PATUKU tshipepele tshikole, udi mua kumvua makubakuba atuta. Kabitu bianji kukuenza buôwa anyi?— * Yezu udi ubikila bayidi bende babidi ne: ‘Bana ba mukungulu wa mvula.’ Tuanjibi kumona bua tshinyi wakababikila nanku.

Bayidi ba Yezu babidi aba n’Yakobo ne Yone. Mbana ba Zebedayo ne Salome. Mamu wabu Salome uvua mua kuikala muanabu ne Mariya, mamuende wa Yezu. Nanku Yakobo ne Yone bavua mua kuikala bana ba mamuende mukuabu wa Yezu ne bavua balunda ba katshia ku buana.

Zebedayo ne bana bende bavua balobi. Yakobo ne Yone bavua munkatshi mua bantu ba kumpala bavua Yezu musungule bua kulua bayidi bende. Pavua Yezu mubabikile, bakalekela diakamue mudimu wabu wa kuloba ne kutuadija kumulonda. Pashishe Yezu kusungula bayidi 12 bua kuluabu bapostolo bende. Yakobo ne Yone bavua pabu munkatshi mua bapostolo abu.

Ngondo mikese kumpala kua kushipabu Yezu, uvua uya ne bapostolo bende ku mukuna uvua pabuipi ne tshimenga tshia Samalea. Dîba dikavua diye, ne bakavua batshioke bikole. Kadi bena Samalea bavua bamba ne: kabavua basue bua Yezu ne bayidi bende kulalabu mu tshimenga tshiabu to. Udiku mumanye mbua tshinyi anyi?— Tuanji kumona.

Yezu ne bapostolo bende mbena Yuda, ne bena Yuda ba bungi bavua bakinangane ne bena Samalea. Kadi Yezu kavua nanku to. Uvua ubenzela malu ne dinanga, ne ke tshivua Yakobo ne Yone bua kuenza pabu. Kadi bayidi bende babidi aba bakakuatshila bena Samalea tshiji tshikole bualu kabavua babakidile to, kulombabu Yezu ne: ‘Udi musue tuetu tulombe kapia kalue mu diulu bua  kubosha anyi?’ Buebe wewe, Yezu uvua mua kuikala mubandamune tshinyi?— Yezu wakabambila ne: kabavua mua kujinga bualu bubi bua nanku to. Yakobo ne Yone bavua ne bua kulonga malu a bungi pa tshilumbu tshia kufuilangana luse.

Tshilumbu tshikuabu tshinene tshivua natshi Yakobo ne Yone tshidi ne: bavua basue kuikala ku mutu kua bakuabu ne kuikala ne mushinga wa bungi kupita bakuabu. Matuku makese kumpala kua Yezu kufua, bavua batume mamu wabu bua kulomba Yezu ne: ‘Wele mukenji wa bana banyi aba babidi kushikamabu, mukuabu ku tshianza tshiebe tshia balume, mukuabu ku tshianza tshiebe tshia bakaji, mu bukalenge buebe.’ Bayidi bakuabu dikumi bakafika munda pakumvuabu tshivua Yakobo ne Yone balomba. Uvua pebe mua kufika munda anyi?—

Bidi mua kuikala nanku. Katutu basue patu bakuabu bajinga bua kuikala ku mutu kuetu anyi padibu bajinga bua kuikala ne mushinga wa bungi kutupita to. Pashishe, Yakobo ne Yone bakalua kumona ne: bavua benze tshilema ne kushintulukabu. Bakalua bapostolo bavua banange bakuabu ne bavua ne malu mimpe. Ndilongesha kayi ditudi tupetela ku bualu ebu?—

Tshilejilu tshia Yezu tshidi tshitulongesha ne: tudi ne bua kuenzela petu bakuabu malu mimpe. Yezu uvua wenzela balume ne bakaji nansha bana malu mimpe. Newenzeku muebe muonso bua kuvuluka tshilejilu tshiende ne kumuidikija anyi?—