Nkonko ya babadi

Bukalenge bua Nzambi budi mu mitshima yetu anyi?

Bantu ba bungi badi bitaba ne: Bukalenge bua Nzambi budi mu mitshima ya bantu. Tshilejilu, mukanda mukuabu (The Catholic Encyclopedia) udi wamba ne: “Bukalenge bua Nzambi budi bumvuija bukokeshi bua Nzambi mu mitshima yetu.” Ke tshidi bamfumu ba bitendelelu ba bungi balongesha. Bible utuku ulongesha ne: Bukalenge bua Nzambi budi mu mitshima ya bantu anyi?

Bamue bantu badi bela meji ne: Yezu uvua muambe ne: Bukalenge bua Nzambi budi mu mitshima ya bantu. Yezu uvua muambe ne: “Bukalenge bua [Nzambi] budi munkatshi muenu.” (Luka 17:21, MMM) Imue Bible idi yamba mu mvese eu ne: ‘Bukalenge bua Nzambi budi munda muenu.’ Tshidi Bible eyi yamba ke tshivua Yezu musue kuamba anyi? Yezu uvuaku musue kuamba ne: Bukalenge bua Nzambi budi mu mitshima ya bantu anyi?

Tshia kumpala, tumonayi tshidi mutshima wa muntu muine. Padi Bible wakula bua mutshima wa mu tshimfuanyi, udi wakula bua tshidi muntu menemene, muaba udi meji ende afumina, bikadilu biende ne mudiye udiumvua. Lungenyi lua ne: tshintu tshilenga bu mudi Bukalenge bua Nzambi tshidi mu mutshima wa muntu mu mushindu wa ne: tshidi mua kuulengeja ludi mua kumueneka luimpe, kadi bidi mua kuikala nanku anyi?

Bible udi utuambila ne: ‘Mutshima udi upita bintu bionso kudinga muntu.’ (Yelemiya 17:9) Yezu muine wakamba ne: ‘Mu mitshima ya bantu mudi mulopoka meji mabi ne tshiendenda ne buivi ne kushipa kua bantu ne masandi, lukuka lua biuma ne malu mabi ne mashimi.’ (Mâko 7:20-22) Tuelabi meji, makenga atudi tumona lelu pa buloba kaena afumina ku meji adi bantu bena mapanga badianjile kuela mu mitshima yabu anyi? Kadi mmunyi mudi Bukalenge bua Nzambi budi kabuyi kalema mua kupatukila muaba wa mushindu eu? Mu bulelela, mutshima wa muntu kawena mua kupatula Bukalenge bua Nzambi anu bu mudi mingonga kayiyi mua kukuama mfigi to.​—Matayo 7:16.

Tshibidi, tutangilayi bantu bavua Yezu wambila mêyi adi mu Luka 17:21. Mvese wa 20 udi wamba ne: ‘Bafalese bakamukonka ne: Bukalenge bua Nzambi nebulue dituku kayi? Yeye wakabakudimuna dîyi.’ (Luka 17:20) Bafalese bavua baluishi ba Yezu. Yezu wakambila bena lubombo abu ne: kabavua mua kubuela mu Bukalenge bua Nzambi to. (Matayo 23:13) Mpindieu elabi meji ne: bu muvua Bafalese kabayi mua kubuela mu Bukalenge bua Nzambi, buvuaku mua kuikala mu mitshima yabu anyi? Nansha kakese. Kadi ntshinyi tshivua Yezu musue kuamba?

Bible mikuabu idibu bakudimune bimpe idi itela mêyi a Yezu aa anu bu mudiwu mu Bible wa Traduction du monde nouveau. Imue idi yamba ne: Bukalenge budi “munkatshi muenu.” Mmunyi muvua Bukalenge bua Nzambi tshikondo atshi munkatshi mua bantu ne mua Bafalese? Yezu ke uvua Yehowa musungule bua kuikala Mukalenge wa Bukalenge ebu. Yezu Mukalenge uvuabu basungule uvua munkatshi mua bantu. Wakalongesha bantu malu a Bukalenge bua Nzambi ne kuenza bishima bua kuleja bantu malu enzabu. Mu ngumvuilu muimpe, Bukalenge buvua munkatshi muabu.

Mbimueneke patoke ne: kakuena mvese nansha umue mu Bible udi ulongesha ne: Bukalenge bua Nzambi budi mu mitshima ya bantu to. Kadi Bukalenge ebu mbumfumu buashintulula malu pa buloba anu mukavua baprofete ba Nzambi badianjile kumanyisha.​—Yeshaya 9:6, 7; Danyele 2:44.