Yehezekele 22:1-31
22 Dîyi dia Yehowa diakalua kabidi kundi, diamba ne:
2 “Kadi wewe, muana wa muntu, udiku mudilongolole bua kulumbuluisha* tshimenga tshidi ne tshibawu tshia mashi+ ne kutshileja malu mabi atshi onso+ anyi?
3 Udi ne bua kuamba ne: ‘Mona tshidi Mukalenge Mutambe Bunene Yehowa wamba: “Wewe tshimenga tshidi tshiela mashi panshi+ munda muatshi, tshidi dîba diatshi difike,+ tshidi tshienza mpingu ya muendi* bua kudinyanga,+
4 diela diebe dia mashi panshi ndikupishe,+ ne mpingu yebe ya muendi mmikuvuije mukoya.+ Udi musemeje nshikidilu wa matuku ebe pabuipi ne lukasa, ne nshikidilu wa bidimu biebe mmufike. Ke bualu kayi nenkuvuije tshintu tshia kupendabu kudi bisamba ne tshintu tshia kusekabu kudi matunga onso.+
5 Matunga adi pabuipi nebe ne adi kule nebe neakuseke,+ wewe muena dîna dia bukoya ne udi muwule tente ne kayumbayumba.
6 Mona! Mfumu yonso wa ku bamfumu ba Isalele udi munkatshi muebe udi wenza mudimu ne bukokeshi buende bua kuela mashi panshi.+
7 Munda muebe, badi benzela tatuabu ne mamuabu malu ne kapeja.+ Badi bashimakaja muntu udi musombe buenyi bua kumudia bintu, ne badi bakengesha muana udi kayi ne tatuende* ne mukaji mukamba.”’”+
8 “‘Wewe udi upetula miaba yanyi ya tshijila, ne udi unyanga nsabatu yanyi.+
9 Munda muebe mudi bashiminyinyanganyi ba malu badi bakeba bua kuela mashi panshi.+ Munda muebe, badi badiila milambu pa mikuna ne badifila mu tshikadilu tshia bundu munkatshi muebe.+
10 Munda muebe, badi banyanga bulalu bua tatuabu,*+ ne badi balala ne mukaji udi ne bukoya bua tshijila tshia mashi ku bukole.+
11 Munda muebe muntu udi wenza bualu bubi ne mukaji wa mukuende,+ mukuabu udi unyanga mukaji wa muanende ne tshikadilu tshia bundu,+ ne munga udi ulala ne muanabu wa bakaji, muana wa tatuende mene, ku bukole.+
12 Munda muebe badi bangata nkosa mishiku bua kuela mashi panshi.+ Wewe udi usombeshangana bintu bua kupeta tshia kasombela+ anyi bua kupeta makasa,* ne udi unyenga bakuebe makuta ku bukole.+ Eyowa, udi mumpue muoyo menemene,’ ke mudi Mukalenge Mutambe Bunene Yehowa wamba.
13 “‘Mona! Ndi ntuta bianza bianyi ne muengu bua bintu biudi mupetele ku mashimi ne bua bienzedi bia diela mashi panshi bidi munkatshi muebe.
14 Dikima diebe neditungunuke,* ne bianza biebe nebishale bikole mu matuku angakuenzela bualu anyi?+ Meme Yehowa ke udi muakule, ne nengenze bualu.
15 Nenkutangalaje munkatshi mua bisamba ne nenkumuangalaje munkatshi mua matunga,+ ne nentuishe bukoya buebe ku ndekelu.+
16 Nunku wewe neufuishibue bundu kumpala kua bisamba, ne neufike ku dimanya ne: meme ndi Yehowa.’”+
17 Dîyi dia Yehowa diakalua kabidi kundi, diamba ne:
18 “Muana wa muntu, nzubu wa Isalele mmulue kundi bu manyanu a tshiamu a patupu. Buonso buabu badi tshiamu tshia mitaku, tshiamu tshia eten, tshiamu tshifiike, ne tshiamu tshia plomb mu tshikutu tshia kapia. Bobu mbalue manyanu a tshiamu tshia arjan.+
19 “Nunku monayi tshidi Mukalenge Mutambe Bunene Yehowa wamba: ‘Bu munudi nuenu bonso balue bu manyanu a tshiamu a patupu,+ ndi nnusangisha pamue munda mua Yelushalema.
20 Anu bu mudibu basangisha tshiamu tshia arjan, tshiamu tshia mitaku, tshiamu tshifiike, tshiamu tshia plomb, ne tshiamu tshia eten munda mua tshikutu tshia kapia bua kubipepula kapia ne kubiengulula, ke munganusangisha pamue mu tshiji tshianyi ne mu tshiji tshianyi tshikole, ne nennupepuile ne nennuengulule.+
21 Nennusangishe pamue, nempepule kapia ka tshiji tshianyi tshikole pambidi penu,+ ne nenuenguluke munda muende.+
22 Anu bu mudibu bengulula tshiamu tshia arjan mu tshikutu tshia kapia, ke muanuengululabu munda muende; nunku nenufike ku dimanya ne: meme Yehowa ngudi munuitshikijile tshiji tshianyi tshikole.’”
23 Dîyi dia Yehowa diakalua kabidi kundi, diamba ne:
24 “Muana wa muntu, muambila ne: ‘Wewe udi buloba buikalabu kabayi mua kukezula anyi kabuyi mua kulokela mvula mu dituku dia tshiji tshikole.
25 Baprofete bende mbelelangane tshifufu munda muende,+ bu ntambue udi ukungula padiye usunsulula nyama.+ Badi badia bantu.* Badi banyengangana biuma ne bintu bia mushinga. Mbavuije bakaji ba bungi bakamba munda muende.
26 Bakuidi bende mbashipe mukenji wanyi,+ ne badi batungunuka ne kunyanga miaba yanyi ya tshijila.+ Kabena batapulula tshintu tshia tshijila ne tshintu tshia tshianana,+ ne badi bapangila bua kuleja bantu tshintu tshidi katshiyi tshikezuke ne tshintu tshidi tshikezuke,+ badi babenga bua kunemeka nsabatu yanyi, ne meme ndi mupetudibue munkatshi muabu.
27 Bakokeshi bende badi munkatshi muende badi bu mbua ya ditu idi isunsulula nyama; badi bela mashi panshi ne bashipa bantu* bua kupetela bintu ku mashimi.+
28 Kadi baprofete bende mbashinguile lupemba pa bienzedi biabu. Badi bamona bikena kumona bia dishima ne babuka malu a mafi,+ ne badi bamba ne: “Monayi tshidi Mukalenge Mutambe Bunene Yehowa wamba,” padi Yehowa muine kayi muakule.
29 Bantu ba mu ditunga mbadiangane bintu ne mashimi, mbanyengangane bintu ku bukole,+ mbakengeshe bakengi ne bapele, ne mbashimakaje muntu udi musombe buenyi bua kumudia bintu ne mbanyange tshilumbu tshiende.’
30 “‘Mvua nkeba muntu munkatshi muabu uvua mua kulongolola tshimanu tshia mabue anyi kuimana kumpala kuanyi muaba udi mupandike bua bualu bua buloba ebu, bua kabubutudibu,+ kadi tshiakapeta muntu nansha umue.
31 Nunku nembitshikijile tshiji tshianyi ne nembabutule ne kapia ka tshiji tshianyi tshikole. Nembatumine bipeta bia njila wabu pa mutu wabu bobu,’ ke mudi Mukalenge Mutambe Bunene Yehowa wamba.”
Note
^ Ku mua.: “neulumbuluishe, neulumbuluishe.”
^ Tshiambilu tshia mu tshiena Ebelu etshi tshidi mua kuikala tshipetangana ne muaku “tumvi tua nyama” ne mbenze natshi mudimu bua kuleja kapeja.
^ Anyi “muana wa nshiya.”
^ Ku mua.: “badi bela butaka bua tatuabu patoke.”
^ Anyi “kuangata makasa mapite bungi.”
^ Ku mua.: “Muoyo webe newutungunuke.”
^ Anyi “anyima.”
^ Anyi “anyima.”
