Ntshinyi tshivua Yezu mulongeshe bua inferno?

‘Biakulenduisha dîsu diebe, wadimansha; bua wewe kubuela mu bukalenge bua Nzambi ne dîsu dimue kudi kutamba bua wewe kuimanshibua mu Ngena ne mêsu abidi; amu tshikusu tshiabo katshiena tshifua, kapia kakena kajima.’​—MÂKO 9:47, 48.

Dimue dituku, Yezu uvua wakula bua tshikondo tshia dilumbuluisha, wamba mêyi ambilaye bantu babi tshikondo atshi ne: ‘Umukayi kundi, nudi ne mulawu, nuye mu kapia ka tshiendelele kadi katemeshila Diabolo ne banjelo bende.’ Yeye kusakidila kabidi bua bantu abu ne: “Nebaye mu dikenga dia tshiendelele.”​—MATAYO 25:41, 46.

WEWE mubale mêyi a Yezu adi kulu eku au, udi mua kuamba ne lukasa luonso ne: udi wakula bua inferno wa kadilu. Kabidi, Yezu kena mua kuamba malu adi abengangana ne Dîyi dia Nzambi to, diodi didi dileja malu matoke ne: “Bafue ki mbamanye kabidi bualu nansha bumue.”​—Muambi 9:5, MMM.

Kadi, pavua Yezu muambe ne: bantu babi nebedibue mu “Ngena” anyi mu inferno wa kadilu uvua musue kuamba tshinyi? Yezu uvua muakula bua “kapia ka tshiendelele,” nketu katu katema aka anyi peshi nka mu tshimfuanyi? Mmunyi mudi bantu babi baye “mu dikenga dia tshiendelele”? Tuanji tukonkononayi nkonko eyi ku lumue ku lumue.

Pavua Yezu muambe ne: bantu babi nebedibue mu “Ngena” anyi mu inferno wa kadilu uvua musue kuamba tshinyi? Muaku eu “Ngena” udi mu Mâko 9:47 mmufume ku muaku wa tshiena Greke Geenna. Wowu pawu mmufumine ku muaku wa tshiena Ebelu Geh Hinnom, udi umvuija ‘Lupongo lua muana mulume wa Hinoma.’ Lupongo elu luvua pambelu pa tshimenga tshia Yelushalema. Bavua balambuilamu bana mu tshikondo tshia bakalenge ba Isalele, kadi Nzambi uvua mukine tshienzedi tshibi atshi. Nzambi wakamba ne: uvua ne bua kushipa bantu bonso bavua benza tshienzedi etshi tshibi tshia ntendelelu wa dishima. Bavua babikila kabidi Lupongo lua muana wa Hinoma alu ne: ‘Lupongo lua kushipelamu bantu,’ muaba au ‘bitalu bia bantu’ aba kabavua babijika to. (Yelemiya 7:30-34) Nunku, ke Yehowa kumanyisha ne: Lupongo alu luvua ne bua kulua muaba wa kuimansha bitalu, kadi ki ngua kukengeshila bantu ba muoyo to.

Mu tshikondo tshia Yezu, bena mu Yelushalema bavua ne tshibidilu tshia kuimansha bintu bia bukoya mu Lupongo alu lua muana wa Hinoma. Bavua bimanshamu kabidi bitalu bia bamue bantu bavua bafue lufu lua tshibawu, ne bavua belamu bintu bionso bia manyanu ne bitalu bia nyama bua mudilu kaujimi to.

Pavua Yezu wakula bua bikusu bidi kabiyi bifua ne bua kapia kadi kakayi kajima, uvua mua kuikala welela meji a mêyi adi mu Yeshaya 66:24. Yeshaya udi wamba bua ‘bitalu bia bavua batombokela [Nzambi],’ ne: “bikusu nebibadie kabiyi bifua, kapia nekaboshe kakayi kajima.” Yezu ne bantu bavua bamuteleja bavua bamanye ne: mêyi adi mu Yeshaya aa avua akula bua tshivua tshienzekela bitalu bivuabu kabayi bajika ne lumu.

Nunku, Yezu wakatela Lupongo lua muana wa Hinoma anyi Ngena bua kuleja bimpe lufu lua muntu udi ufua kayi ditekemena dia dibika. Wakumvuija tshivuaye musue kuamba pakambaye ne: Nzambi ‘Udi mua kujimija muoyo ne  mubidi kabidi mu Ngena.’ (Matayo 10:28) Ngena udi tshimfuanyi tshia lufu lua tshiendelele, kadi ki dinyoka dia tshiendelele to.

Yezu uvua muakula bua “kapia ka tshiendelele,” nketu katu katema aka anyi peshi nka mu tshimfuanyi? Tangila ne: “kapia ka tshiendelele” kavua Yezu mutela nkadi katela kabidi mu Matayo 25:41 nkavua kalongoluela ‘Diabolo ne banjelo bende.’ Udi wela meji ne: mudilu wetu eu udi mua kuosha bifukibua bia mu nyuma anyi? Peshi Yezu uvua wakula bua “kapia” ka mu tshimfuanyi? Nansha “mikoko” ne “mbuji” bidiye mutela mu muyuki umue umue eu, mbia mu tshimfuanyi bileja mishindu ibidi ya bisumbu bia bantu. (Matayo 25:32, 33) Kapia ka tshiendelele kadi Yezu wakuila aka, nka mu tshimfuanyi ne kadi kaleja muabutuka bantu babi bua kashidi.

Mmunyi mudi bantu babi baye “mu dikenga dia tshiendelele”? Nansha mudi Bible ya  bungi mienze mudimu ne muaku “dikenga” udi mu Matayo 25:46, kadi muaku wa tshiena Greke kolasin udibu bangatshila muaku au udi umvuija “kutangila mitshi bua ikola bimpe,” anyi kumusha mabeji mabi ne kuusonzela. Bantu badi bafuane mikoko nebapete muoyo wa tshiendelele, kadi badi kabayi balekela malu mabi nebaye “mu dikenga dia tshiendelele,” mmumue ne: nebafue bua kashidi.

Udi wela meji kayi?

Yezu katu muanji kulongesha ne: bantu batu ne anyima utu kayi ufua to. Kadi, uvua misangu ya bungi ulongesha bua dibika dia bantu ku lufu. (Luka 14:13, 14; Yone 5:25-29; 11:25) Mmunyi muvua Yezu mua kuamba ne: bantu nebabishibue ku lufu, kadi eku muikala witaba ne: anyima yabu kayena ifua?

Yezu kavua mulongeshe ne: Nzambi udi ukengesha bantu babi ne tshikisu mu mudilu wa tshiendelele to. Kadi, Yezu wakamba ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Bua tshinyi Yezu wakamba ne: bantu bonso badi kabayi bamuitabuja badi ne bua kufua? Bikalaye uvua musue kuamba ne: bavua ne bua kushala ne muoyo bakenga mu inferno wa kadilu tshiendelele, tshivua mua kumukanda bua kuamba nanku ntshinyi?

Dilongesha dia ne: inferno mmuaba wa kukengeshila bantu kadiena difumina mu Bible to. Kadi, ndilongesha dia bampangano didibu balongeshe bamba mudidi dia bena Kristo. (Bala malu adi mu kazubu ka  “Muvua dilongesha dia inferno dibange,” mu dibeji 6) Nzambi katu ukengesha bantu mu inferno wa kadilu ka tshiendelele nansha kakese. Mmushindu kayi udi dimanya bulelela pa inferno mua kushintulula muenenu webe wa Nzambi?

[Kazubu mu dibeji 6]

 MUVUA DILONGESHA DIA INFERNO DIBANGE

NDILONGESHA DIA BAMPANGANO: Bena mu Ejipitu wa kale bavua bitaba mudiku inferno wa kapia. Mukanda kapanda mufunda mu tshidimu tshia 1375 kumpala kua Yezu udi wakula bua bantu bavuabu “ne bua kuela mu bina bia mudilu mitu minyika panshi; ne . . . kabavua mua kupatukamu to, ne . . . kabavua mua kupanduka ku mudilu au to.” (The Book Ȧm-Ṭuat) Muena nkindi mukuabu wa bena Greke diende Plutarque (wa mu 46 too ne mu 120) wakafunda bua bantu ba mu ditunga dia muinshi mua buloba ne: “[Bavua] badila muadi wa kanyinganyinga anu bu bavua mu dinyoka dia dikema dikuata buôwa dia bundu.”

DITAMPAKANA MU BENA YUDA: Mumanyi wa malu a kale diende Josèphe (wa mu 37 too bu ne mu 100) wakamba ne: bena mu kasumbu ka bena Yuda bena Essene bavua bitaba ne: “anyima kayitu ifua to, itu ishala ne muoyo tshiendelele.” Udi usakidila kabidi ne: “Badi ne ngelelu wa meji bu wa bena Greke . . . Badi bela meji ne: anyima ya benji ba malu mabi itu iya mu muaba wa mîdima wenza buôwa, ne bayinyokamu tshiendelele.”

DIDI DITAMPAKANA MU BUKUA BUENA KRISTO: Mukanda wa Buakabuluibua bua Petelo utu kauyi wa mu Bible mufunda mu bidimu bia lukama ne pamutu uvua wamba bua bantu babi ne: “Badi bababuikila kudi mudilu mukole menemene udi kauyi mua kujima.” Udi wamba kabidi ne: “Muanjelu wa tshiji Ezrael udi uya ne balume ne bakaji buoshike bitupa bua kubela mu muaba wa muidima, inferno wa bantu; ne tshiji tshikole tshidi tshibanyoka.” Mu tshikondo tshimue tshimue atshi, mufundi mukuabu diende Théophile wa ku Antiokia udi pende utela mêyi a muprofete mukaji Sibyl wa bena Greke pavuaye umanyisha dinyoka dia bantu babi ne: “Nebanuele mudilu pa mbidi ne nenoshike mu mudilu dituku dionso.” Mêyi aa ngamue a ku avua Théophile wamba ne: “mmalela, a mushinga, ne majalame, ne adi mua kukuatshisha muntu yonso.”

DILONGESHA DIA INFERNO NDIKENGESHISHE BANTU MU BIDIMU BIA KALE: Mukalenga mukaji Marie I wa mu Angleterre (1553-1558), uvuabu babikila ne: “Marie muena mashi” bua muvuaye muosha bena Mishonyi batue ku 300 basuikila ku mutshi, wakamba musangu mukuabu ne: “Bu mudi anyima ya batontolodi iya kuoshibua mu inferno tshiendelele, mbitambe buimpe bua meme kuidikija mutu Nzambi udisombuela pa kudianjila kuboshila pa buloba apa ne muoyo.”

MUDIBU BADIUMVUIJA MATUKU AA: Mu bidimu bidi panshi ebi, bimue bitendelelu mbishintulule dilongesha dia inferno. Tshilejilu, mu tshidimu tshia 1995, bena mu tshimue tshitendelelu tshia mu Angleterre bakalongesha ne: “Inferno ki mmuaba udibu bakengeshila bantu tshiendelele to, kadi ndisungula dia ndekelu didi bantu badi batombokela Nzambi ne muoyo mujima benza, disungula didibu kabayi mua kushintulula ne nshikidilu wabu udi anu lufu.”

[Kazubu/​Tshimfuanyi mu dibeji 7]

‘DIJIBA DIA KAPIA’ TSHINYI?

Buakabuluibua 20:10 udi wamba ne: Diabolo needibue mu ‘dijiba dia kapia’ kabidi ne: ‘neakengeshibue munya ne bufuku tshiendelele.’ Bikala Diabolo ne bua kukengeshibua bua kashidi, Nzambi se uvua mua kumulama ne muoyo, kadi Bible udi wamba ne: Yezu “neaboze Satana.” (Lomo 16:20, MMM) Dijiba dia kapia dia mu tshimfuanyi edi didi dileja “lufu luibidi.” (Buakabuluibua 21:8) Lufu elu ki ndua kumpala lutu Bible utela ludi lukebesha kudi mpekatu wa Adama to, bualu bantu badilu lukuata badi mua kubishibua. (1 Kolinto 15:21, 22) Bu mudi Bible kayi wamba ne: ‘dijiba dia kapia’ didi mua kupatula bafue badimu, nanku “lufu luibidi” ludi lumvuija lufu lua mushindu mukuabu, ludi kaluyi ne ditekemena munda mualu.

Mmushindu kayi udi bantu badi mu “dijiba dia kapia” bakengeshibua munya ne bufuku tshiendelele? Imue misangu “dikengeshibua” didi mua kumvuija “kukuata” muntu. Dimue dituku, pavua Yezu ukanyina bademon, bakela mbila bamba ne: ‘Wewe wakulua kutukengesha diambedi dituku dia dikenga dietu kadiyi dianji kulua anyi?’ (Matayo 8:29; Luka 8:30, 31) Nunku, bantu bonso badi mu ‘dijiba’ dia kapia ‘nebakengeshibue,’ bakuatshibue tshiendelele anyi “lufu luibidi.”