Ntshinyi tshiudi mua kuenza bua ‘wikale ne diakalenga’?

“DIAKALENGA” mmuaku utu bantu ba bungi batambe kunanga. Bamue bantu mbabande mianzu ku midimu ne mbatute diakalenga dia kupeta bubanji ne kuenda lumu. Bakuabu batu bajinga kututa diakalenga, kadi bafika anu ku dienda diakabi.

Mu mishindu yonso, udi mua kupeta diakalenga bilondeshile malu audi wangata ne mushinga mu nsombelu webe. Mishindu mikuabu ibidi iudi mua kupeta diakalenga, mmuudi ukuata mudimu ne dîba ne makanda ebe, ne mushindu uudi udifila.

Bena Kristo ba bungi mbafike ku dimona ne: kuyisha bikole nkubapeteshe disanka dia bungi. Kudifila mu mudimu wa ku dîba ne ku dîba nkuambuluishe bana ne bakulumpe bua kuikala ne diakalenga. Bushuwa bamue badi mua kumona ne: mudimu wa kuyisha udi utonda, bafika too ne ku diteka malu makuabu pa muaba wa kumpala mu nsombelu wabu. Bua tshinyi bitu bienzeka nanku? Ntshinyi tshiudi mua kuenza bua kubenga kulengulula malu adi ne mushinga menemene? Ntshinyi tshiudi mua kuenza bua ‘wikale ne diakalenga’?​—Yosh. 1:8.

Manaya ne malu makuabu atu enzeka mu tulasa

Bansonga bena Kristo badi ne bua kuikala ne nkatshinkatshi pa bidi bitangila kuenzela Nzambi mulelela mudimu ne kuenza malu makuabu. Aba badi benza nunku nebapete diakalenga mu nsombelu wabu ne mbakanyine kalumbandi.

Kadi bamue bansonga bena Kristo batu batamba kuditua mu manaya ne malu makuabu atu enzeka mu tulasa. Kuenza malu aa kakuena anu mua kuikala kubi to. Kadi bansonga bena Kristo badi ne bua kudiebeja ne: ‘Malu aa neangangate dîba bungi kayi? Mbalunda kayi bangikala nabu? Bantu bandi ngenza nabu malu aa badi ne lungenyi kayi? Mmalu kayi angateka pa muaba wa kumpala mu nsombelu wanyi?’ Udi mua kumona ne: muntu yeye muditue mu midimu eyi kakuikala ne dîba dia bungi ne makanda bua kulama malanda ende ne Yehowa to. Dîba adi neumone ne: mbimpe kudifundila bipatshila bidi ne mushinga mu nsombelu.​—Ef. 5:15-17.

Tuangate tshilejilu tshia Wiktor. * Udi wamba ne: “Pamvua ne bidimu 12, ngakabuela mu tshisumbu tshia banayi ba ndundu wa bianza. Mu tshikondo atshi mvua mupete mafutu ne bintu bia bungi. Ngakapeta mpunga wa kulua munayi munene.” Mu bule bua matuku, biakatuadija kutonda Wiktor pakamonaye ne: manaya ende akavua amunyangila malanda ende ne Yehowa. Dituku dikuabu wakafika ku dilala tulu pavuaye udienzeja bua kubala Bible. Wakamona kabidi ne: katshivua ne disanka bua mudimu wa buambi to. Udi wamba ne: “Manaya avua angangata makanda onso, meme kumona ne: avua kabidi akepesha tshisumi tshianyi bua malu a Yehowa. Mvua mumanye ne: tshivua ndifila ne muanyi muonso to.”

Tulasa tubandile

Mukanda wa Nzambi udi ulomba muena Kristo bua kutabalela bena mu dîku diende, kubakumbajila kabidi majinga abu a ku mubidi. (1 Tim. 5:8) Bua kukumbaja bualu ebu, bidi bikengela anu kulonga tulasa tubandile anyi?

Bidi bikengela kukonkonona tshidi kulonga tulasa tubandile mua kuenzela malanda etu ne Yehowa. Tukonkononayi tshilejilu tshia mu Bible bua kumvua bualu ebu.

Baluka uvua mufundi wa muprofete Yelemiya. Musangu kampanda, pamutu pa kutuishila mêsu ku diakalenga divuaye nadi dia kuenzela Yehowa mudimu, Baluka wakatuadija kujinga malu manene. Yehowa wakamona lungenyi  luende elu ne kumudimuija ku diambuluisha dia muprofete Yelemiya wamba ne: ‘Wewe udi udikebela malu manene anyi? Kudikebediwu nansha.’​—Yel. 45:5.

“Malu manene” avua Baluka udikebela mmalu kayi? Uvua mua kuikala ne dijinga dia kuenda lumu munkatshi mua bena Yuda peshi dia kupeta bintu bia ku mubidi. Katshivua kabidi uteka malu a mushinga wa bungi avua amuambuluisha bua kulama malanda ende ne Yehowa pa muaba wa kumpala to. (Filip. 1:10) Bidi bimueneka ne: Baluka wakateleja didimuija dia Yehowa ku diambuluisha dia Yelemiya ne kupandukaye pakabutulabu Yelushalema.​—Yel. 43:6.

Muyuki wende udi mua kutulongesha tshinyi? Mubelu uvua Baluka mupete udi uleja ne: kuvua bualu buvua kabuyi buenda bimpe. Ukavua udikebela malu manene. Wewe muikale ne mushindu wa kudiambuluisha, bidi bikengela anu kujimija dîba, makuta ne makanda ebe bua kulonga tulasa tubandile bua kukumbaja disua diebe peshi dia baledi ne balela bebe anyi?

Tuangate tshilejilu tshia Grzegorz mulongolodi wa programe ya mu ordinatere. Balunda bende bakamusuisha bua kutungunuka ne tulasa bua kupiluka mu malu a ordinatere, yeye kuitaba. Pashishe katshivua kabidi ne dîba dia kuenzela Yehowa mudimu to. Udi wamba ne: “Bivua bintonda pa tshibidilu. Kondo kanyi ka muoyo kavua kandubakana bualu tshitshivua nkumbaja bipatshila bimvua mudifundile mu mudimu wa Yehowa to.”

Kudina ne kasuki mu mudimu wa bianza

Dîyi dia Nzambi didi dikankamija bena Kristo bua kuenza mudimu bikole, ne kuikala bena mudimu anyi bamfumu bimpe. Mupostolo Paulo wakafunda ne: ‘Malu onso anudi nuenza, nuenze ne mitshima yenu bu munudi nuenzela Mukalenge; ki mbu munudi nuenzela bantu.’ (Kolos. 3:22, 23) Kadi nansha mudibi bikengela kuenza mudimu bikole, tshidi ne mushinga nkuikala mu malanda mimpe ne Mufuki wetu. (Muam. 12:13) Muena Kristo yeye muditue ne kasuki mu dienza mudimu wa bianza, udi mua kufika ku diteka malu a Yehowa pa muaba muibidi.

Kuditua bikole mu dienza mudimu wa bianza kudi mua kutshiokesha muena Kristo bikole, kumupangisha kabidi ne makanda bua kulama malanda ende ne Yehowa ne kuambuluisha bena mu dîku diende. Mukalenge Solomo wakamba ne: ‘Manza abidi muule tente ne mudimu mukole’ misangu ya bungi atu anu ‘kuipata kua lupepele.’ Muena Kristo yeye muditue anu mu mudimu wa bianza, udi mua kupeta tunyinganyinga tupite bungi. Mudimu udi mua kukuata muntu wa nunku ku bupika umufikisha too ne ku disama. Bikalabi nanku, muntu wa nunku udiku mua ‘kusanka bua mudimu wende mukole’ anyi? (Muam. 3:12, 13; 4:6) Udiku mua kuikala ne makanda a mubidi  makumbane ne dijinga dikole dia kukumbaja majitu ende mu dîku ne kuenza mudimu wa Yehowa anyi?

Janusz udi musombele ku Mputu wa kudi dîba dipatukila wakaditua mu mudimu wende wa bianza. Udi wamba ne: “Bena panu bavua banganyisha bikole bua mumvua ngenza mudimu wanyi bimpe. Kadi malanda anyi ne Yehowa akanyanguka, meme kulekela kuyisha. Pashishe meme kulekela dibuela mu bisangilu. Ngakalua ne diambu dia bungi, tshiyi mua kuteleja kabidi mibelu ya bakulu ne meme kupatuka mu tshisumbu.”

Udi mua kututa diakalenga mu nsombelu webe

Tudi bakonkonone malu asatu adi mua kunyangila muena Kristo malanda ende ne Yehowa yeye mudifileku bikole. Udiku muditue mu dienza amue a ku malu aa anyi? Bikalabi  nanku, nkonko ne mvese ne mumvuija bidi bilonda ebi nebikuambuluishe bua kumanya ni udi mu njila udi mua kukututshisha diakalenga.

Manaya ne malu makuabu atu enzeka mu tulasa: Udiku muditue pebe mu malu aa anyi? Malu aa adiku akuangata dîba diuvua wenza malu a Yehowa anyi? Kudisangisha ne bena Kristo nebe kakutshiena kukusankisha kabidi anyi? Bikalabi nanku, idikija mukalenge Davidi wakalomba Yehowa ne: ‘Ummanyishe njila undi ne bualu bua kuendela.’​—Mus. 143:8.

Mutangidi muena ngendu mukuabu wakambuluisha Wiktor utukadi batele. Mutangidi eu wakamuambila ne: “Udi wakula ne disanka dia bungi bua malu ebe a manaya a ndundu wa bianza.” Wiktor udi wamba ne: “Biakandenga ku muoyo bikole. Meme kumona ne: nkavua mupambuke. Ke meme kulekela balunda batuvua tunaya nabu ne kukeba balunda bimpe mu tshisumbu.” Wiktor udi mpindieu wenzela Yehowa mudimu ne tshisumi mu tshisumbu tshiabu. Udi wamba ne: “Ebeja balunda bebe, baledi bebe peshi bakulu ba mu tshisumbu tshienu bakuambile bikalabu bamone malu a mu tulasa audi wenza ni adi akusemeja pabuipi ne Yehowa peshi kule nende.”

Kuenaku mua kuambila bakulu ba mu tshisumbu tshienu ne: udi musue kuipatshila majitu mu mudimu wa Nzambi anyi? Kuenaku mua kuambuluisha bakulakaje badi dijinga ne bantu ba kubakuatshisha, pamuapa kubayila mu tshisalu peshi kubenzela midimu ya ku nzubu anyi? Nansha wewe muikale mukulumpe anyi muana, udi mua kuenza pebe mudimu wa ku dîba ne ku dîba ne kuambila bakuabu malu adi akupetesha disanka.

Tulasa tubandile: Yezu wakadimuija bua kubenga ‘kudikebela butumbi.’ (Yone 7:18) Nansha wewe muangate dipangadika dia kulonga tulasa tua bungi, udiku ‘mumanye mua kujadika malu adi makane’ anyi?​—Filip. 1:9, 10.

Grzegorz mulongolodi wa programe ya mu ordinatere wakashintulula amue malu mu nsombelu wende. Udi wamba ne: “Ndi mupepeje nsombelu wanyi bualu mvua ngangata mibelu ya bakulu ne mushinga. Ngakamona ne: kabivua anu bikengela bua meme kulonga tulasa tua bungi to. Bualu bivua mua kuangata dîba ne makanda anyi.” Grzegorz wakadifila bikole mu dienza midimu ya mu tshisumbu. Pashishe wakabuela mu kalasa katudi tubikila mpindieu ne: Kalasa ka Malu a mu Bible bua Bana betu ba balume bajike. Bushuwa ‘wakadisumbila tshikondo’ bua kulonga bikole malu a Nzambi.​—Ef. 5:16.

Mudimu wa bianza: Udiku muditue bikole mu dienza mudimu webe wa bianza, mufike too ne ku dilengulula malu a Yehowa anyi? Utuku upitshisha dîba dia bungi ne bena mu dîku diebe nuyukila pamue anyi? Udiku ulengeja mushindu webe wa dienza midimu mu bisangilu anyi? Utuku uyukila ne bakuabu miyuki idi ikolesha anyi? Nunku ‘utshine Nzambi, utumikile mikenji yende’ bua upete masanka a kudi Yehowa ne ‘usankishe mutshima webe mu mudimu webe mukole.’​—Muam. 2:24; 12:13.

Janusz utukadi batele kavua mutute diakalenga mu mudimu wende wa bianza to, kadi mudimu wende wakatua panshi. Wakapingana kudi Yehowa kayi kabidi ne makuta eku muikale ne mabanza. Janusz wakakajilula malu ende ne udi mpindieu mpanda-njila wa pa tshibidilu ne mukulu mu tshisumbu tshiabu. Udi wamba ne: “Pandi nsanka ne bindi nabi eku ndifila mu midimu ya Nzambi ne muanyi muonso, ndi ne ditalala dia mu mutshima.”​—Filip. 4:6, 7.

Konkonona ne muoyo umue malu audi wangata ne mushinga ne tshidi tshikusaka bua kuangata ne mushinga. Kuenzela Yehowa mudimu kudi kupetesha diakalenga dia kashidi. Difila bikole mu mudimu uudi wenzela Yehowa mu nsombelu webe.

Udi mua kushintulula amue malu, pamuapa kumusha bimue bintu bidi kabiyi ne mushinga bua kudijadikila nkayebe ‘mudi disua dia Nzambi dimpe, didi dimusankisha, ne didi diakane tshishiki.’ (Lomo 12:2) Kadi udi mua ‘kututa diakalenga’ wewe wenzela Yehowa mudimu ne muoyo mujima.

[Mêyi adi kuinshi]

[Kazubu/​Tshimfuanyi mu dibeji 31]

Ntshinyi tshiudi mua kuenza bua wikale ne diakalenga?

Bu mudiku bintu bia bungi bidi mua kukuangata dîba, ntshinyi tshiudi mua kuenza bua kubenga kulengulula malu adi ne mushinga menemene? Konkonona ne muoyo umue malu audi wangata ne mushinga ne tshidi tshikusaka bua kuangata ne mushinga pa kuelangana meji ku nkonko idi ilonda eyi:

MANAYA NE MALU MAKUABU ATU ENZEKA MU TULASA

▪ Bantu baudi wenza nabu malu aa badi ne lungenyi kayi?

▪ Malu aa neakuangate dîba bungi kayi?

▪ Malu aa adi mua kulua kuangata muaba wa kumpala mu nsombelu webe anyi?

▪ Adiku akuangata dîba diuvua wenza malu a Yehowa anyi?

▪ Mbalunda kayi bawikala nabu?

▪ Udiku wangata balunda aba ne mushinga kupita bena Kristo nebe anyi?

TULASA TUBANDILE

▪ Wewe muikale ne mushindu wa kudiambuluisha, bidi bikengela anu kujimija dîba, makuta ne makanda ebe bua kulonga tulasa tubandile anyi?

▪ Bua kudiambuila bujitu, bidi bikengela anu kulonga tulasa tubandile anyi?

▪ Kulonga tulasa tubandile nekukuambuluishaku bua kubuela mu bisangilu anyi?

▪ Udiku ‘mumanye mua kujadika malu adi makane’ anyi?

▪ Udiku musue kueyemena bukole bua Yehowa budiye ukukumbajila nabu majinga ebe anyi?

MUDIMU WA BIANZA

▪ Mudimu uudi musungule bua kuenza udiku ukupetesha mushindu wa ‘kusankisha mutshima webe mu mudimu webe mukole’ anyi?

▪ Mudimu webe udiku ukuambuluisha bua kuikala ne makanda a mubidi makumbane ne dijinga dikole dia kukumbaja majitu ebe mu dîku ne kuenza mudimu wa Yehowa anyi?

▪ Utuku upitshisha dîba dia bungi ne bena mu dîku diebe nuyukila pamue anyi?

▪ Udiku muditue bikole mu dienza mudimu webe wa bianza, mufike too ne ku dilengulula malu a Yehowa anyi?

▪ Mudimu webe udiku ukupangisha bua kuenza bimpe midimu mu bisangilu anyi?

[Tshimfuanyi mu dibeji 30]

Yehowa wakadimuija Baluka bua didikebela malu manene