Bua tshinyi mabaka a bungi atu afua?

‘Bafalese bakalua kudiye, bakamuteta munda ne: biumusha muntu mukaji wende bua malu onso, neashipe mukenji anyi?’​—Matayo 19:3.

BAMUE bantu ba mu tshikondo tshia Yezu bakamuebeja bua kumanya bikala dibaka mua kushala kashidi. Yezu kubandamuna ne: ‘Nuenu kanuakabala ne: ku tshibangidilu mufuki wakabafuka mulume ne mukaji, mufuki wakamba ne: Bua bualu ebu mulume neashiye tatu wende ne baba wende, nealamate kudi mukaji wende; bubidi buabu nebalue mubidi umue? Nunku kabena bantu babidi kabidi, badi mubidi umue. Bua bualu ebu muntu kapanduludi tshidi tshibumbakaja kudi Nzambi.’ * (Matayo 19:4-6) Bidi bimueneka patoke ne: Nzambi uvua mulongolole bua mabaka kushalawu kashidi.

Mu matunga a bungi lelu, mabaka 40 pa 100 anyi kupita apu ‘mmapandulula’ ne mmafike anu ku difua. Bidiku bisua kuleja ne: mibelu idi Bible ufila bua dibaka kayitshiena ne mushinga anyi? Tudiku mua kuamba ne: mabaka adi afua bualu mbaenze bibi anyi?

Tuangatabi tshilejilu: Mêku abidi mmasumbe mashinyi mafuanangane. Bena mu dîku dia kumpala badi balama mashinyi abu ne baendesha bimpe. Mashinyi abu kaena anyanguka to. Bena mu dîku dibidi kabena ne tshidibu benza bua kulama abu mashinyi bimpe to. Badi baendesha ne tshiputuku. Mashinyi abu aa adi anyanguka ne baalekela. Tshilema ntshia nganyi, ntshia mashinyi anyi ntshia benawu badi baendesha? Mbimueneke patoke ne: benawu badi baendesha ke badi ne tshilema tshinene.

Bia muomumue, padi mabaka a bungi afua kabiena biumvuija ne: pamuapa mbaenze bibi to. Kadi mabaka a bungi adi ne nsombelu wa disanka mmaleje ne: Nzambi uvua muenzelamu dibaka. Mabaka a nunku adi asankisha balume ne bakaji babu, bena mu mêku abu ne bantu bonso ne abakolesha. Kadi anu bu mashinyi, bua dibaka kunengadi, bidi bikengela kudilama ne kuikala ne tshibidilu tshia kulongolola bilema.

Nansha biwikale utshidi ubuelelaku mu dibaka anyi ukadimu ne bidimu bia bungi, umanye ne: mibelu idi Bible ufila bua kulama dibaka ne kudikolesha itshidi ne mushinga wa bungi. Netumone bimue bilejilu mu tshiena-bualu tshidi tshilonda.

[Mêyi adi kuinshi]