MVUA muledibue mu dia 10/12/1968 mu Ilocos Norte, tshimenga tshia mu Philippines. Ndi muana wa muanda-mutekete mu bana dikumi. Anu bu bena Philippines ba bungi, tuvua bakole mu dîku dia bena Katolike. Mvua mujikije tulasa tubandile mu 1986, ne mvua ne dijinga dia kuikala munganga. Kadi tshiakakumbaja tshipatshila tshianyi etshi to, bualu ngakapeta masama a bungi. Bulelela, mvua ngela meji anu ne: ndi mua kufua. Mu dikenga dianyi edi, ngakalomba Nzambi diambuluisha ne meme kumuambila ne: wewe mungondope, nenkuenzele mudimu matuku anyi onso a muoyo.

Meme mumane kumvua bimpe, ngakavuluka bualu bungakalaya Nzambi. Nunku, mu ngondo muisambombo mu tshidimu tshia 1991, ngakabuela mu tulasa tua malu a Bible tua ba Pantekotiste. Programe wa kalasa aka uvua ne tshitupa tshivua tshitangila mushindu wa kupeta ‘dipa dia nyuma muimpe tshianana.’ Mvua ne dijinga dia kupeta bukole bua kuondopangana nabu. Mu kalasa bavua batulongesha ne: bua kupeta bukole ebu bidi bikengela kujila biakudia ne kudifila mu masambila. Musangu mukuabu, bu mumvua musue kudileja bu ne: ndi ne “dipa” edi, ngakaya kuteleja mu musokoko malu avua mulongi nanyi wamba mu disambila diende ne dîyi dikole mu ditumba dîba dituvua tusambila. Pangakamona ne: ukadi ku ndekelu kua disambila diende, ngakapingana lukasa pa muaba umvua mutue binu. Pashishe meme kutuadija kumuambila malu onso avuaye ulomba mu disambila diende, nunku yeye kuitaba ne: mpindieu nkadi ne: ‘dipa dia nyuma.’

Pangakatungunuka ne kalasa kanyi, mvua ne nkonko ya bungi. Tshilejilu, Matayi 6:9 udi wakula bua “Tatu” ne “dîna” diende. Tshilejilu mvua ndiebeja ne: “Tatu kayi udi Yezu wakuila muaba eu?” ne “Dîna dia nganyi didi ne bua kutumbishibua?” Mandamuna avua balongeshi banyi bampesha avua a pamutu pamutu ne kaavua mantuishe to. Bakatulongesha dilongesha dia Busatu bunsantu kadi bobu kutuambila ne: mbualu budi bukole bua kujingulula. Biakandubakaja bikole. Nansha nanku, ngakatungunuka ne kulonga bua meme kulua pastere.

Mu kalasa ka malu a Bible bavua batulongeshe ne: tshitendelelu tshia Bantemu ba Yehowa ntshia dishima. Bavua babangata bu bantu badi kabayi bitaba Kristo to. Mvua ne tshiji tshikole bua tshitendelelu atshi.

Mu tshidimu tshianyi tshibidi tshia kalasa, ngakaya kumbelu bua kutangila baledi banyi mu matuku a dikisha. Pakumvua yayanyi mukuabu wa bakaji diende Carmen ne: mvua kumbelu, wakalua pende. Yeye ukavua mutambule, ne uvua uyisha bikole mu Bantemu ba Yehowa (mbuena kuamba ne: muyishi wa ku dîba ne ku dîba). Pakatetaye bua kundongesha malu a Nzambi, ngakamuandamuna ne tshiji ne: “Nkadi  mumanye Nzambi undi ngenzela mudimu!” Meme mumane kumupenda ne dîyi dikole, ngakamusakila ne tshiakamupesha kabidi mpunga bua yeye kuakula nanyi to.

Pangakapingana mu kalasa kanyi ka malu a Bible, Carmen wakantumina broshire uvua ne tshiena-bualu ne: Tudi ne bua kuitabuja Busatu bunsantu anyi? * Ngakamuvungakaja diakamue ne kumuimansha mu kapia. Ntshivua anu mumufikile tshiji.

Pamvua ngenda ndonga kalasa kanyi ka malu a Bible, mvua ngenda nshintulula nsombelu wanyi. Mvua ne disanka dia pa buadi pavua mamuanyi ne tutuanyi bandonde mu tshitendelelu tshia ba Pentekotiste tshimvua.

Mu ngondo muisatu wa tshidimu tshia 1994, ngakapeta diplome dia kalasa ka malu a mu Bible ka ba Pantekotiste kamvua ndonga. Anu bu mumvua muleje ku ntuadijilu, Pastere wetu uvuaku tshikondo atshi. Tuetu bonso bavua bapete maplome tuvua basue kuikala nende bualu tuvua ne ditabuja dia ne: uvua ne dipa dia kuondopa. Tuakabanda ku tshiakuidi kuvuaye, tuenda tutumpika ne tututa nende bikaji bilondeshile muvua bimbi ba misambu bimba. Muntu yonso uvuaye ulenga uvua ukuluka, ufua “lufu lua mu nyuma.” * Pakandengaye, meme panyi kukuluka ne kujimija lungenyi. Pangakapetulula lungenyi luanyi, mvua ne buôwa, kadi ngakadiumvua ne: mvua mupete bukole bua kuondopangana, nunku ngakumvua disanka.

Matuku makese pashishe, ngakakuata mudimu ne bukole ebu bua kuondopa muana uvua usama bikole muikale ne mubidi kapia. Pangakasambila, muana wakatuadija kutuka bisululu diakamue ne mubidi kapia kumushila muaba. Meme kudiumvua ne: mpindieu ndi mua kukumbaja tshimvua mulaye Nzambi. Bivua binkemesha bualu mvua ndiumvua anu bu muntu uvua dijinga ne tshintu kampanda. Mvua ngitaba mundamunda ne: Nzambi udi anu umue, kadi tshivua mumanye ne: nganyi menemene to. Nkavua ngela mpata malongesha a bungi a mu tshitendelelu tshimvua.

Panyima pa malu aa, ngakatungunuka ne kukina Bantemu ba Yehowa bikole. Misangu yonso imvua mpeta mikanda ya Bantemu, mvua nyosha. Kadi bualu bukuabu bumvua tshiyi mutekemene buakenzeka. Biakantonda pangakapeta mamuanyi katshiyi kabidi musue tshitendelelu tshietu to. Carmen ukavua ulonga nende Bible. Mvua mukuatshile yaya tshiji tshikole.

Pashishe ngakapeta Réveillez-vous! mu nzubu wa mamuanyi. Mu kuamba kuimpe mvua mua kuikala mumuoshe. Kadi bu mumvua musue kumanya malu avuaye ubala, ngakatapamu dîsu lukasa lukasa. Mêsu anyi akatuishila pa tshiena-bualu tshivua tshiakula bua muntu kampanda uvua ne ditabuja dikole ku malu avua tshitendelelu tshiende tshilongesha. Kadi pakatuadijaye kubala mikanda ya Bantemu pamue ne Bible, wakatuishibua ne: malongesha bu mudi dia Busatu bunsantu, iferno wa kapia, ne dibenga kufua dia anyima kaavua a mu Bible to. Biakandenga ku muoyo. Ke malu amvua musue kumvua bimpe menemene. Kutuadijila anu dîba dimvua mubale tshiena-bualu atshi, ngakajinga bua kuikala ne  dîba dia kumvua malongesha malelela a mu Bible.

Meme mumane kubala muyuki kampanda mu Réveillez-vous! uvua wakula bua muntu uvua mupika wa maluvu ne diamba uvua mufike ku dishintulula nsombelu wende bualu uvua ulonga Bible, ngakatuadija kubala bikole mikanda ya Bantemu. Ngakapeta broshire wa Le nom divin qui demeure à jamais. * Pangakamubala, ngakamanya ne: dîna dia Nzambi n’Yehowa. Biakansankisha bikole bua kulonga bulelela pa bidi bitangila Nzambi umuepele mulelela.​—Dutelonome 4:39; Yelemiya 10:10.

Ngakatungunuka ne kubala mikanda ya Bantemu mu musokoko ne meme kulua kumanya malu malelela a bungi a mu Bible. Tshilejilu, mu kalasa ka ba Pentekotiste bavua bandongeshe ne: Yezu ke Nzambi, kadi mpindieu ndi mulonge mu Bible ne: Yezu “mMuana wa Nzambi udi ne muoyo.”​—Matayi 16:15, 16.

Pangakamonangana ne yaya Carmen kabidi, wakakema pangakamulomba bua yeye kumpesha broshire wa Le nom divin qui demeure à jamais, ne mikanda mikuabu. Mvua mupitshishe bidimu bia bungi mu kalasa ka Bible aku, kadi kabavua bandongeshamu bulelela to, bavua bamfofomije mêsu. Muoyo wanyi mmuwule ne disanka mpindieu bua malu malelela a mu Bible andi mulonge. Mvua mudimuenene bulelela bua mêyi a Yezu aa: “Nenumanye bulelela, ne bulelela nebunupeshe budikadidi.” (Yone 8:32) Malongesha malelela aa akatuadija kushintulula nsombelu wanyi.

Mu tshikondo kampanda, mvua ngela meji ne: mvua mua kuikala ntendelela Yehowa Nzambi mu musokoko eku ntungunuka ne kuikala pastere. Mu matuku makese, ngakajingulula ne: tshivua kabidi mua kulongesha malongesha a bungi a mu tshitendelelu tshimvua to. Nansha nanku, mvua anu ne buôwa. Mvua ndiebeja ne: meme mulekele bupastere, nengikale mpeta makuta kuepi? Bena mu tshitendelelu nebumvue bibi pumvuabu ne: pastere wabu mmulue Ntemu wa Yehowa. Nunku ngakatungunuka ne mudimu wanyi wa bupastere, kadi mvua ngepuka bua kulongesha malongesha a dishima.

Pangakamonangana kabidi ne yayanyi Carmen, wakangambila bua meme kubuela mu bisangilu bia Bantemu ba Yehowa. Pamvua nya misangu ne misangu kufila luapolo mu tshitendelelu tshietu tshinene mu tshimenga tshia Laoag, mvua nkeba mu musokoko muaba uvua Bantemu benzela bisangilu biabu mu Nzubu wa Bukalenge. Bakandeja Alma Preciosa Villarin, uvuabu babikila ne: “Precious,” muyishi wa ku dîba ne ku dîba wa mu tshisumbu atshi. Nansha muntshivua ne meji mabi bua Bantemu, ngakitaba bua yeye kundongesha Bible.

Yayanyi uvua ne lutulu lua bungi pavuaye ungambila malu a mu Bible. Mvua mumone kabidi lutulu lua muomumue kudi Precious. Uvua ungambuluisha bikole bua meme kumvua Bible, nansha mumvua mfika munda, njinga kutanda nende, ne imue misangu mbandisha dîyi muimanyine anu pa amue malongesha a kale avuabu  bandongeshe. Mushindu uvua Precious ne Bantemu bakuabu bantabalela, budipuekeshi buvuabu nabu, ne bupole biakandenga bikole ku muoyo. Malu aa akansaka bua kutendelela Yehowa.

Mu ngondo wa 7 mu 1995, ngakamona ne: meme musue kusankisha Nzambi, ndi ne bua kulekela mudimu wanyi wa bupastere. Bua tshinyi? Buakabuluibua 18:4 udi wakula mu ngakuilu wa mu tshimfuanyi bua tshitendelelu tshia dishima wamba ne: “Bantu banyi, patukayi munkatshi muende binuikala kanuyi basue kubuelakana nende mu mibi yende, ne binuikala kanuyi basue kupeta penu bipupu biende.” Kadi mmunyi mumvua mua kupeta makuta a kudiambuluisha nawu? Ebelu 13:5 uvua mundongeshe ne: tuetu benze disua dia Nzambi, udi utulaya ne: “Tshiakukushiya nansha kakese, tshiakukulekela nansha kakese.”

Nansha muvua papa ne tutuanyi banduisha, mbingu ibidi kumpala kua meme kutambula kulua Ntemu, ngakapeta dikima dia kuya kumbelu bua kuosha bintu bionso bimvua nkuata nabi mudimu mu bupastere. Meme mumane kuenza nanku, ngakumvua ne: bukole kampanda bua pa buabu buvuabu bampeshe buakumbuka. Kumpala pamvua ndala, mvua ngumvua misangu ne misangu tshintu tshikuabu tshintshintshimika. Tshintu atshi tshiakajimina patshi. Mindidimbi imvua mmuenena ku dididishi dia nzubu wanyi yakajimina payi. Dilonga dianyi dia Bible diakangambuluisha bua kumanya ne: tshintu tshionso tshidibu babikila lelu ne: mapa, bu mudi bukole bua kuondopangana nabu, kabuena bufuma kudi Nzambi to, kadi nkudi nyuma mibi. Ndi ne disanka bua mundi mumbuke ku bupika bua nyuma mibi eyi, anu bu muvua nsongakaji mukuabu mupika muenze pavua Paulo mumupikule kudi “demon wa lubuku.”​—Bienzedi 16:16-18.

Mvua ne disanka dia bungi bua mutuvua meme ne mamu batambule pamue mu ngondo wa tshitema tshidimu tshia 1996 bua kulua Bantemu ba Yehowa. Meme mumane kutambula, ngakalua muyishi wa ku dîba ne ku dîba wa Bantemu ba Yehowa ne mvua ne disanka dia mumvua muenze mudimu eu bidimu bia bungi.

Mpindieu nkadi musedibue kudi Silver. Tudi tuenza nende mudimu mukole wa dilongesha muanetu wa bakaji malongesha malelela a mu Bible. Bana betu bakuabu bakatulonda mu dienzela Yehowa mudimu. Nansha mundi nyingalala bua mumvua tshinyi mumanye Nzambi menemene mu bidimu bia bungi, ndi ne disanka bua mundi mumanye Nzambi undi ntendelela.