Yehezekele 24:1-27
24 Dîyi dia Yehowa diakalua kabidi kundi mu tshidimu tshia tshitema, mu ngondo wa dikumi, mu dituku dia dikumi dia ngondo diamba ne:
2 “Muana wa muntu, funda dituku edi,* dituku edi mene. Mukalenge wa Babilona mmutuadije kuluisha Yelushalema mu dituku edi mene.+
3 Ela lusumuinu lua* bualu bua nzubu wa bantomboji, amba bua bualu buabu ne:
“‘Mona tshidi Mukalenge Mutambe Bunene Yehowa wamba:
“Teka luesu* peku; luteka pa kapia ne elamu mâyi.+
4 Elamu mabulu a munyinyi,+ dibulu dimpe dionso,Tshibelu ne diboko; luwuja ne mifuba mitambe buimpe.
5 Angata mukoko mutambe buimpe wa mu tshisumbu tshia mikoko,+ ne longa nkunyi muinshi mua luesu muonso.
Sabisha mabulu a munyinyi ne lamba mifuba munda mualu.”’
6 “Nunku mona tshidi Mukalenge Mutambe Bunene Yehowa wamba:
‘Diakabi dikale kudi tshimenga tshidi tshiela mashi panshi,+ luesu lua dimoma, ludibu kabayi bumbushe dimoma dialu!
Sabula dibulu ku dibulu;+ kuedi nshobo bua bualu buawu to.
7 Bualu mashi atshi adi munda muatshi;+ yeye wakaapongoluela pa dibue didi patupu.
Kavua muapongolole mu buloba bua kuajibikila ne lupuishi+ to.
8 Bua kusonsola tshiji tshikole bua kumona mua kusombuela,Ndi muteke mashi ende pa dibue didi patupu didi dibalakanaBua kabamonyi mua kuajibikila.’+
9 “Nunku mona tshidi Mukalenge Mutambe Bunene Yehowa wamba:
‘Diakabi dikale kudi tshimenga tshidi tshiela mashi panshi!+
Nenkunguije mushiki mule wa nkunyi.
10 Longa mushiki wa nkunyi ne temesha kapia,Sabisha munyinyi bikole, pongolola nsupu, mifuba ishile.
11 Teka luesu ludi munda mutupu pa makala a kapia bua lupieBua tshiamu tshialu tshia mitaku tshikunze ne kapia.
Bukoya bualu nebuenguluke munda mualu,+ ne dimoma dialu nediumbuke.
12 Ludi lutondeshangana ne lutshiokeshangana,Bualu mupimbu wa dimoma kawakumbuka to.+
Luela mu kapia ne dimoma dialu!’
13 “‘Bukoya buebe buvua bukebesha kudi tshikadilu tshiebe tshia bundu.+ Mvua mutete bua kukukezula, kadi kuvua mua kulua mukezuke ku bukoya buebe to. Kuakulua mukezuke too ne padi tshiji tshikole tshindi mukukuatshile tshituya.+
14 Meme Yehowa ke udi muakule. Nebienzeke. Nengenze bualu tshiyi ndikanda, tshiyi ngumvua bibi, tshiyi nyingalala to.+ Nebakulumbuluishe bilondeshile njila yebe ne bienzedi biebe,’ ke mudi Mukalenge Mutambe Bunene Yehowa wamba.”
15 Dîyi dia Yehowa diakalua kabidi kundi, diamba ne:
16 “Muana wa muntu, ku tshitutshidi tshimue, nkadi pa kumbusha munanga webe kuudi.+ Kuena ne bua kudila;* anyi kuasa muadi peshi kupuekesha binsonji to.
17 Tuaku mikemu munda munda, kuenji mikiya ya madilu bua udi mufue.+ Suika tshilamba tshiebe ku mutu,+ vuala sandala yebe.+ Kuena ne bua kubuikila muedi wa pa mushiku,*+ ne kudi biakudia bikutuadila kudi bantu bakuabu.”*+
18 Ngakakula ne bantu mu dinda, ne dilolo mukajanyi wakafua. Nunku mu dinda ngakenza anu muvuabu bangambile bua kuenza.
19 Bantu bavua bangambila ne: “Kuena utuambila mudi malu audi wenza aa atutangila anyi?”
20 Ngakabandamuna ne: “Dîyi dia Yehowa ndilue kundi diamba ne:
21 ‘Ambila ba mu nzubu wa Isalele ne: “Monayi tshidi Mukalenge Mutambe Bunene Yehowa wamba: ‘Nkadi pa kunyanga muaba wanyi munsantu,+ muaba unudi nuditambisha nawu bikole, tshintu tshinudi basue, dijinga dia muoyo wenu.* Bana benu ba balume ne ba bakaji banudi bashiye panyima nebakuluke ku muele wa mvita.+
22 Dîba adi nenuikale ne bua kuenza bu mundi muenze. Kanuakubuikila muedi wenu wa pa mushiku, ne kanuakudia biakudia binutuadila kudi bantu bakuabu+ to.
23 Bilamba bienu bia kujingila ku mutu nebikale ku mitu yenu, ne sandala yenu neyikale ku makasa enu. Kanuakudila anyi kuasa muadi to. Kadi nenubolele mu bilema bienu,+ ne nenutuilangane mikemu umue ne mukuabu.
24 Yehezekele mmulue tshimanyinu kunudi.+ Anu mudiye muenze, ke munuenza penu. Padi bualu ebu buenzeka, nenufike ku dimanya ne: meme ndi Mukalenge Mutambe Bunene Yehowa.’”’”
25 “Kadi wewe, muana wa muntu, mu dituku dindi ngumbusha kudibu muaba wabu mukolesha, tshintu tshilengele tshia disanka diabu, tshintu tshidibu basue, dijinga dia muoyo* wabu, pamue ne bana babu ba balume ne bana babu ba bakaji,+
26 nebakuambile lumu elu kudi muntu udi mupanduke.+
27 Mu dituku adi neukangule mukana muebe, newakule ne muntu udi mupanduke ne kuakuikala kabidi kamama to.+ Neulue tshimanyinu kudibu ne bobu nebafike ku dimanya ne: meme ndi Yehowa.”
Note
^ Ku mua.: “dîna dia dituku edi.”
^ Anyi “Fila mufuanu wa.”
^ Anyi “luesu lunene lua kulambila.”
^ Anyi “kudikuma pa tshiadi.”
^ Anyi “mushiku wa muulu.”
^ Ku mua.: “diampa dia bantu.”
^ Anyi “luse lua anyima wenu.”
^ Anyi “anyima.”
