Mvua muledibue mu Baku, Azerbaijan, kuetu bavua batulele babidi ne meme mvua muana muibidi. Tatuanyi uvua Mizilman ne mamu uvua muena Yuda. Baledi banyi bavua banangangane ne bavua bitaba dishilangana dia malongesha abu. Mamu uvua wambuluisha tatu pavuaye wenza bijila biabu bia bamizilman (Ramadan) ne tatu uvua wambuluisha mamu pavuaye wenza Pasaka. Ku Nzubu kuetu tuvua ne mukanda wa Koran, wa Torah ne Bible.

Mvua ndimona bu Mizilman. Nansha mumvua ngitaba ne: Nzambi udiku, mvua anu ne nkonko ivua indubakaja. Tshilejilu, mvua ndiebeja ne: ‘Bua tshinyi Nzambi mmufuke bantu? Mbua kipatshila kayi kadiye welela muntu mu iferno wa kapia bua kukengaye kashidi ne tshiendelele?’ Bu muvua bantu bamba ne: bualu buonso budi buenzeka ndisua dia Nzambi, mvua ndiebeja ne: ‘Nzambi udiku ukebela bantu ntatu ne usanka bua kumona mudibu bakenga anyi?’

Pamvua ne bidimu 12, ngakatuadija kuenza masambila atanu atu bamizilman benza dituku dionso atubu babikila ne: namaz. Tshikondo atshi, tatu wakatutuma ne yaya mu tulasa tua bena Yuda. Mu malongesha avuabu batulongeshamu, bavua batulongesha bilele bia Torah ne muakulu wa tshiena Ebelu. Dituku dionso kumpala kua tuetu kutuadija kulonga, tuvua tuenza disambila dipetangana ne bilele bia bena Yuda. Nunku, mu dinda mvua ngenza masambila atanu a namaz kumbelu, ne pavua diba dibanda tuvua tuenza masambila a bena Yuda mu kalasa.

Tshivua anu muanji kupeta mandamuna a nkonko imvua ndiela to. Misangu ne misangu mvua ngebeja balongeshi ba bena Yuda mu tulasa ne: “Bua tshinyi Nzambi uvua mufuke bantu? Mmunyi mudi Nzambi umona tatuanyi uvua mizilman? Tatu uvua muntu muimpe, kadi bua tshinyi badi bamuangata bu muntu udi kayi muakane? Bua tshinyi Nzambi uvua mumufuke?” Mandamuna avuabu bampesha mu nkonko eyi kaavua anu mantuishe to.

Mu 2002, ditabuja dianyi kudi Nzambi diakateketa. Tuetu bamane kumuangala mu Allemagne, lumingu lumue pashishe, tatu wakakuluka mu disama dikole ne kushalaye katshiyi wakula. Munkatshi mua bidimu bia bungi, mvua nsambila bua bena mu dîku dietu bikale ne makanda a mubidi. Bu mumvua mutuishibue ne: Nzambi wa  Bukole Buonso ke udi ne bukole pa muoyo ne lufu, mvua mmusambila dituku dionso bua tatuanyi umvua bimpe. Mvua ngela meji ne: ‘mbualu butekete kudi Nzambi bua kukumbajila muana wa bakaji mukese dijinga diende.’ Mvua mutuishibue ne: neateleje masambila anyi. Kadi tatuanyi wakafua.

Bu mumvua mumone ne: Nzambi kena uditatshisha bua bualu buetu, biakantonda bikole. Meme kutuadija kuela meji ne: ‘Pamuapa mvua nsambila mu mushindu mubi’ anyi ne: ‘Nzambi kenaku to.’ Biakantonda ne meme kulekela kuenza masambila atanu a namaz. Bitendelelu bikuabu kabivua binsankisha to, nunku meme kufika ku nkomenu wa ne: Nzambi kenaku to.

Ngondo isambombo pashishe, Bantemu ba Yehowa bakalua ku nzubu kuetu. Mutuvua katuyi tuela meji bua malu a bena Kristo, meme ne yaya tuvua basue kubaleja ne bukalanga buonso ne: malu avuabu balue kutuambila avua a dishima. Tuetu kubebeja ne: “Bua tshinyi bena Kristo badi basambila Yezu, batendelela nkuruse, Mariya ne mpingu mikuabu pabi Mikenji Dikumi mikale ibenga malu au?” Ku diambuluisha dia Bible, Bantemu ba Yehowa bakatujadikila ne: bena Kristo balelela kabatu batendelela mpingu to, ne badi ne bua kusambila anu Nzambi. Bualu ebu buakankemesha bikole.

Pashishe tuakabebeja ne: “Bua tshinyi badi bitaba Busatu bunsantu? Bikala Yezu n’Nzambi, mmunyi muvuaye mua kulua pa buloba ne kushipibua kudi bantu?” Bantemu bakatuandamuna kabidi ne Bible ne kutumvuijabu ne: Yezu ki Nzambi to, ne kena mumue ne Nzambi nansha kakese. Bakatuleja ne: ke bualu kayi bobu kabatu bitaba Busatu bunsantu to. Biakankemesha ne meme kumona ne: ‘Aba mbena Kristo ba mushindu mukuabu.’

Nansha nanku, mvua kabidi musue kumanya bua tshinyi bantu badi bafua ne bua tshinyi Nzambi mmulekele makenga. Bantemu bakandeja mukanda wa Dimanya didi difikisha ku muoyo wa kashidi, * uvua ne nshapita ivua yandamuna nkonko yanyi. Bakatuadija diakamue kulonga nanyi Bible.

Mu dilonga dionso, mvua mumone ne: Bible uvua wandamuna nkonko yanyi. Mvua mufike ku dimanya ne: Yehowa ke dîna dia Nzambi. (Musambu 83:18) Dinanga ke ngikadilu wende munene. (1 Yone 4:8) Wakafuka bantu bualu uvua musue kuabanyangana nabu dipa dia muoyo. Mvua mufike kudiumvua ne: nansha mudi Nzambi mulekele malu mabi, ki mmuasue to, ne neikale mua kuwumbusha mu katupa kîpi emu bua kashidi. Mvua mulonge ne: buntomboji bua Adama ne Eve mbunyange bantu. (Lomo 5:12) Munkatshi mua bipeta bibi ebi mudi lufu lua bantu bandi munange, bu mudi papa wanyi. Kadi Nzambi neajikije malu mabi aa mu bulongolodi bupiabupia butshilualua muikale bantu bafue mua kubishibua.​—Bienzedi 24:15.

Bible mmuandamune nkonko yanyi. Ngakatuadija kuitabuja kabidi Nzambi. Pangakamanya Bantemu ba Yehowa bimpe menemene, ngakajingulula ne: mbanagangane bikole pa buloba bujima. Buobumue ne dinanga bidi munkatshi muabu bidi binkemesha bikole. (Yone 13:34, 35) Malu amvua mulonge bua Yehowa akansaka bua kumuenzela mudimu, nunku meme kuangata dipangadika dia kulua Ntemu wa Yehowa. Meme kutambula mu dia 8/1/2005.

Malu a mu Bible avua mantuishe akashintulula bikole mushindu wanyi wa kumona muoyo. Mumvuija mimpe amvua mupete mu Dîyi dia Nzambi mmampeshe ditalala dia mu lungenyi. Ndi ne disanka dia bungi ne ndi mukoleshibue bua ditekemena dia kulua kumona tatuanyi upingana kabidi ku muoyo ku diambuluisha dia mulayi wa mu Dîyi dia Nzambi.​—Yone 5:28, 29.

Kukadi bidimu bisambombo bindi mu dibaka dimpe ne bayanyi Jonathan udi pende utshina Nzambi. Tuetu bonso tudi balonge ne: malu malelela a mu Bible adi atangila Nzambi mmapepele bua kumvua ne ntshiuma tshia mushinga mukole. Ke bualu kayi tudi basue kuyisha bantu bakuabu malu atudi tuitabuja ne ditekemena dimpe ditudi nadi. Lelu eu ndi mumanye ne: Bantemu ba Yehowa ki mbena Kristo ba mushindu mukuabu to, kadi mbena Kristo balelela.