1, 2. Mmunyi mudi mushindu utudi bakole ne muaba utudi mua kutusaka ku dienza malu?

TUETU bonso tutu tuenza malu bilondeshile mushindu utudi bakole ne muaba utudi. Tutu tuvuala mushindu kampanda, banange biakudia bia mushindu kampanda, ne tuenza malu mu mushindu kansanga. Bua tshinyi? Imue misangu bualu tutu tuidikija bantu badi batunyunguluke ne bilondeshile nsombelu utudi nende.

² Kadi kudi malu adi ne mushinga wa bungi kupita disungula dietu dia biakudia anyi mushindu kampanda wa mvuadilu. Tshilejilu, tudi bakole tumona malu kampanda ne: mmimpe ne manyishibue, kadi tumona makuabu bu mabi ne makandikibue. Malu a bungi a nunku adi atangila muntu nkayende ne mmashilangane bilondeshile muntu ne muntu. Malu atudi tusungula adi mene mua kuleja tshidi mu muoyo wetu. Bible udi uleja ne: misangu ya bungi ‘bantu ba bisamba bikuabu badi kabayi ne mikenji batu ne tshibidilu tshia kuenza malu adi mu mikenji.’ (Lomo 2:14) Kadi bualu ebu budi busua kuleja ne: bu mudiku kakuyi mukenji kampanda wa Nzambi musunguluke, tudi mua kulonda anu malu ne bibidilu bia muaba utudi bakolele bidi bantu bonso benza anyi?

3. Mmalu kayi abidi adi asaka bena Kristo bua kubenga kulonda patupu bilele ne malu adi bantu bakuabu bonso benza?

³ Kudi malu matue ku abidi a mushinga adi bena Kristo kabayi mua kuenzela nanku. Bua kumpala, Bible udi utuvuluija ne: ‘Njila udiku udi mululame ku mêsu kua muntu, kadi nshikidilu wende udi lufu.’ (Nsu. 16:25) Bu mutudi bantu bena mapanga, katuena ne bukole bukumbane bua kumanya tshidi tshimpe tshidi mua kulombola biendedi bietu bimpe to. (Nsu. 28:26; Yel. 10:23) Bualu buibidi, Bible udi uleja ne: Satana, “nzambi wa ndongoluelu wa malu eu” ke udi wenzeja ne ulombola bilele ne malu a mu bulongolodi ebu. (2 Kol. 4:4; 1 Yone 5:19) Nunku, tuetu basue bua Yehowa atubeneshe ne atuanyishe, tudi ne bua kutumikila mubelu udi mu Lomo 12:2.​—Bala.

4. Netukonkonone nkonko kayi mu tshiena-bualu etshi?

 ⁴ Kudi malu a bungi a mushinga atudi ne bua kuelela meji adi mu Lomo 12:2. 1) Bua tshinyi tudi ne bua ‘kushintuluka’? 2) Kushintuluka kudi kumvuija tshinyi? ne 3) Tudi ne bua kushintuluka mushindu kayi? Tukonkononayi nkonko eyi.

5. Mêyi a Paulo adi mu Lomo 12:2 avua mafundila nangananga banganyi?

⁵ Mêyi a mupostolo Paulo adi mu mukanda uvuaye mutumine bena Lomo kaavua mafundila bena Lomo bavua kabayi bena Kristo anyi bantu bonso to, kadi uvua muafundile bena Kristo nende bela manyi. (Lomo 1:7) Wakabambila bua kushintuluka ne ‘kulekela kuidikija malu a mu ndongoluelu wa malu eu.’ Bua bena Kristo ba mu Lomo mu tshikondo atshi, mmumue ne: bu mu 56, “ndongoluelu wa malu” uvua ukonga malu, bilele, bibidilu ne mushindu wa dienza malu bivua mu Lomo. Padi Paulo wenza mudimu ne muaku ‘kulekela,’ bidi bileja ne: bamue ba kudibu batshivua benza malu bilondeshile ndongoluelu wa malu au. Mmalu a mushindu kayi avua ndongoluelu au usaka bena Kristo ba tshikondo atshi bua kuenza?

6, 7. Mu matuku a Paulo, mmunyi muvua malu a mu nsombelu ne a ntendelelu a mu Lomo makebele bena Kristo lutatu?

⁶ Lelu, bantu badi baya kuendakana mu Lomo batu bamona bishadila bia ntempelo, nkita, bivulukilu, bipalu, miaba ya manaya, ne bintu bikuabu. Bimue bia ku bintu ebi mbia katshia ku bidimu lukama bia kumpala. Bintu bia kale ebi bidi biambuluisha bua kumanya bimpe malu a mu nsombelu ne ntendelelu bia mu Lomo wa kale. Tudi kabidi mua kubala mu mikanda ya miyuki bua manaya a tshikisu, mbilu ya ditembangana ne matempu, manaya ne mizike ivua ne biena-bualu bishilashilangane, ne bimue bia kudibi bivua bia bundu. Lomo uvua kabidi tshimenga tshivua malu a bungenda mushinga aya kumpala, nunku kuvua mishindu ya kupeta bintu bia bungi bia ku mubidi.​—Lomo 6:21; 1 Pet. 4:3, 4.

⁷ Nansha muvua bena Lomo ne ntempelo ya bungi ne nzambi ya bungi, kabavua bamanyike bu bantu bavua mua kudia malanda malelela ne nzambi ivuabu batendelela ayi to. Buabu bobu, ntendelelu uvua muimanyine nangananga pa bilele kampanda bivua bantu bonso benza dîba didibu balela muana, bantu baselangana anyi padibu bajika muntu mufue. Fuanyikijabi muvua malu onso aa mua kuikala lutatu kudi bena Kristo ba mu Lomo. Bena Kristo ba bungi bavua bakolele mu Lomo, nunku bidi bimueneka patoke ne: bavua ne bua kushintuluka bua kulua bena Kristo balelela, ne dishintuluka edi kadivua ne bua kushikila anu dituku divuabu batambula to.

8. Mmunyi mudi bulongolodi ebu buikale njiwu kudi bena Kristo lelu?

⁸ Anu bu mu Lomo, lelu bulongolodi bubi ebu budi kabidi njiwu kudi bena Kristo badi badilambule. Bua tshinyi bidi nanku? Bualu lungenyi lua bena mu bulongolodi ebu ludi lumuenekela mu mishindu ya bungi. (Bala Efeso 2:2, 3; 1 Yone 2:16.) Bu mutudi kumpala kua majinga, ngelelu wa meji, bibidilu ne nsombelu wa ku dituku ne ku dituku bia mu bulongolodi ebu, tudi misangu yonso mu njiwu ya kubuelakana mu malu a mu  bulongolodi ebu. Ke bualu kayi tudi ne malu a bungi adi atusaka bua kutumikila mubelu mufundisha ku nyuma wa ‘kulekela kuidikija malu a mu ndongoluelu wa malu eu’ ne wa ‘kushintuluka.’ Tudi ne bua kuenza tshinyi?

9. Mmalu kayi avua bantu ba bungi bashintulule kumpala kua kutambulabu?

⁹ Padi muntu ulonga Bible ne utumikila bidiye ulonga, udi utuadija kuya kumpala mu nyuma. Bua kuleja mudiye uya kumpala, udi ushintulula nsombelu wende bilondeshile malu adiye mulonge. Udi umbusha bilele bia mu ntendelelu wa dishima ne ngikadilu mibi ivuaye nayi ne udienzeja bua kupeta ngikadilu ya buena ya Kristo. (Ef. 4:22-24) Tudi ne disanka bua kumona mudi bantu binunu nkama ya bungi baya kumpala tshidimu tshionso ne balua bakumbane bua kutambula bua kuleja mudibu badilambule kudi Yehowa Nzambi. Bushuwa bualu ebu budi busankisha Yehowa. (Nsu. 27:11) Nunku mbimpe tudiebeje ne: Kuenza mashintuluka a nunku ke tshionso tshidi muntu ne bua kuenza anyi?

10. Mmunyi mudi kushintuluka kushilangana ne kuakaja malu?

¹⁰ Bushuwa, dishintuluka didi diumvuija malu a bungi kupita diya kumpala anyi diakaja amue malu. Badi mua kufunda pa tshintu kampanda tshidibu benze anyi kutshienzela madisuisha bamba mudibu batshiakaje, patshi tshikale anu tshiotshi atshi. Badi mua kuikala anu bele kantu kampanda bua kulengeja ne batshikangile mu tshintu tshidi tshikoka ntema. Mu note wa mu diksionere kampanda badi bumvuija muaku ‘kushintuluka’ ne: “Mu Lomo 12:2, kushintulula tshimuenekelu bilondeshile ndongoluelu wa malu eu kudi kubengangana ne kukudimuka tshitudi munda muetu pa kushintulula meji etu ku diambuluisha dia bukole bua nyuma muimpe.” (Vine’s Expository Dictionary) Nunku, dishintuluka didi muena Kristo mua kuenza ki ndia kumusha patupu bikadilu bibi, ngakuilu mubi ne bibidilu bibi to. Bamue bantu badi kabayi ne dimanya dia mu Bible batu badienzeja pabu bua kubenga kuenza malu aa. Nunku, kushintuluka kudi muena Kristo ne bua kuenza kudi kumvuija tshinyi?

11. Paulo uvua muleje ne: dishintuluka didi mua kuenzeka mu mushindu kayi?

¹¹ Paulo wakafunda ne: “Nushintuluke, nukudimune meji enu.” “Meji” adiye mutele adi aleja bieledi bietu bia lungenyi. Kadi anu mudibu baleje mu Bible, meji adi akonga malu adi mu lungenyi, lungenyi lutudi nalu ne bukole buetu bua kuela meji. Ku ntuadijilu kua mukanda uvua Paulo mutumine bena Lomo, udi uleja tshidi bantu badi ne “meji a patupu adi kaayi manyishibue.” Bavua balekela bantu abu ku “malu onso adi kaayi makane, ne muoyo mubi, ne lukuka, ne malu mabi, buwule tente ne lubabu, ne dishipangana, ne matandu, ne dishima” ne malu makuabu mabi. (Rom. 1:28-31) Tudi tumona bua tshinyi Paulo uvua mudimuije bantu bavua bakolele mu nsombelu wa nunku ne balue batendeledi ba Nzambi bua ‘kushintuluka ne kukudimuna meji abu.’

12. Ndungenyi kayi lutu nalu bantu ba bungi lelu? Mmunyi mudi lungenyi elu mua kuikala njiwu bua bena Kristo?

¹² Bia dibungama, tudi banyunguluka kudi  bantu badi benza malu avua Paulo muleja aa. Badi pamuapa mua kuikala bela meji ne: kuimanyima pa mikenji, mmalu a kale atudi katuyi mua kulonda. Balongeshi ne baledi ba bungi batu babuikila mêsu pa malu mabi ne batumbisha tshidibu babikila ne: budikadidi bua kuenza malu. Buabu bobu, kakuena mushindu wa kumanya tshidi tshimpe ne tshidi tshibi to. Nansha bantu ba bungi badi badiamba mudibu batendelela batu bela meji ne: badi ne budikadidi bua kuenza bualu buonso budibu bamona ne: mbuimpe, kabayi benzejibue bua kutumikila Nzambi ne mikenji yende to. (Mus. 14:1) Lungenyi lua nunku ludi mua kuikala njiwu minene kudi bena Kristo balelela. Muntu udi kayi ne meji udi mua kumona malu a mu bulongolodi buetu mushindu wa muomumue. Badi mua kubenga kulonda malu adi malongolola mu tshisumbu anyi mene kutuadija kudiabakena bua tshintu tshionso tshidi katshiyi tshipetangana ne disua diabu. Peshi badi mua kuikala kabayi bitaba ne muoyo mujima mibelu ya mu Bible itudi tupeta bua dijikija lutetuku, dienza mudimu ne Enternete ne dilonga tulasa tutumbuke.

13. Bua tshinyi tudi ne bua kudikonkonona ne muoyo mujima?

¹³ Bia muomumue, tuetu basue bua kubenga kuela meji anyi kuenza malu bilondeshile ndongoluelu wa malu eu, tudi ne bua kudikonkonona ne muoyo mujima bua kumanya tshitudi menemene. Tudi ne bua kukonkonona meji atudi tuela ne malu atudi tujinga, bipatshila bietu ne malu atudi tuangata ne mushinga. Bantu kabena mua kumona tshitudi munda muetu to. Badi mene mua kutuambila ne: tudi tuenza malu mimpe. Kadi tuetu nkayetu ke badi bamanye tshitudi bitabile bua malu a mu Bible atukadi balonge atushintulule ne atungunuke ne kuenza nunku.​—Bala Yakobo 1:23-25.

14. Tshidi mua kutuambuluisha bua kushintuluka mu mushindu udi ukengela ntshinyi?

¹⁴ Kushintuluka kudi kuenzekela munda muetu, nunku bua kushintuluka, tudi dijinga ne tshintu kampanda tshidi mua kubuela, kufika too ne munda muetu. Tshidi mua kutuambuluisha bua kuenza nunku ntshinyi? Patudi tulonga malu adi Yehowa utulomba bua kuenza bilondeshile disua diende didi mu Bible, mushindu utudi tuenza malu udi uleja tshitudi mu muoyo wetu ne malu atudi mua kushintulula bua tuetu kuenza malu bilondeshile ‘disua dia Nzambi didi dipuangane.’​—Lomo 12:2; Eb. 4:12.

15. Mushindu udi Yehowa utufumba udi mua kufila dishintuluka dia mushindu kayi?

¹⁵ Bala Yeshaya 64:8. Difuanyikija didi muprofete wenza nadi mudimu muaba eu didi ditusaka bua kukonkonona bualu bua mushinga. Mmushindu kayi udi Yehowa udi Mufumbi utufumba tuetu bu dima? Bushuwa, kena utushintulula mubidi wetu pamuapa bua kutupesha tshimuenekelu tshidi tshikoka ntema ya bantu anyi bua tuikale ne mubidi muimpe kumona to. Yehowa utu utupesha dimanya dia malu a mu nyuma ki ndia malu a ku mubidi to. Tuetu balekele bua atufumbe, netuenze dishintuluka munda muetu anyi dia mu nyuma ditudi nadi dijinga bua kuluisha malu adi bulongolodi ebu butusaka bua kuenza. Mmunyi mudi difumba dienzeka?

16, 17. a) Umvuija mutu mufumbi wenza mudimu ne dima bua kufumba tshintu kampanda tshimpe. b) Mmunyi mudi Dîyi dia Nzambi dituambuluisha bua kulua tshintu tshia mushinga ku mêsu kua Nzambi?

¹⁶ Bua kufumba tshintu tshimpe menemene, mufumbi utu ukuata mudimu ne dima didi dimpe. Kadi kudi malu adiye ne bua kuenza. Bua kumpala, udi ne bua kusukula dima bua kumbusha bukoya ne bintu bibi bidimu. Pashishe, udi usambakaja dima ne mâyi bungi bukumbane ne udiakaja bua dishale tshintu tshidiye muenze.

¹⁷ Mona ne: badi bakuata mudimu ne mâyi bua kumbusha bukoya budi mu dima ne bua kuluadi dikumbana bua kuenza nadi tshintu tshidiye musue, nansha tshia tshimpe menemene. Udiku umona mudi Dîyi dia Nzambi mua kuenza mudimu mu nsombelu wetu mu mushindu wa muomumue anyi? Didi mua kutuambuluisha  bua kulekela ngelelu wa meji utuvua nende kale patuvua katuyi banji kumanya Nzambi ne bua kulua tshintu tshia mushinga mukole ku mêsu kuende. (Ef. 5:26) Ela meji bungi bua misangu ikadibu batubele bua kubala Bible dituku dionso, kuikala ne tshibidilu tshia kubuela mu bisangilu bia bena Kristo mutudi tulonga Dîyi dia Nzambi. Bua tshinyi badi batukankamija bua kuenza malu aa? Bualu patudi tuenza nunku, tudi tulekela Yehowa utufumba.​—Mus. 1:2; Bien. 17:11; Eb. 10:24, 25.

18. a) Bua tshinyi dielangana meji didi ne mushinga bituikala basue bua Dîyi dia Nzambi ditushintulule? b) Nnkonko kayi idi mua kutuambuluisha?

¹⁸ Bua Dîyi dia Nzambi kutushintulula mudibi bikengela, kubala Bible ne kumulonga ke ntuadijilu. Bantu ba bungi batu babala Bible ku musangu ne ku musangu ne mbafike ku dibidilangana ne tshidiye wamba. Pamuapa ukadi mupetangane ne bantu ba nunku mu mudimu wa buambi. Bakuabu mene batu batela mvese ya mu Bible mu mutu. * Kadi malu aa adi mua kuikala ne bukole bukese mu meji abu ne mu nsombelu wabu. Tshidibu bapangile ntshinyi? Bua Dîyi dia Nzambi kushintululadi muntu, udi ne bua kudilekela dibuela bikole mu muoyo wende. Nunku tudi ne bua kupitshisha dîba dia bungi tuela meji bua malu atudi tulonga. Mbimpe tudiebeje ne: ‘Ndiku mutuishibue ne: bualu ebu mbupite amue malongesha a mu bitendelelu anyi? Kudiku bualu budi bunjadikila mu nsombelu wanyi ne: etshi ke bulelela anyi? Ndiku mumone mushindu undi mua kutumikila malu andi ndonga mu nsombelu wanyi ne kubenga kuamona anu bu malu andi ne bua kulongesha bantu bakuabu anyi? Ndiku ngumvua bu ne: Yehowa udi ungambila meme bualu ebu anyi?’ Kuelangana meji ku nkonko ya mushindu eu kudi mua kutuambuluisha bua kukolesha mushindu utudi tuangata Yehowa mu muoyo wetu. Dinanga dietu kudiye nedikole. Nunku padi malu aa alenga muoyo wetu, netushintulule nsombelu wetu bua kusankisha Yehowa.​—Nsu. 4:23; Luka 6:45.

19, 20. Mmibelu kayi ya mu Bible itudi mua kutumikila idi mua kutupetesha masanka?

¹⁹ Kuikala ne tshibidilu tshia kubala Dîyi dia Nzambi ne kuelelanganapu meji nekutusake bua kutungunuka ne kuenza bualu butukadi pamuapa batuadije kuenza: ‘Kuvula bumuntu bua kale ne bienzedi biabu, kuvuala bumuntu bupiabupia budi buvuijibua bupiabupia ku dimanya dijalame.’ (Kolos. 3:9, 10) Bushuwa, tudi mua kutungunuka ne kuenza nunku patudi tufika ku diumvua bimpe Dîyi dia Nzambi ne bukole budidi nadi. Bumuntu bupiabupia bua buena Kristo butuapete nebutuambuluishe bua kutukuba ku mayele mabi a Satana.

²⁰ Mupostolo Petelo udi utudimuija ne: ‘Bu bana badi batumikila, lekelayi kuenza malu bilondeshile majinga anuvua nawu kumpala, kadi nulue ba tshijila mu bikadilu bienu bionso.’ (1 Pet. 1:14, 15) Kudienzeja muetu muonso bua kumbusha ngelelu wa meji ne bienzedi bituvua nabi kumpala ne kukudimuka nekutupeteshe masanka anu mutuamona mu tshiena-bualu tshidi tshilonda.