Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Anji tangila ni udi mua kuandamuna nkonko idi ilonda eyi:

• Bintu bia mushinga anyi “biuma” bia mu bisamba bidibu basangisha bidi biumvuija tshinyi? (Hag. 2:7)

Mbantu badi batendelela Yehowa basaka kudi dinanga nansha mudibu bena mapanga. (Nsu. 27:11) Badi bu “biuma” bidi bitumbisha Yehowa ne yeye udi pende wangata ne mushinga lulamatu luabu ne mudimu udibu bamuenzela ne tshisumi.​—1/4, dibeji dia 11.

• Tshivua tshivuije Danyele “muntu munangibue bikole” kudi Yehowa ntshinyi? (Dan. 10:11, 19)

Danyele uvua ulonga Mifundu bikole. (Dan. 9:2) Uvua ne tshibidilu tshia kusambila. (Dan. 2:17, 18) Uvua uditatshisha bikole bua kutumbisha Dîna dia Yehowa. (Dan. 2:20, 28; 9:19)​—1/4, dibeji dia 12-13.

• Bena Kristo balelela batuku bangata dîna dia Nzambi bu tshijimba anyi?

Bamue bantu batu bangata tshintu kampanda anyi tshimanyinu kansanga bu tshijimba peshi buanga budi bubalama, kadi batendeledi ba Nzambi kabatu bangata dîna diende bu tshijimba to. Badi beyemena Yehowa ne baditatshisha bua kuenza disua diende, padibu benza nunku badi banyemena ku dîna diende. (Sef. 3:12, 13)​—15/1, dibeji 5-6.

• Mmunyi mudi baledi mua kuambuluisha bana babu bua kuangata mapangadika mimpe a malu a bikadilu?

Baledi badi ne bua kumvuija bana babu bimpe malu adibu basue. Badi ne bua kubalongesha mu bulelela malu onso adi atangila bitupa bia lulelu. Badi kabidi ne bua kubambuluisha bua kumanya ne: bobu kabayi batumikile mikenji ya Yehowa idi itangila bikadilu nebapete ntatu.​—1/4, dibeji dia 19-20.

• Bua tshinyi Yehowa wakabenga mukalenge Shaula?

Shaula uvua ne bua kuindile muprofete wa Nzambi bua kufila mulambu, kadi kakatumikila dîyi dia Yehowa to, wakadifidila mulambu au. Pashishe kakatumikila kabidi dîyi dia Yehowa dia kubutula tshisamba tshia bena lukuna babu to.​—15/2, dibeji dia 22-23.

• Mmunyi mutudi mua kuleja ne: tudi bakine malu mabi?

Tudi ne bua kutumikila mubelu wa Yezu udi utangila tshiendenda, kuepuka dinua dipitshisha dia maluvu ne malu a mîdima. Tshilejilu, tudi ne bua kuepuka ditangila dia bindidimbi bia bantu butaka ne meji mabi adibi mua kushiya mu lungenyi luetu. (Mat. 5:27, 28) Tudi kabidi ne bua kukosa malanda ne bantu badibu bipata mu tshisumbu.​—15/2, dibeji dia 29-32.

• Ngimue mikenji kayi ya mu Bible idi mua kutuambuluisha bua kumanya mudi Yehowa umona manaya a mfranga? (Ef. 5:17)

Ku mêsu kua Nzambi, kueyemena shanse anyi dikasa dimpe nkutendelela kua mpingu. (Yesh. 65:11) Yehowa udi udimuija batendeledi bende bua kuepuka lukuka. (Ekes. 20:17; Lomo 7:7) Batendeledi ba Nzambi badi ne bua kuenza mudimu muimpe bua kupeta makuta. (Ef. 4:28; 2 Tes. 3:10, 12)​—1/4, dibeji dia 22-23.

• Mmunyi muvua Yelemiya muenze bu mutshi ‘mukunyibue pepi ne mâyi, udi utumamu miji’? (Yel. 17:7, 8)

Wakatungunuka anu ne kukuama mamuma ne kavua mutekete mu maboko pavuabu bamuseka to. Uvua anu mulamate ku musulu wa mâyi a muoyo, utumikila bivua Nzambi umuambila.​—15/3, dibeji dia 14.

• Ndilongesha kayi ditudi mua kulongela mu mêyi a Yobo adi mu Yobo 14:13-15 pa bidi bitangila Yehowa?

Yehowa utu munange bikole bantu bonso badi baditeka mu bianza biende ne basue bua abafumbe ne abakaje bua bikale ne mushinga ku mêsu kuende. (Yesh. 64:8)​—1/4, dibeji dia 31.

• Mmunyi muvua muprofete Samuele ‘muenze malu makane’? (Eb. 11:32, 33)

Samuele wakambuluisha bantu bua kuenza malu mimpe ne makane ku mêsu kua Nzambi. Wakatungunuka ne kuenza malu makane bualu uvua muindile Yehowa ne lutulu, umuenzela anu mudimu ne lulamatu nansha mu ntatu.​—1/4, dibeji dia 27.