‘Muana mmusue kuleja Tatu’

‘Kakuena muntu udi mumanye Tatu anu Muana ne udi Muana musue kuleja Tatu.’​—LUKA 10:22.

NEWANDAMUNE MUNYI?

Yezu uvua mukumbane bua kuleja bantu Tatuende bua tshinyi?

Yezu mmuleje bakuabu Tatuende mushindu kayi?

Udi mua kuidikija Yezu mu dileja bakuabu Tatu mu mishindu kayi?

1, 2. Bitu bikolele bantu ba bungi bua kuandamuna lukonko kayi? Bua tshinyi?

BITU bikolela bantu ba bungi bua kuandamuna lukonko lua ne: ‘Nzambi nnganyi?’ Tshilejilu, nansha mudi bantu ba bungi badi badiamba mudibu bena Kristo bamba ne: Nzambi udi Busatu bunsantu, ba bungi batu bitaba ne: mbikole bua kumvua dilongesha edi. Mufundi kampanda wakamba ne: “Dilongesha edi ndikolele bantu bua kumvua. Ndibapite mutu.” Ku lukuabu luseke, bantu ba bungi batu bitaba ne: bintu mbidienze batu bamba ne: Nzambi katuku to. Bela meji ne: bintu bionso bidi bikemesha mbilue ku mpukapuka. Nansha nanku pamutu pa Charles Darwin kubenga dikalaku dia Nzambi, wakamba ne: “Buanyi meme bidi bimueneka ne: mbikole bua bantu kumvuabu bualu ebu.”

² Bantu nansha bobu bitaba malu kayi pa bidi bitangila Nzambi batu anu badiela nkonko bua dikalaku diende. Kadi, padibu kabayi bafika ku diumvua malu aa bimpe, ba bungi batu balekela kukeba bua kumvua malu a Nzambi. Bushuwa, Satana ‘mmufofomije mêsu a badi kabayi bitabuja.’ (2 Kol. 4:4) Kabiena bikemesha mudi bantu ba bungi kabayi bamanye bulelela ne bikale mu tshibuejakaji pa bidi bitangila Tatu, Mufuki wa diulu ne buloba.​—Yesh. 45:18.

3. a) Udi mutuleje Mufuki nnganyi? b) Netuandamune nkonko kayi?

³ Bitu kabidi ne mushinga bua bantu bamanye bulelela pa bidi bitangila Nzambi. Bua tshinyi? Bualu anu aba badi babikila ‘dîna dia Yehowa’ ke basungidibua. (Lomo 10:13, NW) Kubikila dîna dia Nzambi kudi kumvuija kuangata Yehowa anu bu Muntu mulelela. Yezu Kristo wakapesha bayidi bende dimanya dia mushinga mukole edi. Wakabaleja Tatu. (Bala Luka 10:22.) Bua tshinyi Yezu uvua mukumbane bua kuleja bantu Tatu kupita muntu mukuabu yonso? Mmunyi  muvuaye mumuleje? Mmunyi mutudi mua kuidikija tshilejilu tshia Yezu bua kuambuluisha bakuabu bua kumanya Tatu? Tuandamunayi nkonko eyi.

ANU YEZU KRISTO NKAYENDE KE UDI MUKUMBANE BUA KUTULEJA TATU

4, 5. Anu Yezu nkayende ke uvua mukumbane bua kutuleja Tatu bua tshinyi?

⁴ Yezu uvua mukumbane menemene bua kutuleja Tatuende. Bua tshinyi? Bualu kumpala kua kufukabu bintu bionso bakavua bamane kufuka Yezu mu diulu ne mubidi wa nyuma bu ‘Muana umuepele mulela wa Nzambi.’ (Yone 1:14; 3:18) Uvua ne muaba wa pa buawu. Kumpala kua kufukabu tshintu kayi tshionso Muana uvua ne disanka bua muvua Tatuende umutabalela ne muvuaye ulonga malu ne ngikadilu yende. Tatu ne Muana bavua ne bua kuikala bayukila bikole ne banangangane munkatshi mua bidimu bia bungi. (Yone 5:20; 14:31) Muana uvua ne bua kuikala mufike ku dimanya ngikadilu ya Tatuende bikole.​—Bala Kolosai 1:15-17.

⁵ Tatu wakateka Muana bua kuikala muleji-mpala wende, mmumue ne: ‘Dîyi dia Nzambi.’ (Buak. 19:13) Nunku Yezu nkayende ke uvua mukumbane bua kuleja bakuabu Tatuende. Mbikumbane bua mudi Yone muambe muvua Yezu ‘Dîyi’ muikale “mu tshiadi tshia Tatu.” (Yone 1:1, 18) Tshiambilu atshi tshidi tshivuluija tshibidilu tshivua natshi bantu ba mu matuku a Yone pavuabu badiila kaba kamue. Muntu uvua mua kusomba kumpala kua mukuabu mu nkuasa umuepele. Bu muvuabu basombe pamue bavua mua kuyukila bipepele. Nunku bu muvua Muana “mu tshiadi,” bavua mua kuikala bayikila ne Tatuende bimpe bitambe.

6, 7. Mmunyi muvua malanda avua pankatshi pa Tatu ne Muana enda anu akola?

⁶ Malanda avua pankatshi pa Tatu ne Muana avua enda anu akola. Muana uvua ‘usankisha Nzambi ku dituku ne ku dituku.’ (Bala Nsumuinu 8:22, 23, 30, 31.) Nunku bidi bimvuika bua tshinyi malanda abu akakola bua muvuabu benza mudimu pamue ne muvua Muana ulonga mua kuidikija ngikadilu ya Tatuende. Pavuabu bafuke bantu ne banjelu, Muana wakamona muvua Yehowa ubenzela malu, ne wakafika ku dianyisha bikole bumuntu bua Tatuende.

⁷ Pavua Satana muluishe bumfumu bua Yehowa, biakapesha Muana mushindu wa kulonga mudi Yehowa uleja dinanga, buakane, meji ne bukole pavuaye kumpala kua tshilumbu tshikole. Kakuyi mpata, bualu ebu buvua mua kuikala bulongolole Yezu bua kupita ne nsombelu mikole ivuaye mulue kupeta mu mudimu wende pa buloba.​—Yone 5:19.

8. Bible udi utuambuluisha bua kulonga ngikadilu ya Tatu mushindu kayi?

⁸ Bu muvua Muana mu malanda masheme ne Tatuende, uvua mua kumvuija malu a bungi pa bidi bimutangila kupita muntu mukuabu kayi yonso. Kudiku mushindu mukuabu muimpe utudi mua kufika ku dimanya Tatu bimpe pa kumbusha kukonkonona malu avua Muana umuepele mulela mulongeshe ne muenze anyi? Tshilejilu, elabi meji muvuabi mua kuikala bikole bua tuetu kumvua bimpe tshidi muaku “dinanga” umvuija bu tuetu mua kuwubala anu mu diksionere. Kadi patudi tuela meji bua malu adibu bafunde mu Bible bua mudimu wa Yezu ne mishindu ivuaye wenzela bantu malu, tudi mua kumvua bimpe tshidi tshiambilu tshia ne: “Nzambi udi dinanga” tshiumvuija. (1 Yone 4:8, 16) Ke tshitudi mua kuenza kabidi bua ngikadilu mikuabu ya Nzambi ivua Yezu muleje bayidi bende pavuaye pa buloba.

MUVUA YEZU MULEJE TATUENDE

9. a) Yezu uvua muleje Tatuende mu mishindu kayi ibidi? b) Fila tshilejilu tshidi tshileja mudi Yezu ulejila Tatuende ku malu avuaye mulongeshe.

⁹ Mmunyi muvua Yezu muleje bayidi  bende ne muleje kabidi aba bavua mua kulonda panyima Tatu? Wakabalejaye mu mishindu ibidi: ku malongesha ne mu malu avuaye wenza. Tuanji tukonkononayi malongesha a Yezu. Malu avua Yezu mulongeshe bayidi bende avua aleja muvuaye mumanye mushindu uvua Tatuende wela meji, udiumvua ne wenza malu. Tshilejilu, Yezu wakafuanyikija Tatuende ne mulami wa mikoko muimpe udi uya kukeba mukoko mujimine. Yezu wakamba ne: padi mulami eu upeta mukoko udi mujimine ‘neatambe kusanka kupita muvuaye mua kusanka bua makumi tshitema ne tshitema ivua kayiyi mipambuke.’ Lusumuinu elu ludi lumvuija tshinyi? Yezu wakamba ne: “Nunku Tatu wenu wa mu diulu kena musue muana umue wa mu bana aba bakese afue.” (Mat. 18:12-14) Lusumuinu elu ludi lukulongesha tshinyi pa bidi bitangila Yehowa? Nansha wewe umvua imue misangu ne: kuena ne mushinga anyi ne: bantu badi bakulengulula, umanye ne: Tatuebe wa mu diulu udi uditatshisha bua bualu buebe ne ukutabalela. Ku mêsu kuende udi umue wa ku ‘bana bakese aba.’

10. Mmunyi muvua Yezu muleje Tatu ku diambuluisha dia malu avuaye wenza?

¹⁰ Mushindu muibidi udi Yezu uleja bayidi bende Tatu nku diambuluisha dia malu avuaye wenza. Nunku pavua Filipo muambile Yezu ne: ‘Utuleje Tatu,’ Yezu uvua mumuandamuinamu ne: “Wakuntangila meme wakutangila Tatu.” (Yone 14:8, 9) Tumonayi bimue bilejilu bidi bileja muvua Yezu muleje ngikadilu ya Tatuende. Pavua muena nsudi kampanda mulombe Yezu bua amondope, Yezu wakalenga muntu uvua ne “disama dia nsudi dia bungi” eu ne kumuambila ne: ‘Ndi musue, wikale mulengejibue.’ Bu muvuaye mondopibue, muena nsudi eu wakamona tshianza tshia Yehowa mu tshivua Yezu muenze. (Luka 5:12, 13) Kabidi pavua Lazalo mufue bayidi bakamona luse lua Tatu pavua ‘tshiji tshiuule munda mua Yezu tente, mubidi wende mukanke ne pavuaye mushikunke.’ Nansha muvua Yezu mumanye ne: uvua ne bua kubisha Lazalo, wakumvua kanyinganyinga kavua naku bena mu dîku dia Lazalo ne balunda bende. (Yone 11:32-35, 40-43) Kakuyi mpata udi mua kuikala pebe munange miyuki kampanda ya malu a mu Bible idi ikuambuluisha bua kumona luse lua Tatu mu malu avua Yezu wenza.

11. a) Pavua Yezu muipate bantu mu ntempelo, uvua muleje ne: Tatuende utu mushindu kayi? b) Bua tshinyi mushindu uvua Yezu muipate bantu ku ntempelo udi utukolesha?

¹¹ Ndilongesha kayi ditudi tupetela ku mushindu uvua Yezu muipate bantu mu ntempelo? Tangila tshivua tshienzeke: Yezu wakangata mfimbu ne kuipataye bonso bavua bapanyisha mikoko ne ngombe. Wakitshikija mpalata ya bashintudi ba makuta ne wakatonkola mêsa abu. (Yone 2:13-17) Bualu buvuaye muenze ebu buakavuluija bayidi bende mêyi a mulayi avua Mukalenge  Davidi muambe a ne: ‘Lukunukunu lua ku nzubu webe luakundia.’ (Mus. 69:9) Yezu wakaleja dijinga dikole dia kutua ntendelelu mulelela nyama ku mikolo pavuaye wenza malu ne dikima. Udiku umona bumuntu bua Tatu mu bualu buvuaye muenze ebu anyi? Bidi bituvuluija ne: Nzambi kena anu ne bukole bua kujikija malu mabi pa buloba to, kadi udi kabidi ne dijinga dikole dia kuenza bualu ebu. Mushindu uvua Yezu muenze malu kumpala kua bubi udi uleja mudi Tatu umvua padiye umona malu mabi adi enzeka pa buloba lelu. Bualu ebu budi butukolesha padibu batuenzela malu ne kansungansunga.

12, 13. Mushindu uvua Yezu wenzela bayidi bende malu udi utulongesha tshinyi pa bidi bitangila Yehowa?

¹² Tukonkononayi tshilejilu tshikuabu tshia muvua Yezu wenzela bayidi bende malu. Bayidi bavua anu bakokangana bua kumanya uvua ku mutu kua bakuabu. (Mâko 9:33-35; 10:43; Luka 9:46) Bu muvua Yezu mulongele malu a bungi kudi Tatu, uvua mumanye muvua Yehowa umvua bua lungenyi lua diditeka ku mutu kua bakuabu. (2 Sam. 22:28; Mus. 138:6) Kabidi Yezu uvua mumone muvua Satana Diabolo muleje lungenyi elu. Muena diambu eu wakaditatshisha bua kuenda lumu ne kupeta muaba munene. Nunku Yezu uvua mumvue bibi bitambe pakamonaye bayidi bavuaye mulongeshe bikale ne lungenyi lubi alu. Too ne bantu bavuaye musungule bua kuikala bapostolo bavua pabu ne lungenyi lubi alu. Bakaleja muvuabu ne lungenyi lua dikeba miaba minene too ne mu dituku dia ndekelu dia muoyo wa Yezu pa buloba. (Luka 22:24-27) Yezu wakatunguka ne kubabela ne bulenga, mumanye ne: mu bungi bua matuku nebikale ne bua kulonga bua kuenza malu ne budipuekeshi anu bu yeye.​—Filip. 2:5-8.

¹³ Udiku mua kumona bukole bua Tatu mu mushindu uvua Yezu ubela bayidi bende ne lutulu anyi? Udiku umona mu bienzedi ne mêyi bia Yezu mudi Tatu kayi ulekela bantu bende nansha mudibu benza bilema misangu ya bungi anyi? Patudi tumanya ngikadilu ya Nzambi eyi, kabienaku bitusaka bua kunyingalala patudi tuenza bilema anyi?

YEZU UVUA MUDIAKAJE BUA KULEJA TATUENDE

14. Tshidi tshijadika ne: Yezu uvua musue kuleja bantu Tatuende ntshinyi?

¹⁴ Batshikokesha nkaya ba bungi batu badiatakaja bantu ne babasokoka malu. Kadi Yezu uvua wambila bantu malu a bungi avuaye mumanye avua atangila Tatuende. (Bala Matayo 11:27.) Kabidi Yezu uvua mupeshe bayidi bende ‘meji bua bamanye yeye udi wa bushuwa’ mmumue ne: Yehowa Nzambi. (1 Yone 5:20) Bualu ebu budi bumvuija tshinyi? Yezu uvua mujinguluile bayidi bende malu avua mua kubambuluisha bua kumvua malu adi atangila Tatu avuaye ulongesha. Kavua mubasokoke tshidi Tatu mu malongesha avuabu kabayi mua kumvua bu mudi dia Busatu bunsantu to.

15. Yezu kakanji kuamba malu onso a Tatuende bua tshinyi?

¹⁵ Yezu uvuaku muambile bantu malu onso a Tatuende avuaye mumanye anyi? Too, ne budimu kavua mubambile malu onso avuaye mumanye to. (Bala Yone 16:12.) Bua tshinyi? Bualu dîba adi, bayidi bende ‘kabavua bamanye mua kutuala’ malu onso to. Kadi Yezu uvua muambe ne: bavua mua kupeta dimanya dia bungi pavua “musambi” anyi nyuma muimpe uvua mua kubalombola “mu malu malelela onso” mua kufika. (Yone 16:7, 13) Anu bu mutu baledi ba meji mua kubenga kuleja bana babu amue malu too ne padibu bakumbana bua kuumvua, Yezu wakindila bua bayidi bende bashindame ne bakumbane bua kumvua amue malu adi atangila  Tatu. Yezu uvua mumanye matekete abu bimpe.

IDIKIJA TSHILEJILU TSHIA YEZU TSHIA KUAMBULUISHA BAKUABU BUA KUMANYA YEHOWA

16, 17. Tudi mua kuamba ne: wewe udi mukumbane bua kuleja bakuabu Tatu bua tshinyi?

¹⁶ Paudi umanya muntu kampanda bimpe ne wanyisha ngikadilu yende milenga, kabienaku mua kukusaka bua kuambila bantu bakuabu malu ende anyi? Pavua Yezu pa buloba uvua wambila bantu malu a Tatuende. (Yone 17:25, 26) Katuenaku mua kumuidikija pa kuleja bakuabu malu a Yehowa anyi?

¹⁷ Anu mutukadi bamone, Yezu uvua mumanye Tatuende bikole kupita bantu bakuabu. Ke bualu kayi uvua musue kuambila bakuabu malu avuaye mumanye, ne wakapesha bayidi bende meji bua bobu kumvua malu male a bumuntu bua Nzambi. Ku diambuluisha dia Yezu, katuenaku bafike ku dimanya Tatuetu mu mushindu udi bantu ba bungi lelu kabayi bamumanye anyi? Tudi ne dianyisha bua mudi Yezu mutuleje Tatuende ku diambuluisha dia malongesha ne bienzedi biende. Bulelela, tudi mua kutumbila mu kumanya kuetu kua Tatu. (Yel. 9:24; 1 Kol. 1:31) Bu mutudi badienzeje bua kusemena pabuipi ne Yehowa, yeye pende mmusemene pabuipi netu. (Yak. 4:8) Nunku tudi mua kuambila bakuabu malu a Yehowa. Mmunyi mutudi mua kuenza nanku?

18, 19. Mmu mishindu kayi iudi mua kuleja bakuabu Tatu? Umvuija.

¹⁸ Anu bu Yezu tudi ne bua kuleja Tatu ku mêyi ne mu bienzedi bietu. Tuvuluke ne: bantu ba bungi batudi tupetangana nabu mu buambi ki mbamanye Nzambi to. Badi mua kuikala bangata Nzambi mu mushindu mubi bua malongesha a dishima. Tudi mua kubambila malu atudi bamanye bua dîna dia Nzambi, malu adiye mulongolole bua bantu ne ngikadilu yende bidi mu Bible. Kabidi tudi mua kuyukila ne bena Kristo netu imue miyuki ya mu Bible idi ileja ngikadilu ya Nzambi mu mushindu utuvua katuyi bamanye kumpala. Tuetu benze nunku nebibambuluishe pabu.

¹⁹ Tudi mua kuamba tshinyi bua muudi mua kuleja Tatu ku diambuluisha dia bienzedi biebe bua kufuana Yezu? Padi bantu bamona mutudi banange Kristo mu bienzedi bietu nebibasake bua kunanga Tatu ne Yezu. (Ef. 5:1, 2) Mupostolo Paulo udi utukankamija bua ‘tuikale bidikiji bende anu bu muvuaye muidikiji wa Kristo.’ (1 Kol. 11:1) Tudi ne diakalenga dinene dia kuambuluisha bantu bua bamanye Yehowa ku diambuluisha dia bienzedi bietu. Bulelela, tutungunukayi ne kuidikija Yezu mu dileja bantu bakuabu Tatu.

[Nkonko ya dilonga]