udi umanyisha Yakoba dîyi diende, udi uyisha bena Isalele mikenji yakubafundilaye ne mêyi adiye musue benze. Kena muenzele ba mu tshinga tshisamba nunku nansha.’ (Mus. 147:19, 20; bala Musambu wa 34:7, 19; 48:14.) Anu muvua Yehowa mulame tshisamba tshiakalua tshiende kale, ke mudiye ulama kabidi badi badilambula kudiye lelu.

Tshitudi ne bua kudilambuila kudi Nzambi

10, 11. Tudiku baledibue bu bana ba mu dîku dinene dia Nzambi anyi? Umvuije.

¹⁰ Padi bamue bela meji ni badi mua kudilambula ne kutambula bu bena Kristo, badi mua kudiebeja ne: ‘Kadi, tshiena mua kutendelela Nzambi patupu tshiyi mudilambule kudiye anyi?’ Tshitudi ne bua kudilambuila kudiye tshidi tshiumvuika patudi tutangila tshitudi kumpala kua Nzambi lelu eu. Tuvuluke ne: bua bubi bua Adama, tuetu bonso tudi baledibue pambelu pa dîku dia Nzambi. (Lomo 3:23; 5:12) Nunku bua Nzambi kutuitabaye mu dîku dia bana bende ba mu diulu ne pa buloba, tudi ne bua kudilambula kudiye. Bua tshinyi?

¹¹ Kakuena umue wetu uvua tatuende mumuledi mua kushila muoyo udi kauyi kalema uvua Nzambi mutujingile. (1 Tim. 6:19) Katuena baledibue bu bana ba Nzambi bualu pakenza baledi betu ba kumpala bubi, bantu bonso bakatapuluka ne Tatuabu wakabafuka. (Tangila Dutelonome 32:5.) Katshia anu pinapu, bantu bonso bakapatuka mu dîku dia bana ba Yehowa ba mu diulu ne ba pa buloba, kutapulukanganabu ne Nzambi.

12. (a) Bantu bena mapanga badi mua kulua ba mu dîku dia Nzambi mushindu kayi? (b) Ntshinyi tshitudi ne bua kuenza kumpala kua kutambula?

¹² Nansha nanku, muntu yonso udi pende mua kulomba bua Nzambi amuitabe bu muana wa mu dîku dia bantu bende badiye wanyisha. * Mmunyi muenzekabi nanku petu batshikale bena mibi? Mupostolo Paulo wakafunda ne: ‘Patuakadi bena lukuna ba Nzambi, tuvua balengeje nende ku lufu lua Muanende.’ (Lomo 5:10) Dîba dituakatambula tuakalomba Nzambi bua tuikale ne kondo ka muoyo kimpe bua kutuanyishaye. (1 Pet. 3:21) Kadi kumpala kua kutambula, kudi malu atudi ne bua kuanji kuenza. Tudi ne bua kumanya Nzambi, kulonga mua kumueyemena, kunyingalala bua mibi yetu ne kukudimuka mu bienzedi bietu. (Yone 17:3; Bien. 3:19; Eb. 11:6) Kadi nkushale tshikuabu tshintu tshia tuetu kuenza kumpala kua Nzambi kutuanyishaye mu dîku diende. Ke tshinyi atshi?

13. Bua tshinyi mbikumbane bua muntu kuenzaye mutshipu wa didilambula kudi Nzambi bua kushishaye kubuela mu dîku dia batendeledi bende?

¹³ Kumpala kua muntu udi mutapuluke ne Yehowa Nzambi kubuelaye mu dîku dia basadidi bende badiye wanyisha, udi ne bua kuanji kuditshipa kudiye. Bua kumvua muanda eu, tuangate tshilejilu tshia tatu kampanda (muntu wa kunemeka) udi umvuila nsonga kansanga muan’a nshiye luse ne musue kumupiana mu dîku diende. Tatu mmumanyike mutuye muntu muimpe. Kadi kumpala kua kupianaye muana au, mmusue bua muana adiakuile, amutudile dîyi. Nunku tatu udi umuambila ne: “Kumpala kua meme kukuangata bu muananyi, ndi musue kumanya ni wikala munnange, ni unnemeka bu tatuebe.” Anu muana yeye muitabe ne muditshipa muenzaye malu aa ke tatu au kushisha kumuangata mu dîku diende. Tshidi tatu au  ukeba ki ntshibi to. Bia muomumue, anu badi badisuile bua kuditshipa mutshipu wa didilambula kudi Yehowa ke badiye witaba mu dîku diende. Bible udi wamba ne: ‘Nufile mibidi yenu bu mulambu udi ne muoyo, wa tshijila, udi usankisha Nzambi bimpe.’​—Lomo 12:1.

Ntshienzedi tshia dinanga ne ditabuja

14. Nku tshinyi kudi didilambula dikale mushindu wa kuleja dinanga?

¹⁴ Kuenza mutshipu wa didilambula kudi Yehowa mmushindu wa kuleja mutudi bamunange ne muoyo mujima. Mu malu a bungi, nkuenze anu bu mitshipu itu bantu benza dituku dia dibaka. Dîba adi mulume muena Kristo utu uleja dinanga diende padiye uditshipa bua kushala mulamate mukajende nansha bia kumona lufu. Udi uditshipa kudi muntu pamutu pa kumulaya anu patupu muenzaye bualu kampanda. Mulume muena Kristo mmumvue bimpe ne: kena mua kupeta diakalenga dia kusomba ne mukajende yeye kayi muditshipe mutshipu wa dibaka nansha. Bia muomumue, katuena mua kupeta masanka onso a dikala ba mu dîku dia Yehowa patudi katuyi benze mutshipu wa didilambula to. Nanku, tudi tudilambula kudi Nzambi nansha mutudi bena mapanga bualu tudi tujinga bua kumusankisha ne badisuike bua kushala bamulamate nansha bia kumona lufu.​—Mat. 22:37.

15. Mmushindu kayi udi didilambula dikale tshienzedi tshia ditabuja?

¹⁵ Patudi tudilambula kudi Nzambi, tudi tuleja mutudi ne ditabuja. Bua tshinyi bidi nanku? Bualu ditabuja ditudi nadi kudi Yehowa didi ditupa dishindika dia se: kusemena pabuipi nende nkuimpe buetu tuetu. (Mus. 73:28) Tudi bajadike ne: kabiakuikala anu bipepele misangu yonso bua kuenda ne Nzambi patutshidi munkatshi mua ‘bena tshikondo tshikonyangale ne tshia tshishiku’ etshi to, kadi tudi beyemene anu Nzambi udi mutulaye bua kutukuatshisha mu bionso. (Filip. 2:15; 4:13) Tudi bamanye ne: tudi bena mapanga, kadi tudi bajadike ne: nansha tuetu benze bilema, Yehowa neatuleje luse luende. (Bala Musambu wa 103:13, 14; Lomo 7:21-25.) Tudi bitabuje ne: Yehowa neatuambuluishe patudi badisuike bua kulama muoyo wetu mutoke.​—Yobo 27:5.

Didilambula kudi Nzambi didi dipetesha disanka

16, 17. Bua tshinyi kudilambula kudi Yehowa kudi kutupetesha disanka?

¹⁶ Kudilambula kudi Yehowa kudi kutupetesha disanka bualu kudi kumvuija didifila dietu kudiye. Yezu wakaleja bulelela menemene pakambaye ne: ‘Kupa kudi kutamba kuangata kusankisha muntu.’ (Bien. 20:35) Yezu uvua mumvue bimpe mutu disanka dia kupangana pavuaye wenza mudimu wende pa buloba. Uvua udipangisha too ne dikisha, biakudia anyi bintu bimpe bia mu nsombelu pavuabi bikengela bua kuambuluisha bantu bua kupetabu njila wa muoyo. (Yone 4:34) Yezu uvua usanka bua kusankisha mutshima wa Tatuende. Ke bualu kayi wakamba ne: “Matuku onso ntu ngenza malu adi amusankisha.”​—Yone 8:29; Nsu. 27:11.

¹⁷ Nunku Yezu uvua muleje bayidi bende nsombelu udi upetesha disanka pakambaye  ne: ‘Biasua muntu kundonda, adipidie.’ (Mat. 16:24) Kuenza nunku kudi kutuambuluishe bua kusemena pabuipi ne Yehowa. Katuenaku mua kudifila mu bianza bia muntu udi mua kututshiunga ne dinanga dionso anyi?

18. Bua tshinyi kudilambula kudi Yehowa kudi kupetesha disanka dipite dia kudilambula kudi tshintu anyi kudi muntu?

¹⁸ Kudilambula kudi Yehowa ne kuikala ne nsombelu udi umvuangana ne didilambula adi bidi bitupetesha disanka dipite dia kudifila kudi tshintu kampanda anyi kudi muntu. Tshilejilu, bantu bavule batu badifila ne nsombelu wabu mujima anu ku dikeba mabanji, kadi kabayi bapeta diakalenga anyi disanka dilelela nansha. Kadi badi badilambula kudi Yehowa batu bobu bapeta disanka dia kashidi. (Mat. 6:24) Lumu luabu lua mudibu ‘benzejanganyi ba mudimu ne Nzambi’ ludi lubapetesha disanka. Tshidibi, ki mbadilambule kudi mudimu to, kadi nkudi Nzambi wetu utu muena dianyisha. (1 Kol. 3:9) Kakuena mukuabu udi mua kubaleja dianyisha bu dia Nzambi wetu bua didifila diabu to. Neapingaje too badi bamulamate ku bunsonga bua basanke mu bulami buende kashidi ne tshiendelele.​—Yobo 33:25; bala Ebelu 6:10.

19. Ndiakalenga kayi didi nadi bantu badi badilambule kudi Yehowa?

¹⁹ Kulambula kua muoyo webe kudi Yehowa kudi kukuambuluisha bua kusemena kudiye bikole. Bible udi wamba ne: ‘Semenayi pabuipi ne Nzambi ne yeye neasemene pabuipi nenu.’ (Yak. 4:8; Mus. 25:14) Mu tshiena-bualu tshidi tshilonda, netumone tshitudi katuyi ne bua kutshinyina bua kusungula bua kuikala bantu ba Yehowa.

[Mêyi adi kuinshi]

Newandamune munyi?

• Kudilambula kudi Nzambi kudi kumvuija tshinyi?

• Nku tshinyi kudi kudilambula kudi Nzambi kutuambuluisha?

• Bua tshinyi bena Kristo badi ne bua kuikala badilambule kudi Yehowa?

[Nkonko ya dilonga]

[Tshimfuanyi mu dibeji 6]

Kuikala ne nsombelu udi umvuangana ne didilambula dietu kudi kutupetesha disanka dia kashidi