Mukanda mufume ku Madagascar

Bavua anu bu bavua batuimbila misambu mimpe

MEME ne bayanyi tuvua mu luendu batangile mu tshidîla tshia Madagascar, muaba mupiamupia uvuabu batutume bua kuenza mudimu wa bu misionere. Tuakalayangane ne bena mu dîku dietu ne balunda, tuetu kukolesha anu ku muoyo, batuishibue ne: Yehowa mmutusunguile muaba wa kuenzela mudimu uvua mutukumbanyine ne neatuambuluishe bua tuwenza bimpe.

Tutshidi anu bavuluke bisangilu bia kumpala bituvua babuele mu Madagascar patuafiki. Muanetu uvua ulombola dilonga dia Tshibumba tshia Nsentedi uvua anu bu uvua wimbisha bantu misambu. Tutshivua tutata bua kumvua muakulu, ke bualu kayi pavua bantu bakula bavua anu bu bavua batuimbila misambu mimpe. Bivua bitulombe matuku a bungi bua kushisha kumvua bivua bantu bambe.

Bua musangu wa kumpala umvua mumvue lukonko luvua kaluyi mu tshikoso, ngakaluandamuna diakamue ne dîyi dikole kabayi bansungule to. Bantu bavua nanyi pabuipi bavua bumvue diandamuna dianyi, meme kudijika ku mishiku bua tuseku tuanyi katumvuiki. Ngakumvua bundu, kadi mvua ne disanka bualu mvua bushuwa mumvue tshivuabu bebeje.

Pamutu pa meme kuikala tshilejilu kudi bakuabu mu buambi, ngakamona ne: meme ke ukavuabu bambuluisha. Bana betu bavua bangambila mushindu muimpe wa kutuadija kuyukila ne bantu; bandeja tshimvua mua kuamba ne mvese imvua mua kubala.

Ndi mvuluka dimue dituku pamvua mu buambi, muana mukuabu wakatuela mbila ne: “Vazaha! Vazaha!” Muaku eu udi umvuija “muntu muenyi” mu muakulu wa mu Madagascar. Tuakambuluja bua bana bakuabu kabalu pabu kutuela mbila ya mushindu eu. Muana wa balume mukuabu wakatandisha uvua utuela mbila au, umuambila ne: “Ki mmuenyi to, udi uteta kuakula mu muakulu wetu!” Muanetu wa bakaji utuvua nende uvua unkudimuina bivuabu bamba bualu bavua bakula lukasa lukasa tshiyi ngumvua to. Nansha nanku, ngakamona ne: mvua nya kumpala. Ndekelu wa bionso, ngakalua kumona mu Madagascar anu bu kuetu.

Imue misangu pamvua ndimone kabidi nkaya, bivua binkolesha ku muoyo pavua bana batekete  bandeja muvuabu bannange pavuabu bankuata ku tshianza nansha mumvua tshiyi mua kuyukila nabu bimpe. Bansonga ba mu tshisumbu ndibenesha dia kudi Yehowa bulelela. Hasina, muanetu wa bakaji kampanda utshivua mupuekele ke ukavua unkudimuina bituvua tuyukila ne bakuabu. Pavua muntu nansha umue kayi umvua bimvua ngamba, bivua bimutatshisha pende bua kumvua. Pamvua nditatshisha bua kuyukila ne balunda banyi ba mu tshisumbu, uvua ulua muaba umvua, ubumvuija malu amvua njinga kubambila.

Meme ne bayanyi tuvua mu tshisumbu tshikavuabu pa kutapulula. Nanku, bivua bitulomba bua kupesha bana betu bamue balongi ba Bible bualu balongi abu bakavua mu teritware wa tshisumbu tshipiatshipia. Muanetu wa bakaji mukuabu wakankankamija bua ngikale ndonga ne umue wa ku balongi bende ba Bible. Mvua ne buôwa ne ngakabenga bualu muakulu utshivua untatshisha; kadi wakasuminyina anu bua ngitaba, kunjadikilaye ne: Yehowa neangambuluishe. Kungambilaye ne lutulu ne dîyi dimpe mu mêyi mapepele ne: mu matuku makese, nenkumbane bua kulongesha bakuabu Bible mu mushindu ungikale musue. Mêyi au akankolesha ku muoyo bikole.

Anu pinapu, dilonga adi kutungunukadi bimpe. Dimue dituku pamvua pambelu, ngakumvua mulongi wa Bible au umbikila mu dîna dianyi. Yeye ne bayende bavua baya bua kufundisha dibaka diabu kua mbulamatadi. Bayende ukavua mutuadija pende kulonga ne mbadifundile bipatshila bia bungi bidibu bajinga bua kukumbaja ne mbasue kabidi bua kutambula. Bualu abu buakansankisha bikole nansha mundi mumanya ne: Yehowa ke udi ukoka bantu kudiye, ki ntuetu to.

Tudi balonge malu a bungi muaba mupiamupia utudi tuenzela mudimu eu. Nansha mututu katutshiyi tumonangane ne balunda ne bena mu dîku dietu, tudi tumvua anu bu ne: tudi balue ne bamue ba kudibu kuneku. Tutu tuambila bana betu ba mu Madagascar malu abu ne mpindieu bakadi batuebeja bua kumanya mudibu baladila. Tudi bindile ne muoyo kulukulu tshikondo tshikale bena mu dîku dietu ne bana betu ba mu Madagascar mua kusomba pamue.

Padi bantu ba munemu bakula, ntshidi anu ngumvua bu badi “bimba misambu.” Kadi mpindieu, nkadi ngumvua mêyi. Ndi muindile ne muoyo kulukulu tshikondo tshingikale mua kudisanga kudi bakuabu bua kuimba nabu misambu mu mushindu wa muomumue pangatuadije kuakula bimpe muakulu eu. Yezu wakamba ne: ‘Kanutambi kuelangana meji a makelela, bualu bua makelela neadielelangane meji.’ (Matayo 6:34) Kadi netutungunuke anu ne kulonga imue miaku. Kadi bua mpindieu, nengikale nditatshisha bua kuakaja mushindu undi nteleja ne undi ngumvua bua kumona bua kuakula bimpe bu mudi bana betu ba mu Madagascar bakula.

[Tshimfuanyi mu dibeji 25]

Meme ne Hasina mu buambi