WEWE ne bana ba bitende kumbelu, udi mua kuikala pebe ne lutatu lua buena lua baledi batudi batele aba. Kale nuvua mua kuikala nuyikila bimpe ne muanenu. Kadi mpindieu, muyiki wenu mulenga kautshienaku to. Mamu Angela wa mu Italie udi wamba ne: “Patshivua muananyi mutekete, uvua umpuyisha ne nkonko. Kadi lelu, anu meme ke udi utuadija muyiki nende. Meme tshiyi muenze nanku, matuku a bungi adi mua kupita kakuyi muyiki wa nsongo wa ndolo to.”

Anu bu Angela, pamuapa muanebe uvua wakula bikole mmulue kampuwa. Dijinga diebe dikole dia kutuadija muyiki didi mua kuimana ne mandamuna mîpi kaayi a disanka to. Udi mua kukonka muanebe ne: “Mmunyi lelu?” Udi ukuandamuna mu tshikoso ne: “Bimpe.” Ukonka muanebe wa bakaji ne: “Mmalu kayi avua menzeke mu tulasa lelu?” Ukuandamuna mutangile kua tshianana ne: “Kakuvua bualu to.” Paudi ukeba bua kuyikila nende bikole umukonka bua tshinyi kêna wamba malu a bungi, udi mua kushala mupuwa kayi wamba tshintu anu bu kamama.

Nansha nanku, kudi bansonga bakuabu badi bakula badilekelele. Kadi bidibu bakula ki mbidi baledi babu basue to. Mamu Edna wa mu Nigeria udi wamba ne: “Pamvua ngambila muananyi wa bakaji bua kuenza bualu kampanda, uvua utamba kungandamuna ne: ‘Ndekelanyi.’” Ramón wa ku Mexique udi pende wamba bualu bua muomumue bua muanende wa balume wa bidimu 16. Udi wamba ne: “Kakuvua kupita dituku katuyi bakokangane nende to. Misangu yonso imvua mmuambila bua kuenza bualu kampanda, uvua anu wanji ukeba mishindu ya kubenga kubuenza.”

Kujinga mua kuyikila ne muana padiye kayi musue kudi mua kutonda muledi bikole. Bible udi wamba ne: ‘Bikalaku kakuyi bulombodi bua meji, malu adi bantu bapangadija adi apumbishibua.’ (Nsumuinu 15:22) Mamu Anna wa mu Russie udi wamba ne: “Pamvua tshiyi mumanye meji adi nawu muananyi, mvua ngumvua bibi, ntuadija kutanda ngela mbila.” Bua tshinyi bitu bienzeka ne: tshikondo tshitu muyiki pankatshi pa baledi ne bana ulua ne mushinga wa bungi ke tshidi muyiki pawu ukoseka?

Kuyikila kakuena anu kumvuija kupatula mêyi mukana patupu to. Yezu wakamba ne: ‘Mukana mudi muamba anu malu adi matambe kuvulangana mu mutshima.’ (Luka 6:45) Nanku, patudi tuyikila bimpe ne bantu, tudi tumanyina malu makuabu kudibu, tudileja tshitudi kabidi. Bitu bikole bua bansonga kuakula malu  adi munda muabu, bualu padibu bafika mu bidimu abi badi mua kupeta bundu bua kuakula amue malu. Bamanyi ba bungi badi bamba bua bana ba bitende ne: batu badimona bu batu misangu yonso babalondolola ku bionso bidibu bamba ne benza, bienze anu bu badi ku tshilumbuluidi kampanda. Nanku pamutu pa kuikala ku tshilumbuluidi mushindu eu, bamue bana ba bitende batu baditola pa nkayabu, bayikila malu abu mu buobu, bua baledi babu kabamanyi malu abu to.

Bualu bukuabu budi mua kupangisha muyiki budi ne: bansonga batu basue kudienzela malu. Kakuena mushindu wa kuepuka bualu ebu to, bualu dikola dia muana didi diumvuija kutuadija kudienzelaku malu. Kadi bualu ebu kabuena busua kumvuija ne: muanebe ukadi mukumbane bua kumbuka kumbelu to. Muanebe neikale amu nebe dijinga mu malu a bungi. Kadi dienda didikoka pa nkayende edi didi dienda dilua ku kakese ku kakese mu bungi bua bidimu too ne palua muana muntu mukole. Bu tshimue tshia ku bintu bidi bileja mudi muana ukola, bana ba bitende ba bungi batu basue kuanji kuela meji a malu adibu nawu nkayabu kumpala kua kuambila bantu bakuabu.

Tshidibi, bansonga ba bungi kabatu misangu yonso basokoka balunda babu malu to. Tshilejilu, mamu Jessica wa mu Mexique wakamona pende bualu ebu. Udi wamba ne: “Pavua muananyi wa bakaji wa bidimu 14 ne lutatu kampanda, uvua ulua misangu yonso kundi. Kadi lelu, udi uya kukuatshila balunda bende.” Bikala muanebe wenza pende nanku, kuambi musangu umue ne: mmukubenge to. Pabi, dikonkonona didibu benze didi dileja ne: bana ba bitende ba bungi mbasue mibelu ya baledi babu kupita ya balunda babu nansha mudibu kabayi bamba bualu ebu patoke. Ntshinyi tshidi mua kukujadikila ne: nudi nuyukila ne muoyo mujima?

Ela meji ne: udi wenda wendesha mashinyi mu njila mule mululame. Newenze kilometre ya bungi kuyi utata bikole bua kuludika ndundu ya mashinyi to. Mutantshi mukese eu, udi umona tshibende tshikole. Bua kumona mua kulama mashinyi ebe anu mu njila kuyi upambuka, neutume nkata mushindu udi njila uya amu. Ke mudibi kabidi bua muanebe padiye ulua tshitende. Mu bidimu bia bungi, pamuapa nuvua nuyikila bilenga nende kakuyi lutatu lua bungi to. Kadi mpindieu, nsombelu wa muanebe mmushintuluke bikole musangu umue, udi pebe ne bua kushintulula mayele. Udiele nkonko idi ilonda eyi:

‘Padi muananyi mumvue bua kuyikila nanyi, ntu ngumvua panyi bua kuyila nende anyi?’ Bible udi wamba ne: ‘Dîyi diamba mu tshikondo tshiakane didi bu mamuma a tshiamu tshia or mu tshitekelu tshia argent.’ (Nsumuinu 25:11) Tshikondo anyi dîba didi ne mushinga anu mudi mvese eu uleja. Tuangata tshilejilu: Tshidime kêna mua kulayidila anyi kusemeja pabuipi tshikondo tshia dipola bintu to. Tshidiye, udi udienzeja bua kupola padi tshikondo tshia dinowa tshikumbana. Muanebe pebe udi mua kuikala pende ne tshikondo kampanda tshituye umvua mua kuakula. Kupitshishi tshikondo atshi to. Mamu Frances wa mu Australie udi wamba ne: “Misangu ya bungi, muananyi wa bakaji uvua mua kulua mu nzubu wanyi wa bulalu butuku usomba nansha bua dîba dijima. Kabivua bitekete to, bualu tshitu musue kuikala mutabale butuku dîba dia kulala to, kadi nansha mu mêba au makole a butuku tuvua tuyikila malu onso bimpe.”

‘Ndiku nkeba mua kujingulula tshidiye umvua pamutu pa kumuteleja patupu anyi?’ Yobo 12:11 udi wamba ne: ‘Ditshi kadiena diteta mêyi, bu mudi ludimi lulabula biakudia bialu anyi?’ Mpindieu ke tshikondo tshia wewe “kuteta” tshidi muanebe wamba. Bana ba bitende batu bakula malu onso bashindika bienze anu bu se: mmalelela. Tshilejelu, muanebe udi mua kuamba ne: “Utu ungangata misangu yonso anu bu muana mutekete!” anyi ne: “Kutu ungumvuila panyi to!” Pamutu pa kuimanyina pa miaku “misangu yonso” ne “Kutu” idi kayiyi milelela,  manya ne: muanebe kêna pamuapa wamba tshidiye musue kuamba to. Tshilejelu padiye wamba ne: “Utu ungangata misangu yonso anu bu muana” pamuapa uvua musue kuamba ne: “Ndi mmuona ne: kanutu nuntuaku panyi mushinga to”; padiye wamba ne: “Kutu ungumvuila panyi to” uvua usua kuamba ne: “Ndi musue kukuambila tshindi ngumvua.” Ditatshisha bua kujingulula tshidiye usua kuamba mu mêyi ende.

‘Ntu nyanga muyiki tshiyi mumanye pa kuenzeja muana bua akule anyi?’ Bible udi wamba ne: “Mamuma a buakane adi akunyibua mu ditalala kudi bantu badi benzeja ditalala.” (Yakobo 3:18) Ku mêyi ebe ne bienzedi biebe ‘enzeja ditalala’ bua muanebe adiumvue mupepele bua kuakula. Vuluka ne: wewe ke udi muakuidi wa muanebe. Nunku panudi nuyikila pa bualu kampanda, udienzeje bua kuakudi bu mutu nzuji upisha muena tshibawu ku tubadi to. Tatu Ahn wa mu Corée udi wamba ne: “Muledi muimpe kêna mua kuamba muanende mêyi bu mudi: ‘Ndîba kayi diwakola wewe?’ anyi ne: ‘Mmisangu bungi kayi inkadi mukuambile bualu ebu?’ Meme mumane kuenza bilema bia bungi bia mushindu eu, ngakamona ne: bana banyi bavua bafika munda kabiyi anu bua mushindu umvua ngakula kadi ne bua bimvua ngamba.”

Kuyikila ne bana ba bitende kudi mua kuenzeka. Akaja mushindu uudi uyikila ne muanebe bilondeshile nsombelu udiku. Lomba mibelu kudi baledi bakuabu badi bapatula bipeta bilenga. (Nsumuinu 11:14) Paudi uyikila ne muanebe, wikale ‘umvua lubilu, utukija kumpala kua kuakula, kukuatshi tshiji lubilu.’ (Yakobo 1:19) Tshiudi kuyi mua kupua muoyo tshidi ne: kulekedi bua kukolesha muanebe ne ‘dibela ne didimuija bia Mukalenge.’​—Efeso 6:4.