Yehezekele 26:1-21
26 Mu tshidimu tshia 11, mu dituku dia kumpala dia ngondo, dîyi dia Yehowa diakalua kundi, diamba ne:
2 “Muana wa muntu, bu mudi Tulo muakule bibi bua Yelushalema wamba+ ne: ‘Woloo! Tshibuelelu tshia bukua bantu ntshiupula!+ Bintu bionso nebilue kundi, ne mpindieu udibu bamubutule, meme nendue mubanji’;
3 nunku mona tshidi Mukalenge Mutambe Bunene Yehowa wamba: ‘Mona ndi nebe tshilumbu, wewe Tulo, nembandishe bisamba bia bungi kuudi bua kukuluisha anu bu mutu mbuu ubandisha mavuala ende.
4 Nebibutule bimanu bia Tulo, nebiupule bibumba biende,+ ne nenkone buloba, nemmuvuije dibue didi patupu didi diengelela.
5 Nealue muaba wa kuanyikila makondo munkatshi mua mbuu.’+
“‘Bualu meme ke udi muakule,’ ke mudi Mukalenge Mutambe Bunene Yehowa wamba, ‘ne yeye nealue tshintu tshia kupawula bua bisamba.
6 Nebashipe misoko yende idi* pa mpenga ku muele wa mvita, nunku bantu nebafike ku dimanya ne: meme ndi Yehowa.’
7 “Mona tshidi Mukalenge Mutambe Bunene Yehowa wamba: ‘Mona, ndi ntuma Nebukadenesâ* mukalenge wa Babilona bua kuluisha Tulo ufuma ku nord;+ yeye udi mukalenge wa bakalenge,+ muikale ne tubalu,+ matempu a mvita,+ basalayi babande pa tubalu, ne tshiluilu tshia basalayi ba bungi.*
8 Yeye neabutule misoko yebe idi pa mpenga ku muele wa mvita, ne nease tshimanu bua kukutshintshimika natshi, neajule tshibumba tshikole bua kukutshintshimika natshi ne neele ngabu munene muulu bua kukuluisha.
9 Neakume bimanu biebe ne mutshi wende wa kupula nawu bimanu,* ne neupule bibumba biebe ne tusuyi tuende.*
10 Bua bungi bua tubalu tuende, lupuishi luatu nelukubuikile, ne mutoyi wa basalayi badi babande pa tubalu, wa nkata ne wa matempu a mvita newuzakeje bimanu biebe padiye ubuela ku bibuelelu biebe bu bantu babuela lubilu mu tshimenga tshidi ne bimanu biupuke.
11 Bikono bia tubalu tuende nebidiatakaje misesu yebe yonso;+ yeye neashipe bantu bebe ku muele wa mvita, ne makunji ebe makole neadikume panshi.
12 Nebakunyenge biuma biebe, nebapawule bintu biebe bia kupanyisha,+ nebupule bimanu biebe, ne nebabumbule nzubu yebe mimpe; pashishe nebele mabue ebe, mabaya ebe ne buloba buebe mu mâyi.’
13 “‘Nentuishe mutoyi wa misambu yebe ku ndekelu, ne tshiona tshia nzenze yebe katshiakumvuika kabidi nansha.+
14 Nenkuvuije dibue didi patupu didi diengelela, ne neulue muaba wa kuanyikila makondo.+ Kabakukuibakulula nansha, bualu meme Yehowa ke udi muakule,’ ke mudi Mukalenge Mutambe Bunene Yehowa wamba.
15 “Mona tshidi Mukalenge Mutambe Bunene Yehowa wambila Tulo: ‘Ku tshiona tshia dikuluka diebe, padi badi bafua* batua mikemu, padi dishipangana dienzeka munkatshi muebe, bidiila* kabiakukanka+ anyi?
16 Bakokeshi* bonso ba mbuu nebatuluke mu nkuasa yabu ya bukalenge, nebavule mizabi yabu,* nebakopole bilamba biabu bilengeja ne manda, ne lukanku nelubakuate.* Nebasombe panshi bakanka anu kukanka ne nebashale bakutangile bakatshila.+
17 Nebakuelele kasala ka muadi,*+ ne nebakuambile ne:
“Mona muudi mujimine,+ wewe uvuabu basombele kudi bantu ba pa mbuu, tshimenga tshivuabu batumbisha;Wewe ne bantu bebe* bavua basombele munda muebe nuvua ne bukole pa mbuu,+Nuzakeja bantu bonso bavua basombele mu buloba!
18 Bidiila* nebikanke mu dituku dia dikuluka diebe,Bidiila* bia mu mbuu nebipampakane paudi ujimina.”’+
19 “Bualu mona tshidi Mukalenge Mutambe Bunene Yehowa wamba: ‘Pandi nkubutula bu bimenga bidi bantu kabayi basombele, pandi nkubuikidija ne mâyi a mavuala makole, ne mâyi a bukole makubuikile,+
20 nenkupuekeshe wewe ne badi bapueka nebe mu dijimba,* kudi bantu ba kale; nengenze bua usombe muaba wa muinshi menemene, bu miaba ya kale idi mibutula, pamue ne bantu badi bapueka mu dijimba,+ bua bantu kabamonyi mua kusombela munda muebe. Pashishe nentumbishe* buloba bua badi ne muoyo.
21 “‘Nenkutumine buôwa bukole bua mu tshimpitshimpi, ne kuakuikalaku kabidi to.+ Nebakukebe, kadi kabakukupeta kabidi nansha,’ ke mudi Mukalenge Mutambe Bunene Yehowa wamba.”
Note
^ Ku mua.: “bana bende ba bakaji badi.”
^ Ku mua.: “bukua bantu.”
^ Ku mua.: “Nebukadelesâ,” mfundilu mukuabu wa dîna edi.
^ Anyi “mashinyi ende a mvita.”
^ Anyi “miele yende ya mvita.”
^ Anyi “bisanga.”
^ Ku mua.: “badi bashipibue.”
^ Anyi “bamfumu.”
^ Anyi “tuzaku tuabu tua katuyi maboko.”
^ Ku mua.: “nebavuale luzakalu.”
^ Ku mua.: “Yeye ne bantu bende.”
^ Anyi “musambu wa madilu.”
^ Anyi “Bisanga.”
^ Anyi “Bisanga.”
^ Anyi “lukita.”
^ Anyi “nendengeje.”
