Yelemiya 22:1-30
22 Mona tshidi Yehowa wamba: “Pueka ku nzubu* wa mukalenge wa Yuda, wambe mukenji eu.
2 Udi ne bua kuamba ne: ‘Umvua dîyi dia Yehowa, wewe mukalenge wa Yuda udi musombe mu nkuasa wa bukalenge wa Davidi, wewe ne bena mudimu bebe ne bantu bebe badi babuelela ku biibi ebi.
3 Mona tshidi Yehowa wamba: “Imanyinayi kulumbuluisha kuakane ne buakane. Sungilayi muntu udibu biba ku tshianza tshia muntu udi udiangana bintu ku mashimi. Kanukengeshi muntu udi musombe buenyi, ne kanuenzedi muana udi kayi ne tatuende* anyi mukaji mukamba bibi.+ Kanuedi mashi adi kaayi ne bualu panshi muaba eu to.+
4 Bualu nuenu batabalele bua kutumikila dîyi edi, nunku bakalenge badi basomba mu nkuasa wa bukalenge wa Davidi+ nebabuelele ku biibi bia nzubu eu, babande mu matempu ne pa tubalu, bobu ne bena mudimu babu ne bantu babu.”’+
5 “‘Kadi nuenu kanuyi batumikile mêyi aa, ndi nditshipa mu dîna dianyi nkayanyi ne: nzubu eu nealue muaba mubutula,’+ ke mudi Yehowa wamba.
6 “Bualu, mona tshidi Yehowa wamba bua nzubu wa mukalenge wa Yuda,‘Wewe udi kundi bu Gilada,Bu lusongo lua Lebanona.
Kadi nenkuvuije tshipela;Bantu kabakusombela mu tshimenga tshiebe nansha tshimue.+
7 Nenteke* babutudi bua kukubutula,Yonso wa kudibu ne bia mvita biende.+
Nebakose mitshi yebe ya sedre mitambe buimpeNe nebayikulule mu kapia.+
8 “‘Bisamba bia bungi nebipitshile pabuipi ne tshimenga etshi ne nebikonkangane ne: “Bua tshinyi Yehowa uvua muenzele tshimenga tshinene etshi nunku?”+
9 Nebandamune ne: “Bualu bavua balekele tshipungidi tshia Yehowa Nzambi wabu, binamine nzambi mikuabu ne bayenzele mudimu.”’+
10 Kanudidi muntu udi mufue,Ne kanumumvuidi luse to.
Kadi, dilayi bikole bua muntu udi uya,Bualu yeye kakualukila kabidi bua kumona buloba buvuabu bamulelele to.
11 “Bualu mona tshidi Yehowa wamba bua Shaluma*+ muana wa Yoshiya, mukalenge wa Yuda udi ukokesha pa muaba wa tatuende Yoshiya,+ udi mupatuke muaba eu: ‘Yeye kakualukila kabidi muaba au nansha.
12 Bualu yeye neafuile ku babende kudibu bamukuate baye nende, ne kakumona buloba ebu kabidi nansha.’+
13 Diakabi dikale kudi muntu udi wibaka nzubu kakuyi buakane
Ne wibaka bibambalu biende bia kuulu kakuyi kulumbuluisha kuakane,Udi wenza bua muinende amuenzele mudimu tshianana,Muena mafutu adiye ubenga kufuta;+
14 Muntu udi wamba ne: ‘Nendiashile nzubu muneneMuikale ne bibambalu bia kuulu bibululuke.
Nemmuele madidishiNe nemmulamike mabaya a mutshi wa sedre ne nemmulabe mukubu mukunze.’
15 Neutungunuke ne kukokesha bualu udi upita bakuabu ku dienza mudimu ne mutshi wa sedre anyi?
Tatuebe pende wakadia, wakanua,Kadi wakimanyina kulumbuluisha kuakane ne buakane,+Ne malu akenda bimpe buende yeye.
16 Yeye wakakuila manême a mukengi ne mupele,Nunku malu akenda bimpe.
‘Ki ntshidi kummanya kumvuija anyi?’ ke mudi Yehowa wamba.
17 ‘Kadi mêsu ebe ne muoyo webe mbiteke anu ku bintu biebe bipetela ku mashimi,Ku diela mashi adi kaayi ne bualu panshi,Ne ku diibila ne dinyengangana bintu.’
18 “Nunku mona tshidi Yehowa wamba bua Yehoyakima+ muana wa Yoshiya, mukalenge wa Yuda:‘Kabakumudila bamba ne:
“Eyi, muanetu wa balume! Eyi, muanetu wa bakaji!”
Kabakumudila ne:
“Eyi, mfumu wetu! Eyi wa kunemekibua!”
19 Nebamujiike mutubu bajiika mpunda,+Nebamupulumune, nebamuimanshePambelu pa biibi bia Yelushalema.’+
20 Banda ku Lebanona ne ela lubila,Bandisha dîyi diebe mu Bashana,Ne ela lubila kumbukila ku Abalima,+Bualu bananga bebe bonso bavua bakuzukila mbazajibue.+
21 Mvua muakule nebe pauvua udiumvua mu bukubi.
Kadi uvua muambe ne: ‘Tshiakutumikila to.’+
Etshi ntshibidilu tshiebe katshia ku buana,Bualu kuena mutumikile dîyi dianyi.+
22 Lupepele nelulame balami bebe bonso,+Ne bananga bebe badi bakuzukila nebakuatshibue.
Dîba adi neufuishibue bundu ne neupuekeshibue milongo bua makenga ebe onso.
23 Wewe udi musombele mu Lebanona,+Muase disua munkatshi mua mitshi ya sedre,+Neutue mikemu pakukuata bisama,Didinyenga* bu dia mukaji pa lulelu!”+
24 “‘Bushuwa, bu mundi ne muoyo,’ ke mudi Yehowa wamba, ‘nansha bu Koniya*+ muana wa Yehoyakima,+ mukalenge wa Yuda, muikale mpeta wa kutua nende tshitampi wa ku tshianza tshianyi tshia balume, mvua mua kukukopolaku!
25 Nenkufile mu tshianza tshia badi bakeba kuangata muoyo webe,* mu tshianza tshia baudi utshina, mu tshianza tshia Nebukadenesâ* mukalenge wa Babilona, ne mu tshianza tshia bena Kasada.+
26 Nenkukupe wewe ne mamuebe uvua mukulele mu buloba muvuabu kabayi bakulelele, ne muomu amu neufuilamu.
27 Kabakualukila kabidi mu buloba budibu bajinga bikole* nansha.+
28 Muntu eu Koniya udi anu mulondo mupetula, udi mutayike,Mulondo udi muntu nansha umue kayi musue anyi?
Bua tshinyi yeye ne ndelanganyi yende mbabakupe panshiNe babimanshe mu buloba budibu kabayi bamanye?’+
29 Wewe buloba,* buloba, buloba, umvua dîyi dia Yehowa.
30 Mona tshidi Yehowa wamba:
‘Fundayi muntu eu bu muntu udi kayi ne muana,Bu muntu wikala kayi ne diakalenga nansha dimue mu tshikondo tshidiye ne muoyo,*Muanende nansha umue kakuikala ne diakalengaMu disomba mu nkuasa wa bukalenge wa Davidi ne mu dikokesha kabidi mu Yuda.’”+
Note
^ Anyi “dibalasa.”
^ Anyi “muana wa nshiya.”
^ Ku mua.: “Nenjidile.”
^ Bavua bamubikila kabidi ne: Yehoahaza.
^ Ku mua.: “Bisama bia pa kulela.”
^ Bavua bamubikila kabidi ne: Yehoyakina ne Yekoniya.
^ Anyi “badi bakeba anyima webe.”
^ Ku mua.: “Nebukadelesâ,” mfundilu mukuabu wa dîna edi.
^ Anyi “buloba budibu babandishila anyima wabu.”
^ Anyi “ditunga.”
^ Ku mua.: “mu matuku ende.”
