Yeshaya 27:1-13
27 Mu dituku adi Yehowa, muikale ne muele wende wa mvita mukole, munene ne wa bukole,+Neatume ntema yende kudi Leviyatane,* nyoka udi ufinunuka,Kudi Leviatane, nyoka udi wenda uditonya,Ne neashipe nyama munene wa mu mbuu.
2 Mu dituku adi numuimbile ne:*
“Budimi bua tumuma tua mvinyo bua mvinyo udi usaba ntutu!+
3 Meme, Yehowa, ndi mmukuba.+
Dîba dionso ndi mmumiamina mâyi.+
Ndi mmukuba butuku ne munya,Bua muntu nansha umue kamuenzedi bibi to.+
4 Tshiji tshikole katshiena munda muanyi to.+
Nnganyi wansongakaja ne tumitshi tua mêba ne bisuku bua kuluangana nabi?
Nembidiatakaje ne nembitue kapia bionso pamue.
5 Biobi kabiyi nanku, akuate bikole ku muaba wanyi wa kusokomena.
Akebe nanyi ditalala;Akebe nanyi ditalala.”
6 Mu matuku atshilualua Yakoba neele miji,Isalele neele bilongo ne neasampile,+Ne nebuwuje buloba ne bia pa madimi.+
7 Badi ne bua kumukuma ne mukumu wa muntu udi umukuma anyi?
Peshi badi ne bua kumushipa bu ne dishipa dia bashipibue bende anyi?
8 Wewe neuluangane nende ne muadi udi ubazula pawamuipata.
Yeye neamuipate ne tshipepele tshiende tshikole dituku dia lupepele lua ku est.+
9 Nunku, mu mushindu eu nebabuikile tshilema tshia Yakoba,+Ne etshi ke tshikala tshipeta tshionso padi mpekatu wende umbushibua:
Neavuije mabue onso a tshiosheluBu mabue a lupemba adibu bavingutule,Ne kabakushiya makunji a tshijila* anyi bioshelu bia musenga wa manananshi to.+
10 Bualu tshimenga tshikolesha netshishale munda mutupu;Nebalekele mpata ya kudishila nyama ne nebayishiye bu tshipela.+
Muomu amu muana wa ngombe neadie mashinde ne nealalamuNe neadie matamba a mitshi yende.+
11 Padi tumatamba tuende tuma,Bakaji nebalue ne nebatukose,Batemesha natu kapia.
Bualu bantu aba kabena ne dijingulula dia malu to.+
Ke bualu kayi Mufuki wabu kakubafuila luse to,Ne Yeye uvua mubenze kakubaleja bulenga to.+
12 Mu dituku adi Yehowa neakume bimuma kumbukila ku mâyi a Musulu* adi apueka too ne ku Kasulu ka tshilonda nkoka* ka mu Ejipitu,+ ne nenusangishibue muntu ku muntu, nuenu bantu ba Isalele.+
13 Mu dituku adi nebele mpungi munene,+ ne bantu badi bajimina mu buloba bua Ashû+ ne badi bamuangalake mu buloba bua Ejipitu+ nebalue ne nebinamine Yehowa ku mukuna wa tshijila mu Yelushalema.+
Note
^ Badi pamuapa bakula bua Isalele, mutela apa bu muntu mukaji ne mufuanyikija ne budimi bua tumuma tua mvinyo.
^ Mmumue ne: musulu wa Pelata.
