Nkonko ya babadi

Bipupu bidi bienzeka mmanyoka a kudi Nzambi anyi?

Nzambi katu utumina bantu badi kabayi ne bualu bipupu bua kubanyoka to. Katu muanji kuenza nanku ne kadiakuenza nanku to. Bua tshinyi? Bualu Bible udi wamba mu 1 Yone 4:8 ne: “Nzambi udi dinanga.”

Nzambi utu wenza malu onso ne dinanga. Dinanga kaditu dikengesha bantu badi kabayi ne bualu, ne Bible muine udi wamba ne: “Dinanga kadiena dienzela muntu bibi.” (Lomo 13:10, MMM) Bible udi wamba mu Yobo 34:12 ne: “Bulelela, Nzambi kena wenza bibi.”

Bible ukavua mudianjile kumanyisha bua bipupu bu mudi “bikumina bikole” bivua mua kuenzeka mu matuku etu aa. (Luka 21:11, MMM) Yehowa katu unyanga bintu ku diambuluisha dia bipupu ebi to, anu mutu muntu utu umanyisha muikale tshimuenekelu tshia diulu kayi ukebesha lupepela lukole lutu lunyanga bintu. Kadi, pikala Nzambi kayi ukengesha bantu kupitshila ku bipupu, bidi bienzeka bishi?

Bible udi wamba ne: “bena panu bonso badi mu bianza bia Muena bubi” Satana Diabolo. (1 Yone 5:19, MMM) Uvua mushipianganyi katshia watomboka ku tshibangidilu tòo ne lelu eu. (Yone 8:44) Satana mmumone muoyo wa muntu bu tshintu tshia tshianana tshidi katshiyi ne mushinga to. Utu anu muena tshilema, nanku kabiena bikemesha padi bulongolodi buende buule tente ne bena tshilema. Lelu, bena tshilema badi benzeja bapele badi kabayi ne bualu bua kuya kusombela mu miaba itu bipupu bia ku bintu bifuka ne bidi bikebesha kudi bantu bitamba kuenzekela. (Efeso 2:2; 1 Yone 2:16) Nunku, bena lukuka ke batu bakebela bantu badi kabayi ne bualu bimue bipupu. (Muambi 8:9) Mmushindu kayi?

Bualu bua dikema budi ne: bipupu bia bungi bidi bienzeka mbikebesha ndambu kudi bantu nkayabu. Tuangata tshilejilu tshia tshipupu tshinene tshia mvula wa mabue ne tshipepele tshikole tshivua tshiditute mu tshimenga tshia Nouvelle-Orléans mu États-Unis, anyi mikuna ya ku mâyi ivua mibomboloke mienze bitotshi e kupula nzubu mu ditunga dia Venezuela. Mu bilejilu bidi kulu ebi ne mu malu makuabu kabidi, bintu bia ku tshifukilu bu mudi mvunda ne mvula, bitu bilua tshipupu nangananga bualu bantu mbapange mikenji ya ku bufuki, bintu bibi bidibu benza, ngibakilu mubi, dibenga kutumikila dia madimuija ne bilema bia badi balombola.

Tuangate tshilejilu tshia tshipupu kampanda tshivua tshienzeke mu tshikondo tshivuabu bafunde Bible. Mu tshikondo tshia Yezu, tshimanu tshia lumbu kampanda tshiakupuka ne kushipa bantu 18. (Luka 13:4) Bualu abu buvua buenzeka pamuapa bualu bavua bibake bibi anyi bua ‘bikondo bidi malu atulukila’ bantu bidibu kabayi bamanya, misangu mikuabu bua malu aa onso abidi. Kadi, bualu ebu kabuvua dinyoka dia kudi Nzambi to.​—Muambi 9:11.

Kudiku bipupu bidi Nzambi utumina bantu anyi? Eyowa, kadi mbishilangane ne bia ku tshifukilu ne bidi bikebesha kudi bantu, bia Nzambi kabivua bishipa bantu bonso to, bivua ne tshipatshila ne bitu bienzeka ku mpukampuka menemene. Tutela bilejilu bibidi: tshia Mvula wa kabutu wa mu tshikondo tshia Noa ne tshia kabutu ka Sodome ne Amole mu tshikondo tshia Lota. (Genese 6:7-9, 13; 18:20-32; 19:24) Bipupu ebi mmanyoka a kudi Nzambi avua mashipe anu bantu babi bavua kabayi basue kukudimuka, kadi bantu bakane ku mêsu kua Nzambi bakasungidibua.

Tshia kumanya tshidi ne: Yehowa Nzambi udi ne mushindu ne dijinga ne bukole kabidi bua kujikija makenga onso ne kusulakaja bantu ku bipeta bionso bia bipupu. Mukanda wa Musambu 72:12 uvua mudianjile kuamba bua Mukalenge Yezu Kristo udi Nzambi musungule ne: ‘Neapandishe mukengedi wa bintu padileye kudiye, neapandishe muntu mupele udi kayi ne mukuatshishi.’