Bible udi utumanyisha ne: ku nshikidilu nekuikale dibutuka, udi wamba ne: “Nekuikale dikenga dinene ditu kadiyi dianji kuenzeka katshia bafuka buloba too ne mpindieu. Bu matuku au kaayi makepesha, kakuvua muntu uvua mua kupanda to.” (Matayi 24:21, 22) Kadi Nzambi mmutulaye ne: bantu ba bungi nebapanduke. Bible udi wamba ne: “Buloba budi bupita, kadi muntu udi wenza disua dia Nzambi, udi ushala kashidi.”​—1 Yone 2:17.

Ntshinyi tshiudi ne bua kuenza wewe musue kupanduka ne ‘kushala kashidi’ pikala buloba ebu mua kupita? Udi mua kutuadija kulama mishiki ya bintu peshi kulongolola bimue bintu biudi nabi anyi? Tòo. Bible udi utuambila ne dishindika dionso bua kuenza malu a mushinga mashilangane ne atudi tufume ku ditela aa. Udi wamba ne: “Bu mudi bintu bionso ebi ne bua kuvingutuka mushindu eu, nuelangane meji bua kumanya ne: nudi ne bua kuikala bantu ba mushindu kayi mu bikadilu bia tshijila ne mu bienzedi bia dilamata Nzambi, panudi nuindila ne nulama bimpe mu meji dikalaku dia dituku dia Yehowa.” (2 Petelo 3:10-12) Bilondeshile mvese eu, “Bintu bionso ebi” bidibu ne bua kuvingutula mbakokeshi bonso ba pa buloba bubi ebu ne bantu bonso badi basungula bukokeshi buabu pamutu pa bua Nzambi. Bushuwa, nansha tuetu balame mishiki ya bintu, kayakutusungila ku kabutu aka nansha.

Mu bulelela, bua tuetu kupanduka tudi ne bua kudilambula kudi Yehowa Nzambi ne kumanya bikadilu ne malu adi amusankisha. (Sefanya 2:3) Pamutu pa kulonda tshibungi tshia bantu lelu ne kupua muoyo bimanyinu bidi bileja ne: tudi mu tshikondo tshia pabuatshi, tudi ne bua ‘kulama bimpe mu meji dikalaku dia dituku dia Yehowa.’ Bantemu ba Yehowa badi mua kukuleja mua kupanduka ku dituku dinene didi dilua edi ku diambuluisha dia Bible.