DIBISHIBUA dia Yezu ku lufu didi ne mushinga wa bungi kutudi lelu eu. Mupostolo Paulo wakaleja mushinga wa bualu ebu pakafundaye ne: “Kristo ukadi mubishibue ku lufu, mamuma a kumpala a badi balale tulu mu lufu. Bu muvua lufu lufume kudi muntu umue, dibishibua dia bantu ku lufu didi difuma padi kudi muntu umue. Bualu anu bu mudi bantu bonso bafua mu Adama, nunku kabidi mu Kristo bonso nebapete muoyo.”​—1 Kolinto 15:20-22.

Yezu wakabishibua mu dia 16 ngondo wa Nisana mu tshidimu tshia 33 bikondo bietu ebi. Mu dituku adi, ke muvua bena Yuda baya ne mamuma a kumpala a mu madimi abu kudi Yehowa Nzambi mu ntempelo wa mu Yelushalema. Bu mudi Paulo mubikile Yezu ne: mamuma a kumpala, mbuena kuamba ne: kuvua ne bua kuikala bantu bakuabu bavua ne bua kubishibua ku lufu.

Mêyi a Paulo adi alonda adi aleja tshivua dibishibua dia Yezu ku lufu ne bua kutuadila bantu. Paulo udi wamba ne: “Bu muvua lufu lufume kudi muntu umue, dibishibua dia bantu ku lufu didi difuma padi kudi muntu umue.” Mpekatu ne dipanga bupuangane bitudi bapiane kudi Adama mbienze bua tuetu bonso tuikala tufua. Kadi pakafila Yezu muoyo wende mupuangane bu tshia bupikudi, wakakanguila bantu njila bua bapikudibue ku bupika bua bubi ne lufu pikalabu mua kubishibua ku lufu. Bilondeshile Lomo 6:23, Paulo wakajikija bimpe ne mêyi ende wamba ne: “Difutu dia bubi ndufu, kadi dipa didi Nzambi ufila mmuoyo wa tshiendelele mu Kristo Yezu Mukalenge wetu.”

Yezu wakumvuija nkayende mushinga udi nawu lufu luende ne dibishibua diende kutudi. Wakamba bua bualu buende ne: ‘Muana wa muntu neabandishibue, bua muntu yonso udi umuitabuja ikale ne muoyo wa tshiendelele. Bu muvua Nzambi munange ba pa buloba bikole menemene, wakabapesha Muanende mulela umuepele bua muntu yonso udi uleja ditabuja kudiye kafu, kadi ikale ne muoyo wa tshiendelele.’​—Yone 3:14-16.

Ela meji bua muikala muoyo wa tshiendelele: bisama, ntatu ne tunyinganyinga kabiyiku! (Buakabuluibua 21:3, 4) Nsombelu neikale muimpe be! Mumanyi kampanda wa malu a Bible wakaleja bualu ebu mushindu eu: “Bu mudi nkita mua kutuvuluija buîpi bua muoyo wa muntu, dibishibua dia bantu ku lufu diodi didi ditujadikila buîpi bua lufu.” Bulelela, dibishibua dia Yezu ku lufu nedipeteshe bantu muoyo!