Yelemiya 49:1-39
49 Bua bena Amona,+ mona tshidi Yehowa wamba:
“Isalele kena ne bana anyi?
Yeye kena ne mupianyi anyi?
Bua tshinyi Malakama+ mmuangate Gada?+
Ne bua tshinyi bantu bende mbasombele mu bimenga bia Isalele?”
2 “‘Nunku monayi! matuku adi alua,’ ke mudi Yehowa wamba,‘Angenza bua lubila lua dimanyisha mvita* lumvuike bua bualu bua Laba+ wa bena Amona.+
Yeye nealue kakunakuna kadi patupu,Ne nebatue bimenga bidi kumpenga kuende* kapia.’
‘Ne Isalele neakuate bantu bavua bamupawule,’+ ke mudi Yehowa wamba.
3 ‘Ela kabobo ka muadi, wewe Heshebona, bualu Ai mmubutudibue!
Dilayi, nuenu bimenga bidi kumpenga kua Laba.
Vualayi bilamba bikayabale.
Elayi kabobo ka muadi ne tambakanayi munkatshi mua bikumbi bia mabue,*Bualu nebakuate Malakama kuyabu nende ku babende,Pamue ne bakuidi bende ne bakokeshi bende.+
4 Bua tshinyi udi uditambisha bua bibandabanda,*Bua mpata webe udi upueka, wewe muana wa bakaji udi kayi ne lulamatu,Udi weyemena bubanji buendeNe udi wamba ne: “Nnganyi walua kunduisha?”’”
5 “Mukalenge Mutambe Bunene, Yehowa wa biluilu, udi wamba ne: ‘Mona ndi nkutumina tshintu tshidi tshienza buôwaTshifumina kudi bonso badi bakunyunguluke.
Nebakutangalaje mu nseke yonso,Ne muntu nansha umue kakusangisha bantu badi banyema to.’”
6 “‘Kadi panyima nensangishe bakuatshibue ba bena Amona,’ ke mudi Yehowa wamba.”
7 Bua Edome, mona tshidi Yehowa wa biluilu wamba:
“Meji kaatshienaku kabidi mu Temana+ anyi?
Mubelu muimpe mmujimine kudi bantu badi ne bujinguludi anyi?
Meji abu mmabole anyi?
8 Nyemayi, pinganayi!
Ndayi nusombele mu ndondo, nuenu badi basombele mu Dedana!+
Bualu nentumine Esau dikengaPadi tshikondo tshia kutuma ntema yanyi kudiye tshikumbana.
9 Bapodi ba tumuma tua mvinyo bobu balue kuudi,Kabakushiyaku ndambu wa tumuma panyima bua kupumbulula anyi?
Bivi bobu balue butuku,Nebapawule bintu anu bungi budibu basue.+
10 Kadi nenshiye Esau butaka.
Nembulule miaba yende ya kusokomena,Bua kamonyi mua kusokoma to.
Bana bende ne bana babu ne bena mutumba bende nebabutudibue bonso,+Ne yeye kakuikalaku kabidi to.+
11 Shiya bana bebe badi bafuishe batatuabu,Ne meme nembalame ne muoyo,Ne bakaji bakamba bebe nebangeyemene.”
12 Bualu mona tshidi Yehowa wamba: “Tangila! Bikala bantu badibu kabayi bafundile bua kunua dikopo edi ne bua kudinua, wewe nebakushiye kuyi munyokibue nansha kakese anyi? Kabakukushiya kuyi munyokibue to, bualu udi ne bua kudinua.”+
13 “Bualu ndi muditshipe mu dîna dianyi meme muine ne: Bosela nealue tshintu tshidi tshikuatshisha buôwa,+ tshipendu, kabutu, ne mulawu; ne bimenga biende bionso nebilue bikulu tshiendelele,”+ ke mudi Yehowa wamba.
14 Ndi mumvue lumu lufumina kudi Yehowa,Mbatume mutumibue munkatshi mua bisamba, wamba ne:
“Disangishayi pamue ne luayi numuluishe;Dilongololayi bua kuluangana.”+
15 “Bualu mona! Ndi mukuvuije mukese munkatshi mua bisamba,Mupetula munkatshi mua bantu.+
16 Lukanku luuvua mukebeshe ndukushime,Dikamakama dia muoyo webe,Wewe udi musombele mu miaba ya kusokomena ya ku mukuna wa dibue,Musombele pa mukuna mutumbuke.
Nansha muudi muase disua diebe muulu bu nyunyi wa mukanku,Nenkutulule muaba au,” ke mudi Yehowa wamba.
17 “Edome udi ne bua kulua tshintu tshidi tshikuatshisha buôwa.+ Muntu yonso udi upitshila pabuipi nende neashale mumutangile ne buôwa wela muonzo bua bualu bua bipupu biende bionso.
18 Anu bu dikuluka dia Sodoma ne Amola ne bimenga bivua bidie nabu mutumba,”+ ke mudi Yehowa wamba, “muntu nansha umue kakusombelamu, ne muntu nansha umue kakutudilamu to.+
19 “Monayi! Muntu neabande bua kuluisha mpata ya kudishila nyama idi mu bukubi bu ntambue+ udi ufumina mu bipuka bishitakane kumpenga kua Yadene, kadi mu katupa kakese nemmuipate kudiye. Nemmutekele muntu musungula ku mutu kuende. Bualu nnganyi udi bu meme, ne nnganyi wantua tshiadi? Mmulami kayi wa mikoko udi mua kuimana kumpala kuanyi?+
20 Nunku umvuayi, nuenu bantu, dipangadika didi* Yehowa muangate bua Edome ne meji adiye muele bua bantu badi basombele mu Temana:+
Bushuwa nebakoke bana ba mikoko kule.
Yeye neavuije muaba wabu wa kusombela muaba udi mutupu bua bualu buabu.+
21 Bua mutoyi wa dikuluka diabu, buloba mbukanke.
Kudi diyoyo!
Mutoyi mmumvuike too ne ku Mbuu Mukunze.+
22 Monayi! Anu bu nyunyi wa mukanku, yeye neabande ne neapueke lubilu,+Ne yeye neabalule mapuapua ende pa mutu pa Bosela.+
Dituku adi muoyo wa bena mvita ba EdomeNeulue bu muoyo wa mukaji udi pa lulelu.”
23 Bua Damaseke:+
“Hamate+ ne Âpada mbafuishibue bundu.Bualu mbumvue lumu lubi.
Badi benguluka ne buôwa.
Kudi kanyinganyinga mumbuu udi kayi mua kubatama.
24 Damaseke mmujimije dikima.
Mmukudimuke bua kunyema, kadi dipampakana ndimukuate.
Kanyinganyinga ne didinyenga mbimukuate,Bu mukaji udi pa lulelu.
25 Mmunyi mudibu kabayi balekelele tshimenga tshia butumbi,Tshimenga tshia disanka dikole?
26 Bualu bansongalume bende nebakuluke mu miaba yende ya tshinsangansanga,Ne basalayi bende bonso nebafue dituku adi,” ke mudi Yehowa wa biluilu wamba.
27 “Nentue tshimanu tshia Damaseke kapia,Ne koku nekoshe bibumba bikolesha bia Bene-hadada.”+
28 Mona tshidi Yehowa wamba bua Kedâ+ ne makalenge a Hasô, avua Nebukadenesâ* mukalenge wa Babilona mubutule:
“Jukayi, bandayi ku Kedâ,Ne butulayi bana ba ku Est.
29 Nebangate ntenta yabu ne bisumbu biabu bia mikoko,Bilamba biabu bia ntenta ne bintu biabu bionso.
Nebaye ne tumelu tuabu,Ne nebabele lubila ne: ‘Buôwa budi nseke yonso!’”
30 “Nyemayi, ndayi kule!
Ndayi nusombele mu ndondo, nuenu badi basombele mu Hasô,” ke mudi Yehowa wamba.
“Bualu Nebukadenesâ* mukalenge wa Babilona mmunulukile mayele mabi,Ne yeye mmunuelele meji mabi.”
31 “Jukayi, bandayi bua kuluisha tshisamba tshidi mu ditalala,Tshisombe mu bukubi!” ke mudi Yehowa wamba.
“Katshiena ne biibi anyi milonda; mbadisombele pa nkayabu.
32 Tumelu tuabu netulue bintu bipawula,Ne bimuna biabu bivule nebilue bintu binyenga mu mvita.
Nembatangalaje ku mpepele yonso,*Bobu badi bela nsuki yabu biketu ku nseke ya mitu,+Ne nentume dikenga diabu difumina ku nseke yonso,” ke mudi Yehowa wamba.
33 “Hasô nealue tshisombedi tshia mibuabua,Muaba udi mutupu bua kashidi.
Muntu nansha umue kakusombelamu,Ne muntu nansha umue kakutudila munda muende.”
34 Edi ndîyi dia Yehowa diakalua kudi muprofete Yelemiya bua bualu bua Elama+ ku ntuadijilu kua bukokeshi bua Sedekiya+ mukalenge wa Yuda, diamba ne:
35 “Mona tshidi Yehowa wa biluilu wamba: ‘Tangila ndi ntshibula buta bua mikete bua Elama,+ mpokolo* wa bukole buabu.
36 Nentumine Elama mpepele inayi ifumina ku ntengu inayi ya diulu, ne nembatangalaje ku mpepele eyi yonso. Kakuakuikala tshisamba tshikala bantu badibu bamuangalaje ba mu Elama kabayi mua kuya.’”
37 “Nentayishe bena Elama kumpala kua bena lukuna babu ne kumpala kua bantu badi bakeba kuangata muoyo wabu;* ne nembatumine dikenga, tshiji tshianyi tshikole,” ke mudi Yehowa wamba. “Nentume muele wa mvita mu nyima muabu too ne pandi mbabutula.”
38 “Nenjadike nkuasa wanyi wa bukalenge mu Elama,+ ne nembutulamu mukalenge ne bakokeshi,” ke mudi Yehowa wamba.
39 “Kadi ku ndekelu kua matuku, nensangishe bakuatshibue ba mu Elama,” ke mudi Yehowa wamba.
Note
^ Anyi pamuapa: “tshiona tshia lubila lua mvita.”
^ Anyi “bimunyunguluke.”
^ Anyi “bikumbi bia mikoko.”
^ Anyi “bibatabata.”
^ Anyi “lungenyi ludi.”
^ Ku mua.: “Nebukadelesâ,” mfundilu mukuabu wa dîna edi.
^ Ku mua.: “Nebukadelesâ,” mfundilu mukuabu wa dîna edi.
^ Anyi “ku nseke yonso.”
^ Ku mua.: “ntuadijilu.”
^ Anyi “bakeba anyima wabu.”
