María Isabel mmuambi wa lumu luimpe wa tshisumi utshidi muana wa mu tshimenga tshia San Bernardo mu ditunga dia Chili mu Amérique wa ku Sud. Yeye ne dîku diabu mbena mu tshisamba tshia Mapuche. Dîku diabu dijima divua ne disanka bua dienza dia tshisumbu tshipiatshia tshia mu muakulu wa tshiena Mapuche udibu babikila kabidi ne: Mapudungun.

Pakamanyishabu ne: bavua ne bua kuenza Tshivulukilu tshia lufu lua Kristo mu muakulu wa Mapudungun kabidi ne: bavua bapatule mabeji 2 000 mu muakulu eu a kubikila nawu bantu mu Tshivulukilu, biakelesha María Isabel meji. Uvuaku mua kuenza tshinyi bua kuambuluishaye pende? Wakavuluka bilejilu bia Bantemu bakuabu batshivua bana bavua bapatule bipeta bimpe pavuabu bayishe balongi babu ne balongeshi babu. Wakayukila ne baledi bende bua bualu ebu ne kuangatabu dipangadika bonso pamue bua María Isabel ele meji bua muvuaye mua kuabanya mabeji a dibikila mu tshilongelu tshiabu. Wakalongolola bua kuenza tshinyi?

Tshia kumpala, María Isabel wakalomba dianyisha kudi balombodi ba tulasa bua kulamika dibeji dia dibikila ku tshibueledi tshinene tshia tulasa. Bakitaba dilomba diende ne kuanyishabu tshivuaye mulongolole bua kuenza. Dimue dituku mu dinda pakadila ngonga, mulombodi wa tshilongelu wakafila dimanyisha ku tshikolokolo bua dibikila edi.

Pashishe, María Isabel wakalomba bua abuele mu tulasa tuonso bua kufila mabeji aa. Pakamuanyishilabu kudi balongeshi, wakebeja mu kalasa ne kalasa konso bikalaku kuvua mulongi muena Mapuche. Udi wamba ne: “Mvua ngela meji ne: mvua mua kupeta anu balongi 10 anyi 15 ba mu mêku a bena Mapuche bua tshilongelu tshijima. Kadi bavua bapite bungi, meme kufila mabeji a dibikila 150.”

Mamu mukuabu uvua mumone dibeji dia dibikila divuabu balamike ku tshibueledi tshia tulasa wakebeja bua bamuleje muntu uvuaye mua kuyukila nende bua tshibilu atshi. Fuanyikija muakakemaye pakamufikishabu kudi muana wa bakaji wa bidimu 10. María Isabel udi wamba ne mimuemue ne: “Uvua mutekemene bua kumonangana ne muntu mukole.” Pakapesha María Isabel mamu eu dibeji dia dibikila ne kumumvuija malu mu tshikoso, wakamulomba adrese wende bua yeye ne baledi bende baye kumutangila bua kumuleja malu makuabu adi atangila Bukalenge bua Nzambi. Biakasankisha bamanyishi ba lumu luimpe bonso 20 bavua bayisha mu muakulu wa Mapudungun bua kumona ne: mamu eu pamue ne bakuabu bantu 26 bavua basue bulelela ba mu Mapushe bavua balue mu Tshivulukilu. Mpindieu tshisumbu tshiabu tshikadi tshinene.

Nansha wewe muikale bukole kayi, udiku mua kuenza bia muomumue bua kubikila balongi benu nansha bena mudimu nebe mu Tshivulukilu, mu muyuki wa patoke nansha mu mpungilu wa distrike anyi? Bua tshinyi kuenaku mua kukeba bilejilu mu mikanda yetu bidi mua kukuambuluisha bua kumanya mushindu uudi mua kupatula bipeta bimpe? Sambila kabidi Yehowa bua akupeshe nyuma wende bua akuambuluishe bua kupeta dikima dia kuakula bua bualu buende. (Luka 11:13) Wewe muenze nunku, neusanke pebe ne nebikukoleshe bua kumona bipeta bidi bifumina ku kudilongolola kuebe kuimpe.