1, 2. Nnjila kayi udi Yezu utudishila lelu? Bua tshinyi mbimpe tumanye njila eu?

MUANETU wa bakaji mukuabu wakaleja dianyisha diende mu mukanda uvuaye mufundile bana betu badi benza mudimu ku biro bietu bia buloba bujima wamba ne: “Bana betu, tshiena mumanye mua kubala bungi bua misangu inudi bapatule biena-bualu bimvua nkeba anu pamvua nabi dijinga dikole.” Ke mutubi bikuenzekela pebe anyi? Bikadi bienzekele bana betu ba bungi nanku. Bualu ebu budiku mua kutukemesha anyi? Nansha kakese.

² Biakudia bia mu nyuma bitudi tupeta pa dîba diabi bidi bijadika ne: Yezu udi Mutu wa tshisumbu udi ukumbaja mulayi wende wa kutudisha. Udi utudisha ku diambuluisha dia nganyi? Pavua Yezu ufila tshimanyinu tshia dikalaku diende, wakamba ne: uvua ne bua kuenza mudimu ne “mupika wa lulamatu udi mudimuke” bua kupesha bena mudimu bende “biakudia biabu pa dîba diabi.” * (Bala Matayi 24:45-47.) Mupika wa lulamatu ke njila udi Yezu wenza nende mudimu bua kudisha bayidi bende balelela mu tshikondo tshia ku nshikidilu etshi. Nanku, mbimpe tumanye mupika wa lulamatu bualu njila eu ke udi wenza bua tuikale ne makanda a mu nyuma ne malanda makole ne Nzambi.​—Mat. 4:4; Yone 17:3.

3. Ntshinyi tshivua mikanda yetu yamba bua bidi bitangila lusumuinu lua mupika wa lulamatu?

³ Kadi mmunyi mutudi mua kumvua lusumuinu lua Yezu lua mupika wa lulamatu? Kumpala mikanda yetu ivua yamba malu adi alonda aa: Yezu uvua muteke mupika wa lulamatu ku mutu kua bena mudimu bende mu Pentekoste wa mu 33. Mupika uvua uleja bena Kristo bela manyi bonso badi pa buloba tshikondo kayi tshionso kubangila anu musangu au. Bena mudimu bobu mbena Kristo bela manyi kadi muntu ku muntu. Mu 1919 Yezu wakateka mupika wa lulamatu “ku mutu kua bintu biende bionso,” tuamba ne: ku mutu kua bintu bionso bidi bitangila Bukalenge bidi pa buloba. Kadi patudi balonge bimpe bimpe, bele meji ne basambile, tudi  bamone ne: kudi malu adi akengela kuakaja mu ngumvuilu wetu wa mêyi a Yezu adi atangila mupika wa lulamatu udi mudimuke. (Nsu. 4:18) Tukonkononayi lusumuinu elu ne mushindu udilu lututangila nansha tuetu ne ditekemena dia kuya mu diulu anyi dia kushala pa buloba.

4-6. Bua tshinyi tudi mua kuamba ne: lusumuinu lua Yezu lua mupika wa lulamatu luakatuadija kukumbana anu panyima pa 1914?

⁴ Mêyi a mu lusumuinu lua mupika wa lulamatu udi mudimuke adi aleja ne: luvua lutuadije kukumbana mu tshikondo tshia ku nshikidilu, kadi ki mmu Pentekoste wa mu 33 to. Tukonkononayi mvese idi itufikisha ku diamba bualu ebu.

⁵ Lusumuinu lua mupika wa lulamatu ludi tshitupa tshia mulayi wa buprofete wa Yezu udi utangila ‘tshimanyinu tshidi tshileja ne: ukadiku ne tshia ku nshikidilu kua ndongoluelu wa malu eu.’ (Mat. 24:3) Tshitupa tshia kumpala tshia mulayi eu tshidi mu Matayi 24:4-22 tshidi tshikumbana mu mishindu ibidi: wa kumpala, kumbukila mu tshidimu tshia 33 too ne mu tshia 70, muibidi, mu mushindu mualabale mu matuku etu aa. Bualu ebu budiku buleja ne: mêyi a Yezu adi atangila mupika wa lulamatu adi pawu akumbana mu mishindu ibidi anyi? Tòo.

⁶ Kutuadija ne mêyi adi mu Matayi 24:29, Yezu uvua muimanyine nangananga pa malu avua mua kuenzeka mu matuku etu aa. (Bala Matayi 24:29, 30, 42, 44.) Pavua Yezu wakula bua malu alua kuenzeka mu tshikondo tshia dikenga dinene, wakaleja ne: bantu “nebamone Muana wa muntu ulua mu matutu a mu diulu.” Pashishe wakadimuija bantu bavua ne bua kuikala ne muoyo mu matuku a ku nshikidilu ne: “Kanuena bamanye dituku didi Mukalenge wenu ulua” kabidi ne: “Muana wa muntu udi ulua pa dîba dinudi kanuyi nuelela meji to.” * Bilondeshile mvese eyi, pavua Yezu wakula bua malu avua ne bua kuenzeka mu matuku a ku nshikidilu, wakaalamakaja ne lusumuinu lua mupika wa lulamatu. Nunku, tudi mua kuamba ne: mêyi ende adi atangila mupika wa lulamatu akatuadija kukumbana anu panyima pa matuku a ku nshikidilu mamane kutuadija mu 1914. Bualu ebu budi bumvuika bimpe. Bua tshinyi?

7. Ndukonko kayi lua mushinga luakajuka pakatuadija tshikondo tshia dinowa? Bua tshinyi?

⁷ Anji ela meji ku lukonko elu: ‘Nnganyi udi menemene mupika wa lulamatu udi mudimuke?’ Mu bidimu lukama bia kumpala, bantu kabavua mua kuela lukonko elu to. Anu mutuvua bamone mu tshiena-bualu tshishale, bapostolo bavua benza bishima ne bapesha bantu mapa mu bishima bu tshijadiki tshia muvua Yehowa ubambuluisha. (Bien. 5:12) Nunku, bua tshinyi muntu yonso udi ne bua kujinga bua kumanya uvua Kristo muteke bushuwa bua kulombola? Mu 1914 malu akashintuluka bikole. Tshikondo tshia dinowa tshiakatuadija mu tshidimu atshi. Tshikondo tshia kutapulula mponda ne lupela tshiakakumbana. (Mat. 13:36-43) Bu muvua tshikondo tshia kunowa tshituadije, lukonko lua mushinga elu luakajuka: Bu muvuaku bena Kristo ba ku dîna ba bungi badiamba muvuabu bayidi balelela ba Yezu, mmunyi muvuabu mua kumanya mponda anyi bena Kristo bela manyi? Lusumuinu lua mupika wa lulamatu luakafila diandamuna. Bayidi ba Kristo bela manyi ke bavua ne bua kuikala bantu bavua badia bimpe mu nyuma.

8. Bua tshinyi mbikumbane bua mupika wa lulamatu kuikalaye muenza ne bena Kristo bela manyi?

⁸ Mupika wa lulamatu udi ne bua kuikala muenza ne bena Kristo bela manyi badi pa buloba. Badi babikila bena Kristo aba ne: “Bakuidi bikale bakalenge” ne mbabapesha mudimu wa ‘“kumanyisha miaba yonso bikadilu bimpe” bia yeye uvua mubabikile bua kupatuka mu mîdima kubuela mu butoke buende bua dikema.’ (1 Pet. 2:9) Mbikumbane bua bena mu tshisumbu tshia “bakuidi bikale bakalenge” aba kuyishabu bena Kristo nabu bulelela.​—Mal. 2:7; Buak. 12:17.

9. Bena Kristo bela manyi bonso badiku benza mupika wa lulamatu anyi? Umvuija.

 ⁹ Bela manyi bonso badi pa buloba badiku benza mupika wa lulamatu anyi? Tòo. Mu bulelela, ki mmuela manyi yonso udi ne mudimu wa kufila biakudia bia mu nyuma kudi bena Kristo nende ba pa buloba bujima to. Munkatshi mua mponda mudi bana betu ba balume bela manyi badi mua kuenza mudimu bu basadidi anyi bakulu mu bisumbu biabu. Badi balongesha ku nzubu ne ku nzubu ne mu bisumbu biabu, ne badi batua nyama ku mikolo ne muoyo mujima bulombodi bua kudi biro bietu bia pa buloba bujima. Kadi kabena bafila pabu biakudia bia mu nyuma kudi bana betu ba pa buloba bujima to. Bualu bukuabu, munkatshi mua bela manyi mudi bana betu ba bakaji badi ne budipuekeshi badi kabayi mua kuteta nansha kakese bua kuenza mudimu bu balongeshi mu tshisumbu to.​—1 Kol. 11:3; 14:34.

10. Mupika wa lulamatu udi mudimuke nganyi?

¹⁰ Kadi mupika wa lulamatu udi mudimuke nganyi? Mu diumvuangana ne tshilejilu tshia Yezu tshia kudisha bantu ba bungi ku diambuluisha dia bantu bakese, mupika eu mmuenza ne kasumbu kakese ka bana betu ba balume bela manyi badi benza buludiludi mudimu wa kulongolola biakudia bia mu nyuma ne kubifila mu tshikondo tshia dikalaku dia Kristo. Mu matuku a ku nshikidilu, bana betu ba balume bela manyi badi benza mupika wa lulamatu mbenze mudimu pamue ku biro bietu bidi bilombola mudimu wa pa buloba bujima. Mu bidimu bishale ebi, mupika eu uvua muleja mpala kudi Kasumbu kaludiki ka Bantemu ba Yehowa. Kadi manya ne: muaku “mupika” udi mu lusumuinu lua Yezu udi ku bumue, bileja ne: nkasumbu ka mupika. Nunku mapangadika adi bena mu Kasumbu kaludiki bangata badi baangata pamue.

11, 12. a) Mmisangu kayi ibidi idibu bateke mupika wa lulamatu udi mudimuke ku mutu? b) Ndîba kayi divua Yezu muteke mupika wa lulamatu ku mutu kua bena mudimu bende? Mbanganyi bavuaye musungule?

¹¹ Bidi bimueneka patoke ne: mu lusumuinu lua Yezu, mbateke mupika wa lulamatu udi mudimuke ku mutu misangu ibidi mishilangane. Musangu wa kumpala nku mutu kua bena mudimu ne muibidi nku mutu kua bintu bia mfumu bionso. Bu mudi lusumuinu elu lukumbana anu mu tshikondo tshia ku nshikidilu etshi, bavua ne bua kumuteka misangu yonso ibidi eyi panyima pa dikalaku dia Yezu bu mukalenge divua dienzeke mu 1914.

¹² Ndîba kayi divua Yezu muteke mupika wa lulamatu ku mutu kua bena mudimu bende? Bua kuandamuna, tudi ne bua kupingana ku tshidimu  tshia 1914, tshikondo tshivua dinowa dituadije. Anu mutukadi balonge, mu tshikondo atshi kuvua bisumbu bia bungi bivua bidiamba muvuabi bia bena Kristo. Mmu tshisumbu kayi muvua Yezu mua kusungula ne kuteka mupika wa lulamatu? Lukonko elu luakapeta diandamuna pavua Yezu ne Tatuende balue kutangila ntempelo anyi malu a mu nyuma avua atangila ntendelelu kumbukila mu 1914 too ne ku ntuadijilu kua 1919. * (Mal. 3:1) Bakasanka bikole bua kasumbu kakese ka Balongi ba Bible bavua baleje muvua mioyo yabu milamate Yehowa ne Dîyi diende. Nansha nanku, bavua dijinga ne dilengejibua, kadi bakitaba ne budipuekeshi munkatshi mua tshikondo tshîpi tshia ditetshibua ne dibalengeja. (Mal. 3:2-4) Balongi ba Bible ba lulamatu abu bavua bena Kristo balelela bavua mponda. Mu 1919, tshikondo tshia dijukuluka mu nyuma, Yezu wakasungula bana betu ba balume bela manyi bavua bakumbane munkatshi muabu bua kuikalabu mupika wa lulamatu udi mudimuke ne wakabateka ku mutu kua bena mudimu bende.

13. Bena mudimu mbanganyi? Bua tshinyi?

¹³ Kadi bena mudimu mbanganyi? Mu tshikoso, mbantu badibu badisha. Ku ntuadijilu kua matuku a ku nshikidilu, bena mudimu bavua bonso bela manyi. Pashishe, tshisumbu tshinene tshia mikoko mikuabu tshiakalua patshi bena mudimu. Mikoko mikuabu idi yenza mpindieu tshitupa tshinene tshia “tshisumbu tshimue” tshidi Kristo ulombola. (Yone 10:16) Bitupa bionso bibidi ebi bidi bipeta tshikondo tshimue biakudia bia mu nyuma bidi mupika wa lulamatu ufila. Kadi netuambe tshinyi bua bena mu Kasumbu kaludiki badi lelu benza mupika wa lulamatu udi mudimuke? Bana betu ba balume aba badi pabu dijinga ne kudishibua mu nyuma. Nunku badi bitaba ne budipuekeshi buonso mudibu bena mudimu muntu pa nkayende anu bu mudibi bua bayidi bonso bakuabu ba Yezu balelela.

14. a) Mmudimu kayi udibu bapeshe mupika wa lulamatu? Mudimu eu udi ubalomba bua kutangila tshinyi tshikuabu? b) Ndidimuija kayi divua Yezu mupeshe mupika wa lulamatu udi mudimuke? (Tangila kazubu ka ne: “Mupika mubi au yeye mua . . .”)

¹⁴ Yezu wakapesha mupika wa lulamatu udi mudimuke mudimu munene. Mu bikondo bia kale, mupika uvuabu beyemena anyi mulami uvua utangila nzubu mujima. (Luka 12:42) Nunku mbapeshe mupika wa lulamatu udi mudimuke mudimu wa kutangila bena mu nzubu wa ditabuja. Mudimu wabu wa kutangila eu udi kabidi ubalomba bua kutangila bintu bia mudimu, mudimu wa diyisha, dilongolola programe ya mpuilu ne mpungilu ne dipatula mikanda idi yumvuija Bible bua kuenza nayi mudimu mu buambi ne mu dilonga dia muntu pa nkayende anyi mu  tshisumbu. Bena mudimu badi dijinga anu ne biakudia bia mu nyuma bionso bidi kasumbu ka mupika kafila.

15, 16. Ndîba kayi didi Yezu uteka mupika wa lulamatu ku mutu kua bintu biende bionso?

¹⁵ Ndîba kayi didi Yezu uteka bua musangu muibidi mupika ku mutu, mpindieu “ku mutu kua bintu biende bionso”? Yezu wakamba ne: “Mupika au ngua diakalenga pikala mfumuende mupingane mumusangane wenza nanku! Bulelela, ndi nnuambila ne: Neamuteke ku mutu kua bintu biende bionso.” (Mat. 24:46, 47) Manya ne: Yezu udi uteka mupika ku mutu bua musangu muibidi panyima pa yeye mumane kupingana ne mumusangane “wenza nunku,” mmumue ne: ufila biakudia bia mu nyuma misangu yonso. Nunku kudi tshikondo tshivua ne bua kupita pankatshi pa misangu ibidi ya ditekibua ku mutu eyi. Bua kumvua mushindu ne dîba divua Yezu muteke mupika ku mutu kua bintu biende bionso, tudi ne bua kumanya malu abidi: dîba didiye upingana ne tshidi bintu biende bine.

¹⁶ Ndîba kayi didi Yezu upingana? Tudi tupeta diandamuna mu mêyi akambaye. Vuluka ne: pavua mvese ivua kuulu yakula bua ‘dilua’ dia Yezu, muaku eu uvua uleja tshikondo tshikalaye ne bua kulua bua kumanyisha ne kufila dinyoka ku nshikidilu kua ndongoluelu wa malu eu. * (Mat. 24:30, 42, 44) Nunku, ‘dipingana’ anyi ‘dilua’ dia Yezu didibu batele mu lusumuinu lua mupika wa lulamatu didi dienzeka mu tshikondo tshia dikenga dinene.

17. Mu bintu bia Yezu mudi binganyi?

¹⁷ Mu ‘bintu bionso bia Yezu’ mudi binganyi? Yezu kavua muakule bua “bionso” anu bua kuimanyina pa bintu biende bia pa buloba to. Mu bulelela, Yezu uvua ne bukokeshi bunene mu diulu. Wakamba ne: “Bakadi bampeshe bukokeshi buonso mu diulu ne pa buloba.” (Mat. 28:18; Ef. 1:20-23) Mpindieu mu bintu biende mudi kabidi  Bukalenge bua Masiya buvuabu bamupeshe katshia mu 1914 buikalaye mua kudia ne bayidi bende bela manyi.​—Buak. 11:15.

18. Ntshinyi tshiasaka Yezu bua kuteka mupika ku mutu kua bintu biende bionso?

¹⁸ Bua bitudi bafume ku diamba ebi, tudi mua kuamba bishi mpindieu? Palua Yezu bua kulumbuluisha mu tshikondo tshia dikenga dinene, neasangane mupika wa lulamatu upesha bena mudimu biakudia bia mu nyuma pa dîba diabi misangu yonso. Dîba adi Yezu neikale ne disanka dia kubateka bua musangu muibidi ku mutu, mpindieu ku mutu kua bintu biende bionso. Bantu badi benza mupika wa lulamatu nebabateke ku mutu dîba diapetabu difutu diabu mu diulu balua bakokeshi pamue ne Kristo.

19. Nebapeshaku mupika wa lulamatu difutu dinene mu diulu dipite dia bela manyi bakuabu anyi? Umvuija.

¹⁹ Nebapeshaku mupika wa lulamatu difutu dinene mu diulu dipite dia bela manyi bakuabu anyi? Tòo. Difutu diapeta kasumbu kakese mu kabujima ke didibu mua kupesha kabidi bakuabu. Tshilejilu, tumone tshivua Yezu muambile bapostolo bende ba lulamatu 11 butuku kumpala kua kufuaye. (Bala Luka 22:28-30.) Yezu wakalaya kasumbu kakese aku ne: kavua mua kupeta difutu dimpe bua muvuaku ne lulamatu. Bavua ne bua kusomba pamue nende mu nkuasa bu bakalenge. Kadi pakapita bidimu, wakaleja ne: bantu bonso 144 000 nebasombe mu nkuasa wa bukalenge ne nebakokeshe pamue nende. (Buak. 1:1; 3:21) Bia muomumue, anu mudi Matayi 24:47 wamba, Yezu wakalaya ne: neateke kasumbu kakese anyi bana betu ba balume bela manyi badi benza mupika ku mutu kua bintu biende bionso. Mu bulelela, bantu bonso 144 000 nebabanyangane nende bumfumu buende bunene mu diulu.​—Buak. 20:4, 6.

20. Bua tshinyi Yezu wakateka mupika wa lulamatu? Udi mudisuike bua kuenza tshinyi?

²⁰ Ku diambuluisha dia mupika wa lulamatu udi mudimuke, Yezu udi ulonda njila uvuaye mushiye mu bidimu lukama bia kumpala, mmumue ne: kudisha bantu ba bungi ku diambuluisha dia bantu bakese. Yezu wakateka mupika wa lulamatu eu bua kuikalaye mushindike ne: bayidi bende balelela, nansha bobu bela manyi anyi mikoko mikuabu, bavua ne bua kupeta biakudia bikole bia mu nyuma pa dîba diabi mu matuku a ku nshikidilu. Tuikalayi badisuike bua kuleja dianyisha patudi tutungunuka ne kutua bana betu ba balume bela manyi badi benza mupika wa lulamatu udi mudimuke nyama ku mikolo ne muoyo mujima.​—Eb. 13:7, 17.