KUKADI bidimu, Roald ne mukajende Elsebeth bavua ne bidimu bipatshila ku 50 bavua ne nsombelu muimpe mu Bergen udi tshimenga tshibidi ku bunene mu ditunga dia Norvège. Bobu pamue ne muanabu wa bakaji Isabel ne wa balume Fabian bavua benza midimu ne tshisumi mu tshisumbu. Roald uvua mukulu ne Elsebeth uvua mpanda-njila, Isabel ne Fabian bavua bobu bambi ba lumu luimpe.

Kadi mu ngondo wa 9 wa 2009, dîku edi diakangata dipangadika dia kuenza bualu bukuabu, mbuena kuamba ne: kuyisha mu musoko wa kule bua lumingu lumue. Nunku Roald, Elsebeth ne Fabian ukavua ne bidimu 18 bakaya ku Nordkyn, ka tshidiila ka mu Finmark ku mutu kua tshijengu tshia Arctique. Pakafikabu, bakayisha mu musoko wa Kjøllefjord pamue ne bena Kristo bakuabu ba balume ne ba bakaji bavua balue pabu mu musoko wa kule eu bua kuyisha lumu luimpe. Roald udi uvuluka wamba ne: “Ku ntuadijilu kua lumingu, mvua mumvue disanka bua mumvua mulongolole malu anyi bua kuenza mudimu wa pa buawu eu mu lumingu lujima.” Kadi ku ndekelu kua lumingu alu, Roald wakabanga kumvua bibi. Tshivua tshienzeke ntshinyi?

Roald udi wamba ne: “Mario uvua mpanda-njila mu Finnmark wakangebeja diakamue ni mvua mua kuitaba bua kuya mu tshimenga tshia Lakselv bua kuambuluisha mu tshisumbu tshivua ne bamanyishi 23.” Roald wakakema bikole bua bualu buvuaye kayi mutekemene abu. Udi wamba ne: “Meme ne Elsebeth tukavua bele meji bua kuya kuenza mudimu muaba uvuabu dijinga ne bamanyishi, kadi tuvua mua kuya anu pavua bana bumbuka kumbelu.” Kadi munkatshi mua matuku makese avua Roald uyisha mu kamusoko amu, uvua mumone muvua bantu basue kulonga bua kumanya Yehowa. Bavua dijinga ne diambuluisha anu dîba adi, ki mpashishe to. Roald udi uvuluka ne: “Bualu abu buakantonda, kumpangishabu ne tulu matuku a bungi.” Nunku, Mario wakaya ne Roald ne dîku diende ku Lakselv uvua mutantshi wa kilometre mitue ku 240 ku Sud kua Kjøllefjord. Mario uvua musue bua benyi aba badimuene tshisumbu tshikese tshivuamu etshi.

Mu Lakselv, Andreas uvua umue wa ku bakulu babidi ba mu tshisumbu etshi wakendakana ne benyi aba mu musoko ne kubaleja Nzubu wa Bukalenge. Bena mu tshisumbu bakabakidila ne disanka ne kuambilabu Roald ne Elsebeth ne: bavua mua kusanka bu dîku diabu dilue kusombela muaba au bua kubambuluisha mu mudimu wa kuyisha Bukalenge. Andreas wakamba ne mimuemue ne: ukavua mukebele Roald ne Fabian mudimu. Benyi aba bavua mua kuenza tshinyi?

Fabian wakamba diakamue ne: “Tshiena musue kusombela apa to.” Kavua musue kushiya balunda bende bavuaye mukole nabu mu tshisumbu bua kuya mu kamusoko to. Kavua kabidi muanji kujikija malu a nzembu avuaye ulonga to. Kadi, bakakonka Isabel (ukavua ne bidimu 21) ku telefone bua ambe muvuaye wela meji bua diya mu kamusoko aku. Wakamba ne disanka ne: “Ke tshintu njinga kuenza kuonso eku.” Pashishe Isabel udi wamba ne: “Pangakela meji bikole bua bualu ebu, ngakadikonka ne: ‘Lungenyi elu nduimpe anyi? Nenshiye balunda banyi? Nshale anu mu tshisumbu tshietu mudi malu enda bimpe ne malongolola bimpe anyi?’” Elsebeth wakenza tshinyi bua dibikila edi? Udi wamba ne: “Ngakamona ne: Yehowa mmupeshe dîku dietu mudimu, kadi ngakela kabidi meji bua nzubu wetu utuvua tufuma ku diakaja ne bua bintu bionso bituvua bapete munkatshi mua bidimu 25.”

Pakajika lumingu lua pa bualu elu, Roald ne dîku diende bakapingana ku Bergen, kadi bavua anu bela meji bua bena Kristo nabu balume ne bakaji ba mu Lakselv udi mutantshi wa kilometre 2 100. Elsebeth udi wamba ne: “Mvua musambile Yehowa misangu ya bungi ne tuvua anu tubikilangana, tufundilangana, tutuminangana foto ne tulondelangana malu ne balunda batuvua bapete.” Roald udi wamba ne: “Biakandomba matuku a bungi bua meme kuitaba bua kuya. Mvua kabidi ne bua kukonkonona ni kuvua mushindu wa kupeta bia kudiambuluisha nabi. Ngakasambila Yehowa bikole ne kuyukila ne dîku dianyi ne kabidi ne bamue bana betu badi ne dimanya dia bungi.” Fabian udi uvuluka wamba ne: “Pamvua ngela meji bikole bua bualu ebu, ngakamona ne: tshivua ne bualu bulelela buvua bunsaka bua kubenga to. Ngakasambila Yehowa misangu ya bungi ne dijinga dianyi dia kuya divua dienda dikola.” Kadi Isabel? Bua yeye kudilongolola bua luendu alu, wakatuadija kuenza mudimu wa bumpanda-njila mu tshimenga tshiabu. Mu ngondo isambombo ivuaye wenza mudimu eu, uvua kabidi udilongela Bible bikole ne kudimonaye mukumbane bua kuenza luendu lule alu.

Bu muvua dijinga divua nadi dîku edi dia kuya muaba uvuabu bakeba bamanyishi dienda divula, bakatuadija kuenza malu avua mua kubambuluisha bua kukumbaja tshipatshila atshi. Roald uvua wenza mudimu wa makuta a bungi uvuaye munange kadi wakalomba bua kuanji kuwulekela bua tshidimu tshijima. Kadi, mfumuende wakamulomba bua ashale uwenza mêba makese mmumue ne: mbingu ibidi ku mudimu, bingu isambombo pambelu amu nanku. Roald udi wamba ne: “Bakakepesha difutu dianyi bikole, kadi mvua anu bimpe.”

Elsebeth udi wamba ne: “Bayanyi wakandomba bua kukeba nzubu mu Lakselv ne kuteka bafutshidi mu wetu wa mu Bergen. Biakandomba dîba dia bungi ne kudienzeja bikole, kadi malu akenda bimpe. Panyima pa matuku, bana banyi bakapeta midimu ya benza matuku makese. Makuta avuabu bapeta akatuambuluisha bua kusumba biakudia ne kufuta njila.”

Isabel udi wamba ne: “Bu muvua katshimenga mutuvua baye kakese, lutatu lunene lumvua mupete luvua lua kupeta mudimu uvua mua kungambuluisha  bu mumvua mpanda-njila. Misangu mikuabu bivua bimueneka bu bikole.” Kadi, pavua Isabel wenza tumidimu tua matuku makese tuvuaye upeta, biakamuambuluisha bua kusumba bintu bivuaye nabi dijinga. Wakenza midimu eyi misangu tshitema mu tshidimu tshia kumpala. Malu akenda munyi bua Fabian? Udi wamba ne: “Bua kujikija tulasa tua malu a nzembu tumvua ndonga, bivua bikengela ngikale ndibidija. Ke tshimvua muenze mu Lakselv. Pashishe bakangela mateta ne meme kupeta mudimu wa nzembu wa kuenza mu matuku makese.”

Marelius ne mukajende Kesia bavua basue pabu kuya kuenza mudimu muaba uvuabu dijinga ne bamanyishi. Marelius udi ne bidimu 29 udi wamba ne: “Miyuki ya mu mpungilu ne nkonko ivuabu bele bampanda-njila biakansaka bua kuela meji bua kuvudija mudimu wanyi.” Kadi, bua Kesia udi ne bidimu 26 mpindieu, bivua bimukolele bua kushiyangana ne bena mu dîku diabu. Udi wamba ne: “Ngakela meji bikole bua kushiyangana ne bantu bandi munange.” Marelius wakenza mudimu mêba a bungi bua kusumba nzubu. Udi wamba ne: “Ku diambuluisha dia Yehowa ne dia masambila a bungi atuvua tumulomba bua kutuambuluisha bua kushintulula malu, tuakakumbana bua kuya.” Kumpala, bavua badilongela Bible mêba a bungi. Pashishe bakapana nzubu wabu, kulekelabu midimu ivuabu benza ne mu ngondo wa 8 wa 2011, bakaya mu tshimenga tshia Alta tshidi ku Nord kua Norvège. Marelius uvua wenza mudimu wa kulama mfranga ne Kesia uvua upana bintu mu makazen bua kudiambuluishabu muaba eu bu muvuabu bampanda-njila.

Miyuki idi mu Annuaire idi yakula bua bana betu bavua baye kuambuluisha miaba ivuabu dijinga ne bamanyishi ba Bukalenge yakalenga Knut ne mukajende Lisbeth badi mpindieu ne bidimu 30 ne pa mutu ku muoyo. Lisbeth udi wamba ne: “Malu aa akatuelesha meji bua kuya kuyisha mu ditunga dienyi, kadi mvua ngelakana bualu tshivua ngitaba ne: muntu wa patupu bu meme uvua mua kuenza nanku to.” Kadi bakenza malu kampanda bua kukumbaja tshipatshila tshiabu. Knut udi wamba ne: “Tuakapana nzubu wetu, tuetu kulama makuta ne kuya ne mamuanyi. Pashishe bua kulabula dienza mudimu mu ditunga dienyi, tuakaya mu tshisumbu tshia mu muakulu wa Anglais tshia mu Bergen bua tshidimu tshimue, tuakapetangana ne mamuende wa Lisbetsh.” Matuku makese pashishe, Knut ne Lisbeth bakadimona bakumbane bua kuya mu Ouganda, muaba uvua munene kupita Bergen. Batu balukila mu Norvège bua kuenza mudimu ngondo ibidi ku tshidimu. Nunku badi ne makuta makumbane bua kudiambuluisha nawu ne bua kuyisha mêba a bungi mu Ouganda ngondo idi ishala.

Malu akenda munyi bua bana betu bavua basue kuenza mudimu aba? Roald udi wamba ne: “Tudi tusomba pamue mêba a bungi mu dîku mu musoko wa kule eu kupita mutuvua tuenza mu Bergen. Malanda a mu dîku dietu mmakole bikole. Tudi ne disanka bua kumona mudi bana betu bakoleshe dinanga diabu bua Yehowa. Tudi kabidi ne lungenyi luimpe bua bintu bia ku mubidi. Kabiena kabidi ne mushinga kutudi mutuvua tubimona kumpala to.”

 Elsebeth wakamona muvuabi ne mushinga bua kulonga muakulu mukuabu. Bua tshinyi? Bualu tshisumbu tshia mu Lakselv tshidi kabidi ne Karasjok, musoko udi munkatshi mua ba-Sami mu teritware watshi. Ba-Sami mbasombele ku mutu kua ditunga dia Norvège, Suède, Finlande ne Russie. Nunku bua kupetangana ne bantu aba, Elsebeth wakalonga muakulu wa ba-Sami. Mpindieu udi mua kuyukila nabu ndambu mu mukualu eu. Udiku usanka bua teritware wende mupiamupia eu anyi? Udi wamba ne disanka ne: “Ndi ndonga Bible ne bantu basambombo. Ndi ne disanka bua kuenza mudimu muaba eu.”

Fabian udi mpindieu mpanda-njila ne musadidi wa mudimu udi wamba ne: yeye ne Isabel mbambuluishe bansonga basatu bavua dijinga ne diambuluisha bua kudifila bikole mu midimu ya tshisumbu. Bonso basatu badi mpindieu benza mudimu wa buambi bikole. Babidi ba kudibu bakadi batambule ne mbenze mudimu wa bumpanda-njila buambuluishi mu ngondo 3 wa 2012. Umue wa ku bansonga aba ukavua mutuadije kuteketa mu nyuma wakela Fabian ne Isabel tuasakidila bua muvuabu bamuambuluishe bua “kukola kabidi mu nyuma.” Fabian udi wamba ne: “Pakambaye mêyi aa biakandenga bikole ku muoyo. Kuambuluisha muntu kudi kupetesha disanka dia bungi.” Isabel udi wamba ne: “Mu mudimu eu, ndi bushuwa ‘mutete, mulabule, mumvue ne: Yehowa udi muakane.’” (Mus. 34:8) Udi wamba kabidi ne: “Bualu budi ne mushinga kupita bionso budi ne: kuenza mudimu muaba eu nkumpetesha disanka dia bungi.”

Marelius ne Kesia badi mpindieu ne nsombelu mukumbanyine kadi muikale wa nsongo. Tshisumbu tshia mu Alta muvuabu baye tshidi mpindieu ne bamanyishi 41. Marelius udi wamba ne: “Kutangila panyima kudi kuambuluisha bua kumona mushindu udi nsombelu wetu mushintuluke bikole. Tudi tuela Yehowa tuasakidila bua mutudi tumuenzela mudimu wa bumpanda-njila muaba eu. Kakuena bualu budi bufila disanka bu ebu to.” Kesia udi wamba kabidi ne: “Ndi mulonge mua kueyemena Yehowa ne muoyo mujima ne udi ututabalela bikole. Ndi mumone kabidi ne: kuya kusombela muaba udi kule ne balela banyi nkungambuluishe bua kuangata ne mushinga wa bungi dîba ditudi tupitshisha pamue. Tshitu muanji kunyingalala bua dipangadika dietu to.”

Knut ne Lisbeth badi pabu badiumvua bishi mu Ouganda? Knut udi wamba ne: “Bivua bilomba dîba dia bungi bua kuibidilangana ne muaba ne bibidilu bipiabipia. Tutu imue misangu tupangila mâyi, nzembu ne tusama tshifu, kadi tudi mua kulombola malonga a Bible bungi butudi basue.” Lisbeth udi wamba ne: “Wewe mumbuke muaba utudi ne muende minite 30, kudi teritware mikuabu idi lumu luimpe kaluyi luanji kufika. Kadi patudi tuyamu, tudi tusangana bantu babala Bible ne batulomba bua kubalongesha. Kulongesha bantu badi badipuekesha nunku ndisanka dia bungi be!”

Mfumuetu Kristo Yezu udi ne disanka bua kumona mu diulu mudiye mushindu udi lumu luimpe luvuaye mutuadije luyishibua pa buloba too ne mu miaba ya kule. Bulelela, bua batendeledi bonso ba Nzambi, bidi bienza disanka bua kudifila ne muoyo mujima bua kukumbaja mukenji wa Yezu wa ‘kuvuija bantu ba mu bisamba bionso bayidi.’​—Mat. 28:19, 20.