Hoshea 6:1-11
6 “Luayi tupinganayi kudi Yehowa,Bualu yeye mmutusunsule,+ kadi neatuondope.
Yeye wakatukuma, kadi neasuike mputa yetu.
2 Neatupeshilule muoyo panyima pa matuku abidi.
Dituku disatu neatujule,Ne netuikale ne muoyo kumpala kuende.
3 Netumanye, netukebe bua kumanya Yehowa ne muoyo mujima.
Dipatuka diende ndijadikibue anu bu kutshia kua butuku;Yeye nealue kutudi bu mvula witshikila,Bu mvula wa ndekelu udi utalaja buloba bikole.”
4 “Nenkuenzele tshinyi, wewe Efelayima?
Nenkuenzele tshinyi, wewe Yuda?
Bualu dinanga dienu dia lulamatu didi bu matutu a mu dinda,Bu lumuma ludi lujimina lukasa.
5 Ke bualu kayi nembatape ku diambuluisha dia baprofete;+Nembashipe ne mêyi a mukana muanyi.+
Ne mêyi andi nkulumbuluisha nawu neakenke bu butoke.+
6 Bualu ndi nsanka bua dinanga dia lulamatu,* ki mbua mulambu nansha,Ne ndi nsanka bua dimanya dia Nzambi pamutu pa milambu ya kuosha mijima.+
7 Kadi bobu mbashipe tshipungidi+ bu bantu betu ba patupu aba.
Mbangele mâyi ku makasa mu bualu ebu.
8 Gilada ntshimenga tshia benji ba malu mabi,+Tshibuikila kudi bifundu bia makasa bia mashi.+
9 Tshisumbu tshia bakuidi tshidi anu bu bisumbu bia benzavi badi baalamina bua kukuata muntu.
Badi bashipangana mu njila pabuipi ne Shekeme,+Bualu tshikadilu tshiabu ntshia bundu.
10 Ndi mumone bualu bubi butambe mu nzubu wa Isalele.
Muomu amu Efelayima udi wendelamu bundumba;+Isalele mmudinyange.+
11 Kabidi, wewe Yuda, mbakutekele tshikondo tshia dipuola dia bintu,Pandi mpingaja bakuatshibue ba mu bantu banyi.”+
Note
^ Anyi “bua luse.”
