Kukumbaja mudimu wa mamu wa nzubu kudi kuenza disanka

BAMAMU ba bungi pa buloba batu baya ku mudimu. Mu matunga mabanji, balume ne bakaji badi benza midimu ya babafuta. Mu matunga mapele, bamamu batu badima bikole bua kupeta bidibu nabi dijinga mu mêku abu.

Bakaji ba bungi badi eku benza mudimu bua kupeta makuta, eku midimu ya ku nzubu ne bana mibindile. Badi bapeta makuta a kusumba biakudia, bilamba ne muaba wa kulala, kadi badi kabidi ne bua kuipika ne kusukula bia mu nzubu.

Bamamu bena Kristo badi kabidi ne bua kulongesha bana babu Dîyi dia Nzambi. Cristina (udi ne bana ba bakaji babidi) udi wamba ne: “Mu bulelela, ki mbitekete bua kuikala kuya ku mudimu eku wenza midimu ya kumbelu to, nangananga patshidi bana bapuekele bikole. Mbikole bua kutangila majinga onso a bana.”

Ntshinyi tshidi tshisaka bamamu bua kuya ku mudimu? Ntatu kayi idibu bapeta? Bidi bikengela bua bamamu kuenzabu mudimu bua kushishabu kupeta disanka anyi?

Tshidi tshisaka bamamu bua kuya mudimu

Bua bamamu ba bungi, bidi bikengela anu kuenza mudimu. Bamue kabena ne balume badi mua kubambuluisha ne makuta to. Bua bakuabu, difutu dia mulume nkayadi kadiena dikumbana bua kusumbabu bidibu nabi dijinga mu dîku to.

Tshidibi, bamamu bonso kabatu benza mudimu anu bualu badi dijinga ne makuta to. Ba bungi batu benza mudimu anu bua bantu bikale babanemeka. Bamue batu benza mudimu anu bua bikala badikumbajila majinga abu mudibu basue anyi badisumbila bintu bia mushinga. Ba bungi badi benza mudimu wabu bimpe ne baunange bikole.

Bamue bamamu badi benza mudimu anu bualu badi babasaka kudi bakaji nabu. Nansha mudi bantu ba bungi bitaba ne: bamamu badi benza mudimu badi ne tunyinganyinga tua bungi ne batshioke bikole, kabatu bangata badi kabayi benza mudimu bimpe ne pamuapa batu babamona bantu tshianana. Mamu mukuabu udi wamba ne: “Kabitu bitekete bua kumvuija bantu tshiudi kuyi wenzela mudimu to. Mêyi adi bamue bamba ne mushindu udibu bakutangila bidi bileja ne: udi upitshisha dîba dieba patupu.” Rebeca (udi ne muana wa bakaji wa bidimu  bibidi) udi wamba ne: “Nansha mudi bantu ba muaba utudi bitaba ne: mamu udi ne bua kutangila bana bende, ntu mmona ne: badi bamona kabidi bakaji badi kabayi benza mudimu bu bantu tshianana.”

Malu a dishima adi aluisha bulelela

Mu bimue bitupa bia malaba, tudiomba ne bikandakanda bidi bileja ne: mukaji mulenga ngeu udi mumanye bua kusungula mudimu, udibu bamufuta makuta a bungi, uvuala bimpe ne udisumbila bionso bidi bimusamina muoyo. Padiye ufika ku mbelu, udi ne bukole bua kutangila bana, kuakaja miaba idi bayende muenze bilema ne kukumbaja mudimu kayi onso udi mu nzubu muende. Mu bushuwa, anu bamamu bakese ke badi mua kukumbaja tshidibu bamba etshi.

Patudi tutangila bimpe, bamamu ba bungi badi bapeta mudimu anu umue umue ne batu babafuta makuta makese. Tshidi tshibanyingalaja tshidi ne: bamamu badi benza mudimu kabatu bapete mushindu wa kuenza mudimu ne dimanya diabu dionso to. Mukanda mukuabu udi wamba ne: “Nansha mudi bantu baluangana bua balume ne bakaji bikale muomumue, balume badi anu batungunuka ne kuenza midimu ya lumu idibu bafuta makuta a bungi. Kadi bamamu badi baluangana bua kuenza mudimu wabu bimpe batu ne njiwu ya bungi.” (Social Psychology) Tshikandakanda tshikuabu tshia mu Espagne tshidi tshiamba ne: “Bua bamamu, makumi adi aleja ne: bobu badi bapeta tunyinganyinga tua bungi misangu isatu kupita balume, bualu badi ne bia bungi bia kuenza ku mudimu ne ku mbanza yabu.”​—El País

Mudi balume mua kuambuluisha

Mukaji muena Kristo ke udi mua kudiangatshila dipangadika dia kuenza mudimu anyi kubenga kuwenza. Kadi bikalabu bamusele, yeye ne bayende ke badi ne bua kuanji kuyikila tshilumbu etshi bimpe kumpala kua kuangata dipangadika edi, bualu ku bumue ku bumue.​—Nsumuinu 14:15.

Kadi netuambe tshinyi bikala mulume ne mukajende bamone ne: bua kupetabu bidibu nabi dijinga mu tshikondo etshi tshikole, bidi bikengela buobu bonso babidi benza mudimu? Dîba adi mulume muena Kristo muimpe udi ne bua kulonda mubelu wa mu Bible wa ne: “Nuenu balume kabidi, nusombe pamue mu diumvuangana, numanye ne: mukaji mmuena butekete; numunemeke pende, bualu mmupete buende bumpianyi bua dipa dia muoyo bu nuenu.” (1 Petelo 3:7, MMM) Mulume udi leja mudiye utua mukajende mushinga padiye umuenzela malu adi aleja ne: mmumanye miaba idiye kayi mua kukokesha. Padiku mushindu, neamuambuluishe bua kuenza midimu ya kumbelu. Mulume neanyishe bua kuenza midimu itu bantu bamone bu mishadile ne budipuekeshi anu bu Yezu, kena ne bua kuyimona bu idi imupuekesha milongo to. (Yone 13:12-15) Kadi neayimone bu mushindu wa kuleja mudiye munange mukajende bua mudimu mukole utuye wenza. Yeye muenze nanku mukajende neasanke bikole.​—Efeso 5:25, 28, 29.

Bikala mulume ne mukaji benza bonso mudimu, mbimpe bikala bambuluishangana kumbelu. Tshikandakanda tshikuabu tshia mu Espagne tshia ABC ntshiamba bualu ebu bimpe. Tshiakakula bua makebulula menza kudi tshisumbu kampanda tshidi tshilonga malu a mu dîku tshileja ne: mabaka a bungi adi afue mu Espagne kaena afua anu bua “dipangila dia mikenji ya mu bitendelelu ne ya bikadilu” to, kadi mbua malu makuabu abidi aa: “dibuela dia bakaji mu midimu itu balume benza ne dipangila dia balume bua kuambuluisha bakaji babu mu midimu ya kumbelu.”

Mudimu munene udi nawu mukaji muena Kristo

Nansha muvua Yehowa mupeshe batatu mudimu wa kulongesha bana babu, bakaji bena Kristo mbamanye ne: bobu pabu badi ne mudimu munene wa kuenza mu bualu ebu nangananga patshidi bana batekete bikole. (Nsumuinu 1:8; Efeso 6:4) Pavua Yehowa wambila bena Isalele bua kulongesha bana babu mikenji ya Mose, uvua wambila batatu ne  bamamu. Uvua mumanye ne: baledi bavua ne bua kuangata dîba dia bungi ne kuikala ne lutulu nangananga patshidi bana benda bakola. Ke bualu kayi wakambila baledi ne: badi ne bua kulongesha bana padibu kumbelu, mu njila, padibu benda ne padibu basomba.​—Dutelonome 6:4-7.

Dîyi dia Nzambi didi dileja mudimu wa mushinga udi nawu bamamu padidi diambila bana ne: ‘Kulekedi diyisha dia mamuebe.’ (Nsumuinu 6:20) Tshidibi, mukaji udi ne bua kuyukila ne bayende kumpala kua kuelela bana mikenji. Bilondeshile tshidi mvese eu muambe, mukaji udi ne bukokeshi bua kuelela bana mikenji. Pashishe padi bana batumikila mikenji ne mibelu ya mu Bible idi mamuabu ubelela ne muoyo mujima, badi bapeta diakalenga. (Nsumuinu 6:21, 22) Teresa (udi ne bana babidi ba balume) udi umvuija bua tshinyi kavua musue kukeba mudimu wamba ne: “Kufikisha bana banyi ku dilua Bantemu ba Yehowa ke mudimu wa mushinga undi nawu. Ndi musue kuenza mudimu ne muoyo wanyi mujima.”

Bamamu badi benze mudimu muimpe

Mibelu ivua mamuende wa mukalenge wa Isalele Lemuele umupesha ivua mimuambuluishe bikole. ‘Dîyi dia tshijila’ divua mamu au ‘mumumanyishe’ bavua badisakidile mu Mukanda wa Nzambi. (Nsumuinu 31:1; 2 Timote 3:16) Diumvuija divua mamu au muambe bua mukaji wa tshikadilu tshimpe ditshidi ne mushinga ne lelu bua bana badi basungula mukaji wa kusela. Mibelu ivuaye mupeshe muanende bua bundumba ne bunuavi itshidi ne mushinga too ne lelu.​—Nsumuinu 31:3-5, 10-31.

Mu bidimu lukama bia kumpala, mupostolo Paulo uvua mutumbishe mudimu mulenga uvua mamu Eunike muenze bua kulongesha muanende Timote. Bu muvua bayende kayi muena Kristo, uvua ne bua kuikala utendelela nzambi ya bena Greke, nanku Eunike ke uvua ne bua kufikisha Timote ku ditabuja “Mukanda wa Nzambi.” Ndîba kayi divuaye mutuadije kulongesha Timote? Bible udi wamba ne: “ku buana,” mbuena kuamba ne: Timote uvua mulonge kutuadijila patshivuaye muana mutekete. (2 Timote 1:5; 3:14, 15) Ditab uja diende, tshilejilu ne dilongesha diende ke bivua bilongolola Timote bua kuluaye misionere pakakolaye.​—Filipoi 2:19-22.

Bible udi wakula kabidi bua bamamu bavua bakidile basadidi ba Nzambi ba lulamatu bavua bafike ku dishila bana bavua kumbelu tshilejilu tshilenga. Tshilejilu, mamu muena Shunema uvua ne tshibidilu tshia kuakidila muprofete Elisha ku nzubu kuende. Muprofete eu wakabisha muanende pavuaye mufue. (2 Bakelenge 4:8-10, 32-37) Tuangate kabidi tshilejilu tshia Mariya mamuende wa Mâko udi mufunde mukanda wa Mâko. Mu nzubu muende ke muvuabu benzela bisangilu kudi bena Kristo ba kumpala. (Bienzedi 12:12) Disomba ne bapostolo ne bena Kristo bakuabu bavua balua kumbelu kuabu diakambuluisha Mâko bikole.

Bulelela, Yehowa udi wanyisha bikole mudimu mukole udi bakaji ba lulamatu badi balongesha bana babu mikenji yende. Mmunange bakaji aba bua lulamatu luabu ne bua mudibu badienzeja bua kuikala ne nsombelu muimpe ku mbanza yabu.​—2 Samuele 22:26; Nsumuinu 14:1.

Disungula ditambe buimpe

Bilejilu bia mu Bible bitudi batele kulu eku bidi bileja ne: kukumbaja majinga a ku mubidi a bena mu dîku ne kubalongesha Bible kudi kupetesha masanka a pa buawu. Kadi kuenza mudimu ki nkutekete to. Midimu itu mamu wenza kumbelu itu misangu ya bungi imueneka mipite udi muntu udi ne muanzu munene ku mudimu wenza.

Bushuwa, panyima pa mukaji mumane kuyukila ne bayende ne mumona ne: udi ne bua kutuadija kuenza mudimu mêba makese, nsombelu udi mua kushintuluka mu dîku ne udi ne bua kutantamena biambamba bia bantu badi kabayi bumvue bua tshinyi mmuenze nanku. Kadi masanka apetaye neapite mudimu udiye mulekele kule ne kule. Paqui udi ne bana basatu uvua musue kuenza mudimu kadi kauyi wa kutuadijila ku dinda too ne ku  dilolo to. Udi wamba ne: “Mvua musue kuikala kumbelu padi bana bafuma mu kalasa bua basanganaku muntu udibu mua kuyukila nende.” Bualu ebu mbuambuluishe bana bende ku tshinyi? Udi wamba ne: “Ndi mubambuluishe bua kuenza midimu ya mu kalasa ne pavuabu bapeta ntatu, mvua nyijikija diakamue. Tuvua tuyukila bikole bualu tuvua tusombe nabu bikole. Mvua ngangata dîba dimvua mpitshisha ne bana banyi adi ne mushinga kupita kuya ku mudimu ku dinda too ne ku dilolo.”

Bamamu bena Kristo ba bungi mbafike ku dimona ne: bobu ne mushindu wa kukepesha mêba adibu benza ku mudimu, badi mua kuambuluisha bena mu mêku abu bikole. Cristina utudi batele kulu eku udi wamba ne: “Pangakalekela kuenza mudimu, nsombelu wakalengela mu dîku bikole. Ngakapeta dîba dia kuyukila ne bana banyi ne kuambuluisha bayanyi mu malu a bungi. Meme kutuadija kulongesha bana banyi mua kubala ne kudimuena muvuabu baya kumpala.” Kudi bualu bua pa buabu budi Cristina kayi mua kupua muoyo to. Udi wamba ne: “Muananyi wa kumpala wakalongela bua kuenda muaba utubu balamina bana, kadi bua muibidi yeye, meme nkayanyi ke wakamulongesha mua kuenda kumbelu. Ngakadimuene muakambulaye dikasa diende dia kumpala ne kudishindaye mu maboko anyi. Bualu ebu buakansankisha bikole be!”

Bualu bukuabu butudi ne bua kumanya budi ne: kukepesha mêba atu mamu wenza ku mudimu kudi mua kuambuluisha bua kulamaku makuta. Cristina udi umvuija ne: “Dilama dia muana ne dimufutshila njila divua diangata tshitupa tshinene tshia makuta a difutu dianyi. Patuakakonkonona malu bimpe, tuakamona ne: makuta amvua nshala nawu mu difutu dianyi kaavua a nsongo to.”

Padi baledi ba bungi balonga tshidi nsombelu wabu bimpe, bamue mbafike ku dimona ne: mbimpe bua mamuende wa bana ashala kumbelu ubalama kupita kuenzaye mudimu bua kupeta makuta. Bayende wa Cristina diende Paul, udi wamba ne: “Ndi ne disanka dia bungi bua mudi mukajanyi ushala kumbelu ulama bana betu babidi. Tuvua ne tunyinganyinga patuvua tuetu bonso tuenza mudimu tushiya bana nkayabu.” Disungula diabu dia mamu kulekelaye mudimu bua kulama bana divua diambuluishe bana babu ba bakaji ku tshinyi? Paul udi wamba ne: “Bana bavua badimona mu bukubi ne bavua kabidi kule menemene ne malu mabi avua mua kubanyanga ku buana buabu.” Bua tshinyi baledi aba bakamone ne: kusomba ne bana bikole kuvua ne mushinga wa bungi? Paul udi wandamuna ne: “Tuetu katuyi babela ne balongeshe bana malu mimpe, muntu mukuabu neabalongeshe ende.”

Tshidibi, mulume ne mukaji ke badi ne bua kulonga tshidi nsombelu wabu ne muntu nansha umue kena ne bua kubajana bua dipangadika diabu to. (Lomo 14:4; 1 Tesalonike 4:11) Nansha nanku, mbimpe kutangila masanka adi bena mu dîku bapete padi mamu kayi uya ku mudimu wa kutuadijila anu ku dinda too ne ku dilolo. Bua bidi bitangila diya ku mudimu dia mamu, Teresa (tukavua bamutela kulu eku) udi uleja mmuenenu wende mu tshikoso wamba ne: “Kakuena tshintu tshidi tshienza disanka bu kudifila bua kulama bana bebe ne kubalongesha to.”​—Musambu 127:3.

[Tshimfuanyi mu dibeji 29]

Bamamu bena Kristo badi benza mudimu mulenga wa kulongesha bana babu