Tukebe mabenesha a Yehowa ne muoyo mujima

‘[Nzambi] udi mufutshi wa badi bamukeba.’​—EB. 11:6.

1, 2. (a) Mmushindu kayi udi bantu ba bungi bakeba mabenesha a Nzambi? (b) Bua tshinyi tudi dijinga ne mabenesha a Yehowa?

MIABA ya bungi bantu batu ne tshibidilu tshia kuambila nansha muntu udibu kabayi bamanye ne: “Nzambi akubeneshe” bua kubela tuasakidila anyi kubalaya. Bamfumu ba bitendelelu bia bungi batu babenesha bantu, nyama ne bintu. Bantu bakuabu batu benza ngendu baya miaba ya tshijila ya bitendelelu biabu bua kupeta mabenesha. Bena tshididi batu ne tshibidilu tshia kulomba Nzambi bua abeneshe ditunga diabu. Udiku wela meji ne: bantu bonso aba badi balomba mabenesha mudibi bikengela anyi? Kulomba eku kudiku ne mushinga anyi? Nnganyi udi mua kupeta mabenesha a kudi Nzambi? Bua tshinyi?

² Yehowa wakamanyisha ne: mu matuku a ku nshikidilu, neikale ne tshisamba tshikezuke tshia bantu ba mu bisamba bionso badi banange ditalala bavua ne bua kuyisha lumu luimpe lua Bukalenge buende too ne kumfudilu kua buloba nansha muvuabu ne bua kubakina ne kubakengesha. (Yesh. 2:2-4; Mat. 24:14; Buak. 7:9, 14) Tuetu badi bitabe bua kuikala munkatshi mua tshisamba etshi, tudi basue kupeta mabenesha a Nzambi ne tudi nawu dijinga bualu wowu ke adi atupetesha masanka. (Mus. 127:1) Kadi mmunyi mutudi mua kupeta mabenesha a Nzambi?

Bantu badi batumikila Nzambi badi bapeta mabenesha

3. Bu bena Isalele batumikile Nzambi, ntshinyi tshivua mua kuenzeka?

³ Bala Nsumuinu 10:6, 7. Matuku makese  kumpala kua bena Isalele kubuela mu buloba bulaya, Yehowa wakabambila ne: bu bobu mua kutumikila mêyi ende bavua ne bua kuikala bimpe. (Dut. 28:1, 2) Mabenesha a Yehowa kaavua anu ne bua kulua kudi tshisamba tshia Nzambi, kadi avua ne bua ‘kubapeta.’ Bantu bavua bamutumikila, bavua bashindike ne: bavua ne bua kupeta mabenesha au.

4. Ditumikila dilelela didi diumvuija tshinyi?

⁴ Bena Isalele bavua ne bua kutumikila bishi? Nzambi uvua muambe ne: uvua ne bua kunyingalala pavua bena mu tshisamba tshiende babenga kumuenzela mudimu “ne disanka mu mitshima.” (Bala Dutelonome 28:45-47.) Katuena ne bua kutumikila Yehowa anu bualu mmuambe bua tumutumikile to, bualu nansha nyama anyi bademon batu benza nunku. (Mâko 1:27; Yak. 3:3) Patudi tumutumikila ne muoyo wetu mujima, tudi tuleja mutudi bamunange. Ditumikila edi ditu dimuenekela ku disanka didi difumina ku dishindika dia ne: mikenji ya Yehowa kayena ne bujitu ne “udi mufutshi wa badi bamukeba” ne muoyo umue.​—Eb. 11:6; 1 Yone 5:3.

5. Mmunyi muvua kumanya ne: Yehowa neabeneshe bantu mua kuambuluisha muntu bua kutumikila mukenji udi mu Dutelonome 15:7, 8?

⁵ Tumone tshivua muntu uvua mumanye ne: Nzambi neamubeneshe ne bua kuenza bua kutumikila mukenji udi mu Dutelonome 15:7, 8. (Bala.) Kutumikila mukenji au ne mioyo ibidi kuvua mua kuambuluisha bapele mu mushindu kampanda, kadi kuvuaku mua kukebesha malanda mimpe munkatshi mua bena Isalele anyi? Kuvuaku kuleja muvua muntu witabuja mudi Yehowa muikale ne bukole bua kuambuluisha batendeledi bende ne uleja muvuaye musue kuidikija mutu Yehowa upeshangana bintu anyi? Nansha kakese! Nzambi uvua utangila muoyo wa muntu uvua upeshangana bintu ne disanka ne uvua ulaya bua kumubenesha mu midimu yende yonso. (Dut. 15:10) Kuitabuja mulayi eu kuvua kusaka muntu bua kuenza malu mimpe ne kumupetesha mabenesha a bungi.​—Nsu. 28:20.

6. Ebelu 11:6 udi utushindikila bualu kayi?

⁶ Pa kumbusha kuikala ne ditabuja kudi Yehowa bu mufutshi, Ebelu 11:6 udi uleja ngikadilu mukuabu udi ne mushinga bua tuetu kupeta mabenesha a Nzambi. Mvese eu udi uleja ne: Yehowa udi ufuta bantu “badi bamukeba.” Muaku wa mu tshiena Greke udibu bakudimune muaba eu uvua uleja kuenza bualu ne bukole buonso. Bualu ebu budi ne bua kutushindikila ne: netupete mabenesha, bualu adi afumina kudi Nzambi umuepele mulelela ‘udi kayi mua kudinga.’ (Tito 1:2) Mmuleje munkatshi mua bidimu bia bungi ne: utu ukumbaja malu onso atuye ulaya. Dîyi diende kaditu dipangila; ditu anu dikumbana. (Yesh. 55:11) Nunku tudi ne bua kushindika ne muoyo mujima ne: tuetu bikale ne ditabuja dilelela, neatufute.

7. Mmunyi mutudi mua kupeta mabenesha ku diambuluisha dia “kankanunuina” ka Abalahama?

⁷ Yezu Kristo ke uvua tshitupa tshia kumpala tshia “kankanunuina” ka Abalahama. Bena Kristo bela manyi ke badi benza tshitupa tshibidi tshia “Kankanunuina” aku. Mbabapeshe mudimu wa ‘kuamba bua buimpe bua Nzambi wakababikila bua kubapatula mu mîdima bua kubabueja mu munya wende wa dikema.’ (Gal. 3:7-9, 14, 16, 26-29; 1 Pet. 2:9) Katuena mua kuikala mu malanda mimpe ne Yehowa tuetu tubenga kuteleja bantu badi Yezu musungule bua kutangila bintu biende. Katuena mua kumvua bimpe malu atudi tubala mu Dîyi dia Nzambi ne kuatumikila kakuyi diambuluisha dia ‘mupika wa lulamatu ne wa budimu.’ (Mat. 24:45-47, NW) Patudi tutumikila malu atudi tulonga mu Bible, netupete mabenesha a Nzambi.

Tutuishile mêsu pa disua dia Nzambi

8, 9. Mmunyi muvua Yakoba mudienzeje bua kupeta malu avuaye mulombe?

⁸ Tshilejilu tshia Yakoba tshidi tshileja tshidi kudienzeja bua kupeta mabenesha a Nzambi kumvuija. Kavua mumanye muvua bualu buvua Nzambi mulaye kakuende Abalahama ne bua kukumbana to, kadi uvua mutuishibue  ne: Yehowa neavudije bankana ba Abalahama bua balue tshisamba tshinene. Nunku, mu 1781 kumpala kua Yezu, Yakoba wakaya ku Halana bua kukeba mukaji. Kavua musue kupeta mukaji uvua umusankisha patupu to, kadi uvua ukeba mukaji uvua utendelela Yehowa ne uvua ne bua kulua mamu muimpe wa bana bende.

⁹ Tudi bamanye ne: Yakoba wakapetangana ne mulela wende Lakela. Wakamunanga ne kuitaba bua kuenzela tatuende Labana mudimu bidimu muanda mutekete bua kumusela. Bualu ebu ki mmuyiki wa mananga patupu to. Yakoba uvua mumanye mulayi uvua Nzambi wa Bukole Buonso mulaye kakuende Abalahama ne muambuluile kabidi tatuende Isaka. (Gen. 18:18; 22:17, 18; 26:3-5, 24, 25) Pashishe, Isaka wakambila muanende Yakoba ne: ‘Nzambi wa Bukole Buonso akusankishe, akukumbaje, akuvuije bana ba bungi bua wewe ulue tshisumbu tshinene tshia bantu; akupe wewe ne tunkanunuina tuebe disanka dia Abalahama, bua wewe kupiana buloba buakalaya Nzambi Abalahama.’ (Gen. 28:3, 4) Nunku mushindu uvua Yakoba mudienzeje bua kupeta mukaji mukumbane ne kulela bana wakaleja muvuaye weyemena dîyi dia Yehowa.

10. Bua tshinyi Yehowa wakabenesha Yakoba?

¹⁰ Yakoba kavua ukeba bubanji bua dîku diende to. Lungenyi luende luvua ku bualu buvua Yehowa mulaye bua tunkanunuina tuende. Lungenyi luende luvua lutuishile pa dikumbana dia disua dia Yehowa. Uvua mudisuike bua kuenza bionso bivua bikengedibua bua kupeta mabenesha a Nzambi nansha muvuaku ntatu. Wakashala anu ne lungenyi elu too ne ku bukulakaje buende ne Yehowa wakamubenesha bua bualu abu.​—Bala Genese 32:24-29.

11. Ntshinyi tshitudi ne bua kuenza mu diumvuangana ne disua dia Nzambi didi mu Bible?

¹¹ Anu bu Yakoba, katuena bamanye malu onso adi atangila dikumbana dia disua dia Yehowa. Kadi patudi tulonga Dîyi diende, tudi tumvua amue malu adi atangila ‘dituku dia Yehowa.’ (2 Pet. 3:10, 17) Tshilejilu, katuena bamanye dîba dialua dituku adi to, kadi tudi bamanye ne: dikadi pabuipi. Tudi tuitaba padi Dîyi dia Nzambi diamba ne: patudi tuyisha ne muoyo umue mu matuku makese adi mashale aa, netudisungile tuetu bine ne bantu badi batuteleja.​—1 Tim. 4:16.

12. Ntshinyi tshitudi ne bua kuikala bashindike?

 ¹² Tudi bamanye ne: nshikidilu udi mua kulua dîba kayi dionso. Yehowa kakuindila bua muntu yonso wa pa buloba umvue lumu luimpe to. (Mat. 10:23) Pashishe, tudi tupeta mibelu mimpe ya mushindu wa kuyisha bimpe. Tudi tuenza mudimu eu ne ditabuja dionso bilondeshile makanda etu, tuwenza ne bionso bitudi nabi. Netuikale tuyisha anu miaba idi bantu batuteleja anyi? Katuena bamanye tshikala mua kuenzeka to. (Bala Muambi 11:5, 6.) Tshietu nkuyisha ne kutekemena ne: Yehowa neatubeneshe. (1 Kol. 3:6, 7) Tudi mua kushindika ne: udi umona bionso bitudi tuenza ne ku diambuluisha dia nyuma wende, neatupeshe mibelu yonso itudi nayi dijinga.​—Mus. 32:8.

Tukebe nyuma wa Nzambi

13, 14. Mmunyi mudi bukole budi nabu nyuma wa Nzambi bua kuambuluisha batendeledi bende bumueneka?

¹³ Netuenze tshinyi tuetu tudimona katuyi bakumbane bua kuenza mudimu udibu batupeshe anyi wa kuyisha? Tudi ne bua kulomba Yehowa nyuma wende bua tulengeje mushindu utudi tumuenzela mudimu. (Bala Luka 11:13.) Nyuma wa Nzambi udi mua kuambuluisha bantu bua kuenza mudimu bimpe nansha bikalabu bavua ne nsombelu wa mushindu kayi kumpala. Tshilejilu, pavua bena Isalele bumbuke mu Ejipitu, nyuma wa Nzambi wakapesha balami ba mikoko ne bapika bukole bua kutshimuna baluishi babu nansha muvuabu kabayi bamanye malu a mvita. (Ekes. 17:8-13) Matuku makese pashishe, nyuma umue umue eu wakambuluisha Besalele ne Oholiaba bua kuibaka ntenta wa kusambakena bilondeshile tshivua Nzambi muambe.​—Ekes. 31:2-6; 35:30-35.

¹⁴ Nyuma wa bukole eu wakambuluisha Bantemu ba Yehowa bua kukumbaja majinga a bulongolodi pakatuadijabu kudipatuila mikanda yabu nkayabu. Mu mukanda mukuabu, muanetu Robert Martin uvua utangila tshibambalu tshia dipatula mikanda tshikondo atshi wakumvuija tshivuabu benze mu 1927. Wakamba ne: “Mukalenge wakunzulula tshibi pa dîba dikumbane; tuakapeta tshiamu tshinene tshia dipatula natshi mikanda nansha mutuvua katuyi bamanye muvuabu batshienze ne muvuatshi tshienza mudimu. Kadi Mukalenge mmumanye mua kuambuluisha bantu badi badifila mu mudimu wende. . . . Mu bingu mikese tshianana, tuakamanya mua kuenza natshi mudimu bimpe ne tshitshidi tshienza mudimu uvua nansha batshienji kabayi belele meji.” Yehowa udi utungunuka ne kubenesha didifila dia mushindu eu.

15. Mmunyi mudi Lomo 8:11 mua kukankamija bantu badi mu diteta kampanda?

¹⁵ Nyuma wa Yehowa utu wenza mudimu mu mishindu mishilangane. Batendeledi ba  Nzambi bonso badi mua kumupeta ne udi ubambuluisha bua kutantamena ntatu mikole. Kadi ntshinyi tshitudi mua kuenza diteta diodi ditupite bukole? Tudi mua kupetela bukole mu mêyi a Paulo adi mu Lomo 7:21, 25 ne 8:11. Bushuwa ‘nyuma wa yeye wakabisha Yezu ku bafue’ udi mua kutuambuluisha, kutukolesha bua kutshimuna majinga etu mabi. Mvese eu uvua mufundila bena Kristo bela manyi, kadi udi mua kuambuluisha batendeledi ba Nzambi bonso. Tuetu bonso tudi tupeta muoyo patudi tuitabuja Kristo, tudienzeja bua kulekela majinga mabi ne kuenza malu adi umvuangana ne tshidi nyuma muimpe wamba.

16. Tudi ne bua kuenza tshinyi bua kupeta nyuma wa Nzambi?

¹⁶ Nzambi udiku mua kutupesha nyuma wende katuyi benze tshintu kampanda anyi? Tòo. Pa kumbusha kumulomba nyuma eu mu disambila, tudi ne bua kuikala ne tshibidilu tshia kudibadila Dîyi diende didi difundisha ku nyuma. (Nsu. 2:1-6) Pashishe, nyuma wa Nzambi udi mu tshisumbu tshia bena Kristo. Patudi tudisangisha pa tshibidilu, tudi tuleja mutudi ne dijinga dia ‘kumvua budi nyuma wambila ekeleziya.’ (Buak. 3:6) Tudi kabidi ne bua kutumikila malu atudi tulonga. Badi batubela mu Nsumuinu 1:23 ne: ‘Andamukayi bua kumvua kubela kuanyi. Monayi! Nennuitshikijile nyuma wanyi pambidi penu.’ Bushuwa, Nzambi udi upesha bantu ‘badi batumikila mêyi ende’ nyuma wende.​—Bien. 5:32.

17. Tudi mua kufuanyikija mudi Nzambi ubenesha bionso bitudi tuenza ne tshinyi?

¹⁷ Nansha mutudi ne bua kudienzeja bua kupeta mabenesha a Nzambi, tuvuluke ne: ki mmudimu mukole nkayawu udi muenze bua Yehowa apeshe batendeledi bende bintu bimpe bia bungi to. Tudi mua kufuanyikija mushindu udiye ubenesha bionso bitudi tuenza ne mushindu udi biakudia bimpe biambuluisha mubidi wetu. Nzambi mmuenze mubidi wetu mu mushindu wa ne: biakudia bitusankishe ne biwambuluishe. Mmutupeshe kabidi biakudia bine. Katuena bamanye menemene mudi biakudia bipeta bidishi, ne ba bungi ba kutudi kabena mua kumvuija mudi mubidi upetela bukole ku bintu bitudi tudia. Tudi bamanye anu ne: biakudia bidi biambuluisha mubidi patudi tubidia. Nangananga patudi tudia biakudia bidi bidisha mubidi ke patudi tupeta bukole bua bungi. Bia muomumue, Yehowa mmutuambile tshia kuenza bua kupeta muoyo wa kashidi, ne udi utupesha bitudi nabi dijinga bua kukumbaja malu adiye mutuambile aa. Nunku udi utuambuluisha bikole ne tudi ne bua kumutumbisha bua bualu abu. Kadi tudi ne bua kuenza tshidiye utulomba, mbuena kuamba ne: kuenza malu adi umvuangana ne disua diende bua kupeta mabenesha a kudiye.​—Hag. 2:18, 19.

18. Udi mudisuike bua kuenza tshinyi? Bua tshinyi?

¹⁸ Nunku ikala udifila ne muebe muonso mu mudimu wonso udibu bakupesha. Ikala ne tshibidilu tshia kulomba Yehowa bua akuambuluishe. (Mâko 11:23, 24) Paudi wenza nunku, ikala mushindike ne: ‘muntu yonso udi ukeba neamone.’ (Mat. 7:8) Nzambi neabeneshe bena Kristo bela manyi pabapeshaye “tshifulu tshia butumbi tshia muoyo” mu diulu. (Yak. 1:12) ‘Mikoko mikuabu’ ya Kristo idi iditatshisha bua kupeta mabenesha ku diambuluisha dia kankanunuina ka Abalahama neyisanke bua kumvua uyambila ne: ‘Luayi, nudi nusankishibua kudi Tatu wanyi, nupiane bukalenge buakunulongoluelabu ku tshibangidilu tshia buloba.’ (Yone 10:16; Mat. 25:34) Bulelela, bantu ‘badi Yehowa uvudijila disanka nebapiane buloba ne nebashikamemu tshiendelele.’​—Mus. 37:22, 29.

Udi muvuluke anyi?

• Ditumikila dilelela didi diumvuija tshinyi?

• Tudi ne bua kuenza tshinyi bua Nzambi kutubeneshaye?

• Tudi ne bua kuenza tshinyi bua kupeta nyuma wa Nzambi? Mmunyi mudiye mua kutuambuluisha?

[Nkonko ya dilonga]

[Bimfuanyi mu dibeji 9]

Yakoba wakaluangana ne muanjelu bua kupeta mabenesha a Yehowa.

Ke muutu udienzeja pebe anyi?

[Tshimfuanyi mu dibeji 10]

Nyuma wa Nzambi wakambuluisha Besalele ne Oholiaba bua kuenza mudimu muimpe mutambe