Nuenu bena mu mêku a bena Kristo nuikale ‘badilongolole’

‘Nudilongolole, bualu bua Muana wa muntu nealue pa dîba dinudi kanuyi belangana meji.’​—LUKA 12:40.

1, 2. Bua tshinyi tudi ne bua kuvuluka didimuija dia Yezu dia kuikala ‘badilongolole’?

‘PALUA Muana wa muntu mu butumbi buende bua kutapulula bantu,’ ntshinyi tshienzekela dîku diebe? (Mat. 25:31, 32) Bu mudi bualu ebu ne bua kuenzeka pa dîba ditudi katuyi belele meji, bidi ne mushinga bua kuvuluka mubelu wa Yezu wa kushala ‘badilongolole.’​—Luka 12:40.

² Tshiena-bualu tshishale tshivua tshileje tshidi muena mu dîku yonso mua kuenza bua kuambuluisha bena mu dîku bua kushalabu batabale. Tukonkonone mpindieu mishindu mikuabu idi mua kutuambuluisha bua kuikala mu malanda mimpe ne Yehowa.

Nulame dîsu ‘dimpe’

3, 4. (a) Bena mu mêku a bena Kristo badi ne bua kudimukila tshinyi? (b) Kuikala ne dîsu ‘dimpe’ kudi kumvuija tshinyi?

³ Bua bena mu mêku kuikalabu badilongolole bua dilua dia Kristo, badi ne bua kuepuka malu adi mua kubasesuisha mu ntendelelu mulelela. Badi ne bua kuepuka malu adi mua  kubashiya mu ditanaji. Bu mudi mêku a bungi makuluke mu buteyi bua dinanga dinekesha dia biuma, tumone tshivua Yezu muambe bua kulama dîsu ‘dimpe.’ (Bala Matayo 6:22, 23.) Anu bu mudi muendu mua kututokeshila mu njila ne kutuambuluisha bua kuenda bimpe, malu atudi tumona ne ‘mêsu a mu mutshima’ wetu adi mua kutokesha njila wetu ne kutuambuluisha bua kuenda bimpe.​—Ef. 1:18.

⁴ Bua dîsu kumonadi bimpe, didi ne bua kuikala dimpe ne dikumbane mua kutuishila bimpe pa tshintu tshididi ditangila. Ke mudi mêsu a mu mutshima kabidi. Kuikala ne dîsu dimpe kudi kumvuija kuikala ne tshipatshila tshisunguluke. Pamutu pa kuikala ne nsombelu muimanyine anu pa dikeba dia bintu bia ku mubidi ne kutamba kuditatshisha anu bua majinga a ku mubidi a bena mu dîku dietu, tulame dîsu dietu ditangija anu ku malu a Nzambi. (Mat. 6:33) Ebi bidi biumvuija ne: tudi tusanka ne bintu bia mushinga bidi Nzambi utuambuluisha bua kupeta ne tuteka mudimu wende pa muaba wa kumpala mu nsombelu wetu.​—Eb. 13:5.

5. Mmunyi muvua muana mukuabu wa bidimu dikumi na bia pa mutu muleje ne: uvua mutangije ‘dîsu’ diende ku mudimu wa Nzambi?

⁵ Baledi bobu balongesha bana babu bua kuikala ne dîsu dimpe, nebapete malu mimpe. Tuangate tshilejilu tshia muana wa bakaji wa bidimu dikumi ne pa mutu wa mu ditunga dia Éthiopie. Uvua ne meji mu kalasa, nunku pakajikijaye bakamuanyishila bua kulonga tulasa tukuabu kayi ufuta makuta. Kadi bu muvuaye munange kuenzela Yehowa mudimu, kakitaba bualu abu to. Matuku makese pashishe, bakamulomba bua kuenza mudimu uvuabu ne bua kumufuta dolare 4 200 ku ngondo, avua makuta mapite bungi bilondeshile mudibu bafuta bena mudimu mu ditunga diabu. Kadi yeye uvua mutangije ‘dîsu’ diende ku mudimu wa bumpanda-njila. Kavua musue kuanji kuebeja baledi bende kumpala kua kubenga mudimu au to. Baledi bende bakumvua bishi bua tshivua muanabu wa bakaji muenze? Bakasanka bikole ne kumuelabu kalumbandi.

6, 7. Njiwu kayi itudi ne bua ‘kudimukila’?

⁶ Mu mêyi a Yezu adi mu Matayo 6:22, 23 badi batudimuijamu bua kuepuka lukuka. Yezu kavua ufuanyikija dîsu didi ‘dimona bimpe’ ne didi kadiyi ‘dimona bimpe’ to, kadi uvua ufuanyikija dîsu ‘dibi’ ne dimpe. ‘Dîsu dibi,’ ndîsu didi dialakana anyi didi ne lukuka. (Mat. 6:23) Mmunyi mudi Yehowa umona lukuka? Mukanda wa Nzambi udi wamba ne: “Tshiendenda tshia malunda mabi ne malu a bundu ne dikuma dia mutshima kabitedibu mene munkatshi muenu.”​—Ef. 5:3.

⁷ Kabitu bipepele bua kujingulula ne: tudi ne lukuka to, kadi bitu bipepele bua kulujingulula kudi bakuabu. Nunku mbimpe bua tuetu kutumikila mubelu wa Yezu eu: “Nudimuke, kanukumi mitshima ku biuma.” (Luka 12:15) Bua kuepuka lukuka tudi ne bua kudikonkonona bua kumona malu atudi banange mu muoyo wetu. Bena mu mêku a bena Kristo badi ne bua kuela meji bikole bua dîba ditubu bapitshisha ne makuta atubu batula bua dijikija lutetuku, masanka ne disumba dia bintu.

8. Mmunyi mutudi mua kuleja ne: tudi ‘badimuke’ patudi tujinga kusumba bintu?

⁸ Kumpala kua kusumba tshintu, mbimpe kuela meji bikole pamutu pa kuela anu meji ni udi ne makuta makumbane bua kutshisumba anyi kubenga kusumba. Udi mua kudiebeja ne: ‘Nengikale ne dîba dia kuenza natshi mudimu pa tshibidilu ne kutshilama bimpe anyi? Netshingangate matuku bungi munyi bua kutshimanya ne kuenza natshi mudimu bimpe?’ Nuenu bansonga, kanuitabi malu onso a mu bulongolodi ebu anyi madisuisha adibu benza bua kunusaka bua kusumba bilamba anyi bintu kampanda bisunguluke, bia mushinga mukole bidi kabiyi ne kudibi kadi anu bualu bantu ba bungi badi nabi. Ikalayi nudikanda. Elayi kabidi meji bikala tshintu tshinudi nusumba etshi mua kuambuluisha bena mu dîku dienu bua kuikala badilongolole bua dilua dia Muana wa muntu. Mbimpe nuenu kueyemena mulayi wa Yehowa eu: ‘Tshiena nkulekela, nansha kakese, tshiena nkushiya tshianana.’​—Eb. 13:5.

 Difundila bipatshila mu mudimu wa Nzambi

9. Mmunyi mudi kudienzeja bua kukumbaja bipatshila mu mudimu wa Nzambi mua kuambuluisha dîku?

⁹ Mushindu mukuabu udi bena mu dîku mua kukolesha ditabuja diabu ne dia bena mu dîku bonso nkudifundila bipatshila mu mudimu wa Nzambi ne kudienzeja bua kubikumbaja. Kuenza nunku nekuambuluishe bena mu dîku bua kumona mudibu benzela Yehowa mudimu ne kabidi bua kumanya midimu idi ne mushinga wa bungi mu nsombelu wabu.​—Bala Filipoi 1:10.

10, 11. Mbipatshila kayi binudi badifundile mu dîku dienu? Mbipatshila kayi binudi basue kudifundila bua matuku atshilualua?

¹⁰ Kudifundila nansha bipatshila bipepele bidi muena mu dîku yonso mua kukumbaja kudi mua kupetesha masanka. Tshilejilu, tshipatshila tshia kukonkonona dituku dionso mvese wa ku dituku. Mandamuna adi bena mu dîku bafila adi mua kuambuluisha mfumu wa dîku bua kumanya mudibu bangata Yehowa ne mudibu bamona bulelela. Kudifundila tshipatshila tshia kubala Bible mu dîku pa tshibidilu kudi kuambuluisha bana bua kumanya kubala ne kumvua malu a mu Bible bimpe. (Mus. 1:1, 2) Tudi kabidi mua kudifundila tshipatshila tshia kulengeja masambila etu. Kudienzeja bua kuikala ne ngikadilu ya dimuma dia nyuma ntshipatshila tshimpe tshitudi mua kudifundila kabidi. (Gal. 5:22, 23) Tudi kabidi mua kukeba mishindu ya kuleja mutudi banange bantu batudi tuyisha. Patudi tudienzeja bua kuenza nunku mu dîku, bidi mua kuambuluisha bana bua kulonga bua kuikala ne luse ne kupeta dijinga dia kuenza mudimu wa bumpanda-njila bua pa tshibidilu ne wa bumisionere.

¹¹ Kuenaku mua kudifundila bimue bipatshila biudi wewe ne bena mu dîku diebe mua  kukumbaja anyi? Bena mu dîku diebe badiku mua kudifundila tshipatshila tshia kuvudija mudimu wabu wa buambi anyi? Udiku mua kudienzeja bua kujikija buôwa bua kuyisha ku telefone, mu njila nansha miaba idi bantu benzela mudimu anyi? Kuenaku mua kuya muaba udibu dijinga ne bamanyishi ba Bukalenge anyi? Muena mu dîku dienu kenaku mua kulonga muakulu mukuabu bua kuyisha bantu badi bawakula lumu luimpe anyi?

12. Ntshinyi tshidi bamfumu ba mêku mua kuenza bua kuambuluisha mêku abu bua kukolesha malanda abu ne Yehowa?

¹² Mfumu wa dîku udi ne bua kumanya malu adi bena mu dîku diende mua kulengeja. Pashishe udi mua kudifundila bipatshila bisunguluke bua kubambuluisha. Udi ne bua kudifundila bipatshila bidi bena mu dîku mua kukumbaja bilondeshile nsombelu wenu. (Nsu. 13:12) Bushuwa, bidi bilomba dîba bua kukumbaja bipatshila bia mushinga. Bua kukumbaja bipatshila ebi, mbimpe kukepesha dîba dia kuenza malu makuabu bu mudi kutangila televizion. (Ef. 5:15, 16) Dienzeja bua kukumbaja bipatshila biudi mudifundile bua dîku diebe. (Gal. 6:9) Dîku didi didienzeja bua kukumbaja bipatshila mu malu a Nzambi, didiunda diadi ‘nedimueneke kudi bonso.’​—1 Tim. 4:15.

Nuikale nuenza ntendelelu wa mu dîku

13. Mbualu kayi budibu bashintulule mu ndongamu wa bisangilu bia ku lumingu? Nnkonko kayi itudi mua kudiela?

¹³ Mushindu udibu bashintulule ndongamu wa bisangilu bia ku lumingu kutuadijila mu 1 ngondo wa kumpala tshidimu tshia 2009, udi wambuluisha bena mu mêku bua kuikala ‘badilongolole’ bua dilua dia Muana wa muntu. Katuena tuenza kabidi tshisangilu tshia Dilonga dia Mukanda mu tusumbu munkatshi mua lumingu to. Bakadi basangishe tshisangilu etshi pamue ne Kalasa ka Mudimu wa Nzambi ne Tshisangilu tshia Mudimu. Mbashintulule ndongamu eu bua kushila mêku a bena Kristo dîba dia kukolesha malanda abu ne Yehowa pa kuikala ne dituku kampanda disunguluke dia kuenza ntendelelu wa mu dîku lumingu luonso. Bu mukadi matuku ndambu mapite katshia bashintulula ndongamu eu, tudi mua kudiebeja ne: ‘Ntuku muditekele dîba dia kuenza ntendelelu wa mu dîku peshi kudilongela pa dîba didibu banshile edi anyi? Ntuku ndienzeja bua kunemeka ndongamu eu anyi?’

14. (a) Kunemeka ndongamu wa ntendelelu wa mu dîku ne didilongela kudi ne mushinga kayi? (b) Bua tshinyi kudisumbila dîba dia kudilongela kudi ne mushinga?

¹⁴ Tudi ne bua kunemeka ndongamu wa ntendelelu wa mu dîku ne wa kudilongela bualu udi utuambuluisha bua kusemena pabuipi ne Nzambi. (Yak. 4:8) Patudi tudikosela dîba dia kulonga Bible pa tshibidilu ne tukolesha dimanya dia Mufuki wetu, malanda etu nende adi akola. Patudi tusemena kudi Yehowa bidi bitusaka bua kumunanga ‘ne mutshima wetu wonso ne muoyo wetu wonso ne lungenyi luetu luonso ne bukole buetu buonso.’ (Mâko 12:30) Bushuwa, tudi basue kutumikila Nzambi ne kumuidikija. (Ef. 5:1) Kunemeka ndongamu wa ntendelelu wa mu dîku kudi kuambuluisha bena mu dîku bonso bua kuikala ‘badilongolole’ bu mutudi bindile “dikenga dinene” dikavua Bible mumanyishe. (Mat. 24:21) Tudi ne bua kudienzeja bua kupanduka.

15. Mmunyi mudi ntendelelu wa mu dîku mua kulengeja mushindu udi bena mu dîku benzelangana malu?

¹⁵ Ndongamu wa ntendelelu wa mu dîku udi kabidi ne tshipatshila tshia kukolesha malanda a bena mu dîku. Kupitshisha dîba pamue mu dîku ne kuyukidilangana malu a mu Bible lumingu luonso kudi kulengeja mushindu udi bena mu dîku benzelangana malu. Mulume ne mukaji badi baselangane badi bakolesha malanda abu padibu balonga Dîyi dia Nzambi pamue ne disanka. (Bala Muambi 4:12.) Baledi ne bana badi batendelela Yehowa pamue badi bakolesha dinanga diabu “didi tshisuikidi tshia malu onso a buakane buonso.”​—Kolos. 3:14.

16. Umvuija muvua dilonga dia Bible diambuluishe bana betu ba bakaji basatu.

 ¹⁶ Tuangate tshilejilu tshia bana betu ba bakaji basatu bavua bapete masanka pavuabu baditekele dîba dia kulonga Bible. Nansha muvuabu kabayi ne malela a ku mubidi, bana betu ba bakaji bakulumpe bakavua bafuishe ba bayabu aba bavua basombele mu tshimenga tshimue ne bavua balunda ba matuku a bungi. Bu muvuabu basue kuikala batantshilangana bikole, bakajinga bua kuikalabu bayukidilangana malu a mu Bible pamutu pa kuyukila anu malu a tshianana, ke kumvuanganabu bua bikale batuilangana bua kulonga Bible. Bakatuadija kulonga mukanda wa ‘Rends pleinement témoignage au sujet du Royaume de Dieu’ mu ndongamu wabu eu. Umue wa kudibu udi wamba ne: “Tutu basue dilonga dietu edi bikole, ke bualu kayi misangu ya bungi tutu tupitshisha pa dîba dijima. Tutu tuelangana meji pa nsombelu ya bana betu ba mu bidimu lukama bia kumpala ne tudiebeja tshituvua mua kuenza bu tuetu mu nsombelu ya buena ayi. Pashishe tutu tudienzeja bua kutumikila malu atudi tulonga mu mudimu wa buambi. Kuenza nunku nkutuambuluishe bua kuikala ne disanka mu mudimu wetu wa buambi ne kuvuija bayidi ne nkupatule bipeta bimpe kupita kumpala.” Ndongamu eu mmuambuluishe bana betu aba bua kukolesha malanda abu ne Yehowa ne kushemeja kabidi bulunda buabu basatu. Badi bamba ne: “Ndongamu eu mmutusankishe bikole.”

17. Mmalu kayi adi mua kuenza bua ntendelelu wa mu dîku ambuluishe bena mu dîku?

¹⁷ Netuambe tshinyi buebe wewe? Mmunyi mudi ntendelelu wa mu dîku anyi didilongela dikuambuluishe? Muntu yeye wenza dilonga edi mu mpukapuka, kadiakumuambuluisha to. Muena mu dîku yonso udi ne bua kuikala mudiakaje bua kulonga pa dîba dijadika. Katulekedi malu a tshianana atupangisha bua kuenza dilonga edi to. Mbimpe kusungula bua kulonga malu ambuluisha bena mu dîku diebe. Ntshinyi tshiudi mua kuenza bua bikondo bia dilonga kusankishabi bena mu dîku? Keba mishindu mimpe ya kulongesha ne enza bua dilonga dienzeke mu buimpe ne mu ditalala.​—Yak. 3:18. *

Nushale ‘batabale,’ nuikale ‘badilongolole’

18, 19. Kumanya ne: dilua dia muana wa muntu dikadi pabuipi kudi mua kukusaka wewe ne bena mu dîku diebe bua kuenza tshinyi?

¹⁸ Dinyanguka dia malu didiku lelu didi dileja ne: bulongolodi bua Satana mbubuele mu matuku abu a ku nshikidilu katshia mu tshidimu tshia 1914. Armagedone ukadi musemene pabuipi. Mu katupa kîpi emu Muana wa muntu nealue kukumbaja dilumbuluisha dia Yehowa kudi bantu babi. (Mus. 37:10; Nsu. 2:21, 22) Kumanya bualu ebu kudi mua kukusaka wewe ne dîku diebe bua kuenza tshinyi?

¹⁹ Utuku utumikila mubelu wa Yezu wa kulama dîsu ‘dimpe’ anyi? Padi bena pa buloba ebu bakeba bubanji, lumu ne butumbi, bena mu dîku diebe badiku ne bipatshila bia mu nyuma anyi? Ndongamu wa ntendelelu wa mu dîku anyi wa didilongela udiku wenda bimpe buebe wewe anyi? Utuku ukumbaja tshidibu bamulongoluele anyi? Anu mutuvua bamone mu tshiena-bualu tshishale, udiku ukumbaja mudimu udi Nzambi mukupeshe wewe mulume, mukaji anyi muana bua kuambuluisha bena mu dîku dienu bua kushala ‘batabale’ anyi? (1 Tes. 5:6) Wewe muenze nunku, newikale ‘mudilongolole’ bua dilua dia Muana wa muntu.

[Mêyi adi kuinshi]

Udi muvuluke anyi?

• Umvuija mudi bena mu mêku a bena Kristo mua kuikala ‘badilongolole’ . . .

padibu ne: dîsu ‘dimpe.’

padibu badifundila bipatshila mu mudimu wa Nzambi ne babikumbaja.

padibu ne: tshibidilu tshia kuenza ntendelelu wa mu dîku.

[Nkonko ya dilonga]

[Tshimfuanyi mu dibeji 13]

Dîsu ‘dimpe’ neditusake bua kukandamena malu a pa buloba adi mua kutushiya mu ditanaji