Nahuma 3:1-19
3 Diakabi dikale kudi tshimenga tshidi tshiela mashi panshi!
Yeye mmuwule tente menemene ne dishima ne buivi.
Katu upangila tshintu tshia kudia nansha!
2 Kudi muadi wa mfimbu ne mutoyi wa nkata,Kabalu kadi kadiela lubilu ne ditempu didi ditondoka.
3 Mubandi wa pa kabalu, muele wa mvita udi utua nsese, ne difuma didi dibalakana,Bantu bashipa bungi tshianana ne mishiki ya bitalu,Kakuena ndekelu wa bitalu.
Badi batungunuka ne kutondoka ku bitalu.
4 Bidi bienzeka nunku bua bungi bua bienzedi bia bundumba bia mukaji wa ndumba,Yeye udi muimpe kumona ne mulengele, mamu wa malu a mupongo,Udi uteya bisamba ku bundumba buende ne mêku ku malu ende a mupongo.
5 “Mona! Ndi nebe* tshilumbu,” ke mudi Yehowa wa biluilu wamba,+“Nengambulule muntumpu webe kukubuikila ku mêsu;Nendeje bisamba butaka buebe,Ne makalenge bundu buebe.
6 Nenkuele bukoya pambidiNe nenkuvuije tshintu tshia kupetula;Nenkuvuije tshintu tshia kukatshila.+
7 Muntu yonso udi ukumona neakunyeme,+ wamba ne:‘Niniwe mmubutudibue!
Nnganyi waditeka pa muaba wende?’
Nenkupetele bakusambi penyi?
8 Wewe udi mupite No-amona*+ udi musombe kumpenga kua minkoloji ya musulu wa Nile anyi?+
Mâyi avua mamunyunguluke;Bubanji buende buvua mbuu ne tshimanu tshiende tshivua mbuu.
9 Etshiopi ke uvua mpokolo wende wa bukole budi kabuyi ne mikalu, ne Ejipitu kabidi.
Puta+ ne bena Libi ke bavua bambuluishi bebe.+
10 Kadi nansha nanku yeye wakakuatshibua ku babende;+Yeye wakabuela mu bupika.
Bana bende pabu bakatayishibua mu disangu dionso dia njila.*
Bakelela bantu bende ba bunême nshobo,Ne bantu bende banene bonso bavua basuikibue nkanu.
11 Wewe kabidi neukuatshike;+Neuye kusokoma.
Neukebe muaba wa kunyemena muena lukuna.
12 Miaba yebe mikolesha yonso idi bu mitshi ya mfigi idi ne tumuma tudi tubobe kumpala;Padibu batunyukula, tudi tumatshila mukana mua batudi.
13 Mona! Basalayi bebe badi bu bantu bakaji munkatshi muebe.
Biibi bia ditunga diebe nebikale biunzuluila bena lukuna bebe bikole.
Kapia nekoshe milonda ya biibi biebe.
14 Suna mâyi bua ditshintshimika!+
Kolesha miaba yebe mikolesha.
Buela mu bitotshi ne diata diima;Kuata mushete wa madioto.
15 Nansha kuoku aku kapia nekakoshe.
Muele wa mvita newukutape.+
Newukudie bu mutu bana ba mpasu badia.+
Divudija anu bu bana ba mpasu!
Eyowa, divudija anu bu mpasu!
16 Udi muvudije bangenda mushinga bebe kupita mitoto ya mu diulu.
Muana wa mpasu udi udiuvulula ne udi ubuuka.
17 Balami bebe badi bu mpasu,Ne banene bebe ba basalayi badi bu tshisumbu tshia mpasu.
Idi itudila mu bikumbi bia mabue dituku dia mashika,Kadi padi munya utema, idi ibuuka;Ne kakuena muntu udi mumanye kudiyi.
18 Balami bebe badi babungila ne tulu, wewe mukalenge wa Ashû;Bantu bebe banene badi bashala mu miaba yabu ya kusombela.
Bantu bebe mbatangalaja pa mikuna,Ne muntu nansha umue kena ubasangisha kaba kamue.+
19 Kakuena disulakana bua dikenga diebe to.
Mputa webe kena mua kuondopibua nansha.
Bonso badi bumvua lumu lua bualu buebe nebatute bianza biabu;+Bualu nnganyi udi kayi mukenge bua tshikisu tshiebe tshidi katshiyi tshijika?”+
