Tudi ne malu a bungi adi atusaka bua kuikala ne disanka

YEHOWA mmufuke bintu mu bulongame kutuadijila anu ku tu selile tukese too ne ku bisumbu binene bia mitoto. Kabiena bitukemesha to, bualu mufuki wetu “kena Nzambi wa malu mabuelakane.” (1 Kol. 14:33) Mushindu udi Yehowa mulongolole bua bantu bende bikale bamutendelela udi kabidi ukemesha. Tukonkononayi tshivuaye muenze. Mmufuke bifukibua bia meji miliyo ne miliyo mu diulu ne pa buloba, mmubipeshe budikadidi bua kudisunguila malu ne kumutendelela mu buobumue. Bualu ebu budi bukemesha.

Kale mu Isalele, Yelushalema uvua tshimfuanyi tshia bulongolodi bua Nzambi pa buloba, muaba uvua ntempelo wa Yehowa usanganyibua ne uvua mukalenge wende muela manyi musombele. Muena Isalele mukuabu uvua ku bupika mu Babulona wakamba bua musoko wa tshijila eu ne: ‘Ludimi luanyi lulamate mu tshilakalaka tshianyi, bingikala tshiyi nkuvuluka, bingikala tshiyi ntumbisha Yelushalema pa mutu pa disanka dianyi didi ditamba bunene.’​—Mus. 137:6.

Ke muutu pebe udiumvua bua bulongolodi bua Nzambi lelu anyi? Butu bukusankisha kupita tshintu tshikuabu tshionso anyi? Bana bebe mbamanyeku muvua tshitupa tshia bulongolodi bua Nzambi tshia pa buloba tshituadije ne muditshi tshienza mudimu lelu anyi? Batuku basanka bua mudibu pabu mu dîku dia Bantemu ba Yehowa ba pa buloba bujima anyi? (1 Pet. 2:17) Kuenaku mua kuenza mudimu ne malu adi alonda aa mu Ntendelelu wa mu Dîku bua kukolesha dimanya ne dianyisha dia bena mu dîku diebe bua bulongolodi bua Yehowa anyi?

Ikala ubalondela malu a mu ‘matuku a kale’

Bena Isalele bavua badisangisha tshidimu tshionso bua kusekelela Pasaka. Pakajadikabu difesto edi, Mose wakambila bena Isalele ne: ‘Panukonka bana benu ba balume ne: tshibilu etshi tshidi tshiumvuija tshinyi? Nubandamune ne: Yehowa uvua mutupatule mu bupika mu Ejipitu ku bukole bua diboko diende.’ (Ekes. 13:14, MMM) Bena Isalele kabavua mua kupua muoyo malu avua Yehowa mubenzele to. Bamfumu ba mêku ba bungi ba mu Isalele bakatumikila mukenji wa Mose. Bikondo bia bungi bimane kupita, muena Isalele mukuabu wakasambila ne: ‘Nzambi, tuakumvua ku matshi etu, batatu betu bakatuambila bua malu awakenza mu matuku abu, mu matuku akapita kale.’​—Mus. 44:1.

Wewe ulondela muanebe miyuki ya Bantemu ba Yehowa ba mu bidimu 100 bishale, udi muenze anu bu udi umulondela malu a mu ‘matuku a kale.’ Ntshinyi tshiudi mua kuenza bua muanebe kumonaye ne: miyuki eyi mmilelela? Bamue baledi batu benza mudimu ne mukanda wa Les Témoins de Jéhovah: Prédicateurs du Royaume de Dieu, wa Annuaire, miyuki ya mu nsombelu idi mu bibejibeji bietu, luapolo lua malu a Bukalenge ne filme mipiamipia idi yakula bua batendeledi ba Yehowa ba mu matuku etu aa. Filme idi ileja muvuabu bakengesha bana betu ba mu Union Soviétique ne ba mu Allemagne Nazie, idi ilongesha bena mêku bua kueyemena Yehowa mu ntatu. Udi mua kuenza mudimu ne bintu ebi panudi nuenza Ntendelelu wa mu Dîku. Kuenza nunku nekukoleshe ditabuja dia bana bebe padibu bateta muoyo wabu mutoke.

Wewe ubala tshianana muyuki kampanda, kabiena mua kukoka diakamue ntema ya bana to. Nanku, keba mishindu ya kukoka ntema yabu. Tshilejilu, udi mua kulomba muanebe bua kusungula ditunga kampanda didi dimusankisha, kukeba luapolo lua mudimu wa Bukalenge lua mu ditunga adi ne kumvuija bena mu dîku amue malu adiye mupete mu dibala diende. Mu tshisumbu tshienu mudi mua kuikala muena Kristo udi muenzele Yehowa mudimu ne  lulamatu bidimu bia bungi unudi mua kubikila kumbelu panudi nuenza ntendelelu wa mu dîku. Udi pamuapa mua kuambila muanebe bua kumuela nkonko bua kumufikisha ku dilonda malu mimpe a mu nsombelu wende. Udi mua kumuambila bua kumvuija bimfuanyi bia mianda minene ya malu a Bukalenge bu mudi: dibaka dia nzubu wa Betele, mpungilu wa bantu bafume mu matunga a bungi ne muvuabu benza mudimu ne tshisanji tshia fono bua kuyisha ku nzubu ne ku nzubu.

Longa ‘mudimu udi nawu tshitupa tshionso’

Mupostolo Paulo wakafuanyikija tshisumbu tshia bena Kristo ne ‘bitupa bionso bia mubidi bidi biakajangana ne bidi bilamakajangana pamue bua dikuatshishangana dia manungu onso, bu mudi mudimu wa tshitupa tshionso.’ (Ef. 4:16) Patudi tumanya mudi mubidi wa muntu wenza mudimu, tudi tukolesha dianyisha dietu ne kanemu kudi Mufuki wetu. Bia muomumue, patudi tukonkonona mudi Bantemu ba Yehowa benza mudimu pa buloba bujima, bidi bitukemesha bua mudi ‘Nzambi ne meji mavule.’​—Ef. 3:10.

Yehowa mmuleje mudi tshitupa tshia bulongolodi buende tshia mu diulu ne tshia pa buloba bienza mudimu. Tshilejilu, udi utuambila ne: wakabuluila diambedi Yezu Kristo malu, ne Yezu pende ‘wakatuma muanjelu wende bua kumanyisha mupika wende Yone, ne yeye wakamanyisha bantu.’ (Buak. 1:1, 2) Bu mudi Nzambi utuleja mudi tshitupa tshia bulongolodi buende tshienza mudimu mu diulu, tudi bajadike ne: mmusue bua tuetu kumvua mudi ‘tshitupa tshionso tshienza mudimu’ pa buloba.

Tshilejilu, nuenu bikale ne dikumbula dia mutangidi wa tshijengu mu matuku adi kumpala eku, kanuenaku mua kukonkonona midimu idi nayi batangidi aba ne masanka adibu bapeta mu mudimu eu anyi? Mmunyi mudibu bambuluisha yonso wa kutudi? Nudi kabidi mua kudiebeja ne: Bua tshinyi mbimpe kufila luapolo lua mudimu wa buambi? Bulongolodi bua Nzambi butu bupetela mfranga kuepi? Mmunyi mudi bena mu Kasumbu Kaludiki benza mudimu? Mmunyi mudi kasumbu aka katupesha biakudia bia mu nyuma?

Patudi tumvua mudi Yehowa mulongolole malu mu bulongolodi buende, bidi bituambuluisha mu mishindu isatu eyi: dianyisha dietu bua bantu badi benza mudimu mukole bua kutuambuluisha didi dikola. (1 Tes. 5:12, 13) Bidi bitusaka bua kukuatshisha midimu ya Bukalenge. (Bien. 16:4, 5) Ne pashishe, patudi tumona mudi badi batulombola balongolola malu ne bangata mapangadika mimanyine pa Mukanda wa Nzambi, bidi bikolesha dieyemena dietu kudibu.​—Eb. 13:7.

‘Nubuele mu nzubu yende mikole’

Mufundi wa misambu wakakankamija bena Isalele bua kumona Yelushalema bu uvua pabuipi pakambaye ne: ‘Endakanayi ku nseke yonso ya Siona, numunyunguluke, balayi bungi bua bibumba biende. Tangilayi bimpe ngumbu yende ya mvita, nubuele mu nzubu yende mikole, bua numanye mua kuambila ba mu tshikondo tshidi tshinulonda kunyima.’ (Mus. 48:12, 13) Bena Isalele bavua bavuluka malu mimpe avuabu bapeta pavuabu baya ku musoko wa tshijila bua bibilu bia ku tshidimu ne bamona muvua ntempelo. Bavua kabidi ne bua ‘kuambila ba mu tshikondo tshivua tshilonda kunyima’ malu au.

Ela meji bua mukalenge mukaji wa mu Sheba, uvua muanji kuela mpata pakamuambilabu muvua bukalenge bua Solomo buimpe ne muvuaye ne meji a bungi. Ntshinyi tshiakamujadikila ne: malu avuaye mumvue avua malelela? Wakamba ne: ‘Meme tshiakitabuja mêyi a bantu too ne pangakulua nkayanyi ne pangakubimona ne mêsu anyi.’ (2 Kul. 9:6) Bushuwa, malu atudi tumona ne ‘mêsu etu’ adi mua kutulenga ku muoyo bikole.

Ntshinyi tshiudi mua kuenza bua kuambuluisha bana bebe bua kudimuena ne ‘mêsu abu’ mudi bulongolodi bua Yehowa buimpe? Binuikale ne Betele muaba unudi basombele, nudienzeja bua kuya kendakanaku. Tshilejilu, Mandy ne Bethany bavua bakolele mu ditunga divua Betele usanganyibua, kadi muaba uvuabu basombele uvua mutantshi wa kilometre 1 500 ne ku Betele. Baledi babu bavua ne tshibidilu tshia kulongolola ngendu bua kuya kuendakana miaba ya bungi nangananga patshivua bana babu aba bapuekele. Badi bamba ne: “Kumpala kua tuetu kuya kendakana ku Betele, tuvua tuela meji ne:  bana kabavua mua kuyaku to, anu bantu bakulumpe. Kadi tuakasanganaku bansonga benzela Yehowa mudimu mukole ne disanka. Tuakamona ne: bulongolodi bua Yehowa kabuvua bushikidile anu muaba utuvua basombele to. Misangu yonso ituvua tuya kendakanaku, tuvua tusemena pabuipi bikole ne Yehowa ne bivua bitusaka bua kumuenzela mudimu bikole.” Pavua Mandy ne Bethany badimuena mudimu uvua wenzeka mu bulongolodi bua Nzambi, biakabasaka bua kulua bampanda-njila ne pashishe kubabikilabu bua kuambuluisha ku Betele.

Kudi mushindu mukuabu utudi mua “kumona” anyi kubandila bulongolodi bua Yehowa uvua bena Isalele kabayi nawu to. Mu bidimu bishala ebi, mbapatuile batendeledi ba Nzambi filme idi yumvuija bitupa bivule bia bulongolodi buende, bu mudi wa: Les Témoins de Jéhovah: Organisés pour prêcher la bonne nouvelle, Toute la communauté de nos frères, Jusqu’aux extrémités de la terre ne wa Unis grâce à l’enseignement divin. Nuenu bamone mudimu mukole udibu benza kudi bena ku Betele, bana betu badi baya miaba idi bikumina bienzeke bua kuambuluisha, ba misionere ne bana betu badi balongolola malu a mpuilu ne mpungilu, disanka dienu dia munudi mu dîku dia bena Kristo ba pa buloba bujima nedivule.

Tshisumbu tshionso tshia bena Kristo tshidi tshienza mudimu muimpe wa kuyisha lumu luimpe ne kukuatshisha bena Kristo badimu. Nunku, ikala upitshisha dîba pamue ne bena mu dîku diebe bua kuvuluka ‘bana benu ba mu Kristo badi pa buloba’ bujima. Nebikuambuluishe wewe ne bana bebe bua kushala ‘bajalame mu ditabuja’ bashindike ne: nudi ne malu a bungi adi anusaka bua kuikala ne disanka.​—1 Pet. 5:9.

 [Kazubu/​Tshimfuanyi mu dibeji 18]

Bulongolodi bua Nzambi Tshiena-bualu tshia mushinga tshia kulonga

Tudi ne bintu bia bungi bidi mua kutuambuluisha bua kumanya malu a bungi a muvua bulongolodi bua Yehowa butuadije ne mudibu buenza mudimu. Nkonko idi ilonda eyi idi mua kukuambuluisha bua kutuadija:

☞ Mmushindu kayi uvua mudimu wa batangidi ba bijengu ne ba distrike ba lelu mutuadije?​—Les Témoins de Jéhovah: Prédicateurs du Royaume de Dieu, dibeji dia 222-227.

☞ Mu Mpuilu wa Malu a Nzambi wa mu 1941, “dituku dia bana” divua ne mushinga kayi?​—Les Témoins de Jéhovah: Prédicateurs du Royaume de Dieu, dibeji dia 86 ne dia 88.

☞ Mmunyi mutu bena mu Kasumbu Kaludi bangata mapangadika?​—‘Rends pleinement témoignage au sujet du Royaume de Dieu,’ dibeji dia 108 too ne dia 114.