PAVUA William Bedell mulombodi wa tshitendelelu kampanda wa mu Angleterre muye mu Irlande mu 1627, wakasanganamu lutatu lukole. Muena mishonyi kampanda wa mu Angleterre ke uvua ulombola Irlande, ditunga didi ne bena Katolike ba bungi. Balombodi bena Mishonyi bakavua bakudimune Bible mu miakulu ya bungi ya ku Mputu. Kadi muntu nansha umue kavua musue kukudimuna Bible mu tshiena Irlande to.

Bedell kumonaye ne: “kabivua bimpe bua kulekela bena mu Irlande too ne palongabu Anglais to.” Ke kutuadijaye kukudimuna Bible mu tshiena Irlande. Kadi wakatuilangana ne buluishi bua bungi bufumina nangananga kudi bena Mishonyi. Bua tshinyi bivua bienzeke nanku?

Bedell wakaditua mu dilonga tshiena Irlande yeye nkayende. Pakaluaye mulombodi wa tshilongelu tshia Trinity College mu Dublin ne kuluaye kabidi mpasata wa mu Kilmore, Bedell wakalomba balongi bua bikale bakula mu tshiena Irlande. Bualu bukuabu mbua ne: pavua mukalenge mukaji Elizabeth I wa mu Angleterre muase tshilongelu tshia Trinity College uvua musue bua tshipatule balongeshi bavua mua kulongesha bantu bende Bible mu muakulu wabu wa ku dibele. Bedell wakadienzeja bua bualu ebu bukumbane.

Mu dioseze dia mu Kilmore, bantu ba bungi bavua bakula tshiena Irlande. Nunku Bedell wakaditatshisha bua kupeta balongeshi bavua bakula tshiena Irlande. Wakenza nanku bilondeshile lungenyi ludi mu mêyi a mupostolo Paulo adi mu 1 Kolinto 14:19 a ne: “Mu tshisumbu ndi mua kujinga kuakula nansha miaku itanu ne lungenyi luanyi bua ndongeshe bakuabu ne mêyi a mukana pamutu pa kuakula miaku 10 000 mu muakulu mukuabu,” mmumue ne: mu muakulu udibu bumvua kakese.

Kadi bamfumu bavua ku mutu bakenza muabu muonso bua kumukandika. Bilondeshile bamanyi ba malu a kale, bamue bantu bavua bamba ne: tshiena Irlande tshivua tshikebela “mbulamatadi njiwu,” bakuabu ne: “katshivua mua kuambuluisha mbulamatadi to.” Banga bavua bela meji ne: bavua bajimija tshiena Irlande bua diakalenge dia Angleterre. Bua bualu ebu, mikenji ivua ilomba bua bena Irlande balekele muakulu ne bilele biabu bua kulonga Anglais ne kulonda bilele bia bena mu Angleterre.

Bedell kavua utshina benzejanganyi ba malu aba to. Ku ntuadijilu kua 1630, wakaditua mu dikudimuna Bible wa Anglais wa ndekelu uvuaku (King James Version wa mu 1611), umukudimuna mu tshiena Irlande. Uvua musue kupatula nkudimuinu wa Bible uvua bantu ba bungi mua kumvua bipepele. Bivua bimutonde bikole bualu bapele kabavua ne mushindu wa kuenza makebulula mu Bible bua kupeta njila wa muoyo wa tshiendelele to, bualu kabavua ne mushindu wa kupeta Bible to.​—Yone 17:3.

Bedell kavua muntu wa kumpala ku dimona lutatu elu to. Bidimu 30 kumpala, mpasata mukuabu  diende William Daniel, uvua mumone muvuabi bikolele bantu bonso bua kulonga malu adi Bible ulongesha “mu muakulu uvuabu kabayi bamanye.” Daniel ukavua mukudimune Mifundu ya tshiena Greke ya bena Kristo mu tshiena Irlande. Ke Bedell kudituaye pende mu dikudimuna Mifundu ya tshiena Ebelu. Nkudimuinu eu bakamubikila ne: Bible wa Bedell kusangisha ne tshitupa tshikavua William Daniel mukudimune. Bu muvua mudimu eu muende bimpe, Bible wa Bedell tuambe ne: Bible mujima wa kumpala mu tshiena Irlande, ke nkudimuinu umuepele wa Bible uvuaku mu tshiena Irlande bua bidimu 300 bivua bilonda.

Bedell mulongeshi uvua mupiluke mu muakulu wa tshiena Ebelu wakangata bena Irlande babidi bua bamuambuluishe bua kukudimuna Bible wa Anglais mu tshiena Irlande. Pakayabu kule ne mudimu wabu, Bedell ne muntu umue anyi babidi bavua bamuambuluisha, bakatangilula ne dîsu ditonona mvese yonso. Bua kumanya ni bavua bakudimune bimpe, bavua bangate nkudimuinu wa tshiena Italie uvuabu benze kudi Giovanni Diodati mumanyi wa malu a theologi wa mu Suisse, kuangatabu kabidi Bible wa Septante mu tshiena Greke ne maniskri a Bible mimpe a mu tshiena Ebelu a kale.

Kasumbu ka bakudimunyi kakalonda buludiki bua King James Version (nkundimuinu ivua Bedell mua kuikala mumanye bimpe) ne kubuejabu dîna dia Nzambi miaba ya bungi mu Bible wabu. Tshilejilu mu Ekesode 6:3 bavua bapingajamu dîna dia Nzambi nunku: “lehovah.” Maniskri a Bedell a ku ntuadijilu mmalama mu tshilaminu tshia mikanda tshia Marsh mu Dublin mu ditunga dia Irlande.​—Tangila kazubu ka ne: “Bakavuluka Bedell ne bakamuitaba.”

Bedell wakajikija mudimu wende bu mu 1640. Kadi kavua mua kumupatule diakamue to. Bua tshinyi? Bualu utshivua anu ne buluishi bukole. Baluishi bakanyangila mukudimunyi uvua mulombole mudimu  wa dikudimuna wa Bedell lumu, ne lungenyi lua kupepejija mudimu wende. Kufikabu too ne ku dimuelesha mu buloko. Kabavua bashikidile anu apu to, bakakuma Bedell bikole bamba kumushipa, kumubandabu mu bilumbu bia bantu bavua baluisha muakulu wa Anglais, bivua bijike mu 1641. Bena Irlande bakakuba Bedell bua tshikondo kampanda nansha muvuaye wa mu Angleterre, bualu bavua bamone muvuaye uditatshisha bua bualu buabu. Nansha nanku, ndekelu wa bionso basalayi bavua bantomboji bakamuela mu buloko, kumutekabu miaba mibi mitambe. Kakuyi mpata, bualu ebu buakamufikisha ku lufu mu 1642. Kavua mumone muvuabu bapatule mudimu wende to.

Mudimu wa Bedell wakanyanguka wonso pavuabu banyangakaje nzubu wende. Diakalenga, mulunda wende wa pa muoyo wakangulula mikanda yonso ikavuaye mukudimune. Mu bungi bua matuku, Narcissus Marsh wakalua pastere munene mu Armagh ne muakuidi mu tshitanda tshia mu Irlande, wakapeta mikanda yende ya kale. Bobert Boyle mumanyi wa malu a sianse wakamuambuluisha ne makuta yeye kupatula ne dikima dionso Bible wa Bedell mu 1685.

Ki mbantu bonso bavua banyishe Bible wa Bedell to. Uvua mudimu mukese wa mushinga uvua muambuluishe bua kupeta Bible udi umvuika bimpe nangananga bua bena mu Irlande, mu Écosse ne miaba mikuabu. Mpindieu badi mua kudikumbajila majinga abu a mu nyuma bualu badi babala Dîyi dia Nzambi mu muakulu wabu wa ku dibele.​—Matayi 5:3, 6.

Bible wa Bedell mmutungunuke ne kuambuluisha banangi ba bulelela bua kuenzabu tshidi tshimpe too ne mu matuku etu aa. Muntu mukuabu uvua wakula tshiena Irlande, uvua mulonge tshidi Bible ulongesha menemene matuku mashale aa, udi wamba ne: “Patudi tubala Bible wa Bedell, tudi tumvua mêyi a mu Bible mu muakulu wetu. Etshi ke lusapi ludi lungunzuluile meme ne bena mu dîku dianyi mpunga wa kulonga bulelela bua mushinga budi mu Mifundu.”