Nanga malu makane ne muoyo webe mujima

‘Udi munange malu makane.’​—MUS. 45:7.

1. Ntshinyi tshiatuambuluisha bua kuendela ‘mu njila ya buakane?’

YEHOWA udi ulombola batendeledi bende ‘mu njila ya buakane’ ku diambuluisha dia Bible ne nyuma wende. (Mus. 23:3) Kadi bu mutudi bena mapanga, bitu bitufikila bua kusesuka mu njila wende. Bidi bikengela kudienzeja bua kupingana mu njila eu ne kuenza malu makane. Ntshinyi tshiatuambuluisha bua kuenza nunku? Anu bu Yezu, tudi petu ne bua kunanga ne kuenza malu makane.​—Bala Musambu wa 45:7.

2. ‘Njila ya buakane’ ntshinyi?

² ‘Njila ya buakane ntshinyi?’ Njila eyi idi yumvuija kuikala ne nsombelu udi umvuangana ne mikenji miakane ya Yehowa. Mu tshiena Ebelu ne mu tshiena Greke, muaku “buakane” udi umvuija kulamata bikole ku mikenji ya bikadilu. Bu mudi Yehowa muikale ‘lupangu lua buakane,’ batendeledi bende badi basanka bua yeye kubaleja njila muakane udibu ne bua kulonda.​—Yel. 50:7.

3. Mmushindu kayi utudi mua kulonga malu a bungi adi atangila buakane bua Nzambi?

³ Bua tuetu kusankisha Nzambi bikole, tudi ne bua kudienzeja ne muoyo wetu wonso bua kutumikila mikenji yende miakane. (Dut. 32:4) Tudi ne bua kutuadija kulonga Bible bua kumanya malu adi atangila Yehowa Nzambi. Patudi tuenda tulonga malu adi amutangila, tudi tusemena pabuipi nende bikole ne tunanga buakane buende. (Yak. 4:8) Tudi kabidi ne bua kutumikila mibelu idi mu Dîyi diende patudi tujinga kuangata mapangadika a mushinga mu nsombelu wetu.

Keba buakane bua Nzambi

4. Kukeba buakane bua Nzambi kudi kumvuija tshinyi?

⁴ Bala Matayo 6:33. Kukeba buakane bua Nzambi kakuena kumvuija anu kuyisha lumu luimpe lua Bukalenge to. Bua Yehowa kuanyishaye mudimu wetu wa tshijila, tudi ne bua kuikala ne nsombelu udi umvuangana ne mikenji yende dituku dionso. Bantu bonso badi bakeba buakane bua Yehowa badi ne bua kuenza tshinyi? Badi ne bua ‘kudivuadika muntu mupiamupia wakafukibua mu tshifuanyikiji tshia Nzambi ne buakane ne tshijila bidi bifuma ku malu malelela.’​—Ef. 4:24.

5. Ntshinyi tshiatuambuluisha bua kutantamena ditekeshibua?

⁵ Nansha mutudi tudienzeja bua kutumikila mikenji miakane ya Nzambi, tudi mua kuteketa mu mikolo imue misangu bualu tudi bena mibi. Ntshinyi tshiatuambuluisha bua kutantamena diteketa mu mikolo? Ntshinyi tshiatuambuluisha bua kunanga ne kuenza malu makane? (Nsu. 24:10) Tudi ne bua kuikala tusemena pabuipi ne Yehowa mu disambila ‘ne mutshima mulelela mu dimanya dijalame dia ditabuja.’ (Eb. 10:19-22) Nansha tuetu bikale ne ditekemena dia kupiana muoyo mu diulu anyi pa buloba, tudi tuitabuja mulambu wa Yezu Kristo ne mudimu wende wa muakuidi munene. (Lomo 5:8; Eb. 4:14-16) Mupostolo Yone wakafunda ne: ‘Mashi a Yezu adi atulengeja ku mibi yonso.’ (1 Yone 1:6, 7) Bible udi wamba ne: nansha bikala mibi yetu ‘mikunze kunzuu, neyitoke bu neige.’ Bidi bituenza disanka bua mudi Yehowa mutupikule ku diambuluisha dia mulambu wa muanende munanga.​—Yesh. 1:18.

 Ikala ne bia mvita bia mu nyuma

6. Bua tshinyi bidi ne mushinga bua tuetu kukonkonona bia mvita bia mu nyuma?

⁶ Dîba dionso, tudi ne bua kuikala ne ‘buakane bu tshibuikilu tshia pa tshiadi’ bualu ntshia mvita tshia mushinga mukole tshidi Nzambi mutupeshe. (Ef. 6:11, 14) Nansha tuetu badilambule kudi Yehowa matuku adi panshi aa anyi kukadi bidimu bia bungi, mbimpe kuikala ne tshibidilu tshia kukonkonona bia mvita bietu dituku dionso. Bua tshinyi? Bualu Diabolo ne bademon bende bakedibua panshi pa buloba. (Buak. 12:7-12) Satana udi ne tshiji tshikole bualu mmumanye ne: nkumushadile matuku makese. Ke bualu kayi mmuvudije mateyi ende kudi batendeledi ba Nzambi. Kuenaku umona ne: bidi ne mushinga bua kuteka ‘buakane bu tshibuikilu tshia pa tshiadi’ anyi?

7. Tuetu bamanye mushinga wa kuikala ne ‘buakane bu tshibuikilu tshia pa tshiadi,’ netuenze malu mushindu kayi?

⁷ Anu mudi tshibuikilu tshia pa tshiadi tshilama muoyo, ke mudi buakane kabidi bulama mutshima wa muntu. Bu mutudi bena mibi, mutshima wetu utu misangu ya bungi utudinga ne utamba kunyanguka. (Yel. 17:9) Bu mudi muoyo wetu musue kuenza malu mabi, bidi bikengela kuulongesha bimpe. (Gen. 8:21) Tuetu bamanye mushinga wa kuikala ne ‘buakane bu tshibuikilu tshia pa tshiadi,’ katuakuteta nansha kakese bua kubulekela ne kusungula mishindu ya dijikija lutetuku idi Nzambi mukine anyi kuela meji bua kuenza malu mabi to. Katuakujimija dîba dia bungi dia kuenza malu a mushinga anu ku ditangila televizion to. Kadi netuikale tudienzeja bua kuenza malu adi asankisha Yehowa. Nansha bituikala balekele meji mabi matufikishe ku dienza bualu bubi, tumanye ne: Yehowa udi mua kutuambuluisha bua kuenza kabidi malu mimpe.​—Bala Nsumuinu 24:16.

8. Tudi dijinga ne ‘ngabu wa ditabuja’ bua tshinyi?

⁸ Mu bia mvita bietu bia mu nyuma mudi kabidi ‘ngabu wa ditabuja.’ Udi utuambuluisha bua ‘kuepela miketa yonso ya Satana idi ne kapia kasuikaku.’ (Ef. 6:16) Ditabuja dietu ne dinanga ditudi banange Yehowa ne muoyo mujima nebituambuluishe bua kuenza malu makane ne kushala mu njila wa muoyo wa tshiendelele. Tuetu tudienzeja bua kunanga Yehowa, netunange buakane buende kabidi. Kadi netuambe tshinyi bua kuondo ketu ka muoyo? Mmunyi mudiku katuambuluisha patudi tudienzeja bua kunanga buakane?

Lama kondo ka muoyo kimpe

9. Patudi tulama kondo ketu ka muoyo kimpe, ntshinyi tshitudi tupeta?

⁹ Patuvua batambule, tuakalomba Yehowa bua atupeshe “muoyo mukese muimpe.” (1 Pet. 3:21) Mashi a Yezu mmabuikile mibi yetu ne mmatuambuluishe bua kuikala mu malanda mimpe ne Nzambi bualu tudi bitabuje mulambu wa tshiabupikudi. Kadi bua tuetu kushala mu malanda aa, tudi ne bua kulama kondo ketu ka muoyo kimpe. Imue misangu, kondo ketu ka muoyo koku katupisha anyi katudimuija, tudi ne bua kuikala ne disanka bua mudiku kenza mudimu bimpe. Padiku kenza nunku, bidi bileja ne: kondo ketu ka muoyo katshidi kimpe. (1 Tim. 4:2) Kondo ka muoyo kadi mua kukuata mudimu  mukuabu mu nsombelu wa bantu badi basue kuenza malu makane.

10, 11. (a) Londa bualu budi buleja mushinga wa diteleja kondo ketu ka muoyo kalongesha kudi Bible. (b) Bua tshinyi kunanga malu makane kudi mua kutupetesha disanka dia bungi?

¹⁰ Patudi tuenza bualu bubi, kondo ketu ka muoyo kadi mua kutupisha anyi kutulumbuluisha. Nsonga mukuabu wakasesuka mu ‘njila ya buakane.’ Wakatuadija kumona bindidimbi bia bantu butaka ne kunua diamba. Wakalekela kuyisha ne kubuela mu bisangilu bualu kondo kende ka muoyo kavua kamupisha pavuaye uya mu bisangilu ne uvua udimona anu bu muena mpala ibidi pavuaye uyisha. Udi wamba ne: “Tshivua ngela meji ne: kondo kanyi ka muoyo kavua mua kumpisha bua malu amvua ngenza to. Ngakatungunuka ne kuenza malu mabi au munkatshi mua bidimu bitue ku binayi.” Pashishe, wakatuadija kuela meji bua kupingana mu njila wa bulelela. Nansha muvuaye wela meji ne: Yehowa kavua mua kuteleja disambila diende, wakatuadija kusambila ne kulomba luse. Minite mitue ku dikumi pashishe, mamuende wakalua muaba uvuaye au ne kumukankamika bua kutuadija kabidi kuya mu bisangilu. Wakaya ku Nzubu wa Bukalenge ne kulombaye mukulu mukuabu bua kumulongesha Bible. Pakapita matuku wakatambula, ne udi wela Yehowa tuasakidila bua mudiye mumumbushe mu njila mubi.

¹¹ Kuenaku umona ne: tudi tupeta disanka dia bungi patudi tuenza malu makane anyi? Patudi tulonga bua kunanga buakane ne kuenza malu makane ne muoyo mujima, netupete disanka bua mutudi tusankisha Tatuetu wa mu diulu. Anji elabi meji bua dituku dikala bantu bonso ne disanka mu mitshima ne dialejabu mudibu tshimfuanyi tshilelela tshia Nzambi. Tudienzejayi ku mpindieu bua kunanga malu makane ne muoyo umue bua kusankisha Yehowa.​—Nsu. 23:15, 16.

12, 13. Mmushindu kayi utudi mua kulongesha kondo ketu ka muoyo?

¹² Ntshinyi tshitudi ne bua kuenza bua kulongesha kondo ketu ka muoyo? Patudi tulonga Bible ne mikanda yetu mikuabu, tudi ne bua kuvuluka ne: “Mutshima wa muntu muakane udi welangana meji a bualu budiye mua kukudimuna.” (Nsu. 15:28) Mubelu eu udi mua kutuambuluisha dîba ditudi tukeba mudimu wa kuenza. Padi mudimu kampanda ubengangana ne tshidi Bible wamba, bana betu ba bungi batu balonda mibelu idi mupika wa lulamatu ne wa budimu ufila. Kadi dîba ditudi katuyi bapete mubelu musunguluke udi utangila mudimu au, tudi ne bua kukonkonona tshidi Bible wamba ne kuelanganapu meji mu disambila. * Tudi ne bua kutamba kuenza nanku bua kubenga kunyingalaja kondo ka muoyo ka bana betu bakuabu. (1 Kol. 10:31-33) Tudi ne bua kutamba kuditatshisha bua kutumikila mikenji idi itangila malanda etu ne Nzambi. Tuetu tumona Yehowa bu muntu mulelela, kumpala kua  kuitaba mudimu kampanda netudiebeje ne: ‘Meme muenze mudimu eu, Yehowa neanyingalale anyi?’​—Mus. 78:40, 41.

¹³ Patudi tudilongolola ku dilonga dia Tshibumba tshia Nsentedi anyi dia Bible dia Tshisumbu, katupu muoyo ne: tudi ne bua kuela meji pa malu atudi tubala. Tutuku ne tshibidilu tshia kuela anu mishonyi lukasa lukasa pa mandamuna ne tupita diakamue ku tshikoso tshidi tshilonda anyi? Didilongolola dia mushindu eu kadiakutusaka bua kunanga buakane ne muoyo mujima anyi kulongesha kondo ketu ka muoyo to. Bua tuetu kunanga buakane, tudi ne bua kulonga ne muoyo mujima ne kuelangana meji pa bitudi tubala mu Dîyi dia Nzambi. Bidi bikengela kudienzeja ne muoyo mujima bua kunanga buakane.

Nzala ne nyota ya buakane

14. Yehowa Nzambi ne Yezu Kristo mbasue bua tumvue bishi bua mudimu wetu wa tshijila?

¹⁴ Yehowa Nzambi ne Yezu Kristo mbasue bua tuikale ne disanka mu mudimu wa tshijila utudi tuenza. Ntshinyi tshiatuambuluisha bua kuikala ne disanka edi? Ndinanga dia buakane. Yezu wakamba mu muyuki wende wa pa mukuna ne: ‘Badi ne nzala ne nyota ya buakane badi ne disanka bua bobu nebukute.’ (Mat. 5:6) Mêyi aa adi umvuija tshinyi bua bantu badi banange buakane?

15, 16. Mmu mishindu kayi mudi nzala ne nyota ya mu nyuma mua kujika?

¹⁵ Buloba butudi basombele ebu mbulombola kudi mubi. (1 Yone 5:19) Tuetu babale tshikandakanda tshia mu ditunga kayi dionso, tudi tusanganamu anu ngumu ya dishipangana ne tshikisu mu mushindu wa dikema. Bitu bitonda muntu muakane bua kumona mudi muntu ukengesha muntu nende. (Muam. 8:9) Bu mutudi banange Yehowa, tudi bamanye ne: anu yeye nkayende ke udi mua kukumbajila bantu dijinga dia kulonga bua kumanya malu makane. Mu katupa kîpi emu, pabutulabu bantu babi, bantu badi banange buakane kabakupeta kabidi tunyinganyinga tukebesha kudi malu mabi adi bantu badi kabayi batumikila mikenji benza to. (2 Pet. 2:7, 8) Bushuwa atshi netshikale tshikondo tshimpe be.

¹⁶ Bu mutudi batendeledi ba Yehowa ne bayidi ba Kristo Yezu, tudi bamanye ne: bantu bonso badi ne nzala ne nyota ya buakane ‘nebukute.’ Nebasanke bikole bua diulu dipiadipia ne buloba bupiabupia ‘mudi buakane buikalemu’ bidi Nzambi mulongolole. (2 Pet. 3:13) Nunku, katuteketshi mu mikolo anyi katukemi bua mudi dikengeshangana ne tshikisu biangate muaba wa buakane mu bulongolodi bua Satana ebu to. (Muam. 5:8) Yehowa mutambe bunene mmumone malu adi enzeka aa ne ukadi pa kusungila bantu badi banange kuenza malu makane.

Kunanga buakane kudi kupetesha masanka

17. Mmasanka kayi adi bantu badi banange malu makane bapeta?

¹⁷ Musambu wa 146:8 udi umvuija bualu bua mushinga butudi tupeta patudi tulonda anyi tuenda mu njila ya buakane. Udi wamba ne: “Yehowa udi unanga bantu bakane.” Anji elabi meji bua mudi Mutambe bunene wa mu diulu mutunange bualu tudi banange buakane. Bua mudi Yehowa mutunange, tudi bajadike ne: tuetu bateke Bukalenge buende pa muaba wa kumpala mu nsombelu wetu neatukumbajile majinga etu a ku mubidi. (Bala Musambu wa 37:25; Nsumuinu 10:3.) Bantu badi banange buakane nebapiane buloba. (Nsu. 13:22) Batendeledi ba  Nzambi ba bungi badi benza malu makane nebapete disanka ne muoyo wa tshiendelele mu mparadizu pa buloba. Nansha mu matuku etu aa, bantu badi banange buakane bua Nzambi badi ne ditalala dia mu mutshima didi dibambuluisha bua kuikala mu buobumue mu mêku abu ne mu bisumbu bia bena Kristo.​—Filip. 4:6, 7.

18. Bu mutudi bindile dituku dia Yehowa, ntshinyi tshitudi ne bua kutungunuka ne kuenza?

¹⁸ Bu mutudi bindile dituku dinene dia Yehowa, tudi ne bua kutungunuka ne kukeba buakane buende. (Sef. 2:2, 3) Nanku, tulejayi mutudi banange njila miakane ya Yehowa Nzambi ne muoyo mujima. Mbuena kuamba ne: tudi ne bua kulama ‘buakane buetu budi bu tshibuikilu tshia pa tshiadi’ bikole bua kukuba muoyo wetu. Tudi kabidi ne bua kulama kondo ketu ka muoyo kimpe kadi mua kutupetesha disanka ne kusankisha Nzambi wetu.​—Nsu. 27:11.

19. Tudi ne bua kudisuika bua kuenza tshinyi? Ntshinyi tshitualonga mu tshiena-bualu tshidi tshilonda?

¹⁹ Mukanda wa Nzambi udi wamba ne: ‘Mêsu a Yehowa adi akenzakana ku nseke yonso ya buloba bua kuleja bukole buende kudi bantu badi ne mitshima miakane kudiye.’ (2 Kul. 16:9) Mêyi aa adi atukolesha bikole bualu tudi tuenza malu makane nansha mudiku malu mabi ne tshikisu ne malu enda anyanguka mu bulongolodi ebu bubi. Bushuwa, bantu badi kabayi banange Nzambi badi mua kukema padibu batumona tuendela mu njila ya buakane. Kadi tudi tupeta masanka a bungi patudi tulonda buakane bua Yehowa. (Yesh. 48:17; 1 Pet. 4:4) Nanku, tudisuikayi bua kutungunuka ne kunanga ne kuenza malu makane ne muoyo mujima bua tuikale ne disanka. Kunanga buakane ne muoyo mujima kudi kumvuija kukina malu mabi. Tshiena-bualu tshidi tshilonda netshiumvuije bualu ebu.

[Mêyi adi kuinshi]

Newandamune munyi?

• Bua tshinyi kuleja dianyisha bua mulambu wa Yezu kudi ne mushinga bituikala basue kunanga buakane?

• Bua tshinyi bidi ne mushinga bua kuvuala ‘buakane bu tshibuikilu tshia pa tshiadi?’

• Mmushindu kayi utudi mua kulongesha kondo ketu ka muoyo?

[Nkonko ya dilonga]

[Tshimfuanyi mu dibeji 26]

Kondo ka muoyo kimpe kadi katuambuluisha bua kusungula mudimu muimpe