1, 2. a) Bua tshinyi mbimpe ‘kuikala badimuke bua kudifila mu masambila’? b) Nnkonko kayi itudi mua kudiela bua bidi bitangila disambila?

MUNTU kampanda uvua wenza mudimu butuku wakamba ne: “Tshikondo tshitu tshikole bua muntu kushala mutabale butuku, mpakadi butuku pa kutshia.” Bia muomumue bantu bakuabu batu pabu batshisha batu bitaba bualu ebu. Lelu, bena Kristo batu bapeta pabu lutatu lua buena elu bualu butuku bule bua ndongoluelu wa malu mubi wa Satana bukadi ku ndekelu kuabu. (Lomo 13:12) Nebikale njiwu kutudi tuetu balale mu mêba a ku ndekelu aa. Tudi ne bua ‘kuikala ne meji mimpe’ ne kutumikila didimuija dia mu Bible dia ‘kuikala badimuke bua kudifila mu masambila.’​—1 Pet. 4:7.

² Bua tshikondo tshitudi, mbimpe tudiebeje ne: ‘Mmushindu kayi undi mudimuke bua bidi bitangila disambila? Ntuku ngenza masambila a mishindu yonso, ne ntu ne tshibidilu tshia kusambila anyi? Ntuku ne tshibidilu tshia kusambila bua bantu bakuabu anyi? Peshi masambila anyi atu mimanyine anu pa majinga antu nawu? Mmushinga kayi udi nawu disambila bua bidi bitangila lupandu luanyi?’

3. Mmishindu kayi mikuabu ya masambila itudi mua kuenza?

³ Mu mukanda uvua mupostolo Paulo mufundile bena Efeso, wakakulamu bua ‘masambila a mishindu yonso.’ (Ef. 6:18) Mu masambila etu tudi ne bua kulomba Yehowa bua atukumbajile majinga etu ne bua atuambuluishe bua kutantamena ntatu. ‘Mumvu wa milombo’ udi uteleja ne dinanga masambila atudi tuenza bua kumulomba diambuluisha. (Mus. 65:2) Kadi, tudi ne bua kudienzeja kabidi bua kuenza masambila a mishindu mikuabu. Mu mishindu eyi mudi: masambila a kumutumbisha nawu, a kumuela tuasakidila ne a kumusengelela.

4. Bua tshinyi tudi ne bua kuikala ne tshibidilu tshia kutumbisha Yehowa mu masambila etu?

 ⁴ Kudi malu a bungi adi enza bua mu masambila atudi tuenza kudi Yehowa muikale mêyi a kumutumbisha nawu. Tshilejilu, tudi tufika ku dimutumbisha patudi tuela meji bua ‘bienzedi biende binene’ ne bua ‘bunene buende bupite bunene.’ (Bala Musambu wa 150:1-6.) Badi batukankamija misangu 13 mu mvese isambombo ya Musambu wa 150 bua kutumbisha Yehowa. Bu muvua mufundi wa Musambu wa 119 unemeka Yehowa bikole, wakafunda ne: ‘Ndi nkutumbisha misangu muanda mutekete ku dituku ku dituku, bualu bua mêyi ebe makane majalame.’ (Mus. 119:164) Bushuwa Yehowa mmukumbane bua kumutumbisha. Nunku, katuenaku mua kumutumbisha mu masambila etu “misangu muanda mutekete,” mmumue ne: pa tshibidilu anyi?

5. Mmushindu kayi udi lungenyi lua kuela Nzambi tuasakidila mu masambila lutukuba?

⁵ Diela tuasakidila mmushindu mukuabu wa disambila udi ne mushinga wa bungi. Paulo wakadimuija bena Kristo bavua mu tshimenga tshia Filipoyi ne: “Kanusamishi mutu bua tshintu nansha tshimue, kadi mu malu onso mu disambila ne mu disengelela pamue ne disakidila, numanyishe Nzambi milombu yenu.” (Filip. 4:6) Tudi tupeta bukubi patudi tuela Yehowa tuasakidila ne muoyo mujima mu disambila. Bidi nanku nangananga bu mutudi mu matuku a ku nshikidilu mudi bantu “kabayi ne dianyisha.” (2 Tim. 3:1, 2) Buloba mbuwule tente ne lungenyi lua dibenga kuleja dianyisha. Tuetu katuyi badimuke, tudi mua kupeta petu lungenyi elu. Kuleja Nzambi dianyisha mu disambila kudi kutupetesha disanka ne kutuambuluisha bua kubenga kulua ‘bena manunganyi anyi kudiabakena bua tshidi nsombelu wetu.’ (Yuda 16) Kadi padi bamfumu ba mêku bela Nzambi tuasakidila padibu basambila ne bena mu mêku abu, badi benza bua bakaji babu ne bana babu bikale ne lungenyi lua diela tuasakidila.

6, 7. Disengelela ntshinyi? Tudi mua kusengelela Yehowa bua malu kayi?

⁶ Disengelela ndisambila didi muntu wenza ne muoyo mujima ne uleja majinga adi mu muoyo wende. Tudi mua kusengelela Yehowa bua malu kayi? Tudi mua kuenza nunku padibu batukengesha peshi patudi ne disama kampanda dikole. Mu bikondo bia nunku, masambila atudi tuenza kudi Nzambi bua kumulomba diambuluisha adi alua misengelelu. Kadi tudi mua kusengelela Yehowa anu mu nsombelu eyi nkayayi anyi?

⁷ Bala disambila dia Yezu dia tshilejilu umone tshivuaye muambe bua dîna dia Nzambi, bua Bukalenge buende ne bua disua diende. (Bala Matayi 6:9, 10.) Bena panu mbaditue mu dienza malu mabi, ne mbulamatadi ya bantu mmipangile bua kukumbajila bantu too ne majinga abu a mushinga. Ke bualu kayi tudi ne bua kusambila bua dîna dia Tatu wetu wa mu diulu ditumbishibue ne bua Bukalenge buende bumbushe bukokeshi bua Satana pa buloba. Etshi ke tshikondo tshia kusengelela kabidi Yehowa bua disua diende dienzeke pa buloba muomumue ne mu diulu. Nunku, tudi ne bua kuikala badimuke badiakaje bua kuenza masambila a mishindu yonso.

8, 9. Bua tshinyi katuena ne bua kumona Petelo ne bapostolo bakuabu bavua bapangile mua kushala batabale mu budimi bua Getesemane mu mushindu mubi?

⁸ Nansha muvua mupostolo Petelo mudimuije bena Kristo bua ‘kuikala badimuke bua kudifila mu masambila,’ wakapangila bua kuenza nunku imue misangu. Uvua umue wa ku bayidi bavua bapangile bua kushala batabale pavua Yezu usambila mu budimi bua Getesemane. Nansha pavua Yezu mubambile bua ‘kushala batabale ne kutungunuka ne kusambila,’ kabakenza nanku to.​—Bala Matayi 26:40-45.

⁹ Pamutu pa tuetu kumona Petelo ne bapostolo bakuabu mu mushindu mubi bua muvuabu bapangile bua kushala batabale, mbimpe tuvuluke ne: malu avuabu benze dituku adi avua mabatshiokeshe.  Bavua balongolole tshibilu tshia Kupita kua Yehowa ne batshisekelele dilolo adi. Pashishe Yezu kujadikaye tshibilu tshia Didia dia dilolo dia Mukalenge, kulejaye tshilejilu tshia muvuabu ne bua kushala basekelela Tshivulukilu tshia lufu luende mu matuku avua alua. (1 Kol. 11:23-25) “Bobu bamane kutumbisha Nzambi ne misambu, bakaya ku Mukuna wa Olive,” kuendabu ntanta mule bendela mu tujila tufimpakane tua mu Yelushalema. (Mat. 26:30, 36) Nunku, bavua mua kuikala bakadi mundankulu. Bu tuetu mua kuikala mu budimi bua Getesemane butuku abu, tuvua petu mua kuikala balale. Pamutu pa Yezu kuamba bapostolo bavua batshioke aba mêyi mabi, wakamba ne dinanga ne: “Muoyo mmusue kuenza, kadi mubidi udi ne butekete.”

10, 11. a) Ndilongesha kayi divua Petelo mupetele ku tshivua tshienzeke mu budimi bua Getesemane? b) Tshivua tshifikile Petelo tshidi tshikuambuluisha mushindu kayi?

¹⁰ Petelo kavua mupue bualu buvua buenzeke mu budimi bua Getesemane muoyo to. Wakapeta dilongesha dinene bua muvuaye mupangile bua kuikala mudimuke. Kumpala pavua Yezu muambile bayidi bende ne: “Nuenu bonso nenulenduke bua bualu buamfikila butuku ebu,” Petelo wakamuambila ne: “Nansha bakuabu bonso balenduke bua bualu buakufikila, meme tshiakulenduka nansha kakese!” Ke Yezu kuleja ne: Petelo uvua ne bua kumuvila misangu isatu. Petelo wakamuambila ne dishindika dionso ne: “Nansha bikalabi bua kufua nebe, tshiakukuvila nansha kakese.” (Mat. 26:31-35) Kakuyi mpata, Petelo wakalenduka anu muvua Yezu muleje. Bu muvuabi bimutonde pakavilaye Yezu musangu muisatu, ‘wakadila bikole.’​—Luka 22:60-62.

¹¹ Bushuwa bualu ebu buakapetesha Petelo dilongesha ne buakamuambuluisha bua kumbusha lungenyi lua kudieyemena. Bidi bimueneka patoke ne: disambila diakambuluisha Petelo mu bualu ebu. Nunku bidi ne mushinga bua mudi mubelu wa ‘kuikala badimuke bua kudifila mu masambila’ ufumina kudi Petelo. Tutuku tutumikila mubelu mufila ku diambuluisha dia nyuma muimpe eu anyi? Tutuku kabidi ‘tutungunuka ne kusambila’ bua kuleja mutudi beyemene Yehowa anyi? (Mus. 85:8) Tukuatayi kabidi mu lungenyi didimuija dia mupostolo Paulo edi: “Nunku, muntu udi wela meji ne: mmuimane, adimuke bua kaponyi.”​—1 Kol. 10:12.

12. Bua tshinyi Nehemiya udi tshilejilu tshimpe kutudi?

¹² Tuangate tshilejilu tshia Nehemiya uvua wenza mudimu wa kuelela mukalenge wa Pelasa Atashasete mvinyo mu dikopo mu bidimu bia 400 kumpala kua Yezu. Nehemiya mmushiye tshilejilu tshimpe tshia kusambila ne muoyo mujima. Munkatshi mua matuku a bungi  uvua ‘mujile biakudia ne utendelela kumpala kua Nzambi’ bua nsombelu mukole uvua nende bena Yuda mu Yelushalema. (Neh. 1:4) Pavua Atashasete mukonke Nehemiya tshivuaye mubungamine, ‘diakamue, Nehemiya wakasambila Nzambi wa mu diulu.’ (Neh. 2:2-4, NW) Tshiakenzeka ntshinyi? Yehowa wakandamuna masambila ende ne kulombola malu mu mushindu uvua mua kuambuluisha bantu bende. (Neh. 2:5, 6) Bushuwa bualu ebu buvua bukoleshe ditabuja dia Nehemiya.

13, 14. Ntshintu tshitudi ne bua kuenza bua kuikala ne ditabuja dikole ne kukandamena mateyi adi Satana utuela bua kututekesha?

¹³ Kuikala ne tshibidilu tshia kusambila anu bu Nehemiya kudi kutuambuluisha bua kuikala ne ditabuja dikole. Satana katu ne luse, ne utu misangu yonso ututeya patudi batekete. Tshilejilu, tuetu tusama anyi batekete mu mikolo, tudi mua kutuadija kuela meji ne: Nzambi udi wangata ne mushinga mukese dîba ditudi tupitshisha mu mudimu wa buambi. Bamue ba kutudi badi mua kuikala banyingalala bua malu kampanda avuabu bapete mu nsombelu wabu. Satana udi mua kuenza bua tudimone bu badi kabayi ne mushinga. Misangu ya bungi utu utuela mateyi bua kunyanga lungenyi luetu ne pashishe kutekesha ditabuja dietu. Kadi tuetu ‘bikale badimuke bua kudifila mu masambila,’ tudi mua kushala ne ditabuja dikole. Kakuyi mpata, ‘ngabu munene wa ditabuja neatuambuluishe bua kujima miketa ya mubi idi ne kapia.’​—Ef. 6:16.

¹⁴ Tuetu “badimuke bua kudifila mu masambila,” netushale batabale ne katuakuenza bualu bubi pikala ditabuja dietu mua kutetshibua dîba ditudi katuyi batekemene to. Patudi tutuilangana ne ntatu ne makenga, tuvuluke tshilejilu tshia Nehemiya ne tusambile Nzambi diakamue. Tudi mua kutantamena mateyi ne mateta a ditabuja dietu anu ne diambuluisha dia Yehowa.

15. Nnkonko kayi itudi ne bua kudiela bua bidi bitangila kusambila bua bantu bakuabu?

¹⁵ Yezu wakasengelela Nzambi bua bualu bua Petelo bua ditabuja diende kaditeketshi. (Luka 22:32) Epafa, muena Kristo wa lulamatu wa mu bidimu lukama bia kumpala wakidikija Yezu mu bualu ebu ne wakasambila bikole bua bena Kristo nende ba mu Kolosayi. Paulo wakabafundila ne: “Udi misangu yonso udifila bikole mu masambila bua bualu buenu, bua nuenu nujalame bakumbane tshishiki, bikale ne dishindika dikole mu disua dionso dia Nzambi.” (Kolos. 4:12) Mbimpe tudiebeje ne: ‘Ntuku nsambila bikole bua bena Kristo nanyi ba pa buloba bujima anyi? Mmisangu bungi kayi intu nsambila bua bena Kristo nanyi badi batata bua bikumina ne bipupu bidi bibakuate? Mmusangu kayi wa ndekelu umvua musambile bikole bua bana betu badi ne majitu manene mu bulongolodi bua Yehowa? Ndiku musambile matuku mashale aa bua bena mu tshisumbu tshietu badi mu ntatu anyi?’

16. Masambila atudi tuenza bua bantu bakuabu adiku ne mushinga anyi? Umvuija.

¹⁶ Masambila atudi tuenza kudi Yehowa bua bantu bakuabu adi bulelela mua kubambuluisha. (Bala 2 Kolinto 1:11.) Nansha mudi Yehowa kayi muenzejibue bua kuenza bualu kampanda bualu batendeledi ba bungi bavua bamulombabu njila ne njila, utu umona dijinga diabu mu tshibungi ne utu wangata ne mushinga malu atubu nawu dijinga ne utu ubandamuna. Nunku tudi ne bua kuangata ne mushinga diakalenga ne bujitu bitudi nabi bua kusambila bua bantu bakuabu. Anu bu Epafa, tudi ne bua kuleja mutudi banange bena Kristo netu ne muoyo mujima ne tuditatshisha bua bualu buabu patudi tusambila ne muoyo mujima buabu. Kuenza nunku nekuvudije disanka dietu, bualu “disanka dia kupa ndipite dia kuangata.”​—Bien. 20:35.

17, 18. Kushala “badimuke bua kudifila mu masambila” nekutuambuluishe mushindu kayi?

¹⁷ Kumpala kua Paulo kuambaye ne: “Butuku bukadi pa kutshia; dituku dikadi pa kutuadija,” wakafunda ne: “Nudi bamanye tshikondo tshitudi etshi ne: dîba dia nuenu kubika ku tulu dikadi dikumbane, bualu lupandu luetu lukadi pabuipi menemene mpindieu kupita dîba dituvua balue bena kuitabuja.” (Lomo 13:11, 12) Bulongolodi bupiabupia budi Nzambi mulaye bukadi pabuipi ne lupandu luetu lukadi pabuipi menemene kupita mutudi mua kuikala tuela meji. Katuena ne bua kulala tulu mu nyuma to, ne katuena ne bua kulekela malu a mu bulongolodi ebu adi afila ditanaji angata dîba dietu dia kuyukila ne Yehowa mu disambila nansha. Kadi ‘tuikalayi badimuke bua kudifila mu masambila.’ Kuenza nunku nekutuambuluishe bua kuikala ne ‘bikadilu bia tshijila ne bienzedi bia dilamata Nzambi’ bu mututshidi bindile dituku dia Yehowa. (2 Pet. 3:11, 12) Dîba adi nsombelu wetu nealeje ne: tudi batabale mu nyuma ne tudi tuitaba bushuwa ne: nshikidilu wa ndongoluelu mubi eu ukadi pabuipi. Nanku, ‘tusambile misangu yonso.’ (1 Tes. 5:17) Tuidikije kabidi Yezu pa kukeba muaba wa nkayetu bua kusambila. Tuetu batungunuke ne kusambila Yehowa pa nkayetu, netusemene bikole pabuipi nende. (Yak. 4:7, 8) Etshi netshikale diakalenga dinene.

¹⁸ Bible udi wamba ne: “Patshivuaye ne muoyo pa buloba, Kristo wakasengelela, kulombaye kabidi kudi Yeye uvua ne bukole bua kumusungila ku lufu ne mbila mikole ne binsonji, ne wakamumvuila bua ditshina diende dia Nzambi.” (Eb. 5:7) Yezu wakasengelela Nzambi ne kumulomba nunku kushalaye ne lulamatu kudiye too ne ku ndekelu kua muoyo wende pa buloba. Bu tshipeta, Yehowa wakabisha Muanende uvuaye munange ku lufu ne kumupesha muoyo mu diulu udi kawuyi ufua. Tuetu petu tudi mua kushala ne lulamatu kudi Tatuetu wa mu diulu nansha tuetu mua kupeta ntatu ne makenga mu nsombelu wetu matuku adi alua. Nunku, tudi mua kupeta difutu dia muoyo wa tshiendelele anu tuetu bashale “badimuke bua kudifila mu masambila.”