Yelemiya 27:1-22
27 Ku ntuadijilu kua bukokeshi bua Yehoyakima muana wa Yoshiya, mukalenge wa Yuda, dîyi edi diakalua kudi Yelemiya difumina kudi Yehowa, diamba ne:
2 “Mona tshidi Yehowa mungambile: ‘Dienzela nshinga ne mitshi ya tshikokedi, ubiteke pa nshingu pebe.
3 Pashishe ubitumine mukalenge wa Edome,+ mukalenge wa Moaba,+ mukalenge wa bena Amona,+ mukalenge wa Tulo,+ ne mukalenge wa Sidona+ ku tshianza tshia batuadi ba mukenji badi balue ku Yelushalema kudi Sedekiya mukalenge wa Yuda.
4 Ubambile dîyi dituma edi bua bamfumu babu:
“‘“Monayi tshidi Yehowa wa biluilu, Nzambi wa Isalele, wamba; nudi ne bua kuambila bamfumu benu nunku:
5 ‘Meme ke uvua muenze buloba, bukua bantu, ne nyama bidi pa buloba ku bukole buanyi bunene ne diboko dianyi diolola; ndi mubupeshe muntu yonso undi musue.*+
6 Mpindieu, ndi mufile maloba aa onso mu tshianza tshia muena mudimu wanyi Nebukadenesâ+ mukalenge wa Babilona; ndi mumupeshe too ne nyama ya tshisuku ya mu mpata bua imuenzele mudimu.
7 Bisamba bionso nebimuenzele yeye, muanende wa balume ne muikuluende mudimu too ne pafika tshikondo tshia buloba buende yeye,+ pamuvuija bisamba bia bungi ne bakalenge banene mupika wabu.’+
8 “‘“‘Tshisamba anyi bukalenge kampanda buobu bubenge bua kuenzela Nebukadenesâ mukalenge wa Babilona mudimu ne bubenge kuela nshingu wabu muinshi mua tshikokedi tshia mukalenge wa Babilona, nempeshe tshisamba atshi dinyoka ne muele wa mvita,+ ne tshiyole tshia nzala, ne tshipupu kabidi,’* ke mudi Yehowa wamba, ‘too ne pandi mbamana bonso ku tshianza tshiende.’
9 “‘“‘Nunku kanuteleji baprofete benu, bena mbuku benu, bena ndota benu, bena majimbu benu, ne bena mupongo benu badi banuambila ne: “Kanuakuenzela mukalenge wa Babilona mudimu to.”
10 Bualu badi banuambila mêyi a buprofete a dishima, bua kuyabu nenu kule ne buloba buenu, ne nennutangalaje ne nuenu nenujimine.
11 “‘“‘Kadi tshisamba tshidi tshibueja nshingu watshi muinshi mua tshikokedi tshia mukalenge wa Babilona ne tshimuenzela mudimu, nenganyishe bua tshishale* mu buloba buatshi,’ ke mudi Yehowa wamba, ‘bua kubudima ne kusombelamu.’”’”
12 Mvua muambile kabidi Sedekiya+ mukalenge wa Yuda bia muomumue, ngamba ne: “Buejayi nshingu yenu muinshi mua tshikokedi tshia mukalenge wa Babilona ne muenzelayi yeye ne bantu bende mudimu, ne nuenu nenushale ne muoyo.+
13 Bua tshinyi wewe ne bantu bebe nudi ne bua kufua ku muele wa mvita,+ ku tshiyole tshia nzala,+ ne ku tshipupu+ bu mudi Yehowa muambe bua tshisamba tshikala katshiyi tshienzele mukalenge wa Babilona mudimu?
14 Kanuteleji mêyi a baprofete badi banuambila ne: ‘Kanuakuenzela mukalenge wa Babilona mudimu to,’+ bualu bobu badi banuambila mêyi a buprofete a dishima.+
15 “‘Bualu meme tshiena mubatume,’ ke mudi Yehowa wamba, ‘kadi badi bamba malu a buprofete a dishima mu dîna dianyi, bua nunku meme nennutangalaje ne nenujimine, nuenu ne baprofete badi banuambila malu a buprofete.’”+
16 Mvua muambile bakuidi ne bantu aba bonso ne: “Monayi tshidi Yehowa wamba: ‘Kanuteleji mêyi a baprofete benu badi banuambila malu a buprofete ne: “Monayi! Nebapingaje bintu bia mudimu bia mu nzubu wa Yehowa bifumina ku Babilona mu tshitupa tshikese emu!”+ bualu badi banuambila mêyi a buprofete a dishima.+
17 Kanubateleji to. Enzelayi mukalenge wa Babilona mudimu ne nenushale ne muoyo.+ Bua tshinyi tshimenga etshi tshidi ne bua kulua bikulu?
18 Kadi bobu bikale baprofete ne bikale ne dîyi dia Yehowa, balombe Yehowa wa biluilu bua kabayi ne bintu bia mudimu bidi bishale mu nzubu wa Yehowa, mu nzubu* wa mukalenge wa Yuda, ne mu Yelushalema mu Babilona to.’
19 “Mona tshidi Yehowa wa biluilu wamba bua makunji,+ Mbuu,*+ matempu+ ne bintu bia mudimu bidi bishale bidibu bashiye mu tshimenga etshi,
20 bivua Nebukadenesâ mukalenge wa Babilona muye nabi pavuaye mukuate Yekoniya muana wa Yehoyakima, mukalenge wa Yuda, mumbuke nende ku Yelushalema muye nende ku Babilona, pamue ne bantu banene bonso ba mu Yuda ne ba mu Yelushalema;+
21 eyowa, mona tshidi Yehowa wa biluilu, Nzambi wa Isalele, wamba bua bintu bia mudimu bidi bishale ku nzubu wa Yehowa, mu nzubu* wa mukalenge wa Yuda, ne mu Yelushalema:
22 ‘“Nebaye nabi mu Babilona,+ muine amu nebishalamu too ne dituku dindi ntuma ntema yanyi kudibi,” ke mudi Yehowa wamba. “Pashishe nembialuje ne nembipingaje muaba eu.”’”+
Note
^ Ku mua.: “muntu udi mukumbane ku mêsu kuanyi.”
^ Anyi “disama.”
^ Ku mua.: “tshikishe.”
^ Anyi “dibalasa.”
^ Mmumue ne: Mbuu wa tshiamu tshia mitaku wa ku ntempelo.
^ Anyi “dibalasa.”
