THOMAS EMLYN uvua nganyi? Ntshinyi tshivua tshimusake bua kuakuila bulelela? Tshilejilu tshiende tshidi mua kutuambuluisha mushindu kayi lelu eu?

Bua kuandamuna nkonko eyi, tudi dijinga ne kuanji kumanya malu avua menzeke ku ndekelu kua bidimu bia 1600 ne ku ntuadijilu kua bidimu bia 1700 mu ditunga dia Angleterre ne dia Irlande. Ekeleziya wa mu Angleterre uvua ne bukokeshi bua bungi. Kuvua bimvundu bia bungi pankatshi pa tusumbu tua batendeledi bua malongesha ne bilele bia mu Ekeleziya.

Thomas uvua muledibue mu dia 27/5/1663 mu Stamford, Lincolnshire mu Angleterre. Pavuaye ne bidimu 19, wakayisha bua musangu wa kumpala mu tshitendelelu tshiabu. Pashishe, wakatuadija kulongesha mukaji mukuabu uvua ne muanzu munene uvua musombele mu tshimenga tshia Londres, pashishe kuyaye ku Belfast, Irlande.

Mu Belfast wakatuadija kuyisha mu ekeleziya. Mu kupita kua bidimu, Emlyn wakenza mudimu wa bu pastere miaba ya bungi ne mu Dublin.

Mu bidimu abi, Emlyn wakadifila bikole mu dilonga Bible. Dilonga diende dia Bible diakamusaka bua kubenga dilongesha dia Busatu bunsantu, nansha muvuaye uditaba ku ntuadijilu. Pakenzaye makebulula mu Evanjeliyo wakafika ku dituishibua ne: ngumvuilu wende mupiamupia eu uvua muimpe.

Emlyn kakaleja diakamue bantu tshivuaye mupete etshi to. Kadi, bamue bantu ba mu tshitanda tshivuaye pastere bakafika ku dimona ne: kavua wakula kabidi bua Busatu bunsantu mu malongesha ende to. Bu muvuaye mumanye ne: bantu bakuabu kabakuitaba bipepele ngumvuilu wende mupiamupia eu, wakafunda ne: “Pandi ndeja mmuenenu undi nende, tshiakutungunuka ne mudimu wanyi wa bu pastere to.” Mu ngondo muisambombo, tshidimu tshia 1702, bena mu tshitendelu tshiabu babidi bakamutandisha bua muvuaye ubenga kulongesha Busatu bunsantu mu malongesha ende. Emlyn wakabaleja patoke ne: kavua witaba kabidi dilongesha dia Busatu bunsantu ne uvua musue kulekela mudimu wende wa bu pastere.

Mu matuku makese, wakumbuka mu Dublin mu Irlande bua kuya mu Angleterre. Kadi panyima pa mbingu dikumi, wakapingana mu Dublin bua kujikija amue malu, ne tshipatshila tshia kuya kusombela mu tshimenga tshia Londres kashidi. Pavuaye mu Dublin, bua kuleja mmuenenu wende eu, wakapatula mukanda wa makebulula avuaye muenze mu Bible pa bidi bitangila Yezu Kristo. Mu mukanda wende eu, uvua muleje patoke bijadiki bidi bileja mudi Yezu kayi ku mutu kua Nzambi to. Mukanda eu wakanyingalaja bena mu tshitanda tshia mu Dublin tshivuaye ubuela. Bobu kumufundabu ku tubadi. (An Humble Inquiry Into the Scripture-Account of Jesus Christ).

Bakakuata Emlyn kuyabu nende mu kabadi ka mukalenge mukaji ka mu Dublin mu dia 14/6/1703. Mu dilumbulula diende, Emlyn wakamba ne: “bavua bamfunde bamba mundi mpenda Nzambi bualu  mvua mufunde ne mupatule mukanda uvua ne dilongesha dia ne: Yezu Kristo kavua bukole bumue ne Nzambi Tatu to.” Bavua benze dilumbuluisha dia tshidingijilu. Bualu bamfumu muanda mutekete ba mu Ekeleziya wa mu Irlande bavua basombe ne banzuji bua kumulumbuluisha. Kabavua nansha banyishile Emlyn bua kuakulaye bua kudibingisha to. Richard Levins mumanyi wa mikenji munene wakambila Emlyn ne: “kavua ne dîyi dia kuamba to.” Ku ndekelu kua tshilumbu, nzuji munene wa mu Irlande diende Pyne wakambila balumbuluishi ne: nuenu kanuyi bakose tshilumbu etshi mu mushindu utudi batekemene, pamuapa “bamfumu ba tshitendelelu tshiende” badi muaba eu badi mua kulomba bua banunyoke.

Pavuabu bapishe Emlyn, nzuji mukuabu wakamulomba bua alekele dilongesha adi. Emlyn wakabenga. Bakamulomba tshibawu ne kumukosela tshidimu tshijima tshia buloko. Bu muvuaye kayi mukokeshe bua kufuta bibawu, wakashala mu buloko bidimu bibidi too ne pakalua mulunda wende mukuabu kulomba bamfumu bua bakepeshe bungi bua bibawu abi. Bakalekela Emlyn mu dia 21/7/1705. Lutatu elu luakamusaka bua kuambaye mêyi utudi bakuile kuulu eku a ne: “Mvua muanyishe bua kukengeshibua bua bulelela bumvua muitabe pa bidi bitangila Nzambi ne butumbi buende.”

Emlyn wakaya mu Londres muvuaye muye kudisangisha ne William Whiston mumanyi mukuabu wa malu a mu Bible uvua mupatule tshivuaye wangata bu bulelela bua mu Bible. Whiston uvua unemeka Emlyn bikole umubikila ne: “Muntu wa kumpala uvua muleje patoke buena Kristo bua kale.”

Anu bu William Whiston ne Isaac Newton mumanyi mukuabu uvuabu banemeka, Emlyn wakamona ne: Bible kena ulongesha Busatu bunsantu bu mudibi bileja mu tshimanyinu tshia Athanase to. Wakumvuija ne: ‘Kunyima kua meme mumane kuela meji bikole ne mulonge Mifundu minsantu, ngakangata dipangadika dia kushintulula mmuenenu wanyi bua Busatu bunsantu.’ Wakakomesha wamba ne: “Nzambi Tatuende wa Yezu Kristo ke Muntu umuepele udi ku mutu kua bionso.”

Ntshinyi tshivua tshimusake bua kufika ku nkomenu eu? Uvua mupete mvese ya bungi idi ileja dishilangana didi pankatshi pa Yezu ne Tatuende. Imue ya kudiyi nyoyi eu:

•  Yone 17:3: “Kristo katu muanji kuamba musangu nansha umue ne: yeye ke Nzambi umuepele udibu bakuila mu mvese eu to.” Anu Tatu ke udibu babikila ne: “Nzambi umuepele mulelela.”

•  Yone 5:30: “Muana kena wenza disua diende yeye, kadi udi wenza disua dia Tatu.”

•  Yone 5:26: “Muoyo udi nawu Muana mbamupeshawu kudi Tatu.”

•  Efeso 1:3: “Batu babikila Yezu Kristo ne: Muana wa Nzambi, katutu banji kumvua babikila Tatu ne: Tatu wa Nzambi nansha mudibu bamubikile imue misangu ne: Tatu wa mukalenge wetu Yezu.”

Emlyn mumane kukonkonona bijadiki bionso ebi, wakamba ne dishindika dionso ne: “Kakuena mvese nansha umue mu Mifundu minsantu udi uleja ne: Tatu, Muana ne Nyuma muimpe mmuntu umue anyi ne: mbantu basatu mu muntu umue.”

Bantu ba bungi lelu badi ne buôwa bua kubingisha dilongesha dia mu Bible. Kadi Emlyn uvua ne dikima dia kuakuila bulelela bua mu Bible. Uvua muele lukonko elu: “Bikala muntu kayi uleja patoke malongesha malelela a mushinga adiye mupete mu Mifundu minsantu ne bijadiki biawu, bua tshinyi udi ubala Bible ne ukeba malongesha adimu?” Emlyn udi wimanyina bulelela.

Tshilejilu tshidi Emlyn ne bakuabu bashiye tshidi tshitusaka bua kudikonkonona bua kumanya ni tudi badiakaje bua kubingisha bulelela padibu batupetula. Tuetu petu tudi mua kudiebeja ne: ‘Ntshinyi tshidi ne mushinga, ndumu ne masanka bitudi tupeta mu tshitendelelu anyi peshi tshidi ne mushinga nkubingisha bulelela bua mu Dîyi dia Nzambi?’