Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

Badiku mua kosha tshitalu tshia muena Kristo anyi?

Diosha anyi dibenga kosha ndipangadika dia muntu nkayende. Nansha mudi Bible kayi wakula buludiludi bua tshilele etshi, mbimpe tumanye ne: bavua boshe tshitalu tshia mukalenge Shaula ne tshia muanende Yonatana, pashishe kubijika. (1 Sam. 31:2, 8-13)​—15/6, dibeji dia 7.

Ntshinyi tshidi tshitujadikila ne: Nzambi katu ukebesha malu mabi?

Njila ya Nzambi yonso mmiakane. Udi muakane, muena lulamatu ne muena bululame. Yehowa udi kabidi ne luse lujalame ne dinanga. (Dut. 32:4; Mus. 145:17; Yak. 5:11)​—1/7, dibeji 4.

Nntatu kayi idi muntu mua kupeta padiye uya muaba mukuabu bua kuenza mudimu muaba udiku dijinga dinene?

Kudi ntatu isatu eyi: 1) kuibidilangana ne nsombelu mishilashilangane, 2) kutantamena disamina dia kuetu muoyo ne 3) kuibidilangana ne bana betu ba muaba uudi. Ba bungi badi batantamena ntatu eyi mbapete masanka a bungi.​—15/7, dibeji 4-5.

Bua tshinyi bana babu ne Jozefe bavua bamukuatshile tshiji?

Mbualu Yakoba uvua wanyisha Jozefe mu mushindu wa pa buawu, uvua mumupeshe tshilamba tshia pa buatshi. Bana babu ne Jozefe bakamumvuila mukawu ne kumupanabu mu bupika.​—1/8, dibeji dia 11-13.

Bua tshinyi trakte yetu mipiamipia mmikumbane ne mipepele bua kuenza nayi mudimu?

Yonso idi ne tshimuenekelu tshia muomumue. Trakte yonso udi usaka muntu bua kubala mvese wa mu Bible ne wela muntu lukonko. Nansha diandamuna diende diodi mushindu kayi, tudi tubulula trakte, tumuleja tshidi Bible wamba. Tudi kabidi mua kumuleja lukonko lutualua kuandamuna musangu udi ulonda.​—15/8, dibeji dia 13-14.

Peshitta wa tshiena Sulia ntshinyi?

Tshiena Sulia mmuakulu wa bena Alama ne wakalua kumanyika bikole pa buloba mu bidimu bia lukama ne bia 200. Bidi bisua kumueneka ne: tshiena Alama tshivua muakulu wa kumpala uvuabu bakudimune tshitupa tshia mifundu ya bena Kristo ya mu tshiena Greke. Bible wa mu tshiena Sulia wakalua kumanyika mu dîna dia Peshitta.​—1/9, dibeji dia 13-14.

Ntshinyi tshidi baledi bena Kristo mua kuenza bua kukolesha bana babu?

Mbimpe kuteleja bana bua kubamanya. Dienzeje bua kubadisha mu nyuma. Balombole ne dinanga, tshilejilu padibu bapeta mpata bua malongesha a mu Bible.​—15/9, dibeji dia 18-21.

Mu Bukalenge bua Nzambi, mmalu kayi ajimina?

Masama, lufu, dipangila dia mudimu, mvita, dipanga biakudia, ne bupele kabiakuikalamu to.​—1/10, dibeji 6-7.

Ntshipungidi kayi tshidi mu Bible tshiambuluisha bantu bakuabu bua kulombola ne Kristo?

Panyima pa Pasaka wa ndekelu uvua Yezu muenze ne bapostolo bende, wakadia tshipungidi ne bayidi bende ba lulamatu tshitudi mua kubikila ne: tshipungidi tshia Bukalenge. (Luka 22:28-30) Tshidi tshibashindikila ne: nebakokeshe ne Yezu mu diulu.​—15/10, dibeji dia 16-17.

Fila bilejilu bibidi bia mu Bible bidi bileja ne: Satana mmuntu mulelela.

Mifundu minsantu idi ileja ne: Satana wakakula ne Yezu pavuaye umuteta. Bualu bukuabu, mu matuku a Yobo, Satana wakakula ne Nzambi. Miyuki eyi idi ijadika ne: Satana mmuntu mulelela.​—1/11, dibeji 4-5.

‘Bantu badi ne dîna diende’ badi Yakobo wakuila mu Bienzedi 15:14 mbanganyi?

Bantu aba mbena Yuda ne bantu bavua kabayi bena Yuda bavua bitabuje bavua Nzambi musungule bua kuikala tshisamba tshisungula bua ‘bamanyishe miaba yonso bikadilu bimpe’ bia yeye uvua mubabikile. (1 Pet. 2:9, 10)​—15/11, dibeji dia 24-25.

Timgad uvua penyi? Ndungenyi kayi luvua nalu bantu ba muaba au?

Timgad uvua tshimenga tshinene tshia bena Lomo tshivua ku Nord kua Afrike (muaba udibu babikila lelu ne: Algérie). Bua kumanya lungenyi luvua nalu bamue bantu ba mu tshimenga etshi, mifundu kampanda ivuabu bangule idi ne mêyi aa: “Kukuata nyama, kuowa mâyi, kunaya ne kuseka ke nsombelu muimpe!” Lungenyi ludi lufuanangana ne ludi mu 1 Kolinto 15:32.​—1/12, dibeji dia 8-10.