Yeshaya 21:1-17
21 Dîyi diamba bua bualu bua tshipela tshia mbuu* didi ne:+
Tshintu tshidi tshilua bu tshipepele tshikole tshidi tshikomba ku sud,Tshifumina mu tshipela, mu buloba budi buenza buôwa.+
2 Mbangambile tshikena kumona tshikole:
Mutungidianganyi udi wenza malu a tshitungu,Ne mubutudi udi ubutula.
Banda, wewe Elama! Tshintshimika, wewe Madayi!+
Nentuishe mikemu yonso idiye ukebesha ku ndekelu.+
3 Ke bualu kayi ndi ne kanyinganyinga kakole.*+
Disubakana ndinkuate,Bu dia mukaji pa lulelu.
Ndi ne dibungama dikole, tshiyi mua kumvua;Ndi mu dilubakana dikole, tshiyi mua kumona to.
4 Muoyo wanyi udi ulubakana; ndi nkanka bua buôwa bukole.
Dilolo dimvua njinga bikole didi dinzakeja.
5 Tekayi mêsa ne longololayi miaba ya kusomba!
Diayi, nuayi!+
Jukayi, nuenu bakokeshi, elayi ngabu manyi!*
6 Bualu mona tshivua Yehowa mungambile:
“Ndaku, uteke nsentedi, umuambile bua ambe tshidiye umona.”
7 Nunku yeye wakamona ditempu dia mvita dikale ne tshisumbu tshia tubalu,Ditempu dia mvita dikale ne mpunda,Ditempu dia mvita dikale ne tumelu.
Wakatangila bimpe bimpe, ne lubatshi luonso.
8 Pashishe wakela dîyi bu nyama wa ntambue ne:
“Yehowa, ndi ngimana pa tshibumba tshia nsentedi misangu yonso mu munya,Ne badi bangimanyika muaba wanyi wa butentekedi butuku buonso.+
9 Tangila tshidi tshilua:
Bantu mu ditempu dia mvita ne tshisumbu tshia tubalu!”+
Pashishe wakakula, kuambaye ne:
“Wakuluki! Babilona wakuluki!+
Bimfuanyi bionso bisonga bia nzambi yende, yeye mmubitayishe panshi!”+
10 Wewe tshisamba tshianyi tshidibu bashipule,Bintu bia* muaba wanyi wa kushipuila,+Ndi munuambile tshindi mumvue kudi Yehowa wa biluilu, Nzambi wa Isalele.
11 Dîyi diamba bua bualu bua Duma* didi ne:
Muntu kampanda udi ungela dîyi ku Seî ne:+
“Nsentedi, wambi tshinyi bua butuku?
Nsentedi, wambi tshinyi bua butuku?”
12 Nsentedi kuambaye ne:
“Dinda didi dienda dilua, ne butuku kabidi.
Nuenu basue kuebeja, nuebeje.
Luayi kabidi!”
13 Dîyi diamba bua bualu bua mpata wa tshipela didi ne:
Nenupitshishile butuku mu ditu, mu mpata wa tshipela,Nuenu bisumbu bia bena ngendu bia ku Dedana.+
14 Luayi ne mâyi bua kutuilangana ne muntu udi ne nyota,Nuenu badi basombele mu buloba bua Tema,+Ne luayi ne biakudia bua muntu udi unyema.
15 Bualu mbanyeme miele ya mvita, mbanyeme muele mutula,Mbanyeme buta bua mikete bunana, ne mbanyeme tshikisu tshia mvita.
16 Bualu mona tshivua Yehowa mungambile: “Mu tshidimu tshimue, bu bidimu bia muntu udibu bangate ku mudimu,* butumbi buonso bua Kedâ+ nebutue ku ndekelu.
17 Bedi ba mikete ba mu bena mvita ba ku Kedâ badi bashala nebikale bakese, bualu Yehowa Nzambi wa Isalele mmuakule.”
Note
^ Pamuapa mbakula bua tshitupa tshia buloba tshia Babilona wa kale.
^ Ku mua.: “tshimono tshianyi tshidi tshisama bikole.”
^ Anyi “labayi ngabu mafuta.”
^ Ku mua.: “Muana wa.”
^ Diumvuija: “Dipuwa.”
^ Anyi “tshibala bimpe bu mutu muntu udibu bangate ku mudimu ubala”; mmumue ne: mu tshidimu tshijima.
