Tunyemayi lubilu ne ditantamana

‘Tuidikije ne kutantamana tshidikijilu tshia lubilu tshidi tshitekibue kumpala kuetu.’​—EB. 12:1.

1, 2. Bible udi ufuanyikija nsombelu wa bena Kristo ne tshinyi?

TSHIDIMU tshionso etshi bantu ba bungi pa buloba bujima batu benza manaya a lubilu. Munkatshi muabu mutu banyemi bapiluke badi basue kutshimuna. Kadi ba bungi ba kudibu batu bamanye ne: kabena mua kutshimuna to. Buabu bobu tshidi ne mushinga nkufika ku ndekelu kua lubilu luabu.

² Bible udi wakula pende bua lubilu kampanda. Udi umvuija ne: nsombelu wa bena Kristo balelela mmuenze bu badi mu lubilu balumbila difutu. Bantu badi badienzeja bua kuikala ne nsombelu muimpe wa buena Kristo ne kushala balamate Yehowa badi bu banyemi ba lubilu badi basue kujikija lubilu luabu. Mupostolo Paulo wakafunda bua lubilu elu mu mukanda wende wa kumpala uvuaye mutumine bena Kristo ba mu Kolinto wamba ne: ‘Kanuena bamanye ne: bantu badi balumbila lubilu mu tshilumbilu badi balumbila bonso, kadi umue wabu udi wangata difutu anyi? Lumbilayi bienu nunku, bua nuenu nuangate difutu.’​—1 Kol. 9:24.

3. Ntshinyi tshivua Paulo musue kuleja pavuaye muambe ne: anu muntu umue ke udi wangata difutu?

³ Pavua Paulo muambe ne: anu muntu umue ke udi wangata difutu, uvuaku usua kuamba ne: anu muena Kristo umue ke uvua ne bua kupeta difutu dia muoyo wa tshiendelele anyi? Tòo. Uvua wakula bua tshivua banyemi ba lubilu bipatshila mu lubilu luabu. Bena Kristo ba mu Kolinto bavua bamanye ne: banyemi ba lubilu bonso bavua benza ne muabu muonso bua kutshimuna, nansha muvua munyemi anu umue wangata difutu. Ke bualu kayi banyemi bonso bavua badibidija bimpe ne banyema ne muabu muonso. Bonso buabu bavua badienzeja bua kutshimuna. Paulo uvua musue bua bena Kristo nende badienzeje bua kushala balamate Yehowa ne kujikija lubilu luabu. Bena Kristo bonso badi benza nunku badi mua kupeta difutu dia muoyo wa tshiendelele.

4. Ntshinyi tshitudi ne bua kumanya pa bidi bitangila lubilu lua bena Kristo?

⁴ Mêyi a Paulo aa adi atukankamija, kadi adi kabidi atusaka bua kuelangana meji bikole pa nsombelu wetu. Tuetu bikale ne nsombelu udi usankisha Yehowa, netuikale ne ditekemena dia kupeta muoyo wa tshiendelele mu diulu anyi mu Mparadizu pa buloba. Kadi nsombelu wa muena Kristo mmufuanangane ne dinyema lubilu lua mutantshi mule mu njila udi ne njiwu ya bungi. Kudi malu a bungi adi mua kututekesha mu mudimu utudi tuenzela Yehowa peshi kutufikisha ku diwulekela. (Mat. 7:13, 14) Ke tshikavua tshienzekele bamue batendeledi ba Yehowa. Mmateyi ne njiwu kayi bidi mu njila utudi tunyemena lubilu bua kupeta muoyo? Mmunyi muudi mua kubiepuka? Ntshinyi tshiudi mua kuenza bua kujikija lubilu ne kupeta difutu?

Bua kutshimuna bidi bikengela kutantamana

5. Ntshinyi tshivua Paulo mumvuije mu Ebelu 12:1?

⁵ Matuku makese pashishe, Paulo wakafundila bena Kristo bena Ebelu bavua mu Yelushalema ne mu Yudaya. Wakakula kabidi bua banyemi ba lubilu. (Bala Ebelu 12:1.) Wakumvuija bua tshinyi bena Kristo badi ne bua kutungunuka ne kunyema lubilu ne kabidi tshidibu ne bua kuenza bua kulujikija. Netuanji kuakula bua tshinyi Paulo uvua mufundile bena Ebelu mukanda ne tshivuaye musue bua benze. Pashishe netuakule bua tshitudi mua kulongela ku malu avuaye mubafundile.

6. Ntshinyi tshivua bamfumu ba bitendelelu basue kuenzela bena Kristo?

⁶ Bena Kristo ba mu bidimu lukama bia kumpala  bavua basanganyibua mu tshikondo tshikole. Nsombelu eu uvua mutambe kukuata bena Kristo bena Ebelu bavua mu Yelushalema ne mu Yudaya bualu bamfumu ba bitendelelu bena Yuda bavua benzeja bantu bua babalonde. Kumpala bavua basake bantu bua kuitaba ne: Yezu Kristo uvua uluisha mbulamatadi ne uvua muenzavi uvua mukumbanyine lufu. Bamfumu aba bakashipa Yezu Kristo ne bavua bakeba kukandika bantu bavua bayisha bualu bua Yezu. Mu mukanda wa Bienzedi, tudi tubalamu tshivua tshienzeke panyima pa Pentekoste wa mu 33. Balombodi aba bavua baluishe bena Kristo misangu ya bungi bua kubakandika mudimu wa kuyisha. Bushuwa, nsombelu uvua mukole bua bena Kristo ba lulamatu.​—Bien. 4:1-3; 5:17, 18; 6:8-12; 7:59; 8:1, 3.

7. Mmalu kayi avua mavuije tshikondo tshikole bua bena Kristo bavua Paulo mufundile?

⁷ Bualu bukuabu buvua buvuije tshikondo tshikole bua bena Krito aba budi ne: dibutuka dia Yelushalema divua disemene pabuipi. Yezu ukavua mubadimuije ne: Nzambi uvua ne bua kubutula Yelushalema. Uvua mubaleje tshivua ne bua kuenzeka kumpala kua kabutu aku, ne kubambilaye kabidi tshivuabu ne bua kuenza bua kupanduka. (Bala Luka 21:20-22.) Yezu wakabadimuija ne: ‘Nudilame bimpe, bua mitshima yenu kayinemi ne mudi ne dibuluka dia maluvu ne malu a pa buloba, ne bua dituku adi kadilu kunudi lukasa bu buteyi.’​—Luka 21:34.

8. Ntshinyi tshivua mua kuikala tshifikishe bamue bena Kristo bua kuteketa mu mudimu wa Nzambi anyi kuwulekela?

⁸ Paulo wakafundila bena Kristo bena Ebelu bidimu bitue ku 30 panyima pa Yezu mumane kuamba mêyi au. Ntshinyi tshivua tshifikile bena Kristo aba munkatshi mua bidimu 30 abi? Bamue kabakatungunuka ne kulonga malu avua atangila Yehowa ne kukolesha malanda abu nende to, bualu bavua bapete ntatu anyi bualu bavua baditatshisha bua majinga abu a ku dituku. (Eb. 5:11-14) Bamue bena Kristo bavua pamuapa bela meji ne: bivua mua kuikala bipepele bua kuikala ne nsombelu wa buena uvua nende bena Yuda bakuabu. Bavua mua kuikala bela meji ne: kuenza nanku kakuvua kubi, bualu bena Yuda batshivua bitaba Nzambi ne batumikila mikenji ya Mose. Kuvua kabidi bamue bantu mu tshisumbu bavua benzeja bakuabu bua kutumikila mikenji ya Mose ne bilele bia bena Yuda. Bamue bena Kristo bavua babalonda ne bakuabu bavua babateleja bualu bavua ne buôwa. Ntshinyi tshivua Paulo muambe bua kukankamija bena Kristo nende bua kutungunuka ne kuikala ne nsombelu wa buena Kristo ne kushala balamate Yehowa?

9, 10. (a) Ku ndekelu kua nshapita wa 10 wa mukanda wa Ebelu, Paulo wakamba ne: bena Kristo bena Ebelu bavua ne bua kuenza tshinyi? (b) Bua tshinyi Paulo uvua muakule bua bienzedi bia ditabuja bia batendeledi ba Yehowa ba kale?

⁹ Yehowa wakasaka Paulo bua kufundila bena Kristo bena Ebelu mukanda uvua ubakankamija. Mu nshapita wa 10 udi wanji ubumvuija muvua mikenji ya Mose mikale ‘mundidimbi wa bintu bimpe bilualua,’ ne muvua mibi yabu mua kubuikidibua anu ku diambuluisha dia mulambu wa Yezu. Ku ndekelu kua nshapita wa 10, Paulo wakabambila ne: bavua ne bua kutantamana bua mulambu eu kubambuluishawu. Wakamba ne: ‘Bualu bua nudi ne bualu bua kuikala ne didikankamika, bua panuenza bu mu disua dia Nzambi, nudi mua kuangata mulayi. Bualu bua palepa musangu muipi, yeye udi ulua nealue, kena unenga.’​—Eb. 10:1, 36, 37.

¹⁰ Mêyi aa ke avua Paulo mukankamije nawu bena Kristo bena Ebelu bua kutantamana. Mu nshapita wa 12 uvua ubadimuija kabidi bua kunanukila ubambila bua ‘kunyema ne ditantamana tshidikijilu tshia lubilu’ tshivua kumpala kuabu. Kadi kumpala kua yeye kuamba nunku, Nzambi ukavua mumusake bua kubafundila bua bualu bukuabu budi mu Ebelu nshapita wa 11. Mu nshapita au, uvua mumvuije tshidi ditabuja dilelela dia Nzambi pavuaye mufunde malu avua bantu bavua ne ditabuja dilelela benze. Kadi bua tshinyi uvua muakule bua ditabuja kumpala kua kuakulaye kabidi bua ditantamana? Bualu uvua musue bua bena Kristo abu bamanye ne: bua kuleja ditabuja dilelela kudi Yehowa bavua ne bua kutantamana ne kuikala ne dikima. Wakatela balume ne bakaji ba bungi bavua bashale ne lulamatu kudi Yehowa nansha mu nsombelu mikole. Tshilejilu tshiabu tshivua mua kuambuluisha bena Kristo bena Ebelu bua kutantamena ntatu. Panyima pa yeye mumane kuakula bua bienzedi bia ditabuja bia batendeledi ba Nzambi aba, Paulo wakambila bena Kristo bena Ebelu ne: ‘Bualu bua tudi tunyungulukibua ne tshisumbu tshinene nunku tshia bamanyi, tumushayi bujitu  buonso, ne malu mabi adi bualu butekete bua kutulenduisha, tuidikije ne kutantamana tshidikijilu tshia lubilu tshidi tshitekibue kumpala kuetu.’​—Eb. 12:1.

‘Tshisumbu tshia bamanyi’

11. Tuetu tuelangana meji pa bilejilu bia bena mu ‘tshisumbu tshinene tshia bamanyi,’ bidi mua kutufikisha ku dienza tshinyi?

¹¹ Paulo wakamba ne: batendeledi ba Yehowa bavua ne muoyo kumpala kua Yezu bavua ‘tshisumbu tshinene tshia bamanyi tshidi tshitunyunguluke.’ Bavua bashale balamate Yehowa too ne ku ndekelu kua muoyo wabu, ne tshilejilu tshiabu tshidi tshileja ne: bena Kristo badi mua kushala balamate Yehowa nansha mu ntatu mikole. Bena mu ‘tshisumbu tshinene tshia bamanyi’ etshi bavua benze anu bu banyemi ba lubilu bakavua bajikije lubilu luabu. Tshilejilu tshiabu tshivua ne bua kukankamija bakuabu bua kutungunuka ne kunyema. Bu tuetu tunyema lubilu eku bamanye ne: banyemi bimpe mbatutangile ne badi batukankamija bua kutungunuka ne kunyema, tuvua mua kudienzeja ne muetu muonso bua kulujikija. Nunku bena Kristo bena Ebelu bavua ne bua kuelangana meji pa bilejilu bia batendeledi ba Yehowa ba kale. Bilejilu biabu bivua mua kubakankamija ne kubavuluija ne: buobu pabu bavua mua ‘kunyema ne ditantamana’ ne kujikija lubilu luabu. Tuetu petu tudi mua kuenza nanku.

12. Ntshinyi tshitudi mua kulongela ku ditabuja dia bantu bavua Paulo mutele?

¹² Tudi mua kuidikija ditabuja dia bantu badi Paulo mutele aba bualu ba bungi bavua mu nsombelu mifuanangane ne yetu. Tshilejilu, Noa uvua ne muoyo kumpala kua Yehowa kubutula bulongolodi bua tshikondo atshi ku mvula wa kabutu. Tuetu petu tudi mu tshikondo tshikadi Yehowa pa kubutula bulongolodi bua Satana. Yehowa wakalomba Abalahama ne Sala bua kumuangala mu musoko wabu. Wakabalaya bua kubavuija tshisamba tshinene bua kumukuatshilabu mudimu ne bavua batekemene dikumbana dia mulayi au. Yehowa udi utulomba bua kubenga kuikala ne muoyo anu buetu nkayetu, kadi kuikala nawu bua bualu buende. Udi utulaya ne: tuetu benze nanku neikale mulunda wetu ne neatubeneshe. Mose wakenza luendu lule mu buloba buvua ne njiwu bua kuya mu Buloba bulaya. Tudi petu mu bulongolodi bubi ne tudi bindile bulongolodi bupiabupia budi Yehowa mutulaye. Bidi ne mushinga bua tuikale tuelangana meji pa nsombelu wa bantu bavua balamate Yehowa aba. Tudi mua kuidikija malu avuabu benze bua kusankisha Yehowa ne kulongela kabidi ku malu avua kaayi amusankisha.​—Lomo 15:4; 1 Kol. 10:11.

Ntshinyi tshivua tshibambuluishe bua kutshimuna?

13. Bua tshinyi Noa uvua mu nsombelu mukole? Ntshinyi tshivua tshimuambuluishe bua kuenza malu onso avua Yehowa mumuambile bua kuenza?

¹³ Ntshinyi tshivua tshiambuluishe batendeledi ba Yehowa aba bua kutantamana ne kujikija lubilu luabu? Tukonkonone tshivua Paulo muambe bua Noa. (Bala Ebelu 11:7.) Katshia, Noa kavua muanji kumona mvula wa kabutu ubutula bantu ne nyama. (Gen. 6:17) Mvula wa kabutu kavua muanji kuloka musangu mukuabu to. Kadi Noa kavua muele meji ne: mvula wa kabutu kavua mua kuloka to. Bua tshinyi? Bualu uvua witaba ne: Yehowa utu ukumbaja misangu yonso malu atuye ulaya. Nunku, Noa kavua mumone bimukolela bua kutumikila Yehowa to. Wakenza anu muvua Yehowa mumuambile bua kuenza. Bible udi wamba ne: “Noa wakenza nunku.” (Gen. 6:22) Noa uvua ne malu a bungi a kuenza. Uvua ne bua kuibaka buatu, kusangisha nyama, kulama biakudia bua bena mu dîku diende ne nyama, kudimuija bantu bua mvula wa kabutu ne kuambuluisha bena mu dîku diende bua kuikala ne ditabuja dikole kudi Yehowa. Kabivua anu bipepele bua Noa kuenzaye malu onso avua Yehowa mumuambile to. Kadi uvua ne ditabuja kudi Yehowa, nunku wakananukila mu mudimu uvuaye ne bua kuenza. Yehowa wakamusungila yeye ne bena mu dîku diende ne wakamupesha masanka a bungi.

14. Mmu nsombelu kayi muvua Abalahama ne Sala baleje ditabuja kudi Nzambi? Ntshinyi tshitudi mua kulongela ku tshilejilu tshiabu?

¹⁴ Paulo wakatela Abalahama ne Sala munkatshi mua ‘tshisumbu tshinene tshia bamanyi tshidi tshitunyunguluke.’ Nsombelu wabu wakashintuluka pavua Nzambi mubambile bua kumuangala mu Ula. Kabavua bamanye tshivua mua kubafikila to. Kadi bavua ne ditabuja dikole kudi Yehowa ne bavua bamutumikila nansha mu  nsombelu mikole. Bible udi ubikila Abalahama ne: ‘nkambua wa bonso badi bitabuja’ bualu uvua mudipangishe malu a bungi bua Yehowa. (Lomo 4:11) Bena Kristo bena Ebelu bavua bamanye nsombelu wa Abalahama ne dîku diende, ke bualu kayi mupostolo Paulo wakakula anu bua bimue bienzedi biabu bia ditabuja. Ebi bivua bikumbane bua kuleja muvuabu ne ditabuja dikole. Paulo wakamba bua bualu buabu ne: ‘Bantu aba bonso bakafua mu ditabuja kabayi banji kuangata biakabalayabu, kadi bamane kubitangila ne kubinemekela pa bule, ne bamane kuitabuja ne: tudi benyi ne bena luendu pa buloba ebu.’ (Eb. 11:13) Ditabuja divuabu nadi kudi Nzambi ne malanda abu nende biakabambuluisha bua kutantamana mu lubilu.

15. Bua tshinyi Mose wakasungula bua kuikala ne nsombelu uvuaye nende?

¹⁵ Mose ngumue wa ku batendeledi ba Yehowa badi benza ‘tshisumbu tshinene tshia bamanyi.’ Mose wakamuangala kuabu anu bu Abalahama. Mose wakashiya butumbi ne bubanji bia mu nzubu wa mukalenge. Wakasungula bua ‘kukengeshibua pamue ne bantu ba Nzambi.’ Bua tshinyi wakasungula bua kuenza nanku? Paulo wakamba ne: ‘Bualu bua wakatangila too ne ku dipingajila dia difutu. Bua yeye wakatantamana bu uvua utangila yeye udi kayi umueneka ku mêsu.’ (Bala Ebelu 11:24-27.) Mose uvua mumanye ne: kuvua bualu bua mushinga mukole buvua bupite ‘masanka a malu mabi a tshitupa tshipi.’ Buende yeye Nzambi uvua muntu mulelela ne uvua mumanye ne: milayi yende yonso neyikumbane. Bualu ebu ke buakamuambuluisha bua kuenza malu ne dikima ne bua kutantamena nsombelu mikole. Biakamuambuluisha kabidi bua kukumbaja mudimu uvuabu bamupeshe wa kupatula bena Isalele mu Ejipitu ne kubafikisha mu Buloba bulaya.

16. Mmunyi mutudi bamanye ne: Mose kavua mutekete mu mikolo bualu uvua mupangile mua kubuela mu Buloba bulaya?

¹⁶ Abalahama ne Mose bakafua kumpala kua malu avua Yehowa mubalaye kukumbanawu. Kumpala kua bena Isalele kubuelabu mu Buloba bulaya, Nzambi wakambila Mose ne: ‘Wewe neutangile buloba budi kumpala kuebe; kadi kuena ubuela mu buloba bundi mpa bena Isalele.’ Bu  muvua Mose ne Alona babenge bua kutumikila Nzambi ku mâyi a Meliba, kabakabuela mu Buloba bulaya to. Bavua balekele bantu bena mutu mukole babafikisha munda, ke bualu kayi kabakatumbisha Nzambi. (Dut. 32:51, 52) Mose kakateketa mu mikolo bualu kavua mua kubuela mu Buloba bulaya to. Kakela meji ne: dipangadika divua Nzambi muangate divua dibi to. Tudi bamanye bualu ebu bualu wakalomba bua kubenesha bena Isalele. Mêyi a ndekelu avuaye muambile bena Isalele avua ne: ‘Bena Isalele, nuenu nudi ne disanka, mbanganyi badi bu nuenu basungidibue kudi Yehowa. Yeye udi bu ngabu wa dikuatshisha dienu; udi bu muele wa mvita unudi nutamba nawu bakuabu?’​—Dut. 33:29.

Tshitudi mua kulongela ku malu aa

17, 18. (a) Ntshinyi tshitudi mua kulongela kudi bena mu ‘tshisumbu tshinene tshia bamanyi’? (b) Netukonkonone tshinyi mu tshiena-bualu tshidi tshilonda?

¹⁷ Tudi tulongela ku nsombelu wa bamue bantu ba mu ‘tshisumbu tshinene tshia bamanyi tshidi tshitunyunguluke’ ne: bua kujikija lubilu luetu, tudi ne bua kuikala ne ditabuja dikole kudi Nzambi ne malu adiye mulaye. (Eb. 11:6) Ditabuja edi didi ne bua kumuenekela ku mushindu utudi tuenza malu mu nsombelu wetu. Tudi bamanye ne: Yehowa mmutulaye nsombelu muimpe mu matuku atshilualua. Tudi mua kumona ‘yeye udi kayi mua kumueneka ku mêsu.’ Ku mêsu kuetu Nzambi mmuntu mulelela, ke bualu kayi tudi tunyema ne ditantamana.​—2 Kol. 5:7.

¹⁸ Lubilu lua bena Kristo ki ndutekete to. Nansha nanku, tudi mua kujikija lubilu luetu. Mu tshiena-bualu tshidi tshilonda, netumone malu makuabu adi mua kutuambuluisha bua kujikija lubilu luetu.

Newandamune munyi?

• Bua tshinyi Paulo wakakula bua bienzedi bia ditabuja bia bamanyi ba kale?

• Mmunyi mudi tshilejilu tshia ‘tshisumbu tshinene tshia bamanyi tshidi tshitunyunguluke’ tshituambuluisha bua kutantamana mu lubilu?

• Ntshinyi tshiudi mulongele ku tshilejilu tshia Noa, Abalahama, Sala ne Mose?

[Nkonko ya dilonga]

[Tshimfuanyi mu dibeji 19]

Abalahama ne Sala bavua badiakaje bua kushiya bintu bionso bivuabu nabi mu Ula