“Ndi mulema mpindieu kadi ki mbua kashidi to”

Muyuki mulonda kudi Sara van der Monde

Bantu batu bangambila pa tshibidilu ne: “Sara, utu useka bimpe be. Bua tshinyi utu anu ne disanka?” Ntu mbambila ne: ndi ne ditekemena dia pa buadi. Ndi mua kumvuija ditekemena dianyi mu mêyi makese ne: “Ndi mulema lelu kadi ki mbua kashidi to.”

MVUA muledibue mu 1974 mu tshimenga tshia Paris mu ditunga dia France. Diledibua dianyi divua dia lutatu, ne pashishe bakalua kumpeta ne disama dia buongo ditu dienza bantu tuneke. Tshivua nyungusha mikolo ne bianza bimpe to, ne mvua ngakula bintu bivua kabiyi biumvuika bimpe. Mvua mupete kabidi disama dia tshiseki ne masama makuabu avua ankuata bipepele.

Pamvua ne bidimu bibidi, dîku dietu diakaya kusombela ku Melbourne mu Australie. Bidimu bibidi pashishe, tatu wakatulekela meme ne mamu. Ke musangu wa kumpala undi mvuluka mumvue mudiumvue pabuipi ne Nzambi. Bu muvua mamuanyi muikale Ntemu wa Yehowa, uvua uya nanyi pa tshibidilu mu bisangilu mungakalonga ne: Nzambi mmunange ne udi uditatshisha buanyi. Dimanya edi ne dinanga divua mamu munnange ne mushindu uvuaye unkolesha biakangambuluisha bua kudiumvua mu bukubi nansha mutuvua ne ntatu ya mu nsombelu.

Mamuanyi wakandongesha kabidi mua kusambila Yehowa. Bushuwa, buanyi meme bivua bipepele bua kusambila pamutu pa kuakula. Pandi nsambila, tshiena ntata bua kushindumuna miaku to, bualu ndi “nyumvua” bimpe mu lungenyi. Bu mudibi bikole bua kumvua malu andi ngamba, bidi binkolesha pandi mmanya ne: Yehowa udi umvua malu onso nansha meme muambile munda munda anyi muambe bibi ne dîyi dikole.​—Mus. 65:2.

Mushindu undi mpita ne malu a mu nsombelu

Pamvua ne bidimu bitanu, disama dianyi diakakola dilomba bua kungelabu biamu ku mikolo bua kuenda. Pamvua ngenda, mvua ntetuka bikole. Pangakakumbaja bidimu 11 tshivua mua kuenda kabidi to. Pashishe, tshivua mua kudibandila anyi kuditulukila pa bulalu to, kadi mvua ntua lubote lua tshiamu tshikuabu tshiasa ku nzembu bua tshingambule bua kunteka mu kakalu kanyi.

Bimue bikondo bulema buanyi butu bunyingalaja bikole. Dîba adi ntu mvuluka mêyi atutu tuamba mu dîku dietu a ne: “Kuditatshishi bua malu audi kuyi mua kuenza. Ikala wenza malu audi mua kukokesha.” Bualu ebu mbungambuluishe bua kuenza malu bu mudi kuendesha kabalu, buatu, kuya mu dikisha muaba kampanda ne kuendesha mashinyi mu njila ivua kayiyi ne bantu ba bungi. Ntu ngumvua kabidi disanka pandi nzola, ngenza bilamba bia bantu kudibuikila, ndengeja bilamba ne bimfuanyi ne ngenza bintu bia mabumba.

Bu mudi bulema buanyi buikale bukole, bamue bantu batu bela meji ne: tshiena mua kutendelela Nzambi bu muntu wa lungenyi ne meji to. Pamvua ne bidimu 18, mulongeshi wetu mukuabu wakangambila bua ngumbuke kumbelu kuetu  bua “kuepuka” ntendelelu wa mamuanyi. Wakangambila kabidi ne: neankebele muaba wa kusomba. Kadi, ngakamuambila ne: tshivua mua kulekela ditabuja dianyi ne mvua mua kumbuka kumbelu kuetu anu pamvua mua kutuadija kudienzela malu.

Matuku makese panyima pa diyukila ne mulongeshi wetu au, ngakatambula bua kulua Ntemu wa Yehowa. Bidimu bibidi pashishe, ngakaya kusomba wanyi muaba. Mpindieu ndi ne disanka dia kupeta diambuluisha didi dikengela ne budikadidi bundi musue.

Bualu bumvua tshiyi muelele meji

Munkatshi mua bidimu, mvua mutuilangane ne malu makuabu avua ateka ditabuja dianyi mu diteta. Dimue dituku, ngakakema bikole pavua mulongi wetu mukuabu uvua pende mulema mundombe bua kuselangana nende. Kumpala bivua bingenze disanka. Anu bu muntu mukaji yonso, ntu njinga kuikala ne mulume wa kusomba nende. Kadi kuselangana bonso balema kakuena kutujadikila ne: netuikale ne disanka mu dibaka to. Kabidi nsongalume au kavua Ntemu to. Malu atudi tuitabuja, tuenza ne tuipatshila avua mashilangane menemene. Nunku mmunyi mutuvua mua kusomba pamue? Mvua kabidi mudisuike bua kutumikila mukenji wa Nzambi wa kuselangana anu ne muena kuitabuja nanyi. (1 Kol. 7:39) Nunku, ngakambila nsongalume au mu buimpe ne: tshivua mua kuselangana nende to.

Too ne lelu ndi mumanye ne: mvua muangate dipangadika dimpe. Kakuyi mpata ndi mushindike ne: nengikale ne disanka mu bulongolodi bupiabupia budi Nzambi mulaye. (Mus. 145:16; 2 Pet. 3:13) Mu dindila tshikondo atshi, ndi mudisuike bua kushala mulamate anu Yehowa ne kusanka bilondeshile nsombelu wanyi.

Ndi mutekemene dituku dingikala mua kutumpika mu kakalu kanyi ne kunyema mudilekelele. Dîba adi nengambe ne: “Mvua mulema, kadi mpindieu ndi tumatuma bua kashidi.”